Nagigirumdoman daw Nindo?

Napahalagahan daw nindo an pagbasa kan dai pa sana nahahaloy na mga isyu kan An Torrengbantayan asin The Watchtower? Helingon kun masisimbag nindo an minasunod na mga hapot:

• Taano ta kinaipuhan na magadan an Mesiyas?

Pinatunayan kan kagadanan ni Jesus na kaya nin sarong sangkap na tawo na papagdanayon an diosnon na debosyon sa ibong kan pinakagrabeng mga pagbalo. Siring man, binayadan nia an penalidad sa kasalan na minana kan mga aki ni Adan asin iyan an nagbukas kan dalan pasiring sa buhay na daing katapusan.—12/15, pahina 22.

• Ano an makakatabang sa saro na mapagdanay an inomon na de alkohol sa tamang lugar kaiyan?

Makakatabang an pamimibi asin pag-adal sa Biblia. Mahalagang marhay an pagpatalubo nin pagpupugol sa sadiri, pagpadanay kan determinasyon nin saro, asin pagpili nin marahay na mga kaibaiba. An saro na nagdesisyon na uminom maninigong magbugtak nin depinidong mga limitasyon asin makanood na magsabi nin dai.—1/1, pahina 7-9.

• Ano an kaiba sa makahulogan na pakikikomunikar sa mga aki?

Kaiba dian bako sana an pakikipag-olay sa sainda, kundi an paghapot asin mapasensiang paghinanyog sa saindang mga simbag. Napatunayan nin dakol na an mga oras nin pagkakan marahay na oportunidad para sa komunikasyon.—1/15, pahina 18-19.

• Si Jehova sangkap, kaya taano ta nakakamate sia nin pagbasol?

Kun beses, nagbabago an saboot nin Dios sa mga tawo. Halimbawa, labi sa sarong beses na an mga Israelita nagbaya ki Jehova asin nagsunod sa ibang mga dios. Sa mga panahon na iyan, dai sinda prinotehiran ni Jehova. Minsan siring, kan magsolsol an banwaan huli sa saindang kasalan asin mamibi sa Dios para sa tabang, nagbago an saboot nia sa sainda, o ‘nakamate sia nin pagbasol.’ (Hok. 2:18)—2/1-E, pahina 21.

• Sa anong mga kamugtakan puedeng pag-isipan an pagpabautismo giraray?

Puede iyan kun sa panahon kan bautismo, an saro igwa nin sekretong pamumuhay o may ginigibo na puede nia kutanang ikatiwalag kun sia balido nang nabautismohan.—2/15, pahina 22.

• Ano an tolong salang pangangatanosan na ginagamit nin nagkapira dapit sa pandadaya?

Ipinapangatanosan nin nagkapira na puede man an paghabon huli ta dukha sinda. An iba nangangatanosan paagi sa pagsabing, “Ginigibo man iyan nin gabos.” Asin an nagkapira na nakakua nin mahalagang mga bagay asin sinadiri iyan nangangatanosan, “Kun siisay an makakua, saiya na iyan.” Dai inooyonan kan Biblia an arin man sa mga pangangatanosan na iyan.—3/1-E, pahina 12-14.

• Sa parabola ni Jesus dapit sa trigo asin mga doot, ano an irinerepresentar kan pagsabwag, o pagtanom, kan marahay na banhi?

An Aki nin tawo, si Jesus, nag-andam kan oma durante kan ministeryo nia sa daga. Poon kan Pentecostes 33 C.E., an marahay na banhi ikinasabwag kan an mga Kristiano lahidan bilang mga aki nin Dios, an mga aki kan Kahadean.—3/15, pahina 20.

• Sa parabola ni Jesus, paano dinadara sa tambobong ni Jehova an simbolikong trigo? (Mat. 13:30)

An kaotoban kaiyan luminawig sa laog nin sarong peryodo nin panahon durante kan pagtatapos kan sistema nin mga bagay. An linahidan na mga aki kan Kahadean, an simbolikong trigo, dinadara sa tambobong ni Jehova kun dinadara sinda sa ibinalik sa dati na Kristianong kongregasyon o kun akoon na ninda an saindang langitnon na balos.—3/15, pahina 21-22.

• Siisay an nagdeterminar kan opisyal na lista nin mga libro na minabilog sa Kristianong Griegong Kasuratan?

Bakong konsilyo kan iglesia o namomoon sa relihion. Imbes, namidbid kan tunay na mga Kristiano, paagi sa paggiya kan banal na espiritu nin Dios, an mga kasuratan na talagang ipinasabong. Kaoyon ini kan katunayan na an “pakabatid sa ipinasabong na mga tataramon” saro sa mga balaog kan espiritu na paggibo nin mga milagro na itinao kaidtong enot na mga dekada kan Kristianong kongregasyon. (1 Cor. 12:4, 10)—4/1, pahina 28.