Nagkakasararo sa Pagkamoot​—Report kan Taonan na Miting

RISANG marhay an dakulang kaogmahan sa Assembly Hall kan Mga Saksi ni Jehova sa Siudad nin Jersey, New Jersey, E.U.A. Kan aga nin Oktubre 3, 2009, labing 5,000 an nagtiripon para sa ika-125 taonan na miting kan Watch Tower Bible and Tract Society of Pennsylvania. Rinibong iba pa an nagdangog asin nagheling kan programa paagi sa audio/video na pagkonektar sa tolong lokasyon kan Bethel sa Estados Unidos asin sa Bethel sa Canada. Gabos-gabos, 13,235 an naogmang marhay sa tolong oras na miting, na nagkakasararo sa pagkamoot ninda ki Jehova.

Si Geoffrey Jackson kan Namamahalang Grupo an tsirman. Pinonan nia an programa paagi sa pag-introdusir nin sarong koro nin mga Bethelite na nag-awit nin mga kantang kinua sa bagong songbook niato. An namayo sa koro saro pang miembro kan Namamahalang Grupo, si David Splane, na nagpaliwanag sa halipot kan kahalagahan nin musika sa dalisay na pagsamba. Inimbitaran an mga nagdadangog na awiton sa miting an tolong bagong kanta; inawit nguna iyan kan koro, dangan sabay iyan na inawit kan koro asin kan mga nagdadangog. An paggamit nin koro para sana sa espesyal na pagtiripon na ini; dai iyan dapat arogon sa mga pagtiripon kan mga kongregasyon, sirkito, o distrito.

Report Hale sa mga Sangang Opisina

May mga bisitang miembro nin Komite kan Sangang Opisina na nagtao nin report hale sa limang sangang opisina. Sinambit ni Kenneth Little na sa dai na mahahaloy an Canada mapoon nang mag-imprenta kan kadaklan sa mga magasin na para sa Estados Unidos asin Canada, na maresulta sa sampulong dobleng pagdakol sa produksion kan sangang opisinang iyan. Tanganing magibo ini, sarong bago nindang makina na pang-imprenta an papaandaron nin duwang relyibo, na may total na 16 na oras kada aldaw.

Si Reiner Thompson nagreport dapit sa gibohon na pang-Kahadean sa Dominican Republic, asin si Albert Olih nagsaysay kan satong mga aktibidad sa Nigeria. Si Emile Kritzinger, hale sa Mozambique, nagpaliwanag na pagkatapos nin dakol na dekada nin persekusyon duman, ikinarehistro an Mga Saksi ni Jehova kan 1992. Dai pa sana nahahaloy, an tolong nasyon na ini nagkaigwa nin marahayon na pagdakol nin mga parahayag. Si Viv Mouritz kan sangang opisina sa Australia nagsaysay dapit sa pag-oswag sa East Timor, na nasa pangangataman kan mga tugang sa Australia.

Mga Komite kan Namamahalang Grupo

Kan 1976, an gabos na aktibidad kan Mga Saksi ni Jehova ibinugtak sa pagdirehir kan anom na komite kan Namamahalang Grupo. Pakalihis nin panahon, an mga miembro kan grupong ibang mga karnero ninombrahan bilang mga katabang. Igwa ngonyan nin 23 na nagtatabang sa gibohon. Anom sa sainda an ininterbio. Igwa sinda nin total na 341 taon nin bilog na panahon na paglilingkod—na may promedyong 57 taon kada saro.

Si Don Adams, na nagpoon maglingkod sa Bethel kan 1943, nagpaliwanag na an Komite kan mga Parakoordinar kompuesto kan mga parakoordinar kan limang iba pang komite, asin sinesegurado kaiyan na an gabos na limang komite aregladong nagtatrabaho na may pagkasararo. An komiteng ini an nag-aasikaso sa mayor na mga emerhensia, persekusyon, mga kaso sa korte, mga kalamidad, asin iba pang importanteng marhay na bagay na nakakaapektar sa mga Saksi ni Jehova sa bilog na kinaban.

Ilinadawan ni Dan Molchan an trabaho kan Komite sa Tawohan, na iyo an nangangataman sa espirituwal asin pisikal na kapakanan kan 19,851 Bethelite sa bilog na kinaban. Tinokar ni David Sinclair kun paano pinangangatamanan kan Komite sa Pagpublikar an pagbakal nin mga suplay asin  kagamitan para sa mga sangang opisina. Sunod, si Robert Wallen, na naglilingkod sa Bethel sa laog nin haros 60 taon na, nagpaliwanag kun paano dinidirehiran kan Komite sa Paglilingkod an aktibidad kan banwaan ni Jehova sa langtad asin sa mga kongregasyon. Ipinaliwanag ni William Malenfant an magabat na trabaho kan Komite sa Pagtotokdo tanganing mag-andam nin programa sa kombension. Pinakahuri, ilinadawan ni John Wischuk kun paano dinidirehiran kan Komite sa Pagsurat an maingat na pag-andam asin pagproseso kan mga ipupublikar na impormasyon. *

An Teksto kan Taon Para sa 2010 Nakasentro sa Pagkamoot

An suminunod na tolong kabtang mga pahayag nin mga miembro kan Namamahalang Grupo. Nagpoon si Gerrit Lösch paagi sa hapot na, “Gusto daw nindong mamotan kamo nin iba?” Ipinaliwanag nia na an pagkamoot sarong pundamental na pangangaipo nin tawo, asin kita gabos napapakarhay huli kaiyan. Utang niato sa pagkamoot an satong pag-eksister dahel sa linalang kita ni Jehova huli sa pagkamoot na bakong maimot. An pangenot na motibo sa paghuhulit asin pagtotokdo niato iyo an pagkamoot ki Jehova.

An may prinsipyong pagkamoot ipinapaabot bako sana sa satong kapwa kundi pati na sa satong mga kaiwal. (Mat. 5:43-45) Dinagka an mga nagdadangog na isipon an inagihan ni Jesus para sa sato, na sia hinampak, tinuyatuya, linutaban, asin tinusok. Sa ibong kaini, ipinamibi nia an mga soldados na nagpako sa saiya. Dai daw kita napapahiro kaiyan na orog pa ngani siang kamotan? Dangan ipinaisi ni tugang na Lösch an teksto kan taon para sa 2010: 1 Corinto 13:7, 8, ‘An pagkamoot nagtatagal kan gabos na bagay. An pagkamoot nungkang nasusudya.’ Igwa kita kan paglaom bako sana na mabuhay sagkod lamang kundi na mamoot saka mamotan man sagkod lamang.

Kamo daw Nagbibiahe na Paubos Na an Gasolina?

Pinonan ni Samuel Herd an saiyang pahayag paagi sa sarong ilustrasyon. Ipamugtak na iiniba kamo nin sarong kaamigo tanganing magbiahe nin 50 kilometros. Mantang nasa tukawan para sa pasahero, nariparo nindo sa metro kan gasolina na paubos na iyan. Sinabihan nindo an saindong kaamigo na mauubosan na sia nin gasolina. Sinabi nia na dai kamo mahadit; mga apat na litro pa an nasa tangke. Minsan siring, dai nahaloy, naubosan kamo nin gasolina. Sulit daw na ‘magbiahe na paubos na an gasolina’ asin mameligro na ma-stranded? Mas marahay nanggad na pirmeng panoon an tangke! Sa piguratibong paagi, kaipuhan na pirme niatong panoon an satong tangke, na an gasolina iyo an satong kaaraman dapit ki Jehova.

Sa katuyohan na iyan, kaipuhan niatong magkarga nin igong gasolina asin gibohon iyan nin regular. May apat na paagi na ginigibo niato ini. Enot, an personal na pag-adal, na binabasa an Biblia aroaldaw tanganing magin pamilyar dian. Imbes na basta sana binabasa an mga tataramon, dapat na masabotan niato iyan. Ikaduwa, an epektibong  paggamit kan satong banggi nin Pampamilyang Pagsamba. Minapondo daw kita serosemana asin pinapano an satong tangke o kadikit sana an ikinakarga niato dian? Ikatolo, an pag-adal kan kongregasyon asin pag-atender sa mga pagtiripon. Ikaapat, an toninong asin mayong disturbong paghorophorop, na iniisip-isip an mga gibo ni Jehova. An Salmo 143:5 nagsasabi: “Ginigirumdom ko an mga aldaw kaidtong suanoy; hinohorophorop ko an gabos mong aktibidad.”

“An mga Matanos Masirang”

Si John Barr an nagtao kan ikatolo asin ultimong pahayag, na nagpaliwanag kan ilustrasyon ni Jesus dapit sa trigo asin mga doot. (Mat. 13:24-30, 38, 43) Sa ilustrasyon na iyan, sinambit an sarong “pag-ani” na durante kaiyan “an mga aki kan kahadean” tiniripon asin an mga doot isinuway tanganing suloon.

Lininaw ni tugang na Barr na an pagtipon na iyan dai magpapadagos nin daing sagkod. Sinambit nia an Mateo 24:34, na nagsasabi: “An kapag-arakian na ini dai nanggad malihis sagkod na an gabos na bagay na ini mangyari.” Binasa nia nin duwang beses an komento na: “Minalataw na an boot sabihon ni Jesus iyo na magkakainarabotan an buhay kan mga linahidan na nakaheling sa pagpoon kan tanda kaidtong 1914 asin an buhay kan ibang linahidan na makakaheling sa pagpoon kan dakulang kahorasaan.” Dai niato aram an eksaktong lawig kan “kapag-arakian na ini,” alagad kaiba dian an duwang grupong ini na magkakainarabotan an buhay. Minsan ngani manlaenlaen an edad kan mga linahidan, an mga kaiba sa duwang grupong ini na minakompuesto kan kapag-arakian magkakatemporanyo durante nin sarong kabtang kan huring mga aldaw. Nakakaranga nanggad na maaraman na an mas hoben na mga linahidan na katemporanyo kan mas gurang na mga linahidan na nakamansay kan tanda kan iyan magin risang-risa poon kan 1914 dai mauubos na magadan bago pumoon an dakulang kahorasaan!

“An mga aki kan kahadean” maogmang nag-aantisipar kan saindang langitnon na balos, alagad gabos kita kaipuhan na magdanay na maimbod, na nagliliwanag sagkod sa katapusan. Dakulaon nanggad na pribilehio niato na maheling sa satong panahon an pagtipon kan “trigo.”

Pagkatapos nin panghuring kanta, si Theodore Jaracz kan Namamahalang Grupo an nangenot sa pantapos na pamibi. Nagin nakakaparigon nanggad na programa an taonan na miting!

[Nota sa Ibaba]

[Kahon sa pahina 5]

PAADALAN PARA SA KAMAGURANGAN

Sa taonan na miting, ipinaisi ni Anthony Morris, miembro kan Namamahalang Grupo, na magpapadagos an pagsasanay para sa mga magurang sa kongregasyon. Sarong paadalan para sa kamagurangan sa Estados Unidos an nagpoon nin klase sa kapinonan kan 2008 sa sentro nin edukasyon sa Patterson, Nueva York. Katatapos pa sana kan ika-72 na klase, asin 6,720 kamagurangan na an nasanay. Dakol pa an kaipuhan gibohon. Sa Estados Unidos sana, igwa nin labing 86,000 na kamagurangan. Huli kaini, inaprobaran kan Namamahalang Grupo an saro pang paadalan na gigibohon sa Brooklyn, Nueva York, poon Disyembre 7, 2009.

Sa laog nin duwang bulan, apat na nagbibiaheng paraataman an sasanayon sa Patterson bilang mga instruktor. Dangan mabalyo sinda sa Brooklyn tanganing magtokdo, asin apat na iba pa an sasanayon. Dangan an mga ini matokdo sa paadalan sa Brooklyn, asin an enot na apat matokdo sa paadalan sa mga Assembly Hall asin Kingdom Hall. Ootrohon an paaging ini sagkod na may 12 nang instruktor na nagtotokdo sa anom na paadalan sa lenguaheng Ingles kada semana sa Estados Unidos. Dangan apat na instruktor an sasanayon na magtokdo sa lenguaheng Kastila. Dai sasalidahan kan paadalan na ini an presenteng Pang-Kahadean na Paadalan sa Pagmiministro; an katuyohan iyo na paoswagon an espirituwalidad kan kamagurangan. An mga sangang opisina sa bilog na kinaban mapoon na magkaigwa nin mga paadalan sa mga Assembly Hall asin Kingdom Hall durante kan 2011 taon nin paglilingkod.

[Mga Ritrato sa pahina 4]

An taonan na miting nagpoon paagi sa pag-awit hale sa bagong “songbook” niato na “Mag-awit ki Jehova”