Mga Babae, Taano ta Dapat Magpasakop sa Pagkapayo?
Mga Babae, Taano ta Dapat Magpasakop sa Pagkapayo?
‘An payo nin babae iyo an lalaki.’—1 COR. 11:3.
1, 2. (a) Ano an isinurat ni apostol Pablo manongod sa areglo ni Jehova sa pagkapayo asin pagpasakop? (b) Anong mga hapot an eestudyaran sa artikulong ini?
INESTABLISAR ni Jehova an aregladong pagkasunodsunod na sinambit ni apostol Pablo kan isurat nia na “an payo kan lambang lalaki iyo an Cristo” asin ‘an payo kan Cristo iyo an Dios.’ (1 Cor. 11:3) Sinambit sa sinundan na artikulo na ibinilang ni Jesus na pribilehio saka kagayagayahan na magin sakop kan saiyang Payo, si Jehova Dios, asin sinambit man dian na an payo nin Kristianong mga lalaki iyo si Cristo. Si Cristo maboot, mapagmalasakit, asin bakong maimot sa mga tawo. An mga lalaki sa kongregasyon dapat na magin arog kaiyan sa iba, lalo na sa saindang agom.
2 Pero, kumusta man an mga babae? Siisay an saindang payo? ‘An payo nin babae iyo an lalaki,’ an isinurat ni Pablo. Paano maninigong mansayon nin mga babae an ipinasabong na mga tataramon na ini? Aplikado pa daw an prinsipyong iyan kun an agom na lalaki bakong kapagtubod? An pagpasakop daw sa pagkapayo kan lalaki nangangahulogan na an agom na babae dai dapat maggirong, na dai puedeng magtao nin opinyon kun naggigibo nin mga desisyon? Paano nag-aako nin kaomawan an sarong babae?
“Magibo Ako nin Katabang Para sa Saiya”
3, 4. Taano ta kapakipakinabang an areglo nin pagkapayo sa pag-agoman?
3 An areglo nin pagkapayo hale sa Dios. Pagkalalang ki Adan, si Jehova Dios nagsabi: “Bakong marahay na an lalaki padagos na magsolo. Magibo ako nin katabang para sa saiya, bilang komplemento nia.” Pagkalalang ki Eva, ogmahon na marhay si Adan na igwa na sia nin kaibaiba asin katabang kaya sinabi nia: “Ini sa katapustapusi tolang nin sakong mga tolang asin laman nin sakong laman.” (Gen. 2:18-24) Si Adan asin Eva may marahayon na oportunidad na magin ama asin ina kan bilog na rasa nin sangkap na mga tawo, na mabubuhay sagkod lamang sa sarong pangglobong paraiso.
4 Huli sa pagrebelde kan enot na mga magurang niato, nawara an sangkap na kamugtakan sa hardin nin Eden. (Basahon an Roma 5:12.) Alagad nagdanay an areglo nin pagkapayo. Kun sinusunod nin tama, iyan nagbubunga nin dakulang pakinabang asin kaogmahan sa pag-agoman. An resulta nagigin kaagid kan saboot ni Jesus sa pagigin sakop kan saiyang Payo, si Jehova. Sa buhay ni Jesus bago nagin tawo, sia “maogma sa atubangan [ni Jehova] sa gabos na panahon.” (Tal. 8:30) Huli sa pagkabakong sangkap, an mga lalaki mayo nang kakayahan na magin sangkap na payo, asin an mga babae dai na makakapagpasakop sa sangkap na paagi. Minsan siring, kun an mga agom na lalaki asin babae padagos na nagmamaigot na gibohon an saindang pinakamakakaya, an areglo minaresulta sa pinakanakakakontentong pag-agoman na posible sa panahon na ini.
5. Taano ta maninigong isapuso kan mga mag-agom an konseho sa Roma 12:10?
5 Mahalaga sa kapangganahan nin pag-agoman an pag-aplikar nin mga mag-agom sa konsehong ini kan Kasuratan na para sa gabos na Kristiano: “Sa pagkamoot na sa magturugang magkaigwa kamo nin mamomoton na kapadangatan sa lambang saro. Sa pagtao nin onra sa lambang saro mangenot kamo.” (Roma 12:10) Siring man, maninigong hingoahon kan agom na lalaki asin babae na ‘magin maboot sa lambang saro, mapagmalasakit sa mamomoton na paagi, na lubos na nagpapatawadan.’—Efe. 4:32.
Kun an Agom Bakong Kapagtubod
6, 7. Ano an puedeng magin resulta kun an sarong Kristianang agom nagpapasakop sa saiyang bakong kapagtubod na agom?
6 Paano kun bakong lingkod ni Jehova an saindong agom? Sa parate, agom na lalaki an bakong kapagtubod. Sa kamugtakan na ini, paano sia tatrataron kan saiyang agom? An Biblia nagsisimbag: “Kamong mga agom na babae, magpasakop kamo sa saindong agom na lalaki, tangani na, kun an siisay man dai nagkukuyog sa tataramon, sinda madara minsan daing tataramon paagi sa gawe-gawe kan saindang agom na babae, huli sa pakaheling mismo sa saindong mabining gawe-gawe na may hararom na paggalang.”—1 Ped. 3:1, 2.
7 An Tataramon nin Dios nagsasabi sa agom na babae na papagdanayon an pagigin mapagpasakop sa bakong kapagtubod na agom. An marahay na paggawe kan babae puedeng makaimpluwensia sa agom nia na isip-isipon kun ano an nagmomotibar sa saiya na gumawe sa siring na marahay na paagi. Bilang resulta, tibaad siyasaton kan agom na lalaki an mga paniniwala kan saiyang Kristianang agom asin pag-abot nin panahon akoon nia mismo an katotoohan.
8, 9. Ano an magigibo nin Kristianang agom kun bakong paborable an reaksion kan saiyang agom sa marahay na paggawe nia?
8 Pero, paano kun bakong paborable an reaksion kan bakong kapagtubod na agom na lalaki? Dinadagka kan Kasuratan an Kristianang agom na ipaheling an mga kualidad nin Kristiano sa gabos na panahon, gurano man tibaad kasakit kaini. Halimbawa, mababasa niato sa 1 Corinto 13:4: “An pagkamoot matinios.” Kun siring, marahay para sa Kristianang agom na padagos na gumawe “na igwa nin lubos na kababaan nin isip asin kahoyoan, na may pakatios,” na nagtatagal huli sa pagkamoot. (Efe. 4:2) Sa tabang kan aktibong puersa nin Dios—an saiyang banal na espiritu—posible na mapagdanay an mga kualidad nin Kristiano sa ibong nin masakit na mga kamugtakan.
9 “Igwa ako kan kosog para sa gabos na bagay huli sa saiya na nagtatao nin puersa sa sako,” an isinurat ni Pablo. (Fil. 4:13) An espiritu nin Dios nakakatabang sa Kristianong agom na gibohon an dakol na bagay na imposible kutana kun mayo iyan. Halimbawa, kun an saro maringis na tinatratar kan saiyang agom, tibaad matentaran siang magbalos. Minsan siring, an Biblia nagsasabi sa gabos na Kristiano: “Dai kamo magbalos nin maraot sa maraot sa kiisay man. . . . Huli ta nasusurat: ‘Sako an pagbalos; ako an mabalos, sabi ni Jehova.’” (Roma 12:17-19) Kaagid kaiyan, an 1 Tesalonica 5:15 nagsasadol sa sato: “Siertohon na mayo nin siisay man na magbalos nin maraot sa maraot sa kiisay pa man, kundi danay na hanapon an karahayan kan lambang saro asin kan gabos na iba pa.” Sa tabang kan banal na espiritu ni Jehova, nagigin posible an ano man na imposible kun sa sadiri sana niatong kosog. Angay nanggad na hagadon niato sa pamibi an banal na espiritu nin Dios tanganing itao sa sato an ano man na kulang sa sato!
10. Paano inatubang ni Jesus an makolog na mga sinabi asin ginibo nin iba?
10 Si Jesus nagpaheling nin marahayon na halimbawa kun paano tatrataron an mga nagtaram o naggibo sa sato nin bakong marahay. “Kan sia pinagtataraman nin maraot,” an sabi sa 1 Pedro 2:23, “dai sia nagbalos na magtaram nin maraot. Kan sia nagsasakit, dai sia nanghuma, kundi padagos na ipinagkatiwala an saiyang sadiri sa saro na naghohokom nin matanos.” Sinasadol kita na sundon an marahay na halimbawa nia. Dai mapukaw sa kaanggotan huli sa maraot na gawe-gawe nin iba. Arog kan sadol sa gabos na Kristiano, magin “mapagmalasakit sa mapagpadangat na paagi, mapakumbaba sa isip, na dai nagbabalos nin maraot sa maraot o nagtataram nin maraot sa nagtataram nin maraot.”—1 Ped. 3:8, 9.
Mga Agom na Dai Dapat Maggirong?
11. Sa anong dakulang pribilehio magkakaigwa nin kabtang an nagkapirang Kristiana?
11 An pagpasakop daw sa pagkapayo nin agom na lalaki nangangahulogan na an mga babae dai dapat maggirong, na dai puedeng magtao nin opinyon sa mga bagay na pampamilya o iba pang tema? Dai nanggad. An mga babae saka lalaki tinawan ni Jehova nin dakol na pribilehio. Isip-isipa na sana an dakulang onra kan mga kabilang sa 144,000 huli sa pagigin nindang mga hade asin saserdote sa langit sa pangengenot ni Cristo kun mamahala na sia sa dagang ini! Kaiba sa bilang na iyan an mga babae. (Gal. 3:26-29) Malinaw na an mga babae tinawan ni Jehova nin aktibong papel sa areglo nia.
12, 13. Magtao nin halimbawa na nagpapaheling na may mga babae na naghula.
12 Halimbawa, kan mga panahon kan Biblia, may mga babae na naghula. Ihinula sa Joel 2:28, 29: “Ibububo ko an sakong espiritu sa gabos na klase nin laman, asin an saindong mga aking lalaki asin an saindong mga aking babae maghuhurula nanggad. . . . Pati sa mga oripon na lalaki asin sa mga oripon na babae sa mga aldaw na iyan ibububo ko an sakuyang espiritu.”
13 Kompuesto nin mga babae saka lalaki an mga 120 disipulo ni Jesus na nagtiripon sa itaas na kuarto sa Jerusalem kan aldaw nin Pentecostes 33 C.E. An espiritu nin Dios ibinubo sa bilog na grupong ini. Kun siring, makokotar ni Pedro an ihinula ni propeta Joel asin ikakaaplikar iyan pareho sa mga lalaki asin babae. Si Pedro nagsabi: “Ini an sinabi paagi ki propeta Joel, ‘Asin sa huring mga aldaw,’ an sabi nin Dios, ‘ibububo ko an iba kan sakong espiritu sa gabos na klase nin laman, asin an saindong mga aking lalaki asin an saindong mga aking babae maghuhurula . . . ; asin pati sa sakong mga oripon na lalaki asin sa sakong mga oripon na babae ibububo ko an iba kan sakong espiritu sa mga aldaw na iyan, asin sinda maghuhurula.’”—Gibo 2:16-18.
14. Ano an papel nin mga babae sa pagpalakop kan Kristianismo kan enot na siglo?
14 Kan enot na siglo, mahalaga an papel nin mga babae sa pagpalakop kan Kristianismo. Sinda naghulit sa iba manongod sa Kahadean nin Dios asin naggibo nin mga bagay na may koneksion sa paghuhulit na iyan. (Luc. 8:1-3) Halimbawa, inapod ni apostol Pablo si Febe na “sarong ministro kan kongregasyon na yaon sa Cencrea.” Asin sa pagpaabot nin pangungumusta sa mga kapwa trabahador, nasambitan ni Pablo an nagkapirang maimbod na babae, kaiba na si “Trifina asin si Trifosa, mga babaeng nagpapagal sa Kagurangnan.” Nasambit man nia si “Persida na satong namomotan, huli ta sia naggibo nin dakol dian sa Kagurangnan.”—Roma 16:1, 12.
15. Ano an papel nin mga babae sa pagpalakop kan Kristianismo sa panahon niato?
15 Sa panahon niato, mga babae na manlaenlaen an edad an minakompuesto sa dakulang kabtang kan labing pitong milyon na naghuhulit kan maogmang bareta kan Kahadean nin Dios sa bilog na kinaban. (Mat. 24:14) Dakol sa sainda an bilog na panahon na ministro, misyonera, asin Bethelite. An salmistang si David nag-awit: “Si Jehova mismo an nagtataram; an mga babaeng nagsasabi kan maogmang bareta sarong dakulang hukbo.” (Sal. 68:11) Nagin totoo nanggad an mga tataramon na ini! Pinapahalagahan ni Jehova an papel nin mga babae sa pagpahayag kan maogmang bareta asin pag-otob kan saiyang mga katuyohan. An kahagadan nia na magpasakop an mga Kristiana siertong dai nangangahulogan nin daing girong na pagpasakop.
Duwang Babae na Dai Nag-alangan na Magtaram
16, 17. Paano ipinaheling kan halimbawa ni Sara na an mga babae dai man kaipuhan na magin daing girong na agom?
16 Kun an mga babae tinatawan ni Jehova nin dakol na pribilehio, bako daw na maninigong konsultahon nin mga agom na lalaki an saindang agom bago gumibo nin magagabat na desisyon? Madonong para sa sainda na gibohon iyan. An Kasuratan nagsambit nin nagkapirang pangyayari na dian an mga agom na babae nagtaram o naghiro dawa dai hinagad kan saindang agom an opinyon ninda. Estudyare an duwang halimbawa.
17 Pigpaparasabihan ni Sara an saiyang agom, an patriarkang si Abraham, na pahaleon an ikaduwang agom asin an aki kaini huli sa kawaran ninda nin galang. ‘An bagay na iyan ikinaraot na gayo nin boot ni Abraham’—alagad inoyonan iyan nin Dios. Si Jehova nagsabi ki Abraham: “Dai mo ikaraot nin boot an ano man na pigpaparasabi sa saimo ni Sara manongod sa aki asin manongod sa saimong surugoon na babae. Hinanyogon mo an saiyang tingog.” (Gen. 21:8-12) Si Abraham nagkuyog ki Jehova, naghinanyog ki Sara, asin ginibo an hinagad kaini.
18. Nagsadiring boot si Abigail na gibohon an ano?
18 Isip-isipa man si Abigail, an agom ni Nabal. Kan si David nagdudulag sa maimon na si Hadeng Saul, si David temporaryong nagkampo harani sa mga aripompon ni Nabal. Imbes na magkua nin arin man sa dakol na pagsasadiri kan mayaman na tawong ini, prinotehiran ni David asin kan mga tawohan nia an pagsasadiri ni Nabal. Minsan siring, si Nabal “maisog asin maraot an saiyang mga gibo,” saka ‘pasilyak niang inanggotan’ an mga tawohan ni David. Sia ‘daing kamanungdanan na tawo’ asin “nasa saiya an pagkadaing isip.” Kan an mga tawohan ni David magalang na maghagad nin nagkapirang probisyon, nagsayuma si Nabal. Ano an ginibo ni Abigail kan madangog nia an nangyari? Dawa mayong sinasabi ki Nabal, “naghidali [sia] asin nagkua nin dos sientos na tinapay saka duwang dakulang lalagan nin arak asin limang karnero na binuno asin limang takad na sea nin sinanlag na tipasi asin sanggatos na tinapay na gibo sa pasas patin dos sientos na tinapay na gibo sa pinilpig na igos” dangan itinao iyan ki David asin sa mga tawohan kaini. Tama daw an ginibo ni Abigail? “Hinampak ni Jehova si Nabal,” an sabi kan Biblia, “kaya sia nagadan.” Kan huri inagom ni David si Abigail.—1 Sam. 25:3, 14-19, 23-25, 38-42.
‘An Babae na Nag-aako nin Kaomawan’
19, 20. Ano an nagpapangyari sa sarong babae na magin tunay na kaomaw-omaw?
19 Kinokomendaran kan Kasuratan an agom na babae na minahiro oyon sa paagi ni Jehova. An libro sa Biblia na Talinhaga inoomaw an “may kakayahan na agom na babae,” na nagsasabi: “An saiyang halaga orog na gayo kisa kan sa korales. Nagtitiwala sa saiya an puso kan saiyang kagsadiri, asin dai magkukulang nin pakinabang. Binalosan nia ini nin karahayan, asin bakong nin karatan, sa gabos na aldaw kan saiyang buhay.” Dugang pa, “ibinuka nia an saiyang ngoso sa kadonongan, asin an ley nin mamomoton na kabootan nasa saiyang dila. Binabantayan nia an mga nangyayari sa saiyang kasararo sa harong, asin dai sia nagkakakan kan tinapay nin kahugakan. An saiyang mga aki nagtirindog asin inapod siang maogma; an saiyang kagsadiri minatindog, asin inoomaw sia kaini.”—Tal. 31:10-12, 26-28.
20 Ano an nagpapangyari sa sarong babae na magin tunay na kaomaw-omaw? “An pang-akit tibaad falso, asin an kagayonan tibaad basang sana,” an sabi sa Talinhaga 31:30, “alagad an babae na natatakot ki Jehova iyo an nag-aako nin kaomawan para sa saiya man sana.” Kaiba sa pagkatakot ki Jehova an pangangaipo na gikan sa boot na magpasakop sa areglo nin Dios sa pagkapayo. ‘An payo nin babae iyo an lalaki,’ kun paanong “an payo kan lambang lalaki iyo an Cristo,” asin ‘an payo kan Cristo iyo an Dios.’—1 Cor. 11:3.
Magpasalamat sa Regalo nin Dios
21, 22. (a) Taano ta ikakapagpasalamat nin mag-agom na mga Kristiano an regalo nin Dios na pag-agoman? (b) Taano ta maninigo niatong igalang an mga areglo ni Jehova sa autoridad asin pagkapayo? (Helingon an kahon sa pahina 17.)
21 An mga Kristianong pinagsaro nin pag-agoman may dakolon na dahelan na magpasalamat sa Dios! Sinda makakapamuhay na magkaibanan bilang maogmang mag-agom. Nangorognang ikakapagpasalamat ninda an nakakaogmang regalo nin Dios na pag-agoman huling nagtatao iyan sa sainda nin oportunidad na pagsaroon an saindang buhay asin maglakaw kaiba ni Jehova. (Rut 1:9; Miq. 6:8) Aram na marhay kan Kagtugdas nin pag-agoman kun ano an kaipuhan tanganing magin maogma an pag-agoman. Pirmeng humiro oyon sa paagi nia, asin ‘an kagayagayahan gikan ki Jehova iyo an saindong magigin kuta,’ dawa sa maribok na kinaban ngonyan.—Neh. 8:10.
22 An sarong Kristianong agom na lalaki na namomoot sa saiyang agom arog kan pagkamoot nia sa sadiri nia magigin mamomoton asin makonsiderasyon na payo. An saiyang diosnon na agom magigin tunay na kawiliwili, huling sia magigin mapagsuportar asin magpapaheling sa saiya nin hararom na paggalang. An pinakamahalaga, an arogan na pag-agoman ninda magtatao nin onra sa satong kaomaw-omaw na Dios, si Jehova.
Nagigirumdoman daw Nindo?
• Ano an areglo ni Jehova sa pagkapayo asin pagpasakop?
• Taano an mag-agom ta maninigong magtao nin onra sa lambang saro?
• Paano maninigong trataron nin Kristianang agom an saiyang bakong kapagtubod na agom?
• Taano ta maninigong konsultahon nin mga agom na lalaki an saindang agom bago gumibo nin magagabat na desisyon?
[Mga Hapot Para sa Pag-adal]
[Kahon sa pahina 17]
Taano ta Dapat Igalang an Autoridad?
Sa madonong na mga linalang ni Jehova, nag-establisar sia nin mga areglo sa autoridad asin pagkapayo. Para iyan sa ikakarahay pareho kan espiritung mga linalang asin kan mga tawo. Nagtatao iyan sa sainda nin mga oportunidad na gamiton an saindang libreng kabotan asin tawan nin onra an Dios paagi sa paglilingkod sa saiya na may pagkasararo.—Sal. 133:1.
Minimidbid kan kongregasyon nin linahidan na mga Kristiano an autoridad asin pagkapayo ni Jesu-Cristo. (Efe. 1:22, 23) Bilang pagmidbid sa autoridad ni Jehova, pag-abot nin panahon “an Aki mismo mapasakop man sa Saro na nagpasakop sa saiya kan gabos na bagay, tanganing an Dios magin gabos na bagay sa gabos.” (1 Cor. 15:27, 28) Sa siring, angay nanggad para sa mga tawo na nagdusay sa Dios na makikooperar sa areglo nin pagkapayo sa laog kan kongregasyon asin sa pamilya! (1 Cor. 11:3; Heb. 13:17) Sa paggibo kaiyan, nakikinabang kita bilang mga nag-aako kan pag-oyon asin bendisyon ni Jehova.—Isa. 48:17.
[Ritrato sa pahina 13]
An pamibi nakakatabang sa Kristianang agom na magpaheling nin diosnon na mga kualidad
[Mga Ritrato sa pahina 15]
Pinapahalagahan ni Jehova an papel nin mga babae sa pagpaoswag kan intereses kan Kahadean