Padagos na Sanayon an Saindong mga Kakayahan sa Pagrisa

MAKAWIWILI nanggad paghelingon an sarong matibay na gymnast (parakawat sa gymnastics) mantang nagpapaheling nin magagayon na hiro na may kaliksihan! Dinadagka kan Biblia an mga Kristiano na patuodon an saindang kakayahan sa pag-iisip kun paanong pinapatuod nin sarong gymnast an saiyang sadiri.

Sa saiyang surat sa mga Hebreo, si apostol Pablo nagsabi: “An matagas na kakanon para sa mga maygurang, sa mga huli sa paggamit napatuod [arog nin gymnast] an saindang mga kakayahan sa pagrisa [Sa literal, “mga organo kan sentido”] na mamidbid an tama sagkod an sala.” (Heb. 5:14, nota sa ibaba) Taano ta sinadol ni Pablo an Hebreong mga Kristiano na sanayon an saindang kakayahan sa pag-iisip kun paanong sinasanay nin tuod nang gymnast an saiyang mga kalamnan? Paano niato mapapatuod an satong mga kakayahan sa pagrisa?

“Dapat na Kamo Magin mga Paratokdo Na”

Kan ipinapaliwanag an katongdan ni Jesus bilang “halangkaw na saserdote segun sa orden ni Melquisedec,” si Pablo nagsurat: “Mapadapit sa saiya [ki Jesus] dakol kaming masasabi asin masakit ikapaliwanag, huli ta kamo nagin maluya sa saindong pagdangog. Huli ta, sa katotoohan, minsan ngani dapat na kamo magin mga paratokdo na huli sa panahon, nangangaipo pa giraray kamo na may magtokdo sa saindo poon sa kapinonan kan pundamental na mga bagay kan sagradong mga kapahayagan nin Dios; asin kamo nagin siring sa mga nangangaipo nin gatas, bakong nin kakanon na matagas.”—Heb. 5:10-12.

Minalataw na an nagkapirang Judiong Kristiano kan enot na siglo dai pa nakakaabante sa pakasabot asin dai uminoswag sa espirituwal. Halimbawa, depisil para sa sainda na akoon an orog na liwanag mapadapit sa Ley asin sa pagturi. (Gibo 15:1, 2, 27-29; Gal. 2:11-14; 6:12, 13) An nagkapira nasakitan na bayaan an tradisyonal na mga kaugalean may koneksion sa semanal na Sabbath asin sa taonan na Aldaw nin Pagbayad sa Kasalan. (Col. 2:16, 17; Heb. 9:1-14) Huli kaiyan, dinagka sinda ni Pablo na patuodon an saindang mga kakayahan sa pagrisa tanganing mamidbid an kalaenan kan tama sa sala asin sinabihan nia sinda na ‘maghingoang makaabot sa pagkamaygurang.’ (Heb. 6:1, 2) An saiyang konseho seguradong nakapahiro sa nagkapira na horophoropon kun paano ninda ginagamit an saindang kakayahan sa pag-iisip asin posibleng marhay na nakatabang sa sainda na umoswag sa espirituwal. Kumusta man kita?

Sanayon an Saindong mga Kakayahan sa Pagrisa

Paano niato masasanay an satong kakayahan sa pag-iisip tanganing magin maygurang sa espirituwal? ‘Paagi sa paggamit,’ an sabi ni Pablo. Arog nin mga gymnast, na paagi sa pagsasanay pinapatuod an saindang mga kalamnan asin hawak na gumibo nin magayon asin komplikadong mga hiro, maninigo niatong sanayon an satong kakayahan sa pag-iisip tanganing mamidbid an tama sagkod an sala.

“An ehersisyo an pinakamarahay na magigibo nindo para sa saindong hotok,” an sabi ni John Ratey, sarong klinikal na propesor sa sikiyatriya sa Harvard Medical School. Segun ki Gene Cohen, direktor kan Center on Aging, Health and Humanities sa George Washington University, “kun pinapagana nanggad niato an satong isip, an mga selula kan hotok nagpapaluwas nin bagong mga dendrite na minaresulta sa dagdag na mga synapse, o mga agihan nin impormasyon.”

Kun siring, madonong na sanayon niato an satong kakayahan sa pag-iisip asin dagdagan an satong kaaraman sa Tataramon nin Dios. Sa paggibo kaiyan, orog kitang masasangkapan na gibohon an “sangkap na kabotan nin Dios.”—Roma 12:1, 2.

 Magkaigwa nin Pagmawot sa “Matagas na Kakanon”

Kun minamawot niatong “makaabot sa pagkamaygurang,” kaipuhan niatong hapoton an satong sadiri: ‘Nag-ooswag daw an pakasabot ko sa katotoohan sa Biblia? Minamansay daw ako nin iba bilang maygurang sa espirituwal?’ An sarong ina naoogmang tawan an saiyang sadit na aki nin gatas asin kakanon na pang-omboy mantang iyan omboy pa. Alagad imahinara an saiyang paghadit kun lumihis an mga taon asin an aki dai nagkakakan nin matagas na kakanon. Sa kaagid na paagi, naoogma kitang maheling an inaadalan niato sa Biblia na umoswag pasiring sa pagdusay asin bautismo. Pero, paano kun pagkatapos kaiyan dai na sia nag-ooswag sa espirituwal? Bako daw na nakakapangluya nin boot iyan? (1 Cor. 3:1-4) An paratokdo naglalaom na pag-abot nin panahon an bagong disipulo magigin sarong paratokdo man.

An paggamit kan satong mga kakayahan sa pagrisa tanganing mangatanosan sa mga bagay-bagay nangangaipo nin paghorophorop, asin kalabot dian an paghihingoa. (Sal. 1:1-3) Dai niato dapat togotan an mga pandisturbo—siring baga nin mga aling-alingan o pagdalan nin telebisyon, na dai man pinapaganang marhay an isip—na makaolang sa makahulogan na paghorophorop. Tanganing mapaoswag an satong kakayahan sa pag-iisip, kaipuhan na pataluboon asin panigoan niato an pagmawot na pag-adalan an Biblia saka an mga publikasyon kan “maimbod asin mapagmansay na oripon.” (Mat. 24:45-47) Apuera sa regular na rutina nin personal na pagbasa sa Biblia, mahalaga na magtagama kita nin panahon para sa Pampamilyang Pagsamba asin detalyadong pag-adal sa mga tema sa Biblia.

Si Jeronimo, sarong nagbibiaheng paraataman sa Mejico, nagsabi na pinag-aadalan nia an kada isyu kan An Torrengbantayan pagkaako nia tolos kaiyan. Nagtatagama man sia nin panahon tanganing mag-adal kaiba kan saiyang agom. Sinabi ni Jeronimo, “Bilang mag-agom, ugale mi na an aroaldaw na pagbasa kan Biblia na magkaibahan, asin ginagamit mi an mga pantabang siring kan brosyur na ‘Good Land.’” An sarong Kristiano na si Ronald nagsabi na pirme niang sinasabayan an iskedyul kan kongregasyon sa pagbasa sa Biblia. Igwa man sia nin saro o duwang panghaloyan na personal na proyekto para sa pag-adal. “Huli sa mga proyektong ini, maogma kong inaantisipar an masunod kong pag-adal,” an sabi ni Ronald.

Kumusta man kita? Nagtatagama daw kita nin igong panahon sa pag-adal sa Biblia asin paghorophorop sa Tataramon nin Dios? Sinasanay daw niato an satong kakayahan sa pag-iisip asin nagigin mas eksperyensiado daw kita sa paggibo nin mga desisyon kaoyon kan mga prinsipyo sa Kasuratan? (Tal. 2:1-7) Logod na an satong pasohan iyo na magin maygurang na mga indibiduwal, na igwa kan kaaraman asin kadonongan na nakakamtan kan mga tawong napatuod an mga kakayahan sa pagrisa na mamidbid an tama sagkod an sala!

[Ritrato sa pahina 23]

Sinasanay niato an satong kakayahan sa pag-iisip ‘paagi sa paggamit’