Dai Nindo Pagpamondoon an Banal na Espiritu ni Jehova

“Dai nindo pagpamondoon an banal na espiritu nin Dios, na paagi kaiyan tinatakan kamo.”—EFE. 4:30.

1. Ano an ginibo ni Jehova para sa minilyon na tawo, asin ano an paninimbagan ninda?

MAY ginibo si Jehova na espesyal na bagay para sa minilyon na nabubuhay sa maribok na kinaban na ini. Pinagin posible nia na makarani sinda sa saiya paagi sa saiyang bugtong na Aki, si Jesu-Cristo. (Juan 6:44) Saro ka sa sainda kun ika nagdusay sa Dios asin namumuhay kaoyon kaiyan. Bilang saro na nabautismohan sa ngaran kan banal na espiritu, igwa ka kan paninimbagan na gumawe kaoyon kan espiritung iyan.—Mat. 28:19.

2. Anong mga hapot an pag-oolayan niato?

² Kita na “nagtatanom para sa espiritu” nagsusulog kan bagong personalidad. (Gal. 6:8; Efe. 4:17-24) Alagad si apostol Pablo naghatol asin nagpatanid sa sato na dai pagpamondoon an banal na espiritu nin Dios. (Basahon an Efeso 4:25-32.) Maingat niatong sisiyasaton ngonyan an hatol kan apostol. Ano an boot sabihon ni Pablo kan sinambit  nia an pagpamondo sa espiritu nin Dios? Paano iyan puedeng magibo nin saro na nagdusay ki Jehova? Asin paano niato malilikayan na mapamondo an espiritu ni Jehova?

Kun Ano an Boot Sabihon ni Pablo

3. Paano nindo ipapaliwanag an kahulogan kan mga tataramon sa Efeso 4:30?

³ Enot sa gabos, mangnohon an sinabi ni Pablo sa Efeso 4:30. Sia nagsurat: “Dai nindo pagpamondoon an banal na espiritu nin Dios, na paagi kaiyan tinatakan kamo para sa aldaw nin pagbutas paagi sa pantubos.” Habo ni Pablo na isapeligro kan saiyang mga kapagtubod an espirituwalidad ninda. An espiritu ni Jehova iyo an nagpangyari na ‘matatakan sinda para sa aldaw nin pagbutas paagi sa pantubos.’ Kaidto asin sagkod ngonyan, an banal na espiritu nin Dios sarong tatak, o patienot na “garantiya para sa maabot,” na itinao sa mga linahidan na pinagdanay an saindang integridad. (2 Cor. 1:22) An tatak nangangahulogan na sinda sadiri nin Dios asin mag-aako nin langitnon na buhay. May bilang na 144,000 an mga natatakan sa katapustapusi.—Kap. 7:2-4.

4. Taano ta mahalagang likayan na mapamondo an espiritu nin Dios?

⁴ An pagpamondo sa espiritu puedeng iyo an magin enot na lakdang sa lubos na pagkawara kan impluwensia kan aktibong puersa nin Dios sa buhay nin Kristiano. An sinabi ni David pagkatapos niang magkasala may koneksion ki Bat-seba nagpaparisa na posible ini. May pagsolsol na nakimaherak si David ki Jehova: “Dai mo ako isikwal sa atubangan mo; asin dai mo logod paghaleon sa sakuya an saimong banal na espiritu.” (Sal. 51:11) Solamenteng an mga linahidan na nagin ‘maimbod dawa sagkod sa kagadanan’ an mag-aako kan “korona” nin imortal na buhay sa langit. (Kap. 2:10; 1 Cor. 15:53) An banal na espiritu kaipuhan man kan mga Kristianong may daganon na paglaom tanganing mapagdanay an integridad ninda sa Dios asin, bilang resulta, mag-ako kan saiyang regalo na buhay basado sa pagtubod sa atang na pantubos ni Cristo. (Juan 3:36; Roma 5:8; 6:23) Huli kaini, kita gabos dapat na mag-ingat na dai mapamondo an banal na espiritu ni Jehova.

Paano Puedeng Mapamondo nin Sarong Kristiano an Espiritu?

5, 6. Paano puedeng mapamondo nin sarong Kristiano an espiritu ni Jehova?

⁵ Bilang nagdusay na mga Kristiano, malilikayan niato na mapamondo an espiritu. Posible ini kun ‘padagos kitang naglalakaw asin nabubuhay segun sa espiritu,’ huling paagi kaiyan dai kita madadaog kan salang mga pagmawot kan laman asin dai niato ipapabanaag an bakong diosnon na mga ugale. (Gal. 5:16, 25, 26) Alagad puede iyan na magbago. Puede niatong mapamondo an espiritu nin Dios kun papabayaan niato an satong sadiri na luway-luway na maanod, na tibaad haros dai naririsa, pasiring sa paggawe na kinokondenar kan Tataramon nin Dios na ipinasabong kan espiritu.

⁶ Kun padagos kitang mahiro kontra sa paggiya kan banal na espiritu, mapapamondo niato iyan asin si Jehova, an Gikanan kan espiritung iyan. Ipapaheling sa sato kan pagsiyasat sa Efeso 4:25-32 kun paano kita maninigong gumawe, asin makakatabang iyan sa sato na likayan na mapamondo an espiritu nin Dios.

Kun Paano Malilikayan na Mapamondo an Espiritu

7, 8. Ipaliwanag kun taano ta dapat kitang magtaram nin totoo.

⁷ Dapat na magtaram kita nin totoo. Sa Efeso 4:25, si Pablo nagsurat: “Ngonyan na nahale na nindo an kaputikan, an lambang saro sa saindo magtaram nin katotoohan sa saiyang kapwa, huli ta kita mga miembro na kabtang kan lambang saro.” Huling nagkakasararo kita bilang “mga miembro na kabtang kan lambang saro,” maninigo na dai nanggad kita magin tuso ni tuyong magprobar na dayaon an satong mga kapwa parasamba, huli ta garo man sana iyan pagputik sa sainda. An siisay man na danay na naggigibo kaiyan mararaot an relasyon sa Dios.—Basahon an Talinhaga 3:32.

⁸ An mapandayang mga tataramon asin gibo puedeng makaraot sa pagkasararo kan kongregasyon. Kun siring, maninigo kitang magin arog kan mapagtitiwalaan na propetang si Daniel, na sa saiya mayong maraot na naheling an iba. (Dan. 6:4) Asin dapat niatong isaisip an sadol ni Pablo  sa mga Kristianong may langitnon na paglaom na an lambang miembro kan “hawak kan Cristo” kabtang kan lambang saro saka kaipuhan na magdanay na kasaro kan linahidan na mga parasunod na nagtataram nin totoo. (Efe. 4:11, 12) Kun naglalaom kita na mabuhay sagkod lamang sa Paraisong daga, dapat man kitang magtaram kan katotoohan, na paagi kaiyan nakakakontribwir kita sa satong pambilog na kinaban na pagkasararo bilang magturugang.

9. Taano ta mahalagang marhay na sunodon niato an Efeso 4:26, 27?

⁹ Dapat na tumangon niato an Diablo, na dai sia tinatawan nin oportunidad na raoton an satong espirituwalidad. (Sant. 4:7) An banal na espiritu nakakatabang sa sato na labanan si Satanas. Halimbawa, magigibo niato iyan kun lilikayan niato na maanggot nin daing kontrol. Si Pablo nagsurat: “Maanggot kamo nin grabe, alagad ta dai kamo magkasala; dai nindo pagpasolnopon an saldang na kamo may kaanggotan, ni tawan man nin lugar an Diablo.” (Efe. 4:26, 27) Kun rasonable sanang maanggot kita, an tolos na pamimibi nin silensio makakatabang sa sato na magin “malipot an espiritu,” na nagpapaheling nin pagpupugol sa sadiri imbes na humiro sa paaging mapapamondo an espiritu nin Dios. (Tal. 17:27) Kaya, dai kita magdanay na may kaanggotan asin dai niato tawan nin oportunidad si Satanas na tentaran kitang gumibo nin maraot. (Sal. 37:8, 9) An sarong paagi na malabanan sia iyo an pagresolber tolos, kaoyon kan hatol ni Jesus, sa mga dai pagkairintindihan.—Mat. 5:23, 24; 18:15-17.

10, 11. Taano ta dapat na dai kita maghabon o gumibo nin bakong sadiosan?

¹⁰ Dapat na dai kita magpadara sa sugot na maghabon o magin bakong sadiosan. Mapadapit sa paghabon, si Pablo nagsurat: “An parahabon dai na maghabon, kundi imbes magpagal sia, na naggigibo nin marahay na gibo paagi sa saiyang mga kamot, tanganing may ikatao sia sa nangangaipo.” (Efe. 4:28) Kun an sarong nagdusay na Kristiano maghabon, sa katunayan ‘inaatake nia an ngaran nin Dios’ paagi sa pagtao nin katuyawan dian. (Tal. 30:7-9) Dawa an kadukhaan bakong makatanosan na rason na maghabon. Aram kan mga namomoot sa Dios asin kapwa na nungkang magigin tama an paghabon.—Mar. 12:28-31.

¹¹ Dai sana sinabi ni Pablo kun ano an dai niato maninigong gibohon; sinabi nia kun ano an maninigo niatong gibohon. Kun kita namumuhay asin naglalakaw segun sa banal na espiritu, magpapagal kita tanganing maasikaso an satong pamilya asin ‘may ikatao man sa nangangaipo.’ (1 Tim. 5:8) Si Jesus asin an saiyang mga apostol nagtagama nin pondo tanganing tabangan an mga dukha, alagad kinua kan parapasaloib na si Judas Iscariote an iba kaiyan. (Juan 12:4-6) Siertong dai sia giniyahan kan banal na espiritu. Kita na ginigiyahan kan espiritu nin Dios ‘minagawe nin sadiosan sa gabos na bagay,’ arog ni Pablo. (Heb. 13:18) Sa siring, linilikayan niato na mapamondo an banal na espiritu ni Jehova.

 Iba Pang Paagi na Malilikayan na Mapamondo an Espiritu

12, 13. (a) Arog kan ipinapaheling sa Efeso 4:29, anong klaseng pananaram an maninigo niatong likayan? (b) Ano an maninigong magin paagi nin pagtaram niato?

¹² Dapat kitang mag-ingat sa satong pananaram. Si Pablo nagsabi: “Dai kamo magpaluwas nin lapang tataramon sa saindong ngoso, kundi ano man na tataramon na marahay para sa pagpakosog sono sa pangangaipo, tangani na ikatao kaiyan an paborable sa mga nagdadangog.” (Efe. 4:29) Sa giraray, dai sana sinabi kan apostol kun ano an dai niato maninigong gibohon; sinabi nia sa sato kun ano an maninigo niatong gibohon. Sa impluwensia kan espiritu nin Dios, mapapahiro kita na ‘magtaram nin marahay para sa pagpakosog tangani na ikatao kaiyan an paborable sa mga nagdadangog.’ Dugang pa, dai kita maninigong magpaluwas nin “lapang tataramon” sa satong ngoso. An Griegong tataramon na trinadusir na ‘lapa’ ginagamit tanganing iladawan an nalalapang prutas, sira, o karne. Kun paanong nababalde kita sa siring na kakanon, naoongis man kita sa pananaram na ibinibilang nin Dios na maraot.

¹³ An satong pananaram maninigo na disente, maboot, asin “tinimplahan nin asin.” (Col. 3:8-10; 4:6) Maninigo na marisa nin mga tawo na laen kita kun nadadangog ninda kitang nagtataram. Kaya tabangan niato an iba paagi sa pagtaram nin “marahay para sa pagpakosog.” Asin logod na an pagmate niato arog kan sa salmista na nag-awit: “Logod na an mga tataramon kan sakong ngoso asin an paghorophorop kan sakong puso magin nakakaogma sa saimo, O Jehova na sakong Gapo asin sakong Paratubos.”—Sal. 19:14.

14. Segun sa Efeso 4:30, 31, dapat na mayo kita nin ano?

¹⁴ Dapat na mayo kita nin kapaitan, grabeng kaanggotan, mapang-abusong pananaram, asin gabos na karatan. Pagkatapos na magpatanid tumang sa pagpamondo sa espiritu nin Dios, si Pablo nagsurat: “Magkaharale na sa saindo an gabos na kapaitan na maraot an kamawotan asin kaanggotan asin grabeng pagkaanggot asin sirilyakan patin mapang-abusong pagtaram kaiba an gabos na karatan.” (Efe. 4:30, 31) Bilang bakong sangkap na mga tawo, kaipuhan niato gabos na magmaigot tanganing makontrol an satong mga kaisipan asin paghiro. Kun mapadara kita sa ‘kapaitan na maraot an kamawotan asin sa kaanggotan asin sa grabeng pagkaanggot,’ mapapamondo niato an espiritu nin Dios. Totoo man iyan kun padagos niatong ginigirumdom an mga salang nagibo sa sato, naghihinanakit kita, asin dai kita nakikipag-ulian sa mga nakakolog sa sato. Kun poponan niato na dai intindihon an hatol kan Biblia, tibaad makapatalubo kita nin mga ugale na puedeng magresulta sa pagkakasala sa espiritu asin tibaad makaeksperyensia kita nin kapahapahamak na mga epekto.

15. Kun may maraot na nagibo sa sato, ano an maninigo niatong gibohon?

¹⁵ Kaipuhan kitang magin maboot, mapagmalasakit, asin mapagpatawad. Si Pablo nagsurat: “Magin maboot sa lambang saro, mapagmalasakit sa mamomoton na paagi, na lubos na nagpapatarawadtawadan kun paanong an Dios man lubos na nagpatawad sa saindo paagi ki Cristo.” (Efe. 4:32) Dawa kun nakolgan kitang gayo huli sa maraot na nagibo sa sato, magpatawad kita, arog nin Dios. (Luc. 11:4) Halimbawa, sarong kapagtubod an nagsabi nin negatibo manongod sa sato. Tanganing resolberan an mga bagay-bagay, dinolok niato sia. Sia namondo talaga asin naghagad nin tawad. Pinatawad niato sia, alagad may dapat pa kitang gibohon. “Dai ka magbalos o magtanom nin raot nin  boot sa mga aki kan saimong banwaan,” an sabi sa Levitico 19:18, “asin kamotan mo an saimong kapwa nin siring sa saimo man sana. Ako si Jehova.”

Kaipuhan an Pagpuka

16. Magtao nin halimbawa na nagpapaheling na tibaad kaipuhan niatong gumibo nin mga pagliliwat tanganing dai mapamondo an espiritu ni Jehova.

¹⁶ Dawa sa pribado, puede kitang matentaran na gumibo nin bagay na nakakapamondo sa Dios. Halimbawa, tibaad nagdadangog sa kuestionableng musika an sarong tugang na lalaki. Nag-abot an panahon na nakonsensia sia huli sa dai nia pag-intindi kan hatol sa Biblia na yaon sa mga publikasyon kan “maimbod asin mapagmansay na oripon.” (Mat. 24:45) Tibaad namibi sia dapit sa problemang ini asin nagirumdoman nia an mga tataramon ni Pablo sa Efeso 4:30. Huling determinado nanggad sia na dai gumibo nin ano man na makakapamondo sa espiritu nin Dios, nagdesisyon sia na likayan an kuestionableng musika poon kaidto. Bebendisyonan ni Jehova an siring na saboot kan tugang. Kun siring, padagos kitang magin mapagbantay na dai mapamondo an espiritu nin Dios.

17. Ano an puedeng mangyari kun bako kitang puka asin mapagngayongayo?

¹⁷ Kun bako kitang puka asin mapagngayongayo, puede kitang madara sa maati o salang gibo na makakapamondo sa espiritu. Huling an banal na espiritu pirmeng ginagamit kan satong langitnon na Ama kaoyon kan saiyang kabotan, kun napapamondo niato iyan, napapamondo niato sia—sarong bagay na siertong dai niato bobooton na magibo. (Efe. 4:30) An mga Judiong eskriba kan enot na siglo nagkasala huling sinabi ninda na hale ki Satanas an mga milagro ni Jesus. (Basahon an Marcos 3:22-30.) An mga kaiwal na iyan ni Cristo ‘naglanghad tumang sa banal na espiritu’ asin sa siring nakagibo nin kasalan na daing kapatawadan. Nungka logod na mangyari iyan sa sato!

18. Paano niato maaaraman na dai kita nakagibo nin kasalan na daing kapatawadan?

¹⁸ Huling habo nanggad niato na makaabot sa kamugtakan na haros magkasala na nin daing kapatawadan, kaipuhan niatong girumdomon an sinabi ni Pablo dapit sa dai pagpamondo sa espiritu. Alagad paano kun nakagibo kita nin magabat na kasalan? Kun kita nagsolsol asin natabangan kan kamagurangan, makakakongklusyon kita na pinatawad na kita nin Dios asin na dai kita nagkasala sa banal na espiritu. Sa tabang nin Dios, malilikayan man niato na mapamondo giraray an espiritu sa ano man na paagi.

19, 20. (a) Ano an nagkapirang bagay na kaipuhan niatong likayan? (b) Maninigo na magin determinado kitang gibohon an ano?

¹⁹ Paagi sa banal na espiritu nin Dios, nag-oorog an pagkamoot, kagayagayahan, asin pagkasararo kan saiyang banwaan. (Sal. 133:1-3) Kun siring, maninigo niatong likayan na mapamondo an espiritu paagi sa pakikilabot sa nakakaraot na tsismis o pagsabi nin mga bagay na makakapaluya kan paggalang sa mga pastor na nombrado nin espiritu. (Gibo 20:28; Jud. 8) Imbes, dapat niatong paorogon an pagkasararo asin paggalang sa lambang saro sa kongregasyon. Maninigo nanggad na dai kita mag-engganyar nin paggrupogrupo paagi sa pagporma nin eksklusibong mga grupo sa banwaan nin Dios. Si Pablo nagsurat: “Sinasadol ko kamo, mga tugang, paagi sa ngaran kan satong Kagurangnan na Jesu-Cristo na kamo gabos maninigong magtaram na may pagkaoroyon, asin na dai magkaigwa nin pagkabaranga dian sa saindo, kundi na kamo lubos na magkasararo sa saro sanang isip asin sa saro sanang pag-iisip.”—1 Cor. 1:10.

²⁰ Si Jehova andam asin may kakayahan na tabangan kitang malikayan na mapamondo an saiyang espiritu. Padagos niatong hagadon sa pamibi an banal na espiritu asin magin determinado na dai iyan mapamondo. Padagos logod kitang ‘magtanom para sa espiritu,’ na maigot na hinahagad an paggiya kaiyan ngonyan asin sagkod lamang.

Ano an Isisimbag Nindo?

• Ano an boot sabihon kan pagpamondo sa espiritu nin Dios?

• Paano puedeng mapamondo nin saro na nagdusay ki Jehova an Saiyang espiritu?

• Sa anong mga paagi malilikayan niato na mapamondo an banal na espiritu?

[Mga Hapot Para sa Pag-adal]

[Ritrato sa pahina 30]

Resolberan tolos an mga dai pagkairintindihan

[Ritrato sa pahina 31]

Arin na prutas an pinakaangay na mag-ilustrar sa saimong pananaram?