Magdanay na Makosog sa Espirituwal Mantang Nag-aataman nin May Helang na Kapamilya

PAGKATAPOS na maheling an sarong bukol harani sa gulod ni Kim, na sarong Saksi, nadiskobre na sia may kanser. * “Kan an bukol haleon paagi sa operasyon,” an sabi kan agom niang si Steve, “si Kim nag-agi nin radiotherapy asin chemotherapy. Bilang epekto kan pagbolong na iyan, sia biyong nagluya. Nagin limitadong marhay an saiyang kakayahan na humiro.”

Naiimahinar daw nindo an labi-labing kamondoan ni Steve mantang an saiyang namomotan na agom naheheling niang nasasakitan huli sa nakakapaluyang helang na ini? Tibaad igwa kamo nin dayupot na kapamilya na nasasakitan huli sa nakakapaluyang helang o huli sa mga epekto nin paggurang. (Ecl. 12:1-7) Kun igwa, aram nindo na tanganing epektibong maataman an saindong namomotan, dapat nindong atamanon an saindong sadiri. Kun kamo lumuya sa espirituwal, puedeng magpoon man na maapektaran an saindong emosyon asin pisikal na salud saka tibaad dai na nindo ikatao an suporta na kaipuhan kan saindong kapamilya. Paano nindo mapapagdanay an saindong espirituwal na pagkatimbang mantang inaataman an sarong kapamilya na may helang o may edad na? Igwa daw nin ano man na magigibo an ibang mga miembro kan Kristianong kongregasyon tanganing ipaheling an konsiderasyon sa siring na mga may helang?

Papagdanayon an Pagkatimbang—Paano?

Tanganing mapagdanay an saindong espirituwal na pagkatimbang asin pisikal na salud mantang inaataman an may helang na kapamilya, kaipuhan na madali kamong makibagay asin badyeton an saindong panahon asin kosog. “An kadonongan yaon sa mga hababa an boot,” an sabi kan Talinhaga 11:2. Sa kontekstong ini, an pananaram na “hababa an boot” nangangahulogan na aram nin saro an saiyang mga limitasyon. Tanganing masierto na dai nindo ginigibo an sobra sa kaya nindong gibohon, tibaad kaipuhan nindong siyasaton an saindong iskedyul asin mga paninimbagan.

Si Steve nagpaheling nin kadonongan asin kababaan nin boot paagi sa pagsiyasat giraray kan mga  trabaho nia. Apuera sa saiyang sekular na trabaho, sia naglilingkod bilang parakoordinar kan grupo nin kamagurangan asin paraataman sa paglilingkod sa lokal na kongregasyon kan Mga Saksi ni Jehova sa Ireland. Sia miembro man kan Hospital Liaison Committee sa saiyang lugar. “Si Kim dai noarin man nagreklamo na napapabayaan ko sia huli sa labi-labing atension na itinatao ko sa mga paninimbagan na ini,” an sabi ni Steve. “Alagad aram ko na sobra na sa makakaya ko an sakong ginigibo.” Paano inasikaso ni Steve an situwasyon na iyan? “Pagkatapos nin mapagngayongayong pag-estudyar,” sia nagsabi, “nagdesisyon akong butasan an paglilingkod bilang parakoordinar. Padagos akong naglingkod bilang magurang sa kongregasyon, alagad paagi sa pagtao sa iba kan nagkapira sa sakong mga paninimbagan sa kongregasyon, ikinatao ko ki Kim an panahon asin atension na kaipuhan nia.”

Pag-abot nin panahon, medyo nagrahay an salud ni Kim. Tinurotimbang ni Steve asin Kim an saindang situwasyon, asin sa pagsuportar kan saiyang agom, ikinabalik ki Steve an dati niang mga paninimbagan sa kongregasyon. “Pareho kaming nakanood na an gibohon sana iyo an itinotogot kan mga limitasyon na resulta kan helang,” an paliwanag ni Steve. “Ako nagpapasalamat na marhay ki Jehova huli sa saiyang tabang asin sa sakong agom huli sa daing reklamong pagsuportar nia sa ibong kan maluya niang salud.”

Estudyare man an eksperyensia kan nagbibiaheng paraataman na si Jerry asin kan saiyang agom  na si Maria. Kinaipuhan nindang ibagay an saindang mga pasohan tanganing maataman an saindang gurang nang mga magurang. “Kaming mag-agom parehong may pasohan na maglingkod bilang misyonero sa ibang nasyon,” an sabi ni Maria. “Pero, si Jerry solong aki, asin an saiyang mga magurang kaipuhan na atamanon. Huli kaini, nagdesisyon kaming magdanay sa Ireland tanganing atamanon sinda. Sa paggibo kaiyan, nahimo mi na yaon kami pirme kan maospital an ama ni Jerry bago ini magadan. Ngonyan aroaldaw ming nakakaolay an ina ni Jerry, asin yaon sana kami sa harani kun kaipuhan nia nin tabang. An kongregasyon kan ina ni Jerry nagin matinabang asin mapagsuportar na marhay, kaya nakapagdanay kami sa gibohon na nagbibiahe.”

Kun Paano Makakatabang an Iba

Kan tinotokar kun anong materyal na mga probisyon an maninigong itao sa may edad nang mga babaeng balo sa kongregasyon, si apostol Pablo nagsurat: “Kun an siisay man dai nagsusustento sa mga sadiri nia, asin orog na sa kasararo nia sa harong, sia nagpainda kan pagtubod asin orog pa karaot kisa sa tawong dai nin pagtubod.” Ipinagirumdom ni Pablo sa mga kapwa Kristiano na tanganing an saindang ginigibo magin “makawiwili sa pagheling nin Dios,” dapat nindang asikasohon sa pinansial na paagi an saindang gurang nang mga magurang asin lolo saka lola. (1 Tim. 5:4, 8) Minsan siring, an iba sa kongregasyon puede asin maninigo na magtao nin praktikal na tabang.

Mangnohon an kamugtakan ni Hakan asin Inger, sarong may edad nang mag-agom na nakaistar sa Sweden. “Kan madiskobre na an sakong agom may kanser,” an sabi ni Hakan, “pareho kaming nabigla. Si Inger pirmeng marahay an salud asin makosog. Ngonyan kaipuhan na aroaldaw kaming magpaospital para sa pagbolong, asin may nakakapaluyang epekto man an saiyang bolong. Si Inger danay na nasa harong durante kan peryodong ini, asin kaipuhan ko siang ibanan tanganing atamanon sia.” Paano tinabangan kan lokal na kongregasyon si Hakan asin Inger?

Iinareglo kan kamagurangan sa kongregasyon na an mag-agom magdangog sa Kristianong mga pagtiripon paagi sa telepono. Dugang pa, pirme sindang personal na binibisita asin inaapodan sa telepono kan mga tugang. Sinda nagpapadara man nin mga surat asin kard. “Namatean mi an pagsuportar kan gabos na tugang saka an tabang ni Jehova,” an sabi ni Hakan. “An atension na ini na itinatao sa samo mahalagang marhay sa pagdadanay ming makosog sa espirituwal. Marahay sana ta si Inger naomayan, asin sa giraray nakakaatender na kami sa Kristianong mga pagtiripon sa Kingdom Hall.” Kun ginigibo kan mga miembro kan kongregasyon an saindang makakaya tanganing tabangan an mga kaiba ninda na may helang asin may edad na, pinapatunayan ninda na sinda ‘tunay na mga kaibaiba na mamomoton sa gabos na panahon, asin mga tugang na namumundag para sa oras nin kasakitan.’—Tal. 17:17.

Pinapahalagahan ni Jehova an Saindong mga Paghihingoa

An pag-ataman sa may helang na kapamilya tunay nanggad na nakakapagal. Pero, si Hadeng David nagsurat: “Maogma an siisay man na minahirong may konsiderasyon sa hamak,” siring sa saro na nangangaipo nin tabang huli sa helang.—Sal. 41:1.

Taano ta puedeng magin maogma an mga nag-aataman sa mga may helang o nagsasakit? “An nagpapaheling nin pabor sa hamak nagpapautang ki Jehova,” an sabi kan Talinhaga 19:17, “asin an saiyang pagtratar Saiyang babayadan sa saiya.” An tunay na Dios nagpapaheling nin partikular na interes sa saiyang maimbod na mga lingkod na nagsasakit huli sa helang, asin binebendisyonan nia an nagpapaheling nin pabor sa sainda. An salmistang si David nag-awit: “Si Jehova mismo magpapakosog sa [siring na tawo] sa ibabaw nin sopa nin kahelangan; an bilog niang higdaan sasalidahan mo nanggad sa panahon kan saiyang paghelang.” (Sal. 41:3) Makakasierto kita na kun an nagtatao nin mamomoton na pag-ataman makaeksperyensia mismo nin kasakitan o remalaso, tatabangan sia ni Jehova.

Nakakaogma nanggad na maaraman na naririsa asin inooyonan ni Jehova Dios an mga ginigibo niato sa pag-ataman sa may helang na kapamilya! Minsan ngani an siring na pagtabang tibaad mangaipo nin paghihingoa niato, sinisierto sa sato kan Kasuratan na “naoogmang gayo an Dios” sa siring na mga sakripisyo.—Heb. 13:16.

[Nota sa Ibaba]

[Mga Ritrato sa pahina 18]

Papagdanayon an espirituwal na pagkatimbang asin mag-ako nin tabang sa iba