Kun Paano Makakayanan an Pagtraydor nin Agom

SI Margarita asin an saiyang agom, si Raul, dakol nang taon na naglingkod ki Jehova na magkaibanan bilang bilog na panahon na mga ministro. * Alagad dai nahaloy pagkamundag kan saindang enot na aki, nagpoon si Raul na rumayo ki Jehova. Kan huri, si Raul nagpoon na mamuhay nin imoral asin natiwalag sa Kristianong kongregasyon. “Kan mangyari gabos ini,” an sabi ni Margarita, “an pagmate ko magagadan na ako. Grabe an sakong pagmondo, asin dai ko aram kun ano an gigibohon.”

Dai nahaloy pagkatapos ikasal si Jane, an saiyang pagtitiwala asin kapadangatan trinaydor kan agom nia sa laen man na paagi. Pinonan niang abusohon si Jane sa pisikal na paagi. “Kan enot na suntokon nia ako,” an sabi ni Jane, “namungnan ako, napasupog, asin nakamate na hinamak. Paorootro niang ginibo iyan asin paorootro siang nakimaherak na patawadon ko. An paghona ko kaidto obligasyon ko bilang Kristiano na pirmeng magpatawad saka lingawan an ginibo nia. An paghona ko man magigin bakong maimbod ako kun sasabihon ko an problema mi sa siisay man—dawa sa mga magurang sa kongregasyon mi. An paorootrong pag-abusong ini asin pagpatawad nagpadagos sa laog nin dakol na taon. Sa bilog na panahon na ini, an paghona ko igwa ako nin magigibo tanganing mamotan ako kan sakong agom. Kan sa kahurihurihi bayaan nia ako asin an aki ming babae, namatean ko na garo nagkulang ako, na  maninigo kutanang may ginibo o sinabi pa ako tanganing ikasalbar an samong pag-agoman.”

Arog ni Margarita asin Jane, tibaad nag-aagi ka nin emosyonal, pinansial, asin espirituwal na kapurisawan huling trinaydor ka kan saimong agom na lalaki. O tibaad saro kang agom na lalaki na nagmomondo asin nagsasakit huling an saimong agom nagin bakong maimbod. Mayong duda, kita nabubuhay sa “delikadong mga panahon na masakit pakibagayan,” siring sa ihinula kan Biblia. Ipinaparisa kan hulang ini na sa “huring mga aldaw,” aatakehon an mga pamilya, asin sa dakol na kamugtakan, an natural na kapadangatan biyo nang nawara. Papaindahan nin nagkapira an saindang paghihingako na naglilingkod sinda sa Dios. (2 Tim. 3:1-5) An tunay na mga Kristiano bakong libre sa mga problemang ini; huli kaini, ano an makakatabang sa saimo na makaya an situwasyon kun ika trinaydor?

Mansayon an Sadiri Mo Siring sa Pagmansay Saimo ni Jehova

Sa primero, tibaad masakitan kang maniwala na magigibo kan saro na namomotan mo na kolgan ka nin grabe. Tibaad basolon mo pa ngani an saimong sadiri sa makasalan na paggawe nia.

Pero, girumdomon na dawa an sangkap na tawong si Jesus trinaydor nin saro na pinagtitiwalaan asin namomotan nia. Pinili ni Jesus an saiyang pinakadayupot na mga kaibaiba, an mga apostol, pagkatapos na maghorophorop asin mamibi nin odok. Kan panahon na idto, an 12 apostol gabos mapagtitiwalaan na lingkod ni Jehova. Kun siring, daing duda na nagmondo nin grabe si Jesus kan si Judas “nagin traydor.” (Luc. 6:12-16) Minsan siring, dai pinapanimbag ni Jehova si Jesus sa mga gibo ni Judas.

Totoo, sa presente mayong agom na sangkap. An agom na lalaki asin babae parehong masasala. Sarong pinasabngan na salmista an realistikong nagsurat: “Kun mga sala an saimong binabantayan, O Jah, O Jehova, siisay an makakatindog?” (Sal. 130:3) Bilang pag-arog ki Jehova, an mag-agom maninigong pirmeng andam na palampason an mga pagkabakong sangkap kan lambang saro.—1 Ped. 4:8.

Minsan siring, “an lambang saro sa sato maninimbag sa Dios para sa saiyang sadiri.” (Roma 14:12) Kun an sarong agom paorootro sa mapang-abusong pagtaram o gawe-gawe, an nagkasala mismo an maninimbag ki Jehova. Kinokondenar ni Jehova an kadahasan asin mapang-abusong pagtaram, kaya mayo nanggad nin lehitimong dahelan na trataron an agom sa siring na paagi, na biyong daing pagkamoot saka paggalang. (Sal. 11:5; Efe. 5:33; Col. 3:6-8) Sa katunayan, kun an sarong Kristiano paorootro saka daing pagsolsol na nagpapadara sa grabeng kaanggotan asin dai magbabago, dapat siang itiwalag sa Kristianong kongregasyon. (Gal. 5:19-21; 2 Juan 9, 10) An sarong agom dai kaipuhan na makamate na may sala sia huli sa pagsabi sa kamagurangan kan siring na paggawe na bakong sa Kristiano. Sa katunayan, nagmamalasakit si Jehova sa mga biktima nin siring na pagmaltrato.

Kun an sarong agom makakomiter nin pagsambay, sia nagkakasala bako sana sa saiyang inosenteng agom kundi pati ki Jehova. (Mat. 19:4-9; Heb. 13:4) Kun an inosenteng agom naghihingoang mamuhay kaoyon kan mga prinsipyo sa Biblia, dai sia kaipuhan na makamate na may sala sia sa pagtraydor kan saiyang agom.

Girumdomon na aram ni Jehova an namamatean mo. Ilinaladawan nia an saiyang sadiri bilang an agom na kagsadiri kan nasyon nin Israel, asin an saiyang Tataramon igwa nin dakol na nakakapahirong pananaram na nagpapahayag kan saiyang kamondoan huli sa espirituwal na pakikisambay kan nasyon na iyan. (Isa. 54:5, 6; Jer. 3:1, 6-10) Makakasierto ka na aram na marhay ni Jehova an pagluha mo kun ika trinaydor sa paano man kan saimong agom. (Mal. 2:13, 14) Aram nia na kaipuhan mo nin pagranga asin pagparigon sa boot.

Kun Paano si Jehova Nagtatao nin Karangahan

An saro sa mga paagi na si Jehova nagtatao nin karangahan iyo an Kristianong kongregasyon. Si Jane nag-ako nin siring na suporta. “An pagsongko kan paraataman sa sirkito natagbo sa mismong panahon na grabe an pangluluya ko sa emosyon,” an natatandaan ni Jane. “Aram nia na grabe an kamondoan ko huling nag-file para sa diborsio an sakong agom. Nagtao sia nin panahon tanganing tabangan ako na mangatanosan basado sa mga teksto siring kan 1 Corinto 7:15. An mga teksto  sa Biblia asin an saiyang maboot na paliwanag nakatabang na mahale an pakamate ko na may sala ako asin nagpatoninong sa isip ko minsan paano.” *

Napatunayan man ni Margarita, na sinambit sa enotan, na si Jehova nagtatao nin praktikal na tabang paagi sa Kristianong kongregasyon. “Kan magin risang-risa na habong magsolsol an sakong agom,” an sabi ni Margarita, “iiniba ko an sakong mga aki asin buminalyo kami sa ibang siudad. Pag-abot mi duman, nakahanap ako nin duwang kuarto na aarkilahon. Kan sunod na aldaw, pinangingibabawan ako nin kamondoan mantang ilinuluwas ko an laog kan samong mga maleta kan may magtuktok sa pinto. An linalaoman ko iyo an landlady, na nakaistar sa ibong na kuarto. Makangangalas, idto an tugang na babae na nagtokdo sa Biblia sa sakong ina asin nagtabang sa pamilya mi na makanood kan katotoohan. Dai nia linalaoman na maheheling ako kundi nagdigdi sia sa harong na ini huling inaadalan nia sa Biblia an sakong landlady. Nakamate ako nin dakulang kaginhawahan—dai ko makontrol an sakong emosyon. Ipinaliwanag ko an sakong situwasyon, asin pareho kaming naghibi. Tolos-tolos niang iinareglo na makaatender kami sa pagtiripon kan aldaw na iyan. Maogma kaming inako kan kongregasyon, asin naggibo an kamagurangan nin praktikal na mga areglo tanganing tabangan ako na maasikaso an espirituwal na mga pangangaipo kan sakong pamilya.”

Kun Paano Makakatabang an Iba

Tunay nanggad, an mga miembro kan Kristianong kongregasyon makakatao nin praktikal na suporta sa dakol na paagi. Halimbawa, kaipuhan kaidto ni Margarita na makahanap nin trabaho. Sarong pamilya sa kongregasyon an nag-alok na tumabang sa pag-asikaso sa mga aki nia pagkatapos nin klase, kun kaipuhan nia iyan.

“An talagang inaapresyar ko,” an isinaysay ni Margarita, “iyo an pag-alok kan mga tugang na ibanan ako asin an sakong mga aki sa ministeryo sa langtad.” Paagi sa siring na praktikal na pagtabang, an mga miembro kan kongregasyon ‘nagtuturowangan sa pagabat sa lambang saro’ asin sa paggibo kaiyan inootob “an ley kan Cristo.”—Gal. 6:2.

An mga nagsasakit huli sa mga kasalan nin iba talagang naaapresyar an arog kaining praktikal na tabang. Si Monique, na binayaan kan saiyang agom na nagwalat sa saiya nin $15,000 na utang sa credit card saka apat na aki na papadakulaon, nagsabi: “An espirituwal na mga tugang ko mamomoton na marhay. Dai ko maimahinar kun paano ako makakatagal kun mayo an saindang suporta. Namatean ko na tinawan ako ni Jehova nin kahangahanga nanggad na mga tugang, na nagpaheling nin dakulang pagmakolog sa mga aki ko. Naogma akong maheling an sakong mga aki na umoswag sa espirituwal na pagkamaygurang paagi sa siring na tabang. Kun kaipuhan ko nin sadol,  tinatabangan ako kan kamagurangan. Kun kaipuhan ko nin makakaolay, naghihinanyog sinda.”—Mar. 10:29, 30.

Siempre, maririsa nin mamomoton na katood kun noarin nanggad dai dapat sambiton an dapit sa mamondong eksperyensia kan iba. (Ecl. 3:7) “Sa parate,” sabi ni Margarita, “naoogma akong makipag-olay sa mga tugang na babae sa bago kong kongregasyon manongod sa paghuhulit, mga inaadalan mi sa Biblia, mga aki mi—maski ano apuera sa mga problema ko. Inapresyar ko na tinogotan ninda ako na malingawan an nakaagi asin na tinabangan ninda ako na makapoon giraray.”

Labanan an Pagmawot na Bumalos

Kun beses, imbes na minsan paano makamate nin paninimbagan sa mga kasalan kan saimong agom, tibaad ikaanggot mo na nagsasakit ka nin grabe huli sa saiyang salang mga gibo. Kun totogotan mong grumabe an siring na pagkaanggot, tibaad makapaluya ini sa determinasyon mo na magdanay na maimbod ki Jehova. Halimbawa, tibaad masugotan kang maghanap nin mga paagi na makabalos sa saimong agom na bakong maimbod.

Kun saimong marealisar na naggagrabe an siring na mga pagmate mo, puede mong horophoropon an halimbawa ni Josue asin Caleb. Isinapeligro kan maimbod na mga lalaking ini an saindang buhay tanganing mag-espiya sa Dagang Panuga. An ibang mga espiya dai nin pagtubod asin sinutsutan an banwaan na dai magkuyog ki Jehova. Gusto pa ngani kan nagkapirang Israelita na gapoon si Josue asin Caleb kan probaran kan mga ini na dagkahon an nasyon na magdanay na maimbod. (Bil. 13:25–14:10) Bilang resulta kan paggawe kan Israel, napiritan si Josue asin Caleb na maglagawlagaw sa kaawagan sa laog nin 40 taon, bakong huli sa saindang sala, kundi huli sa sala kan iba.

Minsan ngani posibleng marhay na nadesganar si Josue asin Caleb, dai nagraot an saindang boot huli sa mga kasalan kan saindang mga tugang. Nagkonsentrar sinda sa pagpadanay kan saindang espirituwal na pagkatimbang. Sa katapusan kan 40 taon sa kaawagan, sinda, kaiba an mga Levita, tinawan nin balos paagi sa pagigin mga natada kan kapag-arakian na iyan asin pagtogot sa sainda na makalaog sa Dagang Panuga.—Bil. 14:28-30; Jos. 14:6-12.

Tibaad magsakit ka sa laog nin harohalawig na panahon huli sa mga gibo kan saimong bakong maimbod na agom. Tibaad maputol an pag-agoman, pero puedeng pagkatapos kaiyan makaeksperyensia ka nin emosyonal asin pinansial na kasakitan. Minsan siring, imbes na maribaraw kan nakakapangluyang mga kaisipan, girumdomon na si Jehova an talagang nakakaaram kun ano an gigibohon sa mga tuyong nagbabaliwala sa mga pamantayan nia, arog kan ipinapaheling kan nangyari sa daing pagtubod na mga Israelita sa kaawagan.—Heb. 10:30, 31; 13:4.

Makakayanan Mo Iyan!

Imbes na togotan an negatibong mga kaisipan na makapagabat sa saimo, panoon an isip mo nin mga kaisipan ni Jehova. “Nadiskobre ko na an pagdangog sa mga tape recording kan The Watchtower asin Awake! nakatabang sa sako na makayanan an problema,” an sabi ni Jane. “Siring man, an mga pagtiripon gikanan nanggad nin kosog. An aktibong pakikikabtang sa mga pagtiripon nakatabang sa sako na dai pagparaisipon an mga problema ko. An paghuhulit nakatabang sa sako sa kaparehong paagi. Paagi sa pagtabang sa iba na magkaigwa nin pagtubod ki Jehova, napapakosog ko an sako mismong pagtubod. Asin mantang tinatabangan ko an mga inaadalan sa Biblia, ikinakasentro ko an sakong isip sa mas importanteng mga bagay.”

Si Monique, na nasambitan sa enotan, nagsabi: “Paagi sa regular na pag-atender sa mga pagtiripon asin pagpartisipar sa paglilingkod sa langtad sa pinakaparateng mahihimo ko, nakatagal ako. An sakong pamilya mas duminayupot sa lambang saro asin sa kongregasyon. An masakit na inagihan ko nakatabang sa sako na maheling an sadiri kong mga kaluyahan. Nabalo ako, alagad sa tabang ni Jehova nakakaya ko iyan.”

Makakayanan mo man an kaagid na mga pagbalo. Sa ibong kan kolog na dara nin pagtraydor, magmaigot na sunodon an ipinasabong na konseho ni Pablo: “Dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mangluya.”—Gal. 6:9.

[Mga Nota sa Ibaba]

[Ritrato sa pahina 31]

Inaapresyar kan binayaan na mga agom an mga nagtatabang sa sainda sa ministeryo sa langtad