Maginhawahan Paagi sa Espirituwal na mga Bagay
Maginhawahan Paagi sa Espirituwal na mga Bagay
“Pasana nindo an sakong sakal . . . , asin magkakaigwa kamo nin kaginhawahan para sa saindong kalag.”—MAT. 11:29.
1. Anong areglo an ginibo nin Dios sa Bukid nin Sinai, asin taano?
KAN an tipan nin Ley iintrodusir sa Bukid nin Sinai, kaiba dian an areglo sa semanal na Sabbath. Paagi sa saiyang representante sa pagtaram na si Moises, pinagbotan ni Jehova an nasyon nin Israel: “Anom na aldaw mong gigibohon an saimong trabaho; alagad sa ikapitong aldaw mapondo ka, tanganing makapahingalo an saimong toro asin an saimong asno saka maginhawahan an aking lalaki kan saimong oripon na babae asin an nakikihimanwa.” (Ex. 23:12) Iyo, bilang pagpaheling nin konsiderasyon sa mga sakop kan Ley, mamomoton na nag-areglo si Jehova nin sarong aldaw na pagpahingalo tanganing “maginhawahan” an saiyang banwaan.
2. Paano an Israel nakinabang sa pag-otob kan Sabbath?
2 An Sabbath daw aldaw sana nin pagpahingalo? Bako, mahalagang kabtang iyan kan pagsamba kan mga Israelita ki Jehova. An pag-otob kan Sabbath nagtao nin panahon sa mga payo nin pamilya na tokdoan an saindang pamilya na ‘sunodon an dalan ni Jehova tanganing maggibo nin katanosan.’ (Gen. 18:19) Nagtao man iyan nin oportunidad sa magkakapamilya asin magkakatood na mag-iribanan tanganing horophoropon an mga ginibo ni Jehova asin magkaigwa nin magayagayang pakikiasosyar. (Isa. 58:13, 14) Mas mahalaga, makahulang itinokdo kan Sabbath an panahon na magkakaigwa nin tunay na kaginhawahan paagi sa Milenyal na Paghade kan Cristo. (Roma 8:21) Alagad kumusta man sa panahon niato? Saen asin paano magkakaigwa kan siring na kaginhawahan an tunay na mga Kristiano na interesado sa mga dalan ni Jehova?
Maginhawahan Paagi sa Kristianong Pakikiasosyar
3. Paano sinuportaran kan mga Kristiano kan enot na siglo an lambang saro, asin may anong resulta?
3 Ilinadawan ni apostol Pablo an Kristianong kongregasyon bilang “sarong harigi asin sulay kan katotoohan.” (1 Tim. 3:15) An enot na mga Kristiano nag-ako nin dakulang suporta paagi sa pagparinigonan asin pagpakinosogan sa pagkamoot. (Efe. 4:11, 12, 16) Mantang nasa Efeso, naparigon si Pablo sa pagdalaw sa saiya kan mga miembro kan kongregasyon sa Corinto. Mangnohon an nagin epekto kaiyan: “Ipinaggagayagaya ko an pagdatong ni Estefanas asin ni Fortunato patin ni Acaico,” an sabi ni Pablo, “huli ta tinawan ninda nin kaginhawahan an sakong espiritu.” (1 Cor. 16:17, 18) Kaagid kaiyan, kan si Tito magpa-Corinto tanganing maglingkod sa mga tugang duman, sinuratan ni Pablo an kongregasyon na iyan, na nagsasabi: “An saiyang espiritu napaginhawa nindo gabos.” (2 Cor. 7:13) Siring man ngonyan, an mga Saksi ni Jehova nagkakaigwa nin tunay na kaginhawahan paagi sa nakakapakosog na pag-iribaiba bilang mga Kristiano.
4. Paano kita napapaginhawa kan mga pagtiripon kan kongregasyon?
4 Aram nindo basado sa saindong eksperyensia na an mga pagtiripon kan kongregasyon gikanan nin dakulang kagayagayahan. Nagkakaigwa kita dian nin “pagparinigonan nin boot . . . an lambang saro paagi sa pagtubod nin iba.” (Roma 1:12) An Kristianong mga tugang niato bako sanang basta mga kamidbid na nakakaolay niato paminsanminsan. Sinda tunay na mga katood, na namomotan asin iginagalang niato. Nag-aako kita nin dakulang kagayagayahan asin karangahan paagi sa regular na pakikiiba sa sainda sa satong mga pagtiripon.—Filem. 7.
5. Paano niato mapapaginhawa an lambang saro sa mga kombension asin asamblea?
5 An saro pang gikanan nin kaginhawahan iyo an taonan na mga kombension asin asamblea. Apuera sa pagpaabot kan nagtataong buhay na mga tubig nin katotoohan hale sa Tataramon nin Dios, an Biblia, an mas darakulang pagtiripon na ini nagtatao man sa sato nin oportunidad na “humiwas” sa satong pakikiasosyar. (2 Cor. 6:12, 13) Alagad paano kun kita masusupgon asin nasasakitan na makipag-olay sa mga tawo? An sarong paagi na makamidbid an satong mga tugang iyo an pagtabang sa panahon nin kombension. Pagkatapos na magtabang sa sarong internasyonal na kombension, sarong tugang na babae an nagkomento: “Apuera sa sakong pamilya asin pipirang katood, kakadikit sana an kabisto ko duman. Alagad kan magtabang ako sa paglinig, dakol akong nakamidbid na tugang! Nakakaogma nanggad iyan!”
6. Ano an sarong paagi na magiginhawahan kita mantang nasa bakasyon?
6 Kada taon, an mga Israelita nagpapasiring sa Jerusalem para sa tolong kapiestahan tanganing sumamba. (Ex. 34:23) Sa parate nangangahulogan iyan nin pagbaya sa mga oma asin tindahan saka nin nagkapirang aldaw na paglakaw sa maalpog na mga dalan. Pero, an pagduman sa templo minaresulta sa “dakulang paggayagaya” mantang an mga presente “nagdodolot nin pag-omaw ki Jehova.” (2 Cron. 30:21) Para man sa dakol sa mga lingkod ni Jehova ngonyan, minaresulta sa dakulang paggayagaya an pagdalaw sa Bethel, an sangang opisina kan Mga Saksi ni Jehova, kaiba kan saindang pamilya. Puede man daw nindong iiba sa sunod na bakasyon nindo bilang pamilya an siring na pagdalaw?
7. (a) Paano puedeng magin kapakipakinabang an mga pagtiripontipon? (b) Ano an makakatabang tanganing magin memorable asin nakakapakosog an sarong pagtiripontipon?
7 An pagtiripontipon bilang magkakapamilya asin magkakatood nakakaparigon man. An madonong na si Hadeng Salomon nagsabi: “Mayo nin mas marahay sa tawo kundi na sia magkakan asin uminom patin pahelingon nin karahayan an saiyang kalag huli sa saiyang kahigosan.” (Ecl. 2:24) An pagtiripontipon dai sana nakakapaginhawa sa kalag kundi nakakapakosog man sa satong bogkos nin pagkamoot sa mga kapwa Kristiano mantang mas namimidbid niato sinda. Tanganing makatabang na magin memorable asin nakakapakosog an sarong pagtiripontipon, pinakamarahay na papagdanayon iyan na sadit asin seguradohon na napapamahalaan na marhay, nangorogna kun may iseserbing arak.
An Ministeryo Nakakapaginhawa
8, 9. (a) Sabihon an pagkakalaen kan mensahe ni Jesus asin kan mensahe kan mga eskriba saka Fariseo. (b) Paano kita nakikinabang sa pagsabi sa iba kan mga katotoohan sa Biblia?
8 Si Jesus maigot sa ministeryo, asin dinagka nia an saiyang mga disipulo na magin maigot man. Maririsa ini sa saiyang mga tataramon: “An anihon mahiwas, alagad an mga paraani kakadikit. Kun siring, makimaherak kamo sa Kagurangnan kan anihon na magsubol nin mga paraani sa saiyang anihon.” (Mat. 9:37, 38) An mensahe na itinokdo ni Jesus nakakapaginhawa nanggad; “maogmang bareta” iyan. (Mat. 4:23; 24:14) Kabaliktaran nanggad ini kan nakakapagabat na mga reglamento na ipinaotob kan mga Fariseo sa mga tawo.—Basahon an Mateo 23:4, 23, 24.
9 Kun an mensahe kan Kahadean ipinapaabot niato sa iba, pinapaginhawa niato sinda, asin, kadungan kaiyan, itinatadom niato sa satong isip asin puso an mahalagang marhay na mga katotoohan sa Biblia. Angay nanggad na sinabi kan salmista: “Omawa nindo si Jah, huli ta marahay na mag-awit nin melodiya sa satong Dios; huli ta iyan kawiliwili.” (Sal. 147:1) Madadagdagan daw nindo an saindong kagayagayahan paagi sa pag-omaw ki Jehova sa saindong kapwa?
10. An kapangganahan daw niato sa ministeryo nakadepende sa positibong reaksion nin mga tawo sa satong mensahe? Ipaliwanag.
10 Totoo, kun ikokomparar sa ibang teritoryo, may mga lugar na mas naghihimate an mga tawo sa maogmang bareta. (Basahon an Gibo 18:1, 5-8.) Kun nag-iistar kamo sa lugar na kadikit sana an naghihimate sa mensahe kan Kahadean, pagmaigotan na magkonsentrar sa marahay na nagigibo nindo sa ministeryo. Girumdomon na bakong sayang sana an padagos na paghihingoa nindo na ibalangibog an ngaran ni Jehova. (1 Cor. 15:58) Dugang pa, an kapangganahan niato sa ministeryo dai nakadepende sa reaksion nin mga tawo sa maogmang bareta. Makakasierto kita na seseguradohon ni Jehova na an mga tama an kamugtakan nin puso matatawan nin oportunidad na madangog an mensahe kan Kahadean.—Juan 6:44.
An Pampamilyang Pagsamba Nakakapaginhawa
11. Anong paninimbagan an itinao ni Jehova sa mga magurang, asin paano ninda maootob iyan?
11 Paninimbagan nin diosnon na mga magurang na tokdoan an saindang mga aki manongod ki Jehova asin sa saiyang mga dalan. (Deut. 11:18, 19) Kun ika sarong magurang, nag-iiskedyul ka daw nin panahon na tokdoan an saimong mga aki manongod sa satong mamomoton na langitnon na Ama? Tanganing tabangan ka na maotob an seryosong paninimbagan na ini asin maasikaso an mga pangangaipo kan saimong pamilya, abundang nagtatao si Jehova nin nakakapaginhawang espirituwal na kakanon paagi sa mga libro, magasin, video, asin rekording sa audio.
12, 13. (a) Paano nakikinabang an mga pamilya sa banggi nin Pampamilyang Pagsamba? (b) Paano masisierto nin mga magurang na an saindang pampamilyang pagsamba nagigin gikanan nin kaginhawahan?
12 Dugang pa, an grupong maimbod asin mapagmansay na oripon naggibo nin mga areglo para sa banggi nin Pampamilyang Pagsamba. Ini sarong banggi na itinatagama kada semana para sa pampamilyang pag-adal sa Biblia. Narisa nin dakol na an areglong ini nakatabang na mas magkaminorootmootan sinda asin nakapakosog sa saindang relasyon ki Jehova. Alagad paano masisierto nin mga magurang na an saindang pampamilyang pagsamba nagigin gikanan nin espirituwal na kaginhawahan?
13 An banggi nin Pampamilyang Pagsamba maninigo na magin interesante asin bakong sobra kaseryoso. Total, sinasamba niato “an maogmang Dios,” asin gusto nia na magin magayagaya kita sa satong pagsamba. (1 Tim. 1:11; Fil. 4:4) An pagkaigwa nin dagdag na banggi tanganing pag-olayan an mahalagang marhay na mga katotoohan sa Biblia sarong tunay na bendisyon. Puedeng ibagay nin mga magurang an saindang mga paagi nin pagtotokdo, na ginagamit an imahinasyon asin pagkamapag-imbento. Halimbawa, tinogotan nin sarong pamilya an saindang dies anyos na aki, si Brandon, na magreport dapit sa temang “Taano ta Naggamit si Jehova nin Halas Tanganing Magrepresentar ki Satanas?” Nakakapurisaw ki Brandon an isyung ini huling mahilig sia sa halas, asin makolog sa saiya na iasosyar iyan ki Satanas. Kun beses, an nagkapirang pamilya nagkakaigwa nin mga dramang basado sa Biblia, na may nakaasignar na karakter para sa lambang miembro nin pamilya, na binabasa sa Biblia an linya kan mga iyan, o tibaad iinaakto an pangyayari. An mga paaging ini nin pagtotokdo bako sanang nakakaogma kundi nagtatao man nin oportunidad sa saindong mga aki na makikabtang tanganing maabot an puso ninda kan mga prinsipyo sa Biblia. *
Likayan an mga Puedeng Makapagabat sa Saindo
14, 15. (a) Paano an tension asin takot saka kahaditan nag-oorog sa huring mga aldaw? (b) Anong iba pang problema an tibaad mapaatubang sa sato?
14 An tension asin takot saka kahaditan nag-oorog sa huring mga aldaw na ini kan maraot na sistemang ini nin mga bagay. An kawaran nin trabaho asin iba pang kasakitan sa pagbuhay nakakaapektar sa minilyon. Dawa an mga may trabaho sa parate nakakamate na an saindang ginaganar garo ibinubugtak sa bulsa na kadakol labot, kaya kadikit sana an natatada para sa saindang pamilya. (Ikomparar an Haggeo 1:4-6.) An mga politiko asin iba pang namomoon garo baga mayong maginibo mantang pinagmamaigotan nindang mahale an terorismo asin iba pang gikanan nin karatan. Dakol an nasasakitan huli sa saindang personal na mga pagkukulang.—Sal. 38:4.
15 An tunay na mga Kristiano bakong ligtas sa mga problema asin kahaditan na itinatao kan sistema nin mga bagay ni Satanas. (1 Juan 5:19) Sa nagkapirang pangyayari, an mga disipulo ni Cristo tibaad mapaatubang sa iba pang problema mantang nagmamaigot sinda na magdanay na maimbod ki Jehova. “Kun ako pinersegir ninda, kamo pepersegiron man ninda,” an sabi ni Jesus. (Juan 15:20) Minsan siring, dawa “pinepersegir” kita, ‘dai kita pinapabayaan.’ (2 Cor. 4:9) Sa paanong paagi?
16. Ano an makakatabang sa sato na mapagdanay an kagayagayahan?
16 Si Jesus nagsabi: “Madia kamo sa sako, kamo gabos na nagpapagal asin nagagabatan, asin papaginhawahon ko kamo.” (Mat. 11:28) Paagi sa lubos na pagtubod sa probisyon na pantubos ni Cristo, ipinapabaya niato an satong sadiri ki Jehova. Sa paaging ini, nagkakaigwa kita nin “puersa na labi sa ordinaryo.” (2 Cor. 4:7) “An paratabang,” an banal na espiritu nin Dios, nagpapakosog nanggad kan satong pagtubod tanganing matagalan niato an mga pagbalo asin kasakitan na napapaatubang sa sato saka magdanay man kitang magayagaya.—Juan 14:26; Sant. 1:2-4.
17, 18. (a) Maninigo kitang mag-ingat na dai maimpluwensiahan nin ano? (b) Ano an puedeng magin resulta kan pagtao nin importansia sa kinabanon na mga kasingawan?
17 An tunay na mga Kristiano ngonyan kaipuhan na mag-ingat na dai maimpluwensiahan kan pagigin bangkag sa kasingawan kan kinaban na ini. (Basahon an Efeso 2:2-5.) Ta kun dai, tibaad masilo kita kan ‘mawot kan laman saka mga mata, asin kan pagpaabaw-abaw kan kaya sa buhay.’ (1 Juan 2:16) O tibaad mapasala kita paagi sa paghona na magpapaginhawa sa sato an pagpadara sa mga mawot kan laman. (Roma 8:6) Halimbawa, may mga tawo na nagdodroga, nagbuburat, nagheheling nin pornograpiya, o nakikikabtang sa mga isport na peligrosong gayo o sa manlaenlaen na bawal na gibo tanganing mag-ogma. An “mga katusohan” ni Satanas may katuyohan na manglagalag paagi sa pagpalakop nin salang ideya dapit sa kun ano an nakakapaginhawa.—Efe. 6:11, nota sa ibaba.
18 Totoo, mayong maraot sa pagkakan, pag-inom, asin pakikikabtang sa nakakarahay na mga klase nin aling-alingan kun iyan ginigibo nin tama sana. Pero, dai niato tinotogotan na magin pangenot sa satong buhay an siring na mga bagay. Mahalagang marhay an pagigin timbang asin an pagpupugol sa sadiri, nangorogna huli sa panahon na kinabubuhayan niato. An mga pinagmamaigotan niatong kamtan para sa satong sadiri puedeng makapagabat sa sato sagkod na nagigin na kitang “inaktibo o daing bunga mapadapit sa tamang kaaraman dapit sa satong Kagurangnan na Jesu-Cristo.”—2 Ped. 1:8.
19, 20. Paano makakamtan an tunay na kaginhawahan?
19 Kun an satong kaisipan kaoyon kan mga regulasyon ni Jehova, nasasabotan niato na temporaryo sana an ano man na kasingawan na iinaalok kan kinaban na ini. Aram iyan ni Moises, asin aram man niato iyan. (Heb. 11:25) An katunayan iyo na an tunay na kaginhawahan, na nagtatao nin dakula asin nagdadanay na kagayagayahan saka pagkakontento, naggigikan sa paggibo kan kabotan kan satong langitnon na Ama.—Mat. 5:6.
20 Logod na padagos kitang maginhawahan paagi sa espirituwal na mga bagay. Sa paggibo kaiyan, ‘isinisikwal niato an pagkabakong diosnon asin an kinabanon na mga mawot mantang naghahalat kita sa maogmang paglaom asin mamuraway na pagkahayag kan dakulang Dios asin kan satong Paraligtas, si Cristo Jesus.’ (Tito 2:12, 13) Kaya, magin determinado kita na magdanay sa sakal ni Jesus paagi sa pagpasakop sa saiyang autoridad asin paggiya. Sa paggibo kaiyan, magkakamit kita nin tunay na kaogmahan asin kaginhawahan!
[Nota sa Ibaba]
^ par. 13 Para sa dugang pang impormasyon kun paano gigibohon na interesante asin nakakapagtokdo an pampamilyang pag-adal, helingon An Satong Ministeryo sa Kahadean na Enero 1991, pahina 1-2.
Ano an Isisimbag Nindo?
• Paano nagiginhawahan ngonyan an banwaan ni Jehova?
• Paano an ministeryo nakakapaginhawa sa sato asin sa mga nakakaolay niato?
• Ano an magigibo kan mga payo nin pamilya tanganing masierto na nakakapaginhawa an saindang pampamilyang pagsamba?
• Ano an mga nakakapagabat sa sato sa espirituwal na paagi?
[Mga Hapot Para sa Pag-adal]
[Mga Ritrato sa pahina 26]
Paagi sa pagpasan niato kan sakal ni Jesus, nagkakaigwa kita nin dakol na gikanan nin kaginhawahan