Taano ta Dapat Tawan nin Onra an mga May Edad Na?

SA KAHALABAAN kan baybayon nin California, E.U.A., manonompongan an saro sa mga kahoy na pinakaparateng rineretrato. Iyan midbid bilang an Lone Cypress. Sinasabing an kahoy na ini labi nang 250 anyos. An magayon na kahoy na ini, na midbid sa pagigin matagal, nakakaapod nin atension sa nagkapirang paagi. Halimbawa, pinasarig iyan paagi sa nagsusuportar na mga kable asin pagsemento sa palibot kan poon kaiyan.

An Lone Cypress tibaad magpagirumdom sa sato kan kaibanan niatong may edad nang mga Kristiano, na nagpapaheling nin kahangahangang pakatagal. An sarong marahayon na paagi na ipinapaheling ninda ini iyo an pagbalangibog kan maogmang bareta. Ihinula ni propeta Joel na an “gurang na mga lalaki” magpapahayag kan mensahe kan Biblia. (Joel 2:28-32; Gibo 2:16-21) Isip-isipa na sana an dai mabilang na oras na ginagamit ninda sa maigot na pagtabang sa iba na manodan an manongod sa ‘maogmang bareta kan kahadean!’ (Mat. 24:14) An nagkapira sa may edad nang mga parabalangibog na ini kan Kahadean nagtagal nin dakol na taon nin persekusyon o iba pang kadepisilan. Kun an sarong poon nin cypress ngani minimidbid huli sa pagigin matagal asin pinapasarig paagi sa semento saka mga kable, an mga may edad nang kaibanan niato mas angay na midbidon asin trataron na may dignidad asin onra!

Pinagbotan ni Jehova an suanoy na banwaan nia: “Maninigo na tumindog ka sa atubangan nin may uban, asin dapat na magpaheling ka nin konsiderasyon sa pagkatawo nin gurang.” (Lev. 19:32) Sa mga lingkod ni Jehova ngonyan, makakaheling kita nin marahayon na mga halimbawa nin mga maimbod na padagos na ‘naglalakaw kaiba nin Dios’ sa laog na nin mga  dekada. (Miq. 6:8) Mantang padagos na iinaaplikar ninda an mga prinsipyong sono sa Kasuratan, an saindang pagkaigwa nin uban tunay nanggad na “korona nin kagayonan.”—Tal. 16:31.

Ininstruksionan ni Pablo an hoben na si Timoteo: “Dai mo pagtatsaran nin labi-labi an sarong gurang na lalaki.” Imbes, dapat na ‘pakiolayan sia ni Timoteo nin siring sa ama,’ asin “an gurang na mga babae nin siring sa mga ina.” (1 Tim. 5:1, 2) Kun baga, dapat na “tumindog” si Timoteo sa atubangan nin may uban. Kun siring, malinaw na linalaoman ni Jehova na an satong paagi nin pagtaram magpapaheling nin siring na onra.

“Sa pagtao nin onra sa lambang saro mangenot kamo,” an sabi sa Roma 12:10. An mga paraataman sa kongregasyon nagpapaheling nanggad nin onra sa may edad nang mga Kristiano. Alagad gabos kita dapat na mangenot sa pagtao nin onra sa lambang saro.

Siempre, an mga kapamilya igwa nin espesyal na paninimbagan sa saindang mga magurang saka lolo asin lola. Kun dapit sa Lone Cypress, naghanap an mga tawo nin mga paagi na makatabang na ingatan an kahoy, asin padagos nindang ginigibo iyan. Kun siring, daing duwa-duwa na maninigo kitang maghanap nin mga paagi na makatabang na ingatan an dignidad kan satong naggugurang nang mga magurang saka lolo asin lola. Halimbawa, kun kita marahay na maghinanyog, dai niato iiinsistir an satong mga kagustohan na dai iniintindi an namamatean ninda.—Tal. 23:22; 1 Tim. 5:4.

An mga may edad nang kaibanan niato mahalagang marhay ki Jehova. Dai nia sinda pinapabayaan. (Sal. 71:18) Talagang pinaparigon sinda kan tunay na Dios tanganing padagos na makapaglingkod sa saiya na may kaimbodan. Logod na padagos man niatong suportaran asin tawan nin onra an mga may edad na.

[Mga Ritrato sa pahina 7]

Kun paanong kaipuhan kan Lone Cypress an suporta, kaipuhan man kan mga may edad na an pagtratar na may dignidad asin onra

[Credit Line]

American Spirit Images/age fotostock