Pagdanay sa Pabor nin Dios sa Ibong nin mga Pagbabago

NAPAPAATUBANG daw kamo sa mga pagbabago sa saindong buhay? Nasasakitan daw kamong akoon an mga pagbabagong iyan? An kadaklan sa sato uminagi na o maagi sa situwasyon na iyan. An mga halimbawa kaidto sa tunay na buhay makakatabang sa sato na maaraman an mga kualidad na magigin kapakipakinabang.

Halimbawa, estudyare si David asin an dakol na pagbabago na kinaipuhan niang atubangon. Sia solteritong pastor pa sana kan sia lahidan ni Samuel bilang an magigin hade. Mantang hoben pa, nagboluntaryo siang labanan an higanteng Filisteo na si Goliat. (1 Sam. 17:26-32, 42) An hoben na si David inimbitaran na mag-istar sa erokan ni Hadeng Saul asin ninombrahan bilang pamayo kan hukbo. Dai man lamang kaidto maiimahinar ni David an gabos na pagbabagong ini sa buhay nia; ni maaantisipar man nia an sunod na mangyayari.

Nagin nakakatension na gayo an relasyon ni David ki Saul. (1 Sam. 18:8, 9; 19:9, 10) Tanganing iligtas an sadiri niang buhay, kinaipuhan ni David na mamuhay bilang dulag sa laog nin nagkapirang taon. Dawa kan sia naghahade na sa Israel, nagbagong gayo an saiyang kamugtakan, lalo na pagkatapos na sia magsambay asin, sa paghihingoang tahoban an kasalan na iyan, makakomiter nin paggadan. Bilang resulta kan saiya mismong mga kasalan, nagkaigwa nin mga trahedya sa pamilya nia. Halimbawa, naeksperyensiahan ni David an pagrebelde kan aki niang si Absalon. (2 Sam. 12:10-12; 15:1-14) Pero, pakatapos na pagsolsolan ni David an saiyang mga kasalan na pagsambay asin paggadan, pinatawad sia ni Jehova asin nakamtan giraray ni David an pabor nin Dios.

Tibaad magbago man an saindong kamugtakan. An mga problema sa salud, sa pagbuhay, o sa pamilya—dawa an sato mismong mga gibo—nagbubunga nin mga pagbabago sa satong buhay. Anong mga kualidad an makakatabang sa sato na magin mas andam na atubangon an siring na mga kadepisilan?

An Kapakumbabaan Nakakatabang sa Sato

Kalabot sa kapakumbabaan an pagkaigwa nin mapagpasakop na saboot. An tunay na kapakumbabaan nagpapangyari na satong maheling an tunay na pagkatawo niato asin an sa iba. Paagi sa dai pagmenos sa mga kualidad asin kapangganahan nin iba, orog niatong maaapresyar kun siisay sinda asin kun ano an saindang ginigibo. Kaagid kaiyan, puedeng pangyarihon kan kapakumbabaan na  masabotan niato kun taano ta nangyari sa sato an sarong bagay asin kun paano iyan aatubangon.

An sarong marahay na halimbawa iyo si Jonatan, na aki ni Saul. An saiyang kamugtakan nabago huli sa mga pangyayari na dai nia kontrolado. Kan sabihan ni Samuel si Saul na hahaleon ni Jehova an kahadean sa saiya, dai sinabi ni Samuel na si Jonatan an masalida bilang hade. (1 Sam. 15:28; 16:1, 12, 13) An pagpili nin Dios ki David bilang an sunod na hade kan Israel nangangahulogan na bako talaga si Jonatan an magigin hade. Sa sarong parte, an kasumbikalan ni Saul nagkaigwa nin negatibong epekto ki Jonatan. Dawa ngani bako si Jonatan an may kasalan, dai sia masalida sa saiyang ama. (1 Sam. 20:30, 31) Ano an nagin reaksion ni Jonatan sa situwasyon na ini? Sia daw naghinanakit huli sa nawarang oportunidad, asin nagin maimon ki David? Dai. Minsan ngani si Jonatan mas matuang gayo asin mas eksperyensiado, maimbod niang sinuportaran si David. (1 Sam. 23:16-18) Nakatabang sa saiya an kapakumbabaan na masabotan kun siisay an ninombrahan nin Dios, asin ‘dai sia nag-isip dapit sa saiyang sadiri nin orog kisa sa dapat isipon.’ (Roma 12:3) Nasabotan ni Jonatan kun ano an inaasahan sa saiya ni Jehova asin inako nia an Saiyang desisyon sa bagay na ini.

Siempre, dakol na pagbabago an may ibinubungang kadepisilan. May panahon na sabay na nakaibaiba ni Jonatan an duwang tawo na dayupot sa saiya. An saro iyo si David, an magigin hade, an saiyang katood na ninombrahan ni Jehova. An saro pa iyo si Saul, an saiyang ama, na isinikwal na ni Jehova pero naghahade pa man giraray. An situwasyon na ini seguradong nagtao nin emosyonal na tension ki Jonatan mantang pinagmamaigotan niang mapagdanay an pabor ni Jehova. Puedeng magin dahelan nin kahaditan asin pagkahandal an mga pagbabago na kaipuhan niatong atubangon. Alagad kun pinagmamaigotan niatong masabotan an pagmansay ni Jehova, makakapagpadagos kitang maimbod na naglilingkod sa saiya mantang inaatubang an mga pagbabago.

An Halaga kan Kababaan nin Boot

Kalabot sa kababaan nin boot an pakaaram sa mga limitasyon nin saro. An kababaan nin boot dai maninigong ipagkamalo sa kapakumbabaan. Tibaad dai lubos na naririsa nin sarong mapakumbabang tawo an saiyang mga limitasyon.

May kababaan nin boot si David. Minsan ngani sia an pinili ni Jehova na magin hade, dai sia nakatukaw sa trono sa laog nin dakol na taon. Mayo kita nin mababasa na ipinaliwanag ni Jehova ki David kun ano an dahelan kan garo baga pagkaatrasong ini. Pero, minsan ngani garo nakakadesganar an situwasyon, dai ini nakapurisaw sa saiya. Aram nia an saiyang mga limitasyon, asin nasabotan nia na si Jehova, na iyo an nagtotogot sa situwasyon na iyan, an may kontrol sa mga bagay-bagay. Huli kaini, nagsayuma si David na gadanon si Saul dawa sa katuyohan na iligtas an saiyang buhay, asin pinugolan nia an kaibaiba niang si Abisai sa paggibo kaiyan.—1 Sam. 26:6-9.

Kun beses, tibaad may maglataw na situwasyon sa laog kan satong lokal na kongregasyon na dai niato nasasabotan o garo baga, sa pagmansay niato, dai naaasikaso sa pinakamarahay o pinakaorganisadong paagi. May kababaan nin boot daw na mimidbidon niato na si Jesus Payo kan kongregasyon asin na sia naghihiro paagi sa grupo nin kamagurangan na ninombrahan tanganing mangenot? Magpapaheling daw kita nin kababaan nin boot,  na nakakaaram na tanganing mapagdanay an pabor ni Jehova, kaipuhan niatong maghalat na sia an mangenot paagi ki Jesu-Cristo? Kita daw may kababaan nin boot na maghahalat dawa ngani depisil ini?—Tal. 11:2.

An Kahoyoan Nakakatabang sa Sato na Magin Positibo

An kahoyoan iyo an pagkakalmado nin boot. Pinapangyayari kaiyan na matagalan niato an kolog nin boot na may pasensia asin dai naiiritar, naghihinanakit, o nag-iisip na magbalos. An kahoyoan sarong kualidad na depisil pataluboon. Interesante nanggad, sa sarong teksto sa Biblia, an mga “mahoyo sa daga” iniimbitaran na ‘hanapon an kahoyoan.’ (Sof. 2:3) An kahoyoan konektado sa kapakumbabaan asin kababaan nin boot, alagad kaiba man dian an iba pang kualidad, siring kan karahayan asin pagkakalmado. An mahoyong tawo puedeng tumalubo sa espirituwal mantang ipinapaheling nia na madali siang tokdoan asin tinotogotan an saiyang sadiri na moldehon.

Paano makakatabang sa sato an kahoyoan na atubangon an mga pagbabago sa satong buhay? Posibleng marhay na naobserbaran nindo na an dakol may tendensiang mansayon nin negatibo an mga pagbabago. An totoo, an mga iyan puedeng magin oportunidad niato na orog pang sanayon ni Jehova. Ipinapaheling iyan kan buhay ni Moises.

Sa edad na 40, si Moises igwa na nin marahayon na mga kualidad. Pinatunayan nia na sia sensitibo sa mga pangangaipo kan banwaan nin Dios asin nagpaheling sia nin mapagsakripisyong espiritu. (Heb. 11:24-26) Pero, bago sia asignaran ni Jehova na pangenotan an Israel paluwas sa Egipto, kinaipuhan ni Moises na atubangon an mga pagbabago na nagdalisay sa saiyang kahoyoan. Kinaipuhan niang magdulag sa Egipto asin mag-erok sa daga nin Midian sa laog nin 40 taon bilang pastor, na bako nang prominente. Ano an nagin resulta? Sia nagin mas marahay na tawo huli kan pagbabagong ini. (Bil. 12:3) Nakanood siang enoton an espirituwal na intereses kisa sa personal na mga bagay.

Bilang halimbawa kan kahoyoan ni Moises, estudyaran niato an nangyari kan sabihon ni Jehova na gusto Niang isikwal an sumbikalan na nasyon asin gibohon an mga magikan ki Moises na magin sarong makapangyarihan na nasyon. (Bil. 14:11-20) Nakimaherak si Moises para sa nasyon. Ipinapaheling kan mga tataramon nia na an mahalaga sa saiya iyo an reputasyon nin Dios asin an kapakanan kan mga tugang nia, bako an saiyang personal na interes. Sarong mahoyong tawo an kaipuhan para sa katongdan ni Moises bilang lider kan nasyon asin parapangoltanan. Si Miriam asin Aaron naggumodgumod tumang sa saiya, pero sinasabi kan Biblia na si Moises “iyo nanggad an pinakamahoyo sa gabos na tawo.” (Bil. 12:1-3, 9-15) Minalataw na may kahoyoan na tinios ni Moises an saindang pang-iinsulto. Ano daw kutana an nangyari kun dai nagin mahoyo si Moises?

Sa saro pang pangyayari, may nagkapirang lalaki na nag-ako kan espiritu ni Jehova, kaya naghurula sinda. Si Josue, an katabang ni Moises, naghona na an mga Israelitang ini minagawe nin bakong tama. Sa ibong na lado, may kahoyoan na hineling ni Moises an mga bagay-bagay segun sa pagmansay ni Jehova asin dai sia  nahadit na mawara an saiyang autoridad. (Bil. 11:26-29) Kun si Moises dai nagin mahoyo, aakoon daw kutana nia an pagbabagong ini sa areglo ni Jehova?

An kahoyoan nagpangyari ki Moises na gamiton nin marahay an dakulang autoridad na itinao sa saiya asin an katongdan na iinasignar sa saiya nin Dios. Inimbitaran sia ni Jehova na tumukad sa Bukid nin Horeb asin tumindog para sa banwaan. An Dios nakipag-olay ki Moises paagi sa sarong anghel asin ninombrahan sia bilang parapangoltanan kan tipan. An kahoyoan ni Moises nagpangyari sa saiya na akoon an dakulang pagbabagong ini sa autoridad asin kadungan kaiyan magdanay pa man giraray sa pabor nin Dios.

Kumusta man kita? An kahoyoan kaipuhan nanggad sa satong personal na pag-oswag. Kaipuhan na magin mahoyo an gabos na pinagkatiwalaan nin mga pribilehio asin autoridad sa tahaw kan banwaan nin Dios. Pinupugolan kita kaiyan na magin orgolyoso kun nakakaeksperyensia kita nin mga pagbabago asin pinapangyayari kaiyan na maatubang niato an mga situwasyon na may tamang saboot. Mahalaga an satong reaksion. Aakoon daw niato an pagbabago? Mamansayon daw niato iyan bilang oportunidad na umoswag? Tibaad iyan magin sarong espesyal na tsansa tanganing mapatalubo an kahoyoan!

Pirme kitang mapapaatubang sa mga pagbabago sa satong buhay. Kun beses, bakong pasil na masabotan kun taano ta nangyayari an mga bagay-bagay. An personal na mga limitasyon asin emosyonal na tension tibaad magpadepisil sa sato na mapagdanay an espirituwal na pagmansay. Pero, an mga kualidad na siring kan kapakumbabaan, kababaan nin boot, asin kahoyoan makakatabang sa sato na akoon an mga pagbabago patin magdanay sa pabor nin Dios.

[Blurb sa pahina 4]

An tunay na kapakumbabaan nagpapangyari na satong maheling an tunay na pagkatawo niato

[Blurb sa pahina 5]

An kahoyoan kaipuhan nanggad sa satong personal na pag-oswag

[Ritrato sa pahina 5]

Kinaipuhan ni Moises na atubangon an mga kadepisilan na nagdalisay sa saiyang kahoyoan