Lubos daw Nindong Sinusunod an Cristo?
Lubos daw Nindong Sinusunod an Cristo?
“Siring na ngani sa paglakaw nindo, . . . padagos nindong gibohon iyan nin mas lubos pa.”—1 TES. 4:1.
1, 2. (a) Anong marahayon na mga bagay an naheling nin dakol na tawo kan panahon ni Jesus? (b) Taano ta makahulogan man an satong presenteng panahon?
NAISIP na daw nindo kun gurano nanggad kagayon na mabuhay kan si Jesus yaon digdi sa daga? Tibaad iniisip nindo an posibilidad na paomayan kamo ni Jesus asin sa siring dai mapurisaw huli sa nakakapasakit na helang sa pisikal. O tibaad isipon nindo na nakakaogma nanggad na maheling asin madangog si Jesus—an makanood sa saiya o an maheling siang naggigibo nin milagro. (Mar. 4:1, 2; Luc. 5:3-9; 9:11) Dakulang pribilehio nanggad kutana na maheling mismo na ginigibo ni Jesus an gabos na iyan! (Luc. 19:37) Mayo na nin ibang henerasyon poon kaidto an nakaheling nin siring na mga bagay, asin an nahaman ni Jesus sa daga “paagi sa pag-atang kan saiyang sadiri” dai na maootro.—Heb. 9:26; Juan 14:19.
2 Pero, makahulogan man an satong presenteng panahon. Taano man? Nabubuhay kita ngonyan sa ihinula kan Kasuratan na “panahon kan katapusan” asin “huring mga aldaw.” (Dan. 12:1-4, 9; 2 Tim. 3:1) Sa panahon na ini, si Satanas pinalayas sa langit. Dai na mahahaloy, sia gagaposon asin iaapon “sa bungaw.” (Kap. 12:7-9, 12; 20:1-3) Sa panahon man na ini, igwa kita kan dakulang pribilehio na ihayag sa bilog na kinaban an ‘maogmang bareta kan kahadean,’ na sinasabi sa mga tawo an paglaom dapit sa Paraisong maabot—sarong gibohon na dai na noarin man maootro.—Mat. 24:14.
3. Kan si Jesus madali nang magsakat sa langit, ano an sinabi nia na dapat gibohon kan saiyang mga parasunod, asin ano an magigin kalabot dian?
3 Kan si Jesus madali nang magsakat sa langit, sinabihan nia an saiyang mga parasunod: “Kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi kan daga.” (Gibo 1:8) Magigin kalabot sa gibohon na iyan an lakop sa globong pagtotokdo. An pasohan? Tanganing gumibo nin mga disipulo—dagdag na mga parasunod kan Cristo—bago mag-abot an katapusan. (Mat. 28:19, 20) Ano an dapat niatong gibohon kun gusto niatong mapangganang maotob an sugo ni Cristo?
4. (a) Anong pangangaipo an idinodoon sa 2 Pedro 3:11, 12? (b) Sa ano kita kaipuhan na mag-ingat?
4 Mangnohon an pagdodoon na ini ni apostol Pedro: “Isipon kun dapat na magin anong klaseng tawo kamo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!” (2 Ped. 3:11, 12) Idinodoon kan mga tataramon ni Pedro an pangangaipo na magdanay na maingat na nagbabantay durante kan huring mga aldaw na ini tanganing seguradohon na an satong buhay danay na nakasentro sa mga gibo nin diosnon na debosyon. Kaiba sa siring na mga gibo an paghuhulit kan maogmang bareta. Kun siring, nakakagayagaya nanggad na maheling an kaigotan kan satong mga tugang sa bilog na kinaban mantang inootob an sugo ni Cristo na maghulit! Kadungan kaiyan, nasasabotan man niato na kaipuhan niatong mag-ingat na dai lumuya an satong kaigotan sa paglilingkod sa Dios huli sa aroaldaw na panggigipit kan kinaban ni Satanas asin huli sa sato mismong minanang makasalan na mga tendensia. Kun siring, pag-olayan niato kun paano niato masesegurado na danay niatong sinusunod an Cristo.
Maogmang Akoon an mga Paninimbagan na Itinao nin Dios
5, 6. (a) Taano ta kinomendaran ni Pablo an saiyang mga kapagtubod sa Jerusalem, asin ano an ipinatanid nia sa sainda? (b) Taano ta dai niato maninigong pagbasangbasangon an satong mga paninimbagan na itinao nin Dios?
5 Sa surat ni apostol Pablo sa mga Kristiano sa Jerusalem, kinomendaran nia an saiyang mga kapagtubod huli sa maimbod na pagtagal ninda sa ibong nin persekusyon. Sia nagsabi: “Padagos nindong girumdomon an nakaaging mga aldaw kan, pakatapos na kamo maliwanagan, kamo nagtagal nin dakulang pakilaban sa irarom nin mga pagdusa.” Iyo, ginirumdom ni Jehova an saindang kaimbodan. (Heb. 6:10; 10:32-34) An mainit na mga tataramon nin komendasyon ni Pablo seguradong nakaparigon nanggad sa boot kan Hebreong mga Kristianong idto. Minsan siring, sa surat man sanang iyan, si Pablo nagpatanid man tumang sa tendensia nin tawo na kun dai kokontrolon, puedeng makapaluya kan kaigotan nin saro sa paglilingkod sa Dios. Sia nagsabi na maninigong mag-ingat an mga Kristiano na dai ‘magsayumang’ sunodon an mga togon nin Dios.—Heb. 12:25.
6 An patanid na iyan tumang sa tendensia na ‘magsayuma’ na maogmang akoon an mga paninimbagan na itinao nin Dios aplikado man sa mga Kristiano ngonyan. Aram niato na kaipuhan niatong magin determinado na dai noarin man pagbasangbasangon an satong Kristianong mga paninimbagan o togotan na magluya an satong kaigotan sa paglilingkod sa Dios. (Heb. 10:39) Total, an sagradong paglilingkod puedeng mangahulogan nin buhay asin kagadanan.—1 Tim. 4:16.
7, 8. (a) Ano an makakatabang sa sato na papagdanayon an kaigotan niato sa paglilingkod sa Dios? (b) Kun luminuya an dating kaigotan niato, ano an maninigo niatong girumdomon manongod ki Jehova asin Jesus?
7 Ano an makakatabang sa sato na dai magsayumang otobon an satong mga obligasyon sa Dios? An sarong importanteng paagi na malabanan an tendensiang iyan iyo an regular na paghorophorop sa kahulogan kan satong panuga nin pagdusay. Sa pundamental, nanuga kita ki Jehova na gigibohon niatong pangenot sa satong buhay an paggibo kan saiyang kabotan, asin gusto niatong otobon an panugang iyan. (Basahon an Mateo 16:24.) Kun siring, kaipuhan niato kun beses na mag-isip-isip asin hapoton an satong sadiri: ‘An sako daw na determinasyon ngonyan na otobon an sakong pagdusay sa Dios pareho pa man giraray kan determinasyon ko kaidtong mabautismohan ako? O luminuya daw an dating kaigotan ko sa pag-agi nin mga taon?’
8 Kun an sadiosan na pagsiyasat sa sadiri nagpapaheling na nagluya an satong paglilingkod ki Jehova, marahay na girumdomon niato an nakakapakosog na mga tataramon ni propeta Sofonias. Sia nagsabi: “Dai logod mangluya an saimong mga kamot. Si Jehova na saimong Dios nasa tahaw mo. Bilang makakamhan na Saro, sia magliligtas. Sia mag-oogma sa saimo na may paggayagaya.” (Sof. 3:16, 17) An nakakaparigon na mga tataramon na ini enot na iinaplikar sa mga Israelita kan suanoy, na nagbalik sa Jerusalem hale sa pagkabihag sa Babilonya. Minsan siring, an pamparigon na ini totoo pa man giraray sa banwaan nin Dios ngonyan. Huling an ginigibo niato hale ki Jehova, maninigo niatong isaisip na si Jehova asin an saiyang Aki parehong nasa likod niato saka nagpapakosog sa sato na otobon an satong mga paninimbagan na itinao nin Dios. (Mat. 28:20; Fil. 4:13) Kun hinihingoa niato na padagos na maigot na otobon an gibohon nin Dios, bebendisyonan asin tatabangan nia kita na padagos na umoswag sa espirituwal.
Maigot na ‘Paghanap Nguna sa Kahadean’
9, 10. Ano an punto kan parabola ni Jesus dapit sa engrandeng pamanggihan, asin anong leksion an manonodan niato dian?
9 Mantang nagkakakan sa harong nin sarong namamahala sa mga Fariseo, si Jesus nagtao nin ilustrasyon manongod sa sarong engrandeng pamanggihan. Sa ilustrasyon na iyan, ilinadawan nia an oportunidad na ipinaabot sa manlaenlaen na tawo na makaiba sa mga magmamana kan Kahadean kan kalangitan. Iinilustrar man nia kun ano an boot sabihon kan ‘pagsayuma.’ (Basahon an Lucas 14:16-21.) An inimbitaran na mga bisita sa ilustrasyon ni Jesus nagtao nin mga dahelan kun taano ta dai sinda makakaatender sa bangkete. An saro nagsabi na kaipuhan niang maghale asin helingon an oma na bago pa sana niang bakalon. An saro man nagsabi na nagbakal sia nin nagkapirang baka asin gusto niang helingon iyan. An saro pa nagsabi: ‘Dai ako makakaduman. Bago pa sana akong ikasal.’ Hababaw na mga dahelan ini. Sa parate, sinisiyasat nguna nin saro an oma o mga hayop bago nia iyan bakalon, kaya bako man talagang importante na siyasaton tolos iyan pakabakal kaiyan. Asin taano ta makakaolang sa sarong bago pa sanang ikasal na akoon an importanteng marhay na imbitasyon na iyan? Bakong makangangalas na sa ilustrasyon naanggot na gayo an kag-imbitar!
10 An bilog na banwaan nin Dios makakanood nin leksion sa parabola ni Jesus. Ano iyan? An personal na mga bagay, arog kan mga nasambitan sa ilustrasyon ni Jesus, maninigo na nungkang magin mahalagang marhay sa sato kaya naeenot na iyan sa paglilingkod niato sa Dios. Kun an personal na mga bagay dai pinapagdadanay nin sarong Kristiano sa tamang lugar kaiyan, luway-luway na maluya an saiyang kaigotan sa ministeryo. (Basahon an Lucas 8:14.) Tanganing dai iyan mangyari, sinusunod niato an konseho ni Jesus: “Padagos na hanapon nguna an kahadean asin an saiyang katanosan.” (Mat. 6:33) Nakakaparigon nanggad sa boot na maheling na an mahalagang marhay na hatol na iyan iinaaplikar kan mga lingkod nin Dios—hoben man o gurang! Sa katunayan, dakol an naggibo nin mga paagi na pasimplehon an saindang pamumuhay tanganing makatao sinda nin mas dakol na panahon sa ministeryo. Nanodan ninda mismo na an maigot na paghanap nguna sa Kahadean nagtatao nin tunay na kaogmahan asin dakulang pagkakontento.
11. Anong pagkasaysay sa Biblia an nag-iilustrar kan kahalagahan nin pagigin maigot asin bilog na puso sa paglilingkod sa Dios?
11 Tanganing iilustrar an kahalagahan kan pagigin maigot sa paglilingkod sa Dios, mangnohon an sarong pangyayari sa buhay ni Hadeng Joas nin Israel. Huling naghahadit sa posibleng mangyari sa Israel sa kamot kan Siria, si Joas naghihibing nagduman ki Eliseo. Pinagbotan sia kan propeta na, mantang nasa may bintana, magpana pasiring sa Siria, na nangangahulogan nin kapangganahan tumang sa nasyon na iyan paagi ki Jehova. Dapat na napakosog kutana kaini an hade. Sunod, sinabi ni Eliseo ki Joas na kuanon an saiyang mga pana asin ipana iyan sa daga. Tolong beses na pinana ni Joas an daga. Ikinaanggot na gayo ini ni Eliseo, huling an lima o anom na beses na pagpana sa daga mangangahulogan kutana na ‘mapapabagsak nia an Siria sagkod na matapos.’ Huli kaiyan, tolong bakong lubos na kapangganahan sana an makakamtan ni Joas. Huling huminiro sia nin daing kaigotan, limitadong kapangganahan sana an nakamtan ni Joas. (2 Ha. 13:14-19) Anong leksion an manonodan niato sa pagkasaysay na iyan? Bebendisyonan kita nin abunda ni Jehova solamente kun bilog na puso asin maigot niatong inootob an saiyang gibohon.
12. (a) Ano an makakatabang sa sato na mapagdanay an satong kaigotan sa paglilingkod sa Dios mantang napapaatubang sa mga kasakitan sa buhay? (b) Isaysay kun paano ka nakikinabang sa pagdadanay na sibot sa ministeryo.
12 An mga kasakitan sa buhay nagigin pagbalo sa satong kaigotan asin debosyon sa paglilingkod sa Dios. Dakol na tugang an napapaatubang sa masakit na mga kamugtakan sa pagbuhay. An iba pinangluluyahan nin boot huli sa grabeng helang na nakakalimitar sa nagigibo ninda sa paglilingkod ki Jehova. Pero, an lambang saro sa sato puedeng gumibo nin mga paagi na masiertong napagdadanay niato an satong kaigotan asin padagos na lubos na nasusunod niato an Cristo. Mangnohon tabi an nagkapira sa mga suhestion asin teksto na nakalista sa kahon na “Ano an Makakatabang sa Saindo na Padagos na Sunodon an Cristo?” Isip-isipon kun paano nindo lubos na ikakaaplikar iyan. Kun gigibohon nindo iyan, mag-aako kamo nin tunay na mga pakinabang. An pagdadanay na sibot sa ministeryo nakakaparigon sa sato, nagpapaoswag kan satong buhay, asin nagtatao sa sato nin orog na katoninongan asin kaogmahan. (1 Cor. 15:58) Dugang pa, an bilog na kalag na paglilingkod niato sa Dios nakakatabang sa sato na ‘mapagdanay na harani sa isip an presensia kan aldaw ni Jehova.’—2 Ped. 3:12.
Gumibo nin Sadiosan na Pag-ebalwar
13. Paano niato madedeterminaran kun ano an boot sabihon sa sato personalmente kan bilog na kalag na paglilingkod?
13 Pero, marahay na girumdomon na an bilog na kalag na paglilingkod dai nanonongod sa kun gurano kadakol na oras an ginagamit niato sa ministeryo. Laen-laen an kamugtakan nin lambang indibiduwal. An sarong tawo na naggagamit sana nin saro o duwang oras sa paglilingkod sa langtad kada bulan tibaad nakakapaogma nang marhay ki Jehova kun iyan sana talaga an itinotogot kan saiyang salud. (Ikomparar an Marcos 12:41-44.) Huli kaini, tanganing madeterminaran kun ano an boot sabihon sa sato personalmente kan bilog na kalag na paglilingkod, kaipuhan niatong sadiosan na ebalwaron an satong mga kakayahan asin kamugtakan. Bilang mga parasunod ni Cristo, gusto man niato na an satong pagmansay magin kaoyon kan sa saiya. (Basahon an Roma 15:5; 1 Cor. 2:16) Ano an ginibo ni Jesus na pangenot sa buhay nia? Sinabi nia sa mga tawo sa Capernaum: ‘Dapat na ipahayag ko an maogmang bareta kan kahadean nin Dios, huli ta dahel kaini ako isinugo.’ (Luc. 4:43; Juan 18:37) Mantang isinasaisip an kaigotan ni Jesus sa ministeryo, ebalwaron an saindong mga kamugtakan tanganing maheling kun mapapaoswag pa nindo an saindong ministeryo.—1 Cor. 11:1.
14. Sa anong mga paagi pa niato mapapaoswag an satong ministeryo?
14 Puedeng ipaheling kan maingat na pagsiyasat niato sa satong mga kamugtakan na puede niatong dagdagan an oras na satong ginagamit sa ministeryo. (Mat. 9:37, 38) Halimbawa, rinibong hoben na naggradwar pa sana sa eskuelahan an nagpaoswag kan saindang ministeryo asin naeeksperyensiahan na ninda ngonyan an kagayagayahan na resulta nin maigot na pagpapayunir. Gusto man daw nindong maeksperyensiahan an kagayagayahan na iyan? Tinurotimbang nin nagkapirang tugang an saindang mga kamugtakan asin nagdesisyon na puede sindang bumalyo sa sarong lugar sa saindang nasyon, o sa ibang nasyon pa ngani, na mas dakula an pangangaipo para sa mga parahayag kan Kahadean. An iba pa nag-adal nin ibang lenguahe tanganing makatabang sa mga tawong nagtataram nin ibang lenguahe. Minsan ngani puedeng magin depisil an pagpaoswag kan satong ministeryo, nagbubunga iyan nin abundang bendisyon, asin tibaad dakol pa an matabangan niato na “makaabot sa tamang kaaraman dapit sa katotoohan.”—1 Tim. 2:3, 4; 2 Cor. 9:6.
Mga Halimbawa sa Biblia na Dapat Sunodon
15, 16. Kiisay na mga halimbawa an puede niatong arogon kun dapit sa pagigin maigot na mga parasunod kan Cristo?
15 Paano naghimate an nagkapirang nagin apostol kan apodon sinda ni Cristo na magin mga parasunod nia? Mapadapit ki Mateo, an pagkasaysay nagsasabi: “Pakabaya sa gabos na bagay sia buminuhat asin nagsunod sa saiya.” (Luc. 5:27, 28) Manongod ki Pedro asin Andres, na naninira kaidto, mababasa niato: “Tolos-tolos na binayaan ninda an mga hikot, dangan nagsunod sa saiya.” Sunod na naheling ni Jesus si Santiago asin Juan, na nagpapakarhay kan saindang mga hikot kaiba kan saindang ama. Ano an nagin reaksion ninda sa imbitasyon ni Jesus? “Tolos-tolos na binayaan an sakayan asin an saindang ama, sinda nagsunod sa saiya.”—Mat. 4:18-22.
16 An saro pang marahay na halimbawa iyo si Saulo, na nagin si apostol Pablo. Minsan ngani dati siang panatikong parapersegir sa mga parasunod ni Cristo, sia nagbago asin nagin “sarong piniling lalagan” tanganing magdara kan ngaran ni Cristo. “Tolos-tolos sa mga sinagoga pinonan [ni Pablo na] ihulit si Jesus, na an Sarong ini iyo an Aki nin Dios.” (Gibo 9:3-22) Asin sa ibong kan pangangaipo nia na tagalan an grabeng kasakitan asin persekusyon, nungkang nawara an kaigotan ni Pablo.—2 Cor. 11:23-29; 12:15.
17. (a) Ano an minamawot nindo kun mapadapit sa pagsunod sa Cristo? (b) Anong mga bendisyon an nakakamtan niato huli sa paggibo kan kabotan ni Jehova sa bilog niatong puso asin kosog?
17 Siertong gusto niato na arogon an marahay na halimbawa kan mga disipulong iyan asin maghimate tolos saka dai mag-alangan. (Heb. 6:11, 12) Anong mga bendisyon an nakakamtan niato mantang padagos niatong hinihingoa na maigot asin lubos na sunodon an Cristo? Naeeksperyensiahan niato an tunay na kaogmahan sa paggibo kan kabotan nin Dios asin an pagkakontento na minagikan sa pag-ako nin dagdag na mga pribilehio nin paglilingkod asin paninimbagan sa kongregasyon. (Sal. 40:8; basahon an 1 Tesalonica 4:1.) Iyo, mantang pinagmamaigotan nanggad niatong sunodon an Cristo, nagkakamit kita nin abunda asin nagdadanay na bendisyon arog kan katoninongan nin isip, pagkakontento, pag-oyon nin Dios, asin kan paglaom na mabuhay na daing katapusan.—1 Tim. 4:10.
Nagigirumdoman daw Nindo?
• Anong importanteng gibohon an itinao sa sato, asin paano niato maninigong mansayon iyan?
• Sa anong tendensia nin tawo kita dapat na mag-ingat, asin taano?
• Anong sadiosan na pag-ebalwar an maninigo niatong gibohon?
• Ano an makakatabang sa sato na padagos na sunodon an Cristo?
[Mga Hapot Para sa Pag-adal]
[Kahon/Ritrato sa pahina 27]
Ano an Makakatabang sa Saindo na Padagos na Sunodon an Cristo?
▪ Basahon an Tataramon nin Dios aroaldaw, asin horophoropon an binabasa nindo.—Sal. 1:1-3; 1 Tim. 4:15.
▪ Parateng mamibi para sa suporta asin paggiya kan espiritu nin Dios.—Zac. 4:6; Luc. 11:9, 13.
▪ Makiasosyar sa mga nagpapaheling nin odok sa pusong kaigotan sa ministeryo.—Tal. 13:20; Heb. 10:24, 25.
▪ Midbidon an pagkaapurado kan panahon na kinabubuhayan niato.—Efe. 5:15, 16.
▪ Magin mapag-isip dapit sa grabeng mga epekto nin ‘pagsayuma.’—Luc. 9:59-62.
▪ Regular na horophoropon an saindong panuga nin pagdusay asin an abundang bendisyon na resulta kan paglilingkod ki Jehova saka kan bilog na pusong pagsunod sa Cristo.—Sal. 116:12-14; 133:3; Tal. 10:22.