Makanompong nin Katiwasayan sa Banwaan nin Dios

“Papamurawayon taka sa dakulang kongregasyon.”—SAL. 35:18.

1-3. (a) Ano an puedeng magsapeligro kan espirituwalidad nin nagkapirang Kristiano? (b) Saen makakanompong nin proteksion an banwaan nin Dios?

MANTANG si Joe asin an saiyang agom nasa bakasyon, nag-iisnorkel sinda sa sarong tropikal na bahura nin korales na kadakol nin darakula asin saradit na sira na laen-laen an kolor. Luminangoy pa sinda sa haroharayo tanganing maheling an makangangalas na bahura sa irarom. Kan makaabot sinda sa lugar na biglang rarom an tubig, an agom ni Joe nagsabi, “Garo napaparayo na kita.” “Relaks ka lang,” an simbag ni Joe. “Aram ko an ginigibo ko.” Dangan, napangalas si Joe, ‘Taano ta mayo nang sira digdi?’ Grabe an takot nia kan maaraman nia kun taano. Hale sa hararom na lugar na iyan, sarong pating an parani sa saiya. Mayo siang kalabanlaban. Kan mga sarong metro na sana an rayo kan pating, suminiko iyan dangan ruminayo.

² An sarong Kristiano puedeng maakit nanggad sa sistema nin mga bagay ni Satanas—aling-alingan, trabaho, mga rogaring—kaya dai nia naririsa na pasiring na sia sa peligrosong situwasyon. “An sakong eksperyensia nagpaisip sa sako manongod sa mga pinipili ming makaibanan,” an sabi ni Joe, na sarong Kristianong magurang sa kongregasyon. “Lumangoy ka sa ligtas asin nakakaogmang lugar—sa kongregasyon!” Dai ka lumangoy pasiring sa hararom na tubig, na duman tibaad ika mapasuway asin mameligro sa espirituwal. Kun mapaduman ka, tolos na bumalik sa ‘ligtas na lugar.’ Ta kun dai, tibaad mameligro an saimong espirituwalidad.

³ Ngonyan, an kinaban peligrosong lugar para sa mga Kristiano. (2 Tim. 3:1-5) Aram ni Satanas na bilang na an mga aldaw nia, asin determinado siang sibaon an mga dai nagmamaan. (1 Ped. 5:8; Kap. 12:12, 17) Minsan siring, may proteksion kita. Tinawan ni Jehova an saiyang banwaan nin ligtas na espirituwal na pailihan—an Kristianong kongregasyon.

4, 5. Ano an saboot nin dakol dapit sa saindang futuro, asin taano?

⁴ An sekular na sosyedad limitado sana an ikakataong katiwasayan—sa pisikal man o sa emosyonal. Dakol na tawo an nakakamate na namemeligro an saindang pisikal na katiwasayan huli sa krimen, kadahasan, mahal na barakalon, asin pati sa mga problema dapit sa kapalibotan. An gabos napapaatubang sa paggurang asin paghelang. Asin an ibang may trabaho, harong, igong kuarta, asin marahay na salud tibaad nag-iisip kun sagkod noarin iyan.

⁵ Dakol man an nadedepisilan na magkaigwa nin katiwasayan sa emosyon. Makamomondo, an dakol na naglalaom na magkaigwa nin katoninongan asin pagkakontento sa pag-agoman saka sa pamilya dai naootob an mga linalaoman. Kun dapit sa espirituwal na mga bagay, dakol na parasimba an nariribong asin nariribaraw, na kinukuestion an halaga kan paggiya na inaako ninda. Nangorognang totoo iyan huli sa kuestionableng paggawe asin bakong sono sa Kasuratan na mga katokdoan kan mga namomoon sa relihion ninda. Huli kaini, iniisip nin dakol na mayo na sindang magigibo kundi an maglaom sa siensia o sa marahay na boot asin kaisipan kan saindang kapwa. Kun siring, bakong makangangalas na an mga tawo ngonyan nakakamate na mayo nanggad sinda nin katiwasayan o mas pinipili na sana ninda na daing gayo pag-isipan an saindang futuro.

6, 7. (a) Ano an mga dahelan kan pagkakalaen sa pagmansay kan mga naglilingkod sa Dios asin kan mga dai naglilingkod sa saiya? (b) Ano an eestudyaran niato?

⁶ Magkalaen nanggad an pagmansay kan mga kabilang sa Kristianong kongregasyon asin kan mga bakong kabilang dian! Dawa ngani kitang  mga lingkod ni Jehova napapaatubang man sa dakol sa mga isyu asin problema na napapaatubang sa satong kapwa, laen nanggad an satong reaksion. (Basahon an Isaias 65:13, 14; Malaquias 3:18.) Taano? Huling, paagi sa Biblia, aram niato an nakakakontentong paliwanag kun taano ta arog kaini an nangyayari sa katawohan, asin igwa kita kan mga kaipuhan niato tanganing makaya an mga kadepisilan asin problema sa buhay. Bilang resulta, dai kita naghahadit nin labi-labi manongod sa maabot na panahon. Huling kita parasamba ki Jehova, protektado kita tumang sa bakong marahay saka bakong makakasuratan na pangangatanosan, sa imoral na mga gibo, asin sa mga resulta kaiyan. Sa siring, an mga miembro kan Kristianong kongregasyon nakakamate nin katrangkilohan na dai naeeksperyensiahan nin iba.—Isa. 48:17, 18; Fil. 4:6, 7.

⁷ An nagkapirang halimbawa puedeng makatabang sa sato na horophoropon an kalaenan kan katiwasayan na namamatean kan mga naglilingkod ki Jehova asin kan mga dai naglilingkod sa saiya. An mga halimbawang ini puedeng magpahiro sa sato na siyasaton an sadiri niatong pangangatanosan saka mga gibo asin magpaisip sa sato kun baga mas lubos pa niatong ikakaaplikar an hatol nin Dios, na dinisenyo tanganing protehiran kita.—Isa. 30:21.

“An Sakong mga Bitis Dikit Pang Magsiko”

8. Ano an pirmeng kaipuhan na gibohon kan mga lingkod ni Jehova?

⁸ Poon pa sa kapinonan kan kasaysayan nin katawohan, pinagmamaigotan na kan mga naglilingkod asin nagkukuyog ki Jehova na likayan an dayupot na pakikiibaiba sa mga dai naggigibo kaiyan. Sa katunayan, ipinarisa ni Jehova na magkakaigwa nin pag-iwal sa pag-oltanan kan mga nagsasamba sa saiya asin kan mga nagsusunod ki Satanas. (Gen. 3:15) Huli sa marigon na paninindogan kan banwaan nin Dios sa mga prinsipyong ipinasabong nia, laen an paggawe ninda kun ikokomparar sa mga nakapalibot sa sainda. (Juan 17:15, 16; 1 Juan 2:15-17) Bako pirmeng pasil na gibohon an siring na paninindogan. Sa katunayan, kun minsan kinukuestion nin nagkapirang lingkod ni Jehova kun baga madonong an pagsasakripisyo.

9. Ano an nakapurisaw sa kagsurat kan Salmo 73?

⁹ An saro sa mga lingkod ni Jehova na nag-isip-isip kun baga madonong an ginibo niang  mga desisyon iyo an kagsurat kan Salmo 73, na posibleng marhay na saro sa mga naggikan ki Asaf. Naghapot an salmista kun taano ta sa parate an mga maraot garo baga mapanggana, maogma, asin asensado, mantang an nagkapira na nagmamaigot na maglingkod sa Dios nag-aagi nin mga pagbalo asin kasakitan.—Basahon an Salmo 73:1-13.

10. Taano ta importante sa saimo an mga isyung ibinangon kan salmista?

¹⁰ Nahapot mo na daw sa saimong sadiri an arog kan mga isinurat kan salmista? Kun iyo, dai mo kaipuhan na makonsensia nin grabe o mag-isip na nawawaran ka na nin pagtubod. An totoo, naisip man iyan nin dakol na lingkod ni Jehova, kaiba na an nagkapira na ginamit ni Jehova tanganing isurat an Biblia. (Job 21:7-13; Sal. 37:1; Jer. 12:1; Hab. 1:1-4, 13) Tunay nanggad, an gabos na nagmamawot na maglingkod ki Jehova dapat na seryosong pag-isipan asin akoon an simbag sa hapot na ini: An paglilingkod asin pagkuyog daw sa Dios an pinakamarahay na gibohon? Konektado ini sa isyu na ibinangon ni Satanas sa hardin nin Eden. An simbag dian mahalagang marhay sa pagresolber kan unibersal na isyu dapit sa soberaniya nin Dios. (Gen. 3:4, 5) Kaya, marahay na pag-isipan niato gabos an ibinangon kan salmista. Maninigo daw kitang maara sa mga maraot na hambogon na garo baga mayo lamang nin problema? Kita daw ‘masiko’ asin mapondo na sa paglilingkod ki Jehova asin aarogon sinda? Iyan mismo an seguradong gusto ni Satanas na gibohon niato.

11, 12. (a) Paano napangganahan kan salmista an saiyang mga pagduda, asin ano an itinotokdo kaini sa sato? (b) Ano an nakatabang sa saimo na magkaigwa nin kongklusyon na kapareho kan sa salmista?

¹¹ Ano an nakatabang sa salmista na mapangganahan an saiyang mga pagduda? Minsan ngani inako nia na dikit pa siang magsiko parayo sa katanosan, nabago an saiyang pagmansay kan maglaog sia sa “kahangahangang santuaryo nin Dios”—an boot sabihon, kan makiasosyar sia sa espirituwal na mga tawo sa tabernakulo o templo nin Dios asin kan horophoropon nia an katuyohan nin Dios. Dangan nagin maliwanag sa salmista na habo niang madamay sa kaaabtan kan mga paragibo nin maraot. Naheling nia na huli sa saindang pamumuhay asin mga desisyon napaduman sinda sa “dagang mahalnas.” Nasabotan kan salmista na an gabos na minabaya ki Jehova siertong malalaglag paagi sa “biglang grabeng mga katakotan,” alagad an mga naglilingkod ki Jehova susuportaran nia. (Basahon an Salmo 73:16-19, 27, 28.) Daing duda na naheheling nindo na totoo an mga tataramon na iyan. An pamumuhay para sa sadiri, na dai iniintindi an ley nin Dios, tibaad garo baga nakakaakit para sa dakol, alagad an maraot na mga resulta kan siring na pamumuhay dai madudulagan.—Gal. 6:7-9.

¹² Ano pa an manonodan niato sa eksperyensia kan salmista? Nakanompong sia nin katiwasayan asin kadonongan sa banwaan nin Dios. Nagpoon siang mangatanosan nin malinaw asin rasonable kan magduman sia sa lugar kun saen sinasamba si Jehova. Ngonyan man, puede kitang makanompong nin madonong na mga parakonseho asin magkamit nin nakakarahay na espirituwal na kakanon sa mga pagtiripon kan kongregasyon. Huli kaini, may marahay na dahelan kun taano ta sinasabihan ni Jehova an saiyang mga lingkod na mag-atender sa Kristianong mga pagtiripon. Dian mapaparigon asin madadagka sinda na humiro nin may kadonongan.—Isa. 32:1, 2; Heb. 10:24, 25.

Magin Madonong sa Pagpili Mo nin mga Kaibaiba

13-15. (a) Ano an nangyari ki Dina, na nag-iilustrar nin ano? (b) Taano ta sarong proteksion an pakikiibaiba sa mga kapwa Kristiano?

¹³ An aking babae ni Jacob na si Dina sarong halimbawa nin tawong napahamak huli sa pakikiibaiba sa kinabanon na mga tawo. An pagkasaysay sa Genesis manongod sa saiya nagsasabi sa sato na ugale na niang makiibaiba sa hoben na mga babaeng Cananeo sa lugar na iniistaran kan saindang pamilya. Bakong arog kan mga nagsasamba ki Jehova, an mga Cananeo mayo nin halangkaw na pamantayan sa moral. Sa kabaliktaran, ipinaparisa kan mga nakua kan mga arkeologo na an gibo-gibo kan mga Cananeo nagin dahelan na an daga mapano nin idolatriya, imoralidad, bikong pagsamba sa sekso, asin kadahasan.  (Ex. 23:23; Lev. 18:2-25; Deut. 18:9-12) Girumdomon an resulta kan pakikiibaiba ni Dina sa mga tawong ini.

¹⁴ Sarong lalaking taga duman, si Siquem, na ilinaladawan bilang “an pinakaonorable sa bilog na kamag-anakan kan saiyang ama” an nakaheling ki Dina ‘dangan kinua ini patin dinorogan ini asin linupigan ini.’ (Gen. 34:1, 2, 19) Makamomondong pangyayari nanggad! Sa heling daw nindo naisip man lamang ni Dina na mangyayari sa saiya an siring na bagay? Tibaad gusto man sana niang makipag-amigo sa mga hoben na taga duman, na ibinilang niang dai man makakaraot sa saiya. Minsan siring, nadaya nanggad si Dina.

¹⁵ Ano an itinotokdo sa sato kan pagkasaysay na ini? Na dai niato puedeng isipon na mayo nin peligro an pakikiibaiba sa mga bakong kapagtubod. An Kasuratan nagsasabi na “an maraot na pag-iriba nakakaraot sa marahay na mga ugale.” (1 Cor. 15:33) Sa ibong na lado, sarong proteksion an pakikiibaiba sa mga tawo na kapareho mo an mga paniniwala asin kapareho mong may halangkaw na mga pamantayan sa moral saka namomoot ki Jehova. An siring na marahay na pakikiibaiba mapakosog sa saimo na gumawe nin may kadonongan.—Tal. 13:20.

“Kamo Nahugasan Na”

16. Ano an sinabi ni apostol Pablo dapit sa nagkapira sa kongregasyon nin Corinto?

¹⁶ Dakol an natabangan kan Kristianong kongregasyon na mahale an maating mga gibo ninda. Sa enot na surat ni apostol Pablo sa kongregasyon sa Corinto, sinambit nia an mga pagbabagong ginibo kan mga Kristiano duman tanganing ioyon an saindang pamumuhay sa mga pamantayan nin Dios. An nagkapira dating parapakisaro, parasamba sa idolo, parasambay, homoseksuwal, parahabon, paraburat, asin iba pa. “Alagad kamo nahugasan na,” an sabi ni Pablo sa sainda.—Basahon an 1 Corinto 6:9-11.

17. Paano nabago an buhay nin dakol huli sa pamumuhay segun sa mga pamantayan kan Biblia?

¹⁷ An mga tawong mayo nin pagtubod mayo nin marahay asin naggigiyang mga prinsipyo. Ginigibo ninda kun ano an gusto ninda o tibaad nagpapadara na sana sinda sa imoral na pamumuhay kan mga nakapalibot sa sainda, arog kan nagkapira sa suanoy na Corinto bago an mga ini nagturubod. (Efe. 4:14) Minsan siring, an tamang kaaraman dapit sa Tataramon nin Dios asin sa saiyang mga katuyohan may kakayahan na pakarhayon an buhay kan gabos na nag-aaplikar kan Kasuratan. (Col. 3:5-10; Heb. 4:12) Dakol na miembro ngonyan kan Kristianong kongregasyon an makakapagsabi sa saindo na bago ninda nanodan asin iinaplikar an matanos na mga pamantayan ni Jehova, namuhay sinda na mayo nin bawal. Pero, sinda bakong kontento asin bakong maogma. Nakamate sana sinda nin katoninongan kan magpoon sindang makiibaiba sa banwaan nin Dios asin mamuhay kaoyon kan mga prinsipyo sa Biblia.

18. Ano an naeksperyensiahan nin sarong hoben, na nagpapatunay nin ano?

¹⁸ Sa kabaliktaran, an nagkapirang buminaya sa ‘ligtas na tubig’ kan Kristianong kongregasyon pinagbabasolan nanggad an desisyon na iyan. Sarong tugang na babae, na aapodon niatong Tanya, an nag-estorya na sia “nagdakula na may aram sa katotoohan,” alagad kan sia 16 anyos na, binayaan nia an kongregasyon tanganing “kamtan an mga pang-akit kan kinaban.” Kaiba sa mga resultang naeksperyensiahan nia iyo an dai ginustong pagbados asin an aborsion. Ini an sinabi nia ngonyan: “An tolong taon na pagrayo ko sa kongregasyon nagwalat sa sako nin emosyonal na kasakitan na dai na mahahale. An saro na padagos na nakakapurisaw sa sako iyo na ginadan ko an sakong dai pa namumundag na aki. . . . Gusto kong sabihon sa gabos na hoben na gustong ‘namitan’ an kinaban dawa sa halipot na panahon sana: ‘Dai!’ Tibaad garo baga masiram iyan sa primero,  alagad mapaiton nanggad an resulta kaiyan. Kamondoan sana an itatao kan kinaban. Aram ko iyan. Nanamitan ko iyan. Magdanay sa organisasyon ni Jehova! Iyan an solamenteng paagi nin pamumuhay na nagtatao nin kaogmahan.”

19, 20. Anong proteksion an itinatao kan Kristianong kongregasyon, asin paano?

¹⁹ Isip-isipa na sana kun ano an mangyayari sa saimo kun babayaan mo an nakakaprotehir na Kristianong kongregasyon. Dakol an habo man lamang nganing magirumdoman an saindang daing kamanungdanan na buhay bago ninda inako an katotoohan. (Juan 6:68, 69) Kun magdadanay kang dayupot sa saimong Kristianong mga tugang, padagos kang makakanompong nin katiwasayan asin proteksion sa ibong kan kasakitan asin kamondoan na lakop sa kinaban ni Satanas. An pakikiibaiba sa mga tugang asin regular na pag-atender sa mga pagtiripon kan kongregasyon padagos na magpapagirumdom sa saimo na madonong na kuyogon an matanos na mga pamantayan ni Jehova asin magpaparigon sa saimo na mamuhay kaoyon kaiyan. Kadakol kan dahelan mo na ‘pamurawayon si Jehova sa dakulang kongregasyon,’ arog kan ginibo kan salmista.—Sal. 35:18.

²⁰ Siempre, huli sa manlaenlaen na dahelan, an gabos na Kristiano nakakaeksperyensia nin mga panahon na garo baga depisil para sa sainda na papagdanayon an integridad bilang Kristiano. Tibaad kaipuhan sanang itokdo sa sainda an tamang direksion. Ano an magigibo mo—asin kan gabos na iba pa sa kongregasyon—tanganing tabangan an mga kapagtubod sa siring na mga panahon? Sisiyasaton sa sunod na artikulo kun paano mo ‘padagos na mararanga asin mapapakosog’ an saimong mga tugang.—1 Tes. 5:11.

Ano an Isisimbag Nindo?

• Ano an manonodan niato sa mga eksperyensia kan kagsurat kan Salmo 73?

• Ano an itinotokdo sa sato kan nangyari ki Dina?

• Taano ta makakanompong ka nin katiwasayan sa Kristianong kongregasyon?

[Mga Hapot Para sa Pag-adal]

[Mga Ritrato sa pahina 7]

Lumangoy ka sa ligtas na lugar; magdanay sa kongregasyon!