An Mapangganang Pag-atubang sa mga Pagbalo Nagpakosog kan Samong Tiwala ki Jehova

Isinaysay ni Ada Dello Stritto

Katatapos ko pa sanang kopyahon sa notebook ko an teksto kan aldaw. Ako 36 anyos na, alagad inabot ako nin duwang oras sa pagsurat kan pipirang linyang idto. Taano ta haloyon? An sakong ina an mapaliwanag.—Joel

KAN 1968, kaming mag-agom nabautismohan bilang mga Saksi ni Jehova. Pakatapos na magkaigwa nin duwang aki na makosog an hawak, si David asin Marc, namundag an ikatolo ming aking lalaki, si Joel. Sia namundag na kulang sa bulan kan 1973 sa sarong ospital sa banwaan nin Binche sa Belgium, mga 60 kilometros sa timog kan Brussels. An timbang nia 1.7 kilos sana. Kan magluwas ako sa ospital, kinaipuhan na mawalat si Joel tanganing madugangan an timbang.

Pakalihis nin pirang semana, kan an samong aki mayo pa giraray nin senyales nin pagrahay, dinara mi sia kan sakong agom na si Luigi sa sarong doktor sa mga aki. Pakatapos niang eksaminon si Joel, an doktor nagsabi: “Ikinamomondo ko. Garo yaon ki Joel an gabos na diperensia na mayo sa mga tugang nia.” Suminilensio nin halawig. Kan mismong oras na idto, narealisar ko na igwa nin seryosong problema sa salud an sadit ming aki. Dangan sinekreto kan doktor an sakong agom asin sinabihan sia: “An saindong aki may trisomy 21,” na inaapod man na Down syndrome. *

Huling namondo sa diagnosis kan doktor, nagdesisyon kami na kumonsulta sa saro pang espesyalista. Maingat niang ineksamin si Joel nin haros sarong oras na dai nin ano man na sinasabi. Para sa samo ni Luigi, idto garo halawigon na panahon. Sa katapustapusi, an doktor nagheling sa samo asin nagsabi: “An aki nindo mangangaipong marhay kan saindong pag-asikaso.” Dangan, may kabootan na sinabi pa nia, “Alagad magigin maogma si Joel huli ta namomotan sia kan saiyang mga magurang!” Pinangibabawan ako nin emosyon, kinarga ko si Joel, asin ipinuli mi sia. Kan panahon na iyan, sia walong semana na.

Pinakosog nin Kristianong mga Pagtiripon Asin kan Ministeryo

Ipinaheling nin dugang pang mga pag-eksamin na si Joel igwa man nin grabeng depekto sa puso asin nin seryosong klase nin rickets. Huling dakulaon an saiyang puso, nadodoonan kaiyan an saiyang baga kaya madali siang maimpeksion. Dai naghaloy, kan si Joel  apat na bulan na, nagkaigwa sia nin bronchopneumonia asin kinaipuhan siang ibalik sa ospital, na duman sia ikinuarentena. Makologon para sa samo na maheling siang nagsasakit. Gustong-gusto mi kutanang makarga asin makugos sia, alagad sa laog nin sampulong nakakatension na semana, dai man lamang kami tinogotan na makapotan sia. Mayo kaming ibang magibo ni Luigi kundi pagmasdan sia, magkugosan, asin mamibi.

Durante kan masakit na situwasyon na iyan, padagos kaming nag-atender sa mga pagtiripon kan kongregasyon kaiba si David asin Marc, na kaidto 6 asin 3 anyos. Para sa samo, an pagigin nasa Kingdom Hall garo pagigin nasa mapagmakolog na kamot ni Jehova. Sa mga oras na yaon kami duman, na napapalibotan kan samong mga tugang na Kristiano, namamatean mi na ikinakabugtak niamo ki Jehova an samong pagabat, asin nakakaeksperyensia kami nin panglaog na pagkakalmado. (Sal. 55:22) Dawa an mga nars na nag-aasikaso ki Joel nagsabi na narisa ninda kun paano an pag-atender mi sa Kristianong mga pagtiripon nakatabang sa samo na magdanay na timbang.

Kan panahon na iyan, nakimaherak man ako ki Jehova para sa kosog na makapaglingkod sa langtad. Imbes na magpirme sa harong na sigeng hibi, gusto kong makipag-olay sa iba asin sabihon sa sainda kun taano ta nakapakosog sa sako an sakong pagtitiwala sa panuga nin Dios dapit sa kinaban na duman mayo nang helang. Kada nakakapakikabtang ako sa ministeryo, namamatean ko na sinisimbag ni Jehova an sakong mga pamibi.

“Pambihira Ini!”

Maogmahon nanggad na aldaw idto kan sa katapustapusi puede mi nang ipuli si Joel hale sa ospital! Alagad kan mismong suminunod na aldaw, an samong kagayagayahan nagin kamondoan. An kamugtakan ni Joel biglang naggrabe, asin kinaipuhan ming ibalik tolos sia sa ospital. Pakatapos na eksaminon sia, an mga doktor nagsabi sa samo: “An buhay ni Joel dai na malampas sa anom na bulan.” Pakalihis nin duwang bulan, kan sia mga walong bulan na, an prediksion kan mga doktor garo baga magkakatotoo huling naggrabe pa an kamugtakan ni Joel. Sarong doktor an nagkaolay sa samo asin nagsabi: “Ikinamomondo ko. Mayo na kaming magigibo para sa saiya.” Dangan idinugang nia: “Sa puntong ini, si Jehova na sana an makakatabang sa saiya.”

Buminalik ako sa kuarto ni Joel sa ospital. Minsan ngani natetension ako asin pagal-pagal, determinado ako na dai maghale sa kataed nia. May pirang tugang na babae na nagsarosalida sa pag-iba sa sako, huling kaipuhan na asikasohon ni Luigi an duwa ming mas matuang aki. Sarong semana an uminagi. Dangan, bigla na sanang inatake sa puso si Joel. An mga nars tolos na nagduman sa kuarto alagad mayo na sindang magigibo tanganing tabangan sia. Pakalihis nin nagkapirang minuto, an saro sa sainda nagsabi sa maluway na boses, “Mayo na . . . ” Huling biyong pinangluluyahan, napahibi ako nin todo asin luminuwas ako sa kuarto. Prinobaran kong mamibi ki Jehova, alagad dai ko maisip kun paano ipapahayag an kolog na namamatean ko. Pakalihis nin mga 15 minutos, makosog na inapod ako nin sarong nars, “Buhay pa si Joel!” Kinabit nia ako asin sinabi, “Madia, puede mo na siang helingon.” Kan balikan ko si Joel, nagpipitik na giraray an puso nia! Marikas na luminakop an bareta dapit sa saiyang pagrahay. An mga nars asin doktor nagdorolok tanganing helingon sia, asin dakol an napataram, “Pambihira ini!”

Nakakasorpresang Paglakaw kan Kuatro Anyos

Kan enot na mga taon ni Joel, parateng sinasabi sa samo kan doktor sa mga aki, “Nangangaipo talaga si Joel nin pagkamoot.” Huling naeksperyensiahan mi ni Luigi an mamomoton na pag-asikaso ni Jehova nangorogna pakatapos mamundag si Joel, gusto mi man na pirmeng ipamate sa samong aki an mamomoton na pag-asikaso.  Nagkaigwa kami nin dakol na oportunidad na ipaheling iyan huling kinaipuhan nia an samong tabang sa gabos niang ginigibo.

Kada taon sa enot na pitong taon ni Joel, paorootro niamong inagihan an iyo man sanang mga pangyayari. Sa pag-oltanan nin Oktubre asin Marso, sunod-sunod an nagigin problema nia sa salud, asin kinaipuhan ming darahon sia nin pabalikbalik sa ospital. Kasabay kaiyan, hinihingoa kong magtagama nin pinakadakol na panahon na mapupuede para sa mga aki ming si David asin Marc. Dangan, sinda man nakatabang nin dakula na umoswag si Joel—asin may nakakasorpresang mga resulta. Halimbawa, nagkapirang doktor an nagsabi sa samo na dai na noarin man makakalakaw si Joel. Alagad sarong aldaw, kan si Joel kuatro anyos na, an aki ming si Marc nagsabi, “Sige na Joel, ipaheling mo ki Nanay na kaya mo iyan!” Sa pagkabigla ko, nakalakaw si Joel sa kaenot-enote! Kami naogmang marhay, asin iriba kaming namibi bilang pamilya tanganing pasalamatan si Jehova nin gikan sa puso. Sa ibang mga panahon, pirme mi siang tinatawan nin mainit na komendasyon dawa sa saradit na pag-oswag na nagigibo ni Joel.

An Diosnon na Pagsasanay Poon sa Pagkaomboy May Marahay na Resulta

Sagkod sa mapupuede, pirme ming iiniiba si Joel sa mga pagtiripon sa Kingdom Hall. Tanganing protehiran sia sa mga mikrobyo na madali sanang makakapahelang sa saiya, ibinugtak mi sia sa sarong espesyal na istroler na natatakopan nin silag na plastik. Pero, dawa nakatukaw sa istroler na natatakopan, naoogma sia na kaiba sia kan kongregasyon.

An Kristianong mga tugang mi nagin pampakosog sa samo, na pirmeng nagpapamate sa samo nin pagkamoot asin nagtatao nin praktikal na tabang. Sarong tugang na lalaki an parateng nagpapagirumdom sa samo kan mga tataramon sa Isaias 59:1: “Uya! An kamot ni Jehova dai nagin halipoton na dai na iyan makapagligtas, ni nagin magabaton an saiyang talinga na dai na iyan makadangog.” An nakakarangang mga tataramon na iyan nakatabang sa samo na magtiwala ki Jehova.

Mantang nagdadakula si Joel, hiningoa ming gibohon na dakulang kabtang kan saiyang buhay an paglilingkod ki Jehova. Sa lambang oportunidad, ipinapakipag-olay mi ki Joel an manongod ki Jehova sa paaging makakapatalubo sia nin mamomoton na relasyon sa saiyang Ama sa langit. Nakimaherak kami ki Jehova na bendisyonan an samong mga paghihingoa tanganing magkaigwa nin marahay na resulta an diosnon na pagsasanay.

Mantang nagtitinedyer sia, ipinagpasalamat mi na maheling si Joel na gustong-gustong ipinapakipag-olay sa iba an mga katotoohan sa Biblia. Mantang nagpaparahay sia sa mayor na operasyon kan sia 14 anyos, naogma akong marhay kan hapoton ako ni Joel, “Nay, puede ko daw pong tawan an doktor nin librong Mabuhay Sagkod Lamang?” Pakalihis nin pirang taon, kinaipuhan giraray na operaran si Joel. Aram ming gayo na tibaad dai na nia iyan malampasan. Bago an operasyon, itinao ni Joel sa doktor an sarong surat na iriba ming ginibo. Ipinaliwanag kaiyan an saiyang paninindogan dapit sa paggamit nin dugo. Hinapot kan doktor si Joel, “Minaoyon ka?” Marigon na nagsimbag si Joel, “Iyo po, Doktor.” Ipinag-oorgolyo ming gayo an pagtitiwala kan samong aki sa saiyang Kaglalang asin an determinasyon nia na paogmahon Sia. Nagin mapagsuportar na marhay an mga tawohan kan ospital, asin pinahalagahan ming gayo iyan.

 An Pagtalubo ni Joel sa Espirituwal

Sa edad na 17, sinimbolisaran ni Joel an saiyang pagdusay sa Dios paagi sa bautismo sa tubig. Dai mi nanggad malilingawan an aldaw na iyan! Dakulang kagayagayahan para sa samo na maheling an saiyang pag-oswag sa espirituwal. Poon kaidto, dai nagluya an saiyang pagkamoot ki Jehova asin an kaigotan nia para sa katotoohan. An totoo, gustong-gustong sinasabi ni Joel sa gabos na nakakaolay nia: “An katotoohan iyo an sakong buhay!”

Sa mga huring taon kan saiyang pagkatinedyer, nakanood si Joel na magbasa asin magsurat. Kinaipuhan kaiyan an dakulang paghihingoa. An kada halipot na tataramon na ikinakasurat nia sarong kapangganahan. Poon kaidto, pinoponan nia an kada aldaw paagi sa pagkonsiderar kan teksto kan aldaw hale sa buklet na Pagsiyasat sa Kasuratan. Pakatapos kaiyan, matiaga niang kinokopya an teksto sa saro sa saiyang mga notebook, asin ngonyan iyan saro nang kahangahangang koleksion!

Sa mga aldaw nin pagtiripon, sinesegurado ni Joel na magduman kami sa Kingdom Hall nin amay huling gusto niang mainit na taratarahon an gabos na minalaog duman. Durante kan mga pagtiripon, naoogma siang magkomento asin makikabtang sa mga demonstrasyon. Nagtatabang man sia sa pag-asikaso kan mga mikropono asin nin iba pang gibohon. Kun kaya kan saiyang salud, serosemana siang minaiba sa samo sa paghuhulit. Kan 2007, ipinaisi sa kongregasyon na si Joel ninombrahan bilang ministeryal na lingkod. Napaluha kami sa kagayagayahan. Marahayon nanggad na bendisyon hale ki Jehova!

Namatean Niamo an Matinabang na Kamot ni Jehova

Kan 1999 napaatubang kami sa saro pang pagbalo. An samong kotse binangga nin sarong daing ingat na drayber, asin naerido si Luigi. Kinaipuhan na putolon an saro niang tabay, asin nagkapirang beses siang nag-agi nin mayor na operasyon sa saiyang taludtod. Sa liwat, paagi sa pagtitiwala ki Jehova, namatean mi an kosog na itinatao nia sa saiyang mga lingkod na nangangaipo. (Fil. 4:13) Minsan ngani baldado si Luigi, hinihingoa ming papagdanayon an positibong pagmansay. Huling dai sia makapagtrabaho nin sekular, mas dakol an panahon nia na asikasohon si Joel. Bilang resulta, igwa ako nin mas dakol na panahon para sa espirituwal na mga aktibidad. Matatawan man ni Luigi nin orog na atension an espirituwal na pangangaipo kan samong pamilya asin kan kongregasyon, na dian padagos siang naglilingkod bilang parakoordinar kan grupo nin kamagurangan.

Huli kan samong pambihirang kamugtakan, dakol an panahon mi na magkairibanan bilang pamilya. Sa pag-agi nin panahon, nakanood kami na magin rasonable asin dai mag-asa nin labi-labi. Sa mga aldaw na nadedesganar kami, ipinapahayag mi ki Jehova paagi sa pamibi an samong mga saboot. Makamomondo, kan an samong mga aking si David asin Marc magin adulto na asin maghale na sa harong, luway-luway sindang nagpondo sa paglilingkod ki Jehova. Linalaoman mi na mabalik pa sinda ki Jehova.—Luc. 15:17-24.

Sa pag-agi nin mga taon, namatean mi an suporta ni Jehova asin nakanood kami na magsarig sa saiya sa lambang kadepisilan na samong inaatubang. Espesyal nanggad para sa samo an mga tataramon sa Isaias 41:13: “Ako, si Jehova na saimong Dios, nagkakapot sa saimong toong kamot, an Saro na nagsasabi sa saimo, ‘Dai ka matakot. Ako mismo an matabang sa saimo.’” Nakakarangang maaraman na marigon na kinakapotan ni Jehova an samong kamot. Tunay nanggad, talagang masasabi niamo na an mapangganang pag-atubang sa mga pagbalo nagpakosog kan samong tiwala sa satong langitnon na Ama, si Jehova.

[Nota sa Ibaba]

[Mga Ritrato sa pahina 16, 17]

Si Joel kaiba an saiyang ina, si Ada

[Ritrato sa pahina 18]

Si Ada, Joel, asin Luigi

[Ritrato sa pahina 19]

Maogmang tinataratara ni Joel an mga tugang sa Kingdom Hall