Maglakaw Segun sa Espiritu Asin Otobon an Saindong Pagdusay
Maglakaw Segun sa Espiritu Asin Otobon an Saindong Pagdusay
“Padagos kamong maglakaw segun sa espiritu asin dai kamo makakagibo nin ano man na horot nin laman.”—GAL. 5:16.
1. Anong mga pagbautismo an nangyari kan aldaw nin Pentecostes?
AN MGA parasunod ni Jesus nagtaram nin laen-laen na lenguahe kan aldaw nin Pentecostes 33 C.E., pagkatapos na bautismohan sinda sa banal na espiritu. Nagpaheling sinda nin milagrosong balaog kan espiritu. (1 Cor. 12:4-10) Ano an epekto kan balaog na ini asin kan diskurso ni apostol Pedro? Dakol an “nagkarulugad sa puso.” Sa pagsadol ni Pedro, sinda nagsolsol asin nagpabautismo. An rekord sa kasaysayan nagsasabi: “An mga maogmang nag-ako kan saiyang tataramon binautismohan, asin kan aldaw na idto mga tolong ribong kalag an nakadugang.” (Gibo 2:22, 36-41) Arog kan itinaong instruksion ni Jesus, kaipuhan sindang bautismohan sa tubig sa ngaran kan Ama, kan Aki, asin kan banal na espiritu.—Mat. 28:19.
2, 3. (a) Ipaliwanag an pagkakalaen kan pagigin binautismohan sa banal na espiritu asin kan pagigin binautismohan sa ngaran kan banal na espiritu. (b) Taano an bautismo sa tubig ta inaasahan sa gabos na nagigin tunay na Kristiano ngonyan?
2 Minsan siring, igwa daw nin ano man na pagkakalaen an pagigin binautismohan sa banal na espiritu asin an pagigin binautismohan sa ngaran kan banal na espiritu? Igwa. An mga binautismohan sa banal na espiritu namundag giraray bilang pinaniaki nin espiritu na mga aki nin Dios. (Juan 3:3) Linahidan sinda tanganing magin kaibang mga hade asin katabang na mga saserdote sa langitnon na Kahadean nin Dios, asin kabtang sinda kan espirituwal na hawak ni Cristo. (1 Cor. 12:13; Gal. 3:27; Kap. 20:6) Kaya an bautismong ini—an pagigin binautismohan sa banal na espiritu—iyo an ginibo ni Jehova kan aldaw nin Pentecostes asin pagkatapos kaiyan, kan magpili sia nin mga indibiduwal na magigin kaibang paramana ni Cristo. (Roma 8:15-17) Alagad kumusta man an bautismo sa tubig sa ngaran kan banal na espiritu, na regular na ginigibo sa mga asamblea asin kombension kan mga lingkod ni Jehova sa satong panahon?
3 An bautismo sa tubig sarong lakdang na ginigibo nin tunay na mga Kristiano bilang simbolo kan saindang lubos na pagdusay ki Jehova Dios. Totoo iyan sa mga nag-ako kan langitnon na pag-apod. Alagad an bautismo sa tubig saro man na lakdang na kaipuhan gibohon kan minilyon na lalaki asin babae sa presenteng panahon na igwa nang paglaom na mabuhay sagkod lamang sa daga. Ano man an paglaom nin saro, an pagigin binautismohan sa tubig sa ngaran kan Ama asin kan Aki patin kan banal na espiritu sarong mahalagang lakdang na dapat gibohon nin saro tanganing akoon sia nin Dios. An gabos na Kristiano na binautismohan sa paaging ini inaasahan na ‘padagos na maglalakaw segun sa espiritu.’ (Basahon an Galacia 5:16.) Kamo daw naglalakaw segun sa espiritu asin sa siring inootob an saindong pagdusay?
Kun Ano an Kahulogan kan ‘Paglakaw Segun sa Espiritu’
4. Sa pundamental, ano an kahulogan kan ‘paglakaw segun sa espiritu’?
4 Kalabot sa ‘paglakaw segun sa espiritu’ an pag-ako sa paghiro kan banal na espiritu sa saindo, na tinotogotan iyan na makaimpluwensia sa saindo. Sa ibang pagtaram, iyan nangangahulogan nin pagigin ginigiyahan kan banal na espiritu sa mga aktibidad nindo sa aroaldaw. Ipinapaheling kan Galacia kapitulo 5 an pagkakalaen kan pagigin impluwensiado kan banal na espiritu asin kan pagigin impluwensiado kan laman.—Basahon an Galacia 5:17, 18.
5. Kalabot sa pagigin impluwensiado kan banal na espiritu an paglikay sa anong mga gibo?
5 Kun kamo impluwensiado kan banal na espiritu, pinagmamaigotan nindong lumikay sa mga gibo kan laman. Kaiba dian an mga bagay na arog baga nin “pakikisaro, pagkamaati, malaswang gawe-gawe, idolatriya, paggibo nin espiritismo, mga pag-iriwal, mapait na paglalaban, pangimon, mga pagputok nin kaanggotan, mga pasuruhay, pagkabaranga, mga sekta, mga pagkauri, mga pagburat, mariribok na pag-ogma.” (Gal. 5:19-21) Sa sarong paagi, ‘ginagadan nindo an mga gibo kan hawak paagi sa espiritu.’ (Roma 8:5, 13) Tatabangan kamo kaiyan na ituruhok an saindong isip sa mga bagay dapit sa espiritu asin makikooperar sa paggiya kaiyan, imbes na togotan na kontrolon kamo kan mga pagmawot kan laman.
6. Iilustrar kun ano an kaipuhan tanganing ikapaheling an bunga kan espiritu.
6 Mantang naghihiro sa saindo an banal na espiritu, ikinakapaheling nindo an diosnon na mga kualidad, “an bunga kan espiritu.” (Gal. 5:22, 23) Pero, nasasabotan nindo na nangangaipo ini nin paghihingoa nindo. Sa pag-ilustrar: An sarong paraoma nagkukultibar kan daga. Siempre, kaipuhan an liwanag kan saldang asin an tubig; kun mayo iyan, dai sia makakaasa na may aanihon sia. Puede niatong ikomparar an banal na espiritu sa liwanag kan saldang. An banal na espiritu kaipuhan tanganing ikapaheling niato an bunga kan espiritu. Pero, may aanihon daw kun mayo an pagmamaigot kan paraoma? (Tal. 10:4) Tunay nanggad, an paagi nin pagkultibar nindo sa piguratibong daga kan saindong puso may epekto sa kalidad kan bunga kan banal na espiritu sa saindo asin sa kun sagkod saen nindo iyan ikinakapaheling. Kaya hapoton an saindong sadiri, ‘Tinotogotan ko daw an banal na espiritu na magbunga sa sako paagi sa pakikikooperar ko dian?’
7. Taano an pag-adal asin paghorophorop ta mahalagang marhay kun gusto nindong pataluboon an bunga kan banal na espiritu?
7 Tanganing magin magayon an ani, kaipuhan man na baribion nin mga paraoma an saindang pananom. Tanganing mapatalubo an bunga kan espiritu, kaipuhan nindo an tubig kan katotoohan na yaon sa Biblia asin na makukua paagi sa Kristianong kongregasyon ngonyan. (Isa. 55:1) Posibleng marhay na ikinapaheling nindo sa dakol na tawo na an Banal na Kasuratan nahaman paagi sa banal na espiritu. (2 Tim. 3:16) Siring man, an grupong maimbod asin mapagmansay na oripon nagtatao nin kaipuhan na gayong pakasabot dapit sa dalisay na tubig kan katotoohan sa Biblia. (Mat. 24:45-47) Malinaw an kahulogan kaiyan. Tanganing maimpluwensiahan kan banal na espiritu, dapat niatong basahon asin horophoropon an Tataramon nin Dios. Kun ginigibo nindo iyan, inaarog nindo an marahay na halimbawa kan mga propeta na ‘maigot na nagsiyasat asin maingat na naghanap’ sa impormasyon na itinao sa sainda. Mahalagang mangnohon na dawa an mga anghel nagpaheling nin hararom na interes sa espirituwal na mga katotoohan mapadapit sa ipinanugang Banhi asin sa linahidan na Kristianong kongregasyon.—Basahon an 1 Pedro 1:10-12.
Impluwensiado kan Espiritu—Paano?
8. Taano ta mahalagang marhay na hagadon nindo ki Jehova an espiritu nia?
8 Bako sanang pag-adal sa Kasuratan asin paghorophorop an kalabot dian. Kaipuhan nindong padagos na hagadon an tabang asin paggiya ni Jehova. Sia “makakagibo nin labi kaorog sa gabos na bagay na satong hinahagad o naiisip.” (Efe. 3:20; Luc. 11:13) Pero, ano an isisimbag nindo kun may maghapot, “Taano ta maninigo akong padagos na maghagad kun aram na nin Dios ‘an mga bagay na kaipuhan ko bago ko pa iyan hagadon sa saiya’?” (Mat. 6:8) Bueno, an sarong dahelan iyo na paagi sa pamimibi na logod tawan kamo nin banal na espiritu, ipinapaheling nindo na nagsasarig kamo ki Jehova. Halimbawa, kun may magpatabang sa saindo, gigibohon nindo an ano man na mahihimo nindo, huling ipinapaheling kan pagpatabang nia na nagtitiwala sia sa saindo. (Ikomparar an Talinhaga 3:27.) Siring man, si Jehova naoogma sa paghagad nindo sa saiya kan espiritu nia, asin iyan itatao nia sa saindo.—Tal. 15:8.
9. Paano an pag-atender sa Kristianong mga pagtiripon nakakatabang sa saindo na maimpluwensiahan kan banal na espiritu?
9 Masasabotan nanggad nindo na an satong mga pagtiripon, asamblea, asin kombension kalabot sa saro pang paagi tanganing maimpluwensiahan kan banal na espiritu. Mahalagang marhay na hingoahon na makaatender asin mag-atento sa programa. An paggibo kaiyan nakakatabang sa saindo na masabotan “an harararom na bagay nin Dios.” (1 Cor. 2:10) May mga pakinabang man sa regular na pagkokomento. Girumdoma an mga pagtiripon na inatenderan nindo kan nakaaging apat na semana. Gurano kaparate nindong iiniitaas an saindong kamot sa pagsimbag tanganing ipahayag an saindong pagtubod? Puede daw kamong umoswag sa aspektong ini? Kun iyo, magdesisyon kun ano an gigibohon nindo sa maabot na mga semana. Maheheling ni Jehova an saindong pagigin andam na magpartisipar asin tatawan nia kamo kan saiyang espiritu, na matabang sa saindo na orog pang makinabang sa mga pagtiripon na inaatenderan nindo.
10. Kalabot sa paglakaw segun sa espiritu an pagpaabot nin anong imbitasyon sa iba?
10 Kaiba sa paglakaw segun sa espiritu an paghimate sa imbitasyon na mababasa niato sa Kapahayagan 22:17: “An espiritu asin an nobya padagos na nagsasabi: ‘Madia!’ Asin an siisay man na nagdadangog magsabi: ‘Madia!’ Asin an siisay man na napapaha dumolok; an siisay man na boot, kumua kan tubig nin buhay na daing bayad.” An espiritu, na naghihiro paagi sa linahidan na grupong nobya, nagpapaabot kan imbitasyon na ini mapadapit sa tubig nin buhay. Kun inako na nindo an pangapodan na “madia!” determinado daw kamong magsabi nin “Madia!”? Sarong pribilehio nanggad na makapakikabtang sa nagliligtas-buhay na gibohon na ini!
11, 12. Ano an papel kan banal na espiritu sa paghuhulit?
11 An mahalagang marhay na gibohon na ini isinasagibo ngonyan paagi sa paggiya kan banal na espiritu. Mababasa niato kun ano an nagin papel kan banal na espiritu kaidtong enot na siglo sa pagbukas nin bagong mga teritoryo para sa mga misyonero. Si apostol Pablo asin an saiyang kairiba “binawalan kan banal na espiritu na ihulit an tataramon sa distrito nin Asia”; saka dai man sinda tinogotan na magduman sa Bitinia. Dai niato aram nin eksakto kun paano sinda pinugolan kan espiritu na magduman sa mga lugar na iyan, pero malinaw na giniyahan si Pablo kan espiritu pasiring sa mahiwason na langtad nin Europa. Nagkaigwa sia nin bisyon dapit sa sarong lalaking taga Macedonia na nakikimaherak para sa tabang.—Gibo 16:6-10.
12 Ngonyan, dinidirehiran man kan espiritu ni Jehova an paghuhulit sa bilog na kinaban. Mayong ginagamit na milagrosong mga bisyon sa pagdirehir; imbes, ginigiyahan ni Jehova an mga linahidan paagi sa banal na espiritu. Asin pinapahiro kan espiritu an mga tugang na gibohon an saindang pinakamakakaya sa paghuhulit asin pagtotokdo. Daing duda na nakikikabtang na kamo sa mahalagang marhay na gibohon na ini. Puede daw nindong dugangan an saindong kagayagayahan sa nakakaogmang aktibidad na ini?
13. Paano kamo makakapagpasakop sa pagdirehir kan banal na espiritu? Iilustrar.
13 Makakapagpasakop kamo sa pagdirehir kan banal na espiritu paagi sa pag-aplikar kan impormasyon na itinatao sa mga lingkod nin Dios. Estudyare an halimbawa kan hoben na si Mihoko na taga Hapon. Bilang sarong bagong payunir, namatean nia na bako siang kualipikado na magdalaw liwat; namatean niang dai nia aram kun paano makua an interes kan kagharong. Kan mga panahon na idto, An Satong Ministeryo sa Kahadean nagtao nin praktikal na mga suhestion kun paano isasagibo an halipot na mga pagdalaw liwat. Dangan ipinublikar an brosyur na A Satisfying Life—How to Attain It. Nagin kapakipakinabang iyan nangorogna sa paghuhulit sa mga Hapones. Iinaplikar ni Mihoko an mga suhestion kun paano gagamiton an brosyur, nangorogna kun paano isasagibo an halipot na mga pagdalaw liwat. Dai nahaloy nagkokondukta na sia nin mga pag-adal sa Biblia sa mga tibaad nagsayumang makipag-adal kaidto. Sia nagsabi, “Dakolon akong inaadalan sa Biblia. May panahon na uminabot iyan sa 12, kaya kinaipuhan kong papaghalaton nguna an nagkapira!” Tunay nanggad, kun naglalakaw kamo segun sa espiritu, na iinaaplikar an pagdirehir na itinatao sa mga lingkod ni Jehova, mag-aani kamo nin abunda.
Magsarig sa Espiritu nin Dios
14, 15. (a) Paano posibleng maotob nin bakong sangkap na mga tawo an saindang pagdusay? (b) Paano nindo manonompongan an pinakamarahay na mga katood?
14 Bilang ordenadong ministro, may ministeryo kamong dapat otobon. (Roma 10:14) Tibaad sa pagmate nindo bako kamong lubos na kualipikado na isaabaga an siring na paninimbagan. Alagad, arog kan sa mga linahidan, an Dios an nagpapagin kualipikado sa saindo. (Basahon an 2 Corinto 3:5.) Maootob nindo an saindong pagdusay paagi sa paggibo kan saindong pinakamakakaya asin pagsarig sa espiritu nin Dios.
15 Totoo, bakong pasil para sa sato na bakong sangkap na mga tawo na otobon an pagdusay niato sa satong sangkap na Dios, si Jehova. An sarong kadepisilan na puedeng mapaatubang sa saindo iyo na an nagkapira sa mga dati nindong kaibaiba tibaad magngalas sa saindong bagong pamumuhay asin ‘magtaram na may panglilibak manongod sa saindo.’ (1 Ped. 4:4) Pero, dai nindo baliwalaon an katunayan na nagkaigwa na kamo nin bagong mga katood, na an pinakaimportante iyo si Jehova asin si Jesu-Cristo. (Basahon an Santiago 2:21-23.) Mahalagang marhay man na mamidbid an mga tugang na lalaki asin babae sa saindong lokal na kongregasyon, na kabtang kan “bilog na kasararoan nin mga tugang” sa bilog na kinaban. (1 Ped. 2:17; Tal. 17:17) Tatabangan kamo ni Jehova paagi sa espiritu nia na magkaigwa nin mga katood na magdadanay na marahay na impluwensia sa saindo.
16. Taano ta mahihimo man nindong ‘mawili sa mga kaluyahan’ arog ni Pablo?
16 Dawa kaibaiba nindo an matinabang na mga katood sa kongregasyon, tibaad madepisilan pa man giraray kamo na atubangon an mga problema sa aroaldaw. Kun beses, huli sa mga kaipuhan nindong pangganahan tibaad nawawaran na kamo nin paglaom, na garo baga nasa laog kamo nin halabang tunnel nin mga problema. Iyan nanggad an panahon na dumolok ki Jehova, na hinahagad an saiyang banal na espiritu. “Kun noarin ako maluya,” an isinurat ni apostol Pablo, “saka man ako mapuersa.” (Basahon an 2 Corinto 4:7-10; 12:10.) Aram ni Pablo na mahihipnoan kan espiritu nin Dios an mga kaluyahan nin tawo, ano man na klase iyan. Sa siring, puede kamong pakosogon kan aktibong puersa nin Dios kada namamatean nindo na kamo maluya asin nangangaipo nin tabang. Si Pablo nagsurat na mahihimo niang ‘mawili sa mga kaluyahan.’ Sa panahon na sia maluya, namamatean nia na naghihiro sa saiya an banal na espiritu. Puede man nindong mamatean iyan!—Roma 15:13.
17. Paano kamo matatabangan kan banal na espiritu mantang pasiring kamo sa saindong destinasyon?
17 Kaipuhan niato an espiritu nin Dios tanganing makapamuhay kita na dusay sa saiya. Ipamugtak na kamo sarong kapitan nin barkong de layag. An saindong pasohan iyo na paglingkodan si Jehova sagkod lamang. An banal na espiritu siring sa doros na gusto nindong matiempohan tanganing makaabot kamo sa destinasyon nindo na ligtas asin tiwasay. Habo nindong ianod asin ipadpad kan espiritu kan kinaban ni Satanas. (1 Cor. 2:12) Kaipuhan nindong aramon asin tiempohan, sabi ngani, an tamang doros. Iyan an banal na espiritu. Paagi sa Tataramon nin Dios asin sa saiyang organisasyon na dinidirehiran nin espiritu, dadarahon kamo kan banal na espiritu sa tamang direksion.
18. Ano an saindong determinasyon ngonyan, asin taano?
18 Kun kamo nakikipag-adal na sa mga Saksi ni Jehova asin ikinakaogma an espirituwal na pakikiasosyar sa sainda, alagad dai pa nindo ginigibo an mahalagang marhay na mga lakdang na pagdusay asin bautismo, hapoton an saindong sadiri, ‘Taano ta mag-aalangan ako?’ Kun saindong minimidbid an papel kan banal na espiritu sa pag-otob kan kabotan ni Jehova ngonyan asin pinapahalagahan an paghiro kaiyan, gibohon nindo an mga lakdang na nanodan nindong tama. Kamo abundang bebendisyonan ni Jehova. Bukas-palad na itatao nia sa saindo an saiyang banal na espiritu. Kun kamo nabautismohan dakol na taon o mga dekada na an nakaagi, siertong naeksperyensiahan nindo an impluwensia kan banal na espiritu. Naheling asin namatean nindo kun paano kamo mapapakosog nin Dios paagi sa saiyang espiritu. Iyan puedeng magpadagos—iyo, sagkod sa daing katapusan na ngapit. Huli kaini, magin determinado kamong padagos na maglakaw segun sa banal na espiritu.
Nagigirumdoman daw Nindo?
• Ano an kahulogan kan ‘paglakaw segun sa espiritu’?
• Ano an makakatabang sa saindo na ‘padagos na maglakaw segun sa espiritu’?
• Paano nindo maootob an saindong pagdusay?
[Mga Hapot Para sa Pag-adal]
[Ritrato sa pahina 15]
An pagkultibar sa piguratibong daga kan saindong puso nangangaipo nin paghihingoa
[Mga Ritrato sa pahina 16, 17]
Impluwensiado daw kamo kan espiritu nin Dios?