‘Padagos na Daogon an Karatan’—Kontrolon an Kaanggotan
‘Padagos na Daogon an Karatan’—Kontrolon an Kaanggotan
“Dai kamo magbalos, mga namomotan, . . . kundi padagos na daogon nin karahayan an karatan.”—ROMA 12:19, 21.
1, 2. Anong marahay na halimbawa an ipinaheling nin nagkapirang pasaherong Saksi?
MANTANG an sarong grupo nin 34 Saksi ni Jehova nagbibiahe tanganing mag-atender sa dedikasyon nin sarong sangang opisina, naatraso sinda huli sa pag-aberiya nin makina kan eroplano. An dapat kutanang sarong oras na pagpondo tanganing magpagasolina inabot nin 44 masakiton na oras sa sarong puerang aeropuerto na mayo nin igong kakanon asin tubig o malinig na kasilyasan. Dakol na pasahero an naanggot asin hinuma an mga nagtatrabaho sa aeropuerto. Alagad an mga tugang nagdanay na kalmado.
2 An mga Saksi nakaabot man giraray sa saindang destinasyon pero an inabotan ninda ultimong kabtang na kan programa sa dedikasyon. Dawa ngani paragal na, nagdanay sinda pagkatapos kan programa tanganing makiasosyar sa mga tugang duman. Kan huri, naaraman ninda na may nakariparo sa saindang pagpapasensia asin pagpupugol sa sadiri. An saro sa iba pang pasahero nagsabi sa kompanya nin eroplano, “Kun bakong dahel sa 34 Kristiano sa biaheng idto, nagkariribok na kutana sa aeropuerto.”
Pamumuhay sa Sarong Kinaban na Pano nin Kaanggotan
3, 4. (a) Paano asin gurano na kahaloy na nakakaapektar sa mga tawo an madahas na kaanggotan? (b) Puede daw kutanang kontrolon ni Cain an saiyang kaanggotan? Ipaliwanag.
3 An mga kadepisilan sa buhay sa presenteng maraot na sistemang ini puedeng makapaanggot sa mga tawo. (Ecl. 7:7) Sa parate, an kaanggotan na ini minaresulta sa pagkaongis asin sa kadahasan pa ngani. May mga guerra sa pag-oltanan nin mga nasyon asin sa laog nin nasyon, mantang sa dakol na pamilya may mga iriwal. Kaidto pa, nangyayari na iyan. Ginadan ni Cain, na enot na aki ni Adan asin Eva, an saiyang nguhod na tugang na si Abel huli sa maimon na kaanggotan. Nagibo ni Cain an maraoton na bagay na ini minsan ngani sinadol sia ni Jehova na kontrolon an saiyang emosyon asin pinanugaan siang bebendisyonan kun gigibohon nia iyan.—Basahon an Genesis 4:6-8.
4 Sa ibong kan minanang pagkabakong sangkap ni Cain, may mapagpipilian sia. Puede nia kutanang kontrolon an saiyang kaanggotan. Kaya, talagang may paninimbagan sia sa madahas na ginibo nia. Kaagid kaiyan, huli sa satong pagkabakong sangkap nadedepisilan kitang likayan an pagkaanggot asin an mga gibo nin kaanggotan. Asin an ibang seryosong problema nakakadagdag pa sa tension sa “delikadong mga panahon” na ini. (2 Tim. 3:1) Halimbawa, an mga kadepisilan sa pagbuhay puedeng makapagabat sa satong emosyon. An mga pulis asin mga organisasyon na nagtatabang sa mga pamilya ikinokonektar an pagbagsak nin ekonomiya sa pagdakol kan kaso nin pagputok nin kaanggotan asin kadahasan sa pamilya.
5, 6. Anong kinabanon na saboot dapit sa pagkaanggot an tibaad makaapektar sa sato?
5 Dugang pa, an dakol sa mga tawong nakakaibanan niato “mamomoton sa sainda man sana,” “maabhaw,” asin “maringis” pa ngani. Madalion sana para sa sato na maimpluwensiahan asin mapaanggot kan maraot na mga ugaleng arog kaini. (2 Tim. 3:2-5) Sa katunayan, parateng ilinaladawan kan mga pelikula asin kan mga programa sa TV na an pagbalos marahay asin na an kadahasan normal sana saka makatanosan na solusyon sa mga problema. An parateng estorya kaiyan nagmomotibar sa mga nagdadalan na halaton kun paano an kontrabida “mag-aako kan maninigo sa saiya”—sa parate paagi sa madahas na paggadan sa saiya kan bida sa estorya.
6 Ipinapalakop kan siring na propaganda, bakong an mga paagi nin Dios, kundi “an espiritu kan kinaban” asin kan anggot na namamahala dian, si Satanas. (1 Cor. 2:12; Efe. 2:2; Kap. 12:12) An espiritung iyan nagpapanigo sa bakong sangkap na laman asin kontra nanggad sa banal na espiritu nin Dios saka sa bunga kaiyan. Sa katunayan, an sarong pundamental na katokdoan nin Kristianismo iyo na dai magbalos dawa pinapaanggot. (Basahon an Mateo 5:39, 44, 45.) Kun siring, paano niato lubos na ikakaaplikar an mga katokdoan ni Jesus?
Marahay Asin Maraot na mga Halimbawa
7. Ano an nagin resulta kan dai kontrolon ni Simeon asin Levi an saindang kaanggotan?
7 An Biblia may kadakol na hatol manongod sa pagkontrol sa kaanggotan asin igwa man nin praktikal na mga halimbawa nin puedeng mangyari kun kokontrolon niato iyan o dai. Estudyare an nangyari kan an mga aki ni Jacob na si Simeon asin Levi magbalos ki Siquem huli sa paglupig sa saindang tugang na si Dina. “Nakolgan an boot [ninda] saka naanggot sindang gayo.” (Gen. 34:7) Sunod, inaktake kan ibang mga aki ni Jacob an siudad ni Siquem, sinalakat iyan, asin dinarang bihag an mga babae asin mga aki. An gabos na ini ginibo ninda bako sanang huli ki Dina kundi posibleng marhay na huli man ta napasupog sinda asin naraot an saindang reputasyon. Sa pagmate ninda nainsulto sinda asin an saindang ama na si Jacob huli sa ginibo ni Siquem. Alagad paano minansay ni Jacob an saindang paggawe?
8. Ano an ipinapaheling kan nangyari ki Simeon asin Levi manongod sa pagbalos?
8 An makaturotristeng nangyari ki Dina siertong nakapamondong gayo ki Jacob; pero, kinondenar nia an pagbalos kan saiyang mga aki. Prinobaran pa man giraray ni Simeon asin Levi na ipangatanosan an ginibo ninda, na nagsabi: “Dapat daw na trataron nin siisay man an samong tugang na babae nin siring sa sarong patotot?” (Gen. 34:31) Alagad dai iyan natapos dian, huling ikinaanggot ni Jehova an nangyari. Dakol na taon pakalihis kaidto, ihinula ni Jacob na huli sa kadahasan na ginibo ni Simeon asin Levi, an mga magikan sa sainda magkakawararak sa mga tribo nin Israel. (Basahon an Genesis 49:5-7.) Iyo, an daing kontrol na kaanggotan ninda dai inoyonan nin Dios asin kan saindang ama.
9. Kasuarin si David haros madara na kan saiyang kaanggotan?
9 Laen nanggad si Hadeng David. Dakol an oportunidad nia na magbalos, alagad dai nia ginibo iyan. (1 Sam. 24:3-7) Minsan siring, sa sarong pangyayari, dikit na siang magpadara sa kaanggotan. May pang-iinsultong sinilyakan nin mayaman na lalaking si Nabal an mga tawohan ni David, minsan ngani prinotehiran ninda an mga aripompon asin pastor ni Nabal. Si David tibaad nakolgan nangorogna para sa saiyang mga tawohan, kaya plinano niang magbalos sa madahas na paagi. Mantang nagbabaklay si David asin an saiyang mga tawohan tanganing atakehon si Nabal asin an kairiba kaini sa harong, sarong hoben na lalaki an nagsabi ki Abigail, an mapagmansay na agom ni Nabal, manongod sa nangyari asin sinabihan sia na humiro. Si Abigail tolos-tolos na nag-andam nin dakol na regalo asin naghale tanganing sabaton si David. Mapakumbaba siang naghagad nin dispensasyon huli sa pagkadaing galang ni Nabal asin dinagka nia si David na humiro kaoyon kan pagkatakot kaini ki Jehova. Si David nakapag-isip-isip asin nagsabi: “Omawon ka na puminugol sa sako sa aldaw na ini na magkasala sa dugo.”—1 Sam. 25:2-35.
An Saboot nin Kristiano
10. Anong saboot an maninigong ipaheling nin mga Kristiano mapadapit sa pagbalos?
10 An nangyari ki Simeon asin Levi saka ki David asin Abigail malinaw na nagpapaheling na kontra si Jehova sa daing kontrol na kaanggotan asin kadahasan saka binebendisyonan nia an mga paghihingoa na makipagkatoninongan. “Kun posible, sagkod na nasa saindo, makipagkatoninongan kamo sa gabos na tawo,” an isinurat ni apostol Pablo. “Dai kamo magbalos, mga namomotan, kundi magtao nin lugar sa grabeng kaanggotan; huli ta nasusurat: ‘Sako an pagbalos; ako an mabalos, an sabi ni Jehova.’ Kundi, ‘kun nagugutom an kaiwal mo, pakakana sia; kun sia napapaha, painoma sia; huli ta sa paggibo kaini magtatambak ka nin naglalaad na baga sa saiyang payo.’ Dai kamo magpadaog sa karatan, kundi padagos na daogon nin karahayan an karatan.”—Roma 12:18-21. *
11. Paano nakanood an sarong tugang na babae na kontrolon an kaanggotan?
11 Puede niatong iaplikar an hatol na iyan. Halimbawa, sarong tugang na babae an nagsumbong sa sarong magurang sa kongregasyon manongod sa saiyang bagong manedyer sa trabaho. Ilinadawan nia ini na bakong makatanosan asin bakong maboot. Anggot sia sa manedyer asin gusto niang maghale sa trabaho. Sinadol sia kan magurang sa kongregasyon na dai magin pabiglabigla. Narisa kan magurang sa kongregasyon na nakapagrabe sana sa situwasyon an anggot na reaksion kan tugang sa bakong marahay na pagtratar kan manedyer. (Tito 3:1-3) Sinabihan sia kan magurang sa kongregasyon na dawa kun makakua sia nin ibang trabaho, kaipuhan pa man giraray nia na bagohon an saiyang reaksion sa bakong maboot na pagtratar. Sinadol sia na trataron an manedyer sa paagi na gusto man niang trataron sia, arog kan ipinapagibo sa sato ni Jesus. (Basahon an Lucas 6:31.) Nag-oyon an tugang na probaran iyan. An resulta? Paghaloyhaloy, naglumoy an saboot kan manedyer, asin pinasalamatan pa ngani nia an tugang huli sa trabaho kaini.
12. Taano an dai pagkakaintindihan nin mga Kristiano ta puedeng nangorognang nakakakolog?
12 Tibaad dai kita magngalas kun magkaigwa kita nin siring na mga problema sa saro na nasa luwas kan Kristianong kongregasyon. Aram niato na an buhay sa sistema ni Satanas sa parate bakong makatanosan asin na kaipuhan niatong makipaglaban tanganing dai kita mapaanggot kan mga paragibo nin maraot. (Sal. 37:1-11; Ecl. 8:12, 13; 12:13, 14) Minsan siring, kun magkaproblema kita sa satong espirituwal na tugang, puedeng magin mas makolog nanggad iyan. Sarong babaeng Saksi an nagsabi, “An nakapadepisil na marhay sa sako sa paglaog sa katotoohan iyo an pag-ako sa katunayan na bakong sangkap an mga lingkod ni Jehova.” Hale kita sa mayong pagmakolog na kinaban, asin naglalaom kita na an gabos sa kongregasyon magpapaheling nin Kristianong kabootan sa lambang saro. Sa siring, kun an sarong kapwa Kristiano, nangorogna kun may mga pribilehio sa kongregasyon, mayo nin konsiderasyon o minahiro na garo baga bakong Kristiano, puede iyan na makakolog o makapaanggot sa sato. ‘Paanong nangyayari an siring na mga bagay sa mga lingkod ni Jehova?’ an tibaad ihapot niato. An totoo, nangyari iyan dawa sa linahidan na mga Kristiano kan panahon kan mga apostol. (Gal. 2:11-14; 5:15; Sant. 3:14, 15) Ano an maninigong magin reaksion niato kun apektado kita?
13. Taano ta maninigo kitang maghingoa na mapangganahan an mga dai pagkakaintindihan asin paano niato magigibo iyan?
13 “Nakanood akong ipamibi an siisay man na nakakolog sa sako,” an sabi kan tugang na nasambitan pa sana. “Iyan pirmeng nakakatabang.” Arog kan binasa na niato, tinokdoan kita ni Jesus na ipamibi an mga nagpepersegir sa sato. (Mat. 5:44) Gurano pa daw kamaninigo na ipamibi niato an satong espirituwal na mga tugang! Kun paanong gusto nin sarong ama na magkaminorootmootan an saiyang mga aki, iyan man an gusto ni Jehova para sa saiyang mga lingkod digdi sa daga. Inaantisipar niato an panahon na iriba kitang mamumuhay nin matoninong saka maogma sagkod lamang, asin tinotokdoan kita ni Jehova na gibohon iyan ngonyan. Gusto nia na makipagtabangan kita sa pag-otob kan saiyang dakulang gibohon. Kun siring, resolberan niato an mga problema o ‘dai na sana pag-intindihon’ an kalapasan asin danay na magkasararo. (Basahon an Talinhaga 19:11.) Imbes na rumayo sa satong mga tugang kun may mag-abot na mga problema, maninigo niatong tabangan an lambang saro na magdanay sa banwaan nin Dios, na ligtas sa “daing katapusan na mga takyag” ni Jehova.—Deut. 33:27.
May Marahay na mga Resulta an Pagigin Maboot sa Gabos
14. Paano niato malalabanan an nakakapabangang impluwensia ni Satanas?
14 Tanganing maolang kita sa pagpalakop kan maogmang bareta, aktibong pinagmamaigotan ni Satanas asin kan mga demonyo na raoton an maogmang mga pamilya asin kongregasyon. Pinagmamaigotan nindang magpalakop dian nin pagkabaranga, huling aram ninda na nakakaraot iyan. (Mat. 12:25) Sa pakikilaban sa maraot na impluwensia ninda, marahay na sunodon niato an hatol ni Pablo: “An oripon kan Kagurangnan dai kaipuhan na makiiwal, kundi kaipuhan na magin maboot sa gabos.” (2 Tim. 2:24) Girumdomon na an satong pakikilaban, “bakong tumang sa dugo asin laman, kundi . . . tumang sa marigsok na mga puersang espiritu.” Tanganing manggana sa pakikilaban na ini, kaipuhan niatong gamiton an espirituwal na pangalasag, kaiba na an “kasangkapan kan maogmang bareta nin katoninongan.”—Efe. 6:12-18.
15. Ano an maninigong magin reaksion niato sa mga pag-atake hale sa luwas kan kongregasyon?
15 Hale sa luwas kan kongregasyon, an mga kaiwal ni Jehova naglalansar nin mabangis na mga pag-atake sa matoninong na banwaan nia. An mga Saksi ni Jehova kinokolgan sa pisikal nin nagkapira sa mga kaiwal na ini. Pinapakaraot man kita nin iba sa media o mga korte. Sinabihan ni Jesus an saiyang mga parasunod na asahan ini. (Mat. 5:11, 12) Ano an maninigong magin reaksion niato? Dapat na nungka kitang “magbalos nin maraot sa maraot,” sa tataramon man o sa gibo.—Roma 12:17; basahon an 1 Pedro 3:16.
16, 17. Sa anong masakit na situwasyon napaatubang an sarong kongregasyon?
16 Ano man an gibohon sa sato kan Diablo, makakatao kita nin marahayon na patotoo kun ‘dadaogon niato nin karahayan an karatan.’ Halimbawa, an sarong kongregasyon sa sarong isla sa Pasipiko nag-arkila nin hall para sa Memorial. Kan maaraman ini kan mga opisyal nin sarong iglesia duman, sinabihan ninda an mga miembro kan saindang iglesia na magtiripon sa hall na iyan para sa sarong seremonya ninda kasabay kan iiniskedyul na oras para sa satong Memorial. Minsan siring, pinagbotan kan hepe kan pulisiya an mga opisyal kan iglesia na bakantehon an hall sa oras na iyan para sa mga Saksi. Pero, pag-abot kan oras na iyan, an hall pano nin mga miembro kan iglesia asin nagpopoon na an saindang seremonya.
17 Mantang nagpepreparar an mga pulis para sa puersahan na pagpahale sa mga tawo sa hall, dinolok kan presidente kan iglesia an saro sa kamagurangan niato asin hinapot: “May espesyal na okasyon kamo ngonyan na banggi?” Sinabi sa saiya kan tugang an manongod sa Memorial, asin an lalaki nagsimbag: “Ah, dai ko aram iyan!” Dangan, sarong pulis an nagkurahaw: “Pero, sinabihan mi na kamo kasubagong aga!” An opisyal kan iglesia may pagtuyang nagsabi sa magurang sa kongregasyon: “Ano na an gigibohon nindo ngonyan? Pano-pano nin tawo an hall. Gagamiton daw nindo an mga pulis tanganing palayason kami?” May katusohan na minaniobra nia an mga bagay-bagay tanganing paluwason na an mga Saksi an namemersegir! Ano an gigibohon kan satong mga tugang?
18. Ano an ginibo kan mga tugang kan sinda pinapaanggot, asin ano an resulta?
18 An mga Saksi nagsuherir na gamiton kan iglesia an kabangang oras para sa saindang seremonya, asin pagkatapos kaiyan gigibohon na man kan mga tugang an Memorial. Luminampas sa oras an seremonya ninda, alagad pagkahale kan mga miembro kan iglesia, suminunod an Memorial. Kan sunod na aldaw, an gobyerno nagbilog nin sarong grupo na mag-iimbestigar sa nangyari. Pagkatapos kan imbestigasyon, an iglesia inobligar kan grupo na ianunsiar na an dahelan kan problema iyo an presidente kan iglesia, bako an mga Saksi. Pinasalamatan man kan grupo an mga Saksi ni Jehova huli sa mapasensiang pag-atubang ninda sa masakit na situwasyon. May marahay na resulta an mga paghihingoa kan mga Saksi na ‘makipagkatoninongan sa gabos na tawo.’
19. Ano pa an makakatabang sa pagkaigwa nin matoninong na mga relasyon?
19 An saro pang paagi tanganing mapagdanay an matoninong na relasyon sa iba iyo an paggamit nin maboot na pananaram. Totokaron sa sunod na artikulo kun ano an maboot na pananaram asin kun paano niato mapapaoswag asin magagamit iyan.
[Nota sa Ibaba]
^ par. 10 An pagsambit sa “naglalaad na baga” nanonongod sa sarong suanoy na paagi nin pagtunaw nin gapong may metal (ore) paagi sa pagpainit kaini sa ibabaw asin sa irarom tanganing mapaluwas an mga metal. An pagpaheling niato nin kabootan sa mga bakong maboot puedeng makapalumoy kan saindang saboot asin makapaluwas kan saindang mas marahay na mga kualidad.
Ikakapaliwanag daw Nindo?
• Taano an mga tawo sa kinaban ngonyan ta aranggoton?
• Anong mga halimbawa sa Biblia an nagpapaheling kan mga resulta nin pagkontrol o dai pagkontrol sa kaanggotan?
• Ano an maninigong magin reaksion niato kun makolgan kita nin kapwa Kristiano?
• Ano an maninigong magin reaksion niato sa mga pag-atake hale sa luwas kan kongregasyon?
[Mga Hapot Para sa Pag-adal]
[Ritrato sa pahina 16]
Nagpuli si Simeon asin Levi pagkatapos na magpadara sa kaanggotan
[Mga Ritrato sa pahina 18]
An pagpaheling nin kabootan puedeng makapalumoy sa saboot nin iba