Tinotogotan daw Nindo si Jehova na Hapoton Kamo?

AN Biblia may ginatos na hapot na minataros sa kairaroman kan puso. Sa katunayan, si Jehova Dios mismo naggamit nin mga hapot tanganing magtokdo nin importanteng mga katotoohan. Halimbawa, naggamit si Jehova nin nagkapirang hapot kan pinapatanidan si Cain na itanos an saiyang kapahapahamak na paggawe. (Gen. 4:6, 7) May mga panahon man na an sarong hapot hale ki Jehova igo na tanganing pahiroon an saro na gumibo nin positibong aksion. Kan madangog si Jehova na maghapot: “Siisay an sakong susugoon, asin siisay an maduman para sa samo?” si propeta Isaias nagsimbag: “Uya ako! Sugoa ako.”—Isa. 6:8.

Si Jesus, an Dakulang Paratokdo, nagin epektibo man sa paggamit nin mga hapot. Manonompongan sa mga Ebanghelyo an labing 280 kan mga hapot ni Jesus. Minsan ngani may mga pangyayaring naggamit sia nin mga hapot tanganing pasilensiohon an mga nagkikritika sa saiya, parateng marhay na an saiyang katuyohan iyo na mataros an puso kan mga naghihinanyog sa saiya, na pinapahiro sinda na horophoropon an saindang espirituwal na kamugtakan. (Mat. 22:41-46; Juan 14:9, 10) Siring man, si apostol Pablo, na nagsurat nin 14 libro kan Kristianong Griegong Kasuratan, naggamit nin nangongombensir na mga hapot. (Roma 10:13-15) Halimbawa, an surat nia sa mga taga Roma igwa nin kadakol na hapot. An mga hapot ni Pablo nagpahiro sa saiyang mga parabasa na pahalagahan “an rarom kan mga kayamanan asin kadonongan patin kaaraman nin Dios.”—Roma 11:33.

May mga hapot na naghahagad nin berbal na simbag. May mga hapot man na may katuyohan na pukawon an mas hararom na saboot, asin nakarekord sa mga Ebanghelyo an paorootrong paggamit ni Jesus kan arog kaining mga hapot. Sa sarong pangyayari, pinapag-ingat ni Jesus an saiyang mga disipulo: “Magmaan kamo sa lebadura kan mga Fariseo asin sa lebadura ni Herodes,” an boot sabihon, an saindang pagsaginsagin asin falsong mga katokdoan. (Mar. 8:15; Mat. 16:12) Dai iyan nasabotan kan mga disipulo ni Jesus asin sinda nagpoon na magpasuruhay dapit sa pagkalingaw nindang magdara nin tinapay. Mangnoha an paggamit ni Jesus nin mga hapot sa suminunod na halipot na pag-oolay. “Sia nagsabi sa sainda: ‘Tadaw ta nagpapasuruhay kamo huli sa dai nindo pagkaigwa nin tinapay? Dai pa daw nindo nasasabotan asin nakukua an kahulogan? An saindo daw na puso mangurol sa pagsabot? “Minsan ngani may mga mata, dai daw nindo naheheling; asin minsan ngani may mga talinga, dai daw nindo nadadangog?” . . . Dai pa daw nindo nakukua an kahulogan?’” An mga hapot ni Jesus may katuyohan na papag-isipon an saiyang mga disipulo, na pinapahiro sinda na maghorophorop sa tunay na kahulogan kan saiyang mga tataramon.—Mar. 8:16-21.

“Hahapoton Taka”

Si Jehova Dios naggamit nin mga hapot tanganing itanos an kaisipan kan lingkod niang si Job. Paagi sa dakol na hapot, itinokdo ni Jehova ki Job an manongod sa saiyang kasaditan kun ikokomparar sa Kaggibo sa saiya. (Job, kap. 38-41) Naglaom daw si Jehova nin berbal na simbag sa kada saro sa mga hapot na idto? Posibleng marhay na dai. An mga hapot na siring kan “Haen ka kan patugmadon ko an daga?” minalataw na may katuyohan na pukawon an kaisipan asin emosyon ni Job. Pakatapos kan nagkapira sa mapuersang mga hapot na iyan, si Job haros dai na makataram. An nasabi sana nia: “Ano an isisimbag ko sa saimo? Ibinugtak ko an sakuyang kamot sa sakuyang ngoso.” (Job 38:4; 40:4) Nasabotan ni Job an punto asin sia nagpakumbaba. Minsan siring, si Jehova dai sana basta nagtotokdo ki Job na magin mapakumbaba. Itinanos man an kaisipan ni Job. Sa anong paagi?

Minsan ngani si Job “lalaking daing katuyawan asin tanos,” kun beses an saiyang mga tataramon naghahayag nin salang punto de vista, na narisa ni Eliu kan sagweon nia si Job huli sa “pagpahayag nia na matanos an saiyang sadiring kalag imbes na an Dios.” (Job 1:8; 32:2; 33:8-12) Sa siring, itinanos man kan mga hapot ni Jehova an  pakasabot ni Job. Sa pagtaram ki Job hale sa bagyong doros, an Dios nagsabi: “Siisay ining nagpapalibog kan hatol paagi sa mga tataramon na mayo nin kaaraman? Hagkosi tabi an saimong habayan na siring sa sarong pusog na lalaki, asin hahapoton taka, asin magsabi ka sa sako.” (Job 38:1-3) Dangan, paagi sa mga hapot, dinara ni Jehova an atension sa saiyang daing limiteng kadonongan asin kapangyarihan siring kan ipinapaheling kan saiyang makangangalas na mga gibo. Huling naliwanagan si Job, ini nakatabang sa saiya na magtiwala sa paghusgar asin paagi nin paghiro ni Jehova nin orog kisa kasuarin man. Nakakapukaw nanggad nin paggalang na eksperyensia para ki Job—na hapoton kan mismong Makakamhan sa Gabos na Dios!

Kun Paano Niato Puedeng Togotan si Jehova na Hapoton Kita

Kumusta man kita? Puede man daw kitang makinabang sa mga hapot na yaon sa Biblia? Puede nanggad! An pagtao niato nin panahon na horophoropon an mga hapot na iyan puedeng magtao sa sato nin abundang espirituwal na balos. An nakakataros na mga hapot sa Tataramon nin Dios nakakakontribwir sa pagkaepektibo kaiyan. Tunay nanggad, “an tataramon nin Dios . . . mapuersa . . . asin nakakabatid kan mga kaisipan asin intension kan puso.” (Heb. 4:12) Minsan siring, tanganing makinabang nin lubos, kaipuhan niatong ipanongod sa satong sadiri an mga hapot na iyan, na garo baga personal kitang hinahapot ni Jehova. (Roma 15:4) Estudyaran niato an nagkapirang halimbawa.

“Dai daw magibo kan tama an Hokom kan bilog na daga?” (Gen. 18:25) Ibinangon ni Abraham ki Jehova an retorikong hapot na ini kan panahon nin paghokom nin Dios sa Sodoma asin Gomorra. Dai man lamang hinona ni Abraham na si Jehova mahiro nin daing hustisya—na gadanon an matanos kaiba kan maraot. An hapot ni Abraham naghahayag kan saiyang hararom na pagtubod sa katanosan ni Jehova.

Ngonyan, an nagkapira tibaad may tendensiang magbanabana manongod sa mga paghokom ni Jehova sa ngapit, arog baga sa kun sairisay talaga an makakaligtas sa Armagedon o kun sairisay an bubuhayon liwat. Imbes na magpadisturbo sa siring na mga kaisipan, puede niatong girumdomon an hapot ni Abraham. Kun nasasabotan niato na si Jehova sarong maboot na Ama sa langit asin kun igwa kita nin lubos na kompiansa sa saiyang hustisya asin pagkaherak, siring kan ginibo ni Abraham, dai masasayang an satong panahon saka kosog sa dai kinakaipuhan na paghadit, nakakapangluyang pagduda, asin daing saysay na debate.

“Siisay sa saindo an sa paghadit makakadagdag nin sarong sokol sa siko sa lawig kan saiyang buhay?” (Mat. 6:27) Sa pakikipag-olay sa dakulang grupo na kinabibilangan kan saiyang mga disipulo, ginamit ni Jesus an hapot na ini tanganing idoon an pangangaipo nindang ibugtak an saindang sadiri sa mamomoton na mga kamot ni Jehova. An huring mga aldaw kan maraot na sistemang ini nin  mga bagay nagigin dahelan nin dakol na kahaditan, alagad an pagparaisip kaiyan dai magpapalawig kan satong buhay o magpaparahay kan kalidad kaiyan.

Kada naghahadit kita manongod sa satong sadiri o sa mga namomotan niato, makakatabang sa sato na magkaigwa nin tamang pagmansay sa mga kahaditan niato kun isasaisip niato an hapot ni Jesus. Makakatabang iyan sa sato na dai na magparahadit asin magparaisip nin negatibo na nakakapangluya sa sato sa mental, emosyonal, asin pisikal. Siring kan sinierto ni Jesus sa sato, an satong langitnon na Ama, na nagpapakakan sa mga gamgam sa langit asin naggugubing sa mga pananom sa oma, lubos na nakakaaram kan mga kaipuhan niato.—Mat. 6:26-34.

“Puede daw na an tawo magtambak nin kalayo sa saiyang daghan alagad dai magkatorotong an saiyang mga gubing?” (Tal. 6:27) Kaiba sa enot na siyam na kapitulo kan Talinhaga an haralipot na diskurso nin sarong ama na nagtatao nin praktikal na kadonongan sa saiyang aki. An hapot na kinotar sa enotan nanonongod sa mapait na mga resulta nin pagsambay. (Tal. 6:29) Kun naririparo niato na kita nakikipaggitilan o nagpaparaisip nin ano man na salang pagmawot sa sekso, an hapot na ini maninigong magin siring sa tanog nin alarma sa satong isip. Sa pundamental, puede ining ihapot kada nasusugotan an saro na gumibo nin ano man na bagay na bakong madonong. Malinaw nanggad na idinodoon kaiyan an praktikal na prinsipyo sa Biblia: ‘Aanihon nindo an itinatanom nindo’!—Gal. 6:7.

“Siisay ka tanganing maghokom sa oripon nin iba?” (Roma 14:4) Sa saiyang surat sa mga taga Roma, tinokar ni Pablo an mga problemang naglataw sa kongregasyon kan enot na siglo. An nagkapirang Kristiano, huling laen-laen na kultura an pinaghalean, may tendensiang husgaran an mga desisyon asin ginigibo kan saindang mga kapagtubod. An hapot ni Pablo nagpagirumdom sa sainda na akoon an lambang saro asin ipabaya ki Jehova an paghusgar.

Siring man ngonyan, laen-laen an kamugtakan sa buhay kan mga lingkod ni Jehova. Pero, tiniripon kita ni Jehova sa mahalagang marhay na pagkasararo. Nakakatabang daw kita sa pagkasararong iyan? Kun kita may tendensiang magpahayag tolos nin dai pag-oyon sa ginigibo nin sarong tugang sono sa konsensia nia, magigin madonong nanggad na ipanongod niato sa sato mismo an hapot ni Pablo na nasa enotan!

Mas Napaparani Kita ki Jehova Huli sa mga Hapot

An pira sanang halimbawang ini nagpapatunay sa puersa kan mga hapot na yaon sa Tataramon nin Dios. An pagkonsiderar sa konteksto kan kada hapot makakatabang sa sato na gumibo nin praktikal na aplikasyon sa sato mismong mga kamugtakan. Asin mantang binabasa niato an Biblia, maheheling niato an dugang pang nakakatabang na mga hapot.—Helingon an kahon sa pahina 14.

Kun an nakakataros na mga hapot na nasa Tataramon nin Dios tinotogotan niato na makaimpluwensia nanggad sa sato, makakatabang iyan na ikaoyon niato an satong isip asin puso sa matanos na mga dalan ni Jehova. Pakatapos na hapoton sia ni Jehova, si Job nagpahayag: “Gikan sa iba nabaretaan taka, alagad ngonyan naheheling ka kan sako mismong mata.” (Job 42:5) Iyo, si Jehova orog na nagin tunay para ki Job, na garo baga Sia naheheling nia mismo. Kan huri, ipinahayag iyan ni disipulo Santiago nin arog kaini: “Rumani kamo sa Dios, asin sia marani sa saindo.” (Sant. 4:8) Logod na togotan niato an lambang kabtang kan Tataramon nin Dios, kaiba an mga hapot dian, na makatabang sa sato na umoswag sa espirituwal asin ‘maheling’ si Jehova nin orog pa kalinaw!

[Kahon sa pahina 14]

Paano an paghapot sa sadiri kan mga hapot na ini makakatabang sa saimo na magkaigwa kan pagmansay ni Jehova sa mga bagay-bagay?

▪ “Igwa daw nin dakulang pagkaogma si Jehova sa mga dolot na tinotong asin mga atang na arog kan sa pagkuyog sa tingog ni Jehova?”—1 Sam. 15:22.

▪ “An Saro na nagpoporma kan mata, dai daw sia makakaheling?”—Sal. 94:9.

▪ “An paghanap nin mga tawo sa sadiri nindang kamurawayan, kamurawayan daw iyan?”—Tal. 25:27.

▪ “Tama daw na ika maanggot nin labi-labi?”—Jon. 4:4.

▪ “Ano an magigin pakinabang para sa sarong tawo kun makamtan nia an bilog na kinaban alagad mawara man an saiyang kalag?”—Mat. 16:26.

▪ “Siisay an mapasuhay sa sato sa pagkamoot kan Cristo?”—Roma 8:35.

▪ “Ano an yaon sa saimo na dai mo inako?”—1 Cor. 4:7.

▪ “Ano an pakikisumaro kan liwanag sa diklom?”—2 Cor. 6:14.

[Ritrato sa pahina 15]

Ano an nanodan ni Job sa mga hapot ni Jehova?