Padagos na Pakosogon an Kongregasyon
Padagos na Pakosogon an Kongregasyon
“Padagos nindong rangahon asin pakosogon an lambang saro.”—1 TES. 5:11.
1. Ano an mga bendisyon sa pagigin miembro kan Kristianong kongregasyon, alagad anong mga kasakitan an tibaad naeeksperyensiahan pa?
DAKULANG bendisyon nanggad na magin miembro kan Kristianong kongregasyon. Igwa kamo nin marahay na relasyon ki Jehova. An pagsarig nindo sa saiyang Tataramon bilang giya nakakaprotehir sa saindo sa maraot na mga epekto nin pamumuhay na bakong sa Kristiano. Napapalibotan kamo nin tunay na mga katood na gustong mapakarhay kamo. Iyo, kadakol kan bendisyon. Minsan siring, an kadaklan na Kristiano nag-aagi nin mga problema. An nagkapira sa sainda tibaad mangaipo nin tabang tanganing masabotan an mas hararom na mga bagay kan Tataramon nin Dios. An nagkapira may helang o nagmomondong gayo, o tibaad naeeksperyensiahan an maraot na mga resulta nin bakong madonong na mga desisyon. Asin kita gabos nabubuhay sa bakong diosnon na kinaban.
2. Ano an maninigong magin reaksion niato sa kasakitan kan satong mga tugang, asin taano?
2 Mayo sa sato an naoogmang maheling na nagsasakit o nadedepisilan an mga kapwa Kristiano. Iinagid ni apostol Pablo an kongregasyon sa sarong hawak asin sinabi nia na “kun an sarong kabtang nagsasakit, an gabos na ibang kabtang nagsasakit na kadamay kaiyan.” (1 Cor. 12:12, 26) Sa siring na mga kamugtakan, maninigo kitang magmaigot na suportaran an satong mga tugang. Sa Kasuratan, dakol an pagkasaysay dapit sa mga miembro kan kongregasyon na nagtabang sa iba na makaya asin mapangganahan an mga kasakitan. Mantang sinisiyasat niato an mga pagkasaysay na iyan, isip-isipa kun paano nindo maaarog an pagtabang na ginibo ninda. Paano nindo matatabangan an saindong mga tugang sa espirituwal na paagi asin sa siring mapakosog an kongregasyon ni Jehova?
“Ipinag-iba Sia Ninda”
3, 4. Paano tinabangan ni Aquila asin Priscila si Apolos?
3 Kan si Apolos mag-istar sa Efeso, sia saro nang maigot na ebanghelisador. “Mantang sia malaad sa espiritu,” an sabi kan pagkasaysay sa Gibo, “sia nagtaram asin nagtokdo nin tama kan mga bagay manongod ki Jesus, alagad nakakaaram sana kan bautismo ni Juan.” An pagigin daing aram ni Apolos dapit sa bautismo “sa ngaran kan Ama asin kan Aki patin kan banal na espiritu” posibleng marhay na nangangahulogan na an nakapagpatotoo sa saiya iyo an mga disipulo ni Juan na Bautisador o an mga parasunod ni Jesus bago kan Pentecostes 33 C.E. Minsan ngani si Apolos maigot, may importanteng mga bagay na dai nia nasasabotan. Paano nakatabang sa saiya an pakikiibaiba sa mga kapagtubod?—Gibo 1:4, 5; 18:25; Mat. 28:19.
4 Nadangog si Apolos kan Kristianong mag-agom na si Aquila asin Priscila mantang sia mapusong nagtataram sa sinagoga, iiniba ninda sia, asin orog pang tinokdoan. (Basahon an Gibo 18:24-26.) Mamomoton an ginibo nindang ini. Siempre, dinolok ni Aquila asin Priscila si Apolos sa mataktika asin nakakatabang na paagi, na dai ipinapamate sa saiya na tinatatsaran sia. Dai nia sana aram an kasaysayan kan enot na Kristianong kongregasyon. Asin daing duda na nagpasalamat si Apolos sa saiyang bagong mga kaibaiba huli sa pagsabi sa saiya kan importanteng mga detalyeng ini. Huling naaraman na ni Apolos an impormasyon na ini, “tinabangan niang marhay” an saiyang mga tugang sa Acaya asin nagtao sia nin mapuersang patotoo.—Gibo 18:27, 28.
5. Anong mamomoton na tabang an ginigibo kan minilyon na parahayag kan Kahadean, asin may anong resulta?
5 Dakol sa Kristianong kongregasyon ngonyan an nagpapasalamat na marhay sa mga nagtabang sa sainda na masabotan an Biblia. Nagin tunay na magkakatood an dakol na inaadalan sa Biblia saka an mga nagtokdo sa sainda. Sa kadaklan na kamugtakan, kaipuhan na mag-iskedyul nin regular na pakikipag-olay sa mga tawo sa laog nin nagkapirang bulan tanganing matabangan sinda na masabotan an katotoohan. Minsan siring, andam an mga parahayag kan Kahadean na gibohon an pagsasakripisyong iyan huling aram ninda na buhay an nakataya. (Juan 17:3) Asin sarong kagayagayahan nanggad na maheling an mga tawo na nasasabotan an katotoohan, namumuhay oyon dian, asin ginagamit an saindang buhay sa paggibo kan kabotan ni Jehova!
“Marahay an Sinasabi Dapit sa Saiya”
6, 7. (a) Taano ta pinili ni Pablo si Timoteo bilang kaibaiba sa pagbiahe? (b) Natabangan si Timoteo na gumibo nin anong pag-oswag?
6 Kan si apostol Pablo asin Silas magdalaw sa Listra durante kan ikaduwang pagbiahe ni Pablo bilang misyonero, nanompongan ninda duman an hoben na si Timoteo, na mga 20 anyos gayod. “Marahay an sinasabi dapit sa saiya kan mga tugang sa Listra asin Iconio.” An ina ni Timoteo, si Eunice, asin an saiyang lola na si Loida nagdusay na mga Kristiano, alagad an saiyang ama bakong kapagtubod. (2 Tim. 1:5) Tibaad namidbid ni Pablo an pamilyang ini kan enot siang magdalaw sa lugar na iyan mga duwang taon bago kaidto. Alagad ngonyan an apostol nagpahayag nin partikular na interes ki Timoteo huling napapalaen ini sa ibang mga hoben. Huli kaini, sa pag-oyon kan grupo nin kamagurangan duman, si Timoteo nagin katabang ni Pablo sa pagmimisyonero.—Basahon an Gibo 16:1-3.
7 Dakol an manonodan ni Timoteo sa mas matuang kaibaiba nia. Asin nakanood talaga sia, kaya pag-abot nin panahon kompiado na si Pablo na sugoon si Timoteo na magdalaw sa mga kongregasyon asin magin representante nia. Sa 15 taon o labi pa na pakikiibaiba ni Timoteo ki Pablo, an bakong eksperyensiado asin tibaad masusupgon na hoben nag-oswag sagkod na magin matibayon na paraataman.—Fil. 2:19-22; 1 Tim. 1:3.
8, 9. Ano an magigibo kan mga miembro kan kongregasyon tanganing madagka an mga hoben? Magtao nin halimbawa.
8 Dakula an potensial nin dakol na hoben sa Kristianong kongregasyon ngonyan. Kun sinda dadagkahon asin tatabangan na umoswag nin mga kaibaiba na espirituwal an kaisipan, an mga hoben na ini puedeng magmaigot na aboton an mas dakulang mga paninimbagan sa banwaan ni Jehova. Mag-obserbar sa kongregasyon nindo! May naheheling daw kamong mga hoben na puedeng magpagamit kan saindang sadiri, arog ni Timoteo? Sa tabang asin pagdagka nindo, tibaad sinda magin mga payunir, Bethelite, misyonero, o nagbibiaheng paraataman. Paano nindo sinda matatabangan na aboton an siring na mga pasohan?
9 Si Martin, na 20 taon nang Bethelite, may pagpasalamat na ginirumdom an interes na ipinaheling sa saiya nin paraataman sa sirkito 30 taon na an nakaagi mantang magkaibanan sinda sa paglilingkod sa langtad. Entusiastikong ipinakipag-olay kan paraataman an paglilingkod nia sa Bethel kan sia hoben pa. Dinagka nia si Martin na pag-isipan an posibilidad na magpagamit sa organisasyon ni Jehova sa kaparehong paagi. Para ki Martin, an dai malilingawan na pag-oolay na ini nakaimpluwensiang marhay sa mga nagin desisyon nia kan huri. An pakikipag-olay mo sa hoben na mga kaamigo dapit sa teokratikong mga pasohan tibaad magkaigwa nin marahay na epekto sa sainda.
“Magtaram na May Pagranga sa mga Kalag na Nagmomondo nin Makuri”
10. Ano an namatean ni Epafrodito, asin taano?
10 Halawig asin nakakapagal an pagbiahe ni Epafrodito hale sa Filipos pasiring sa Roma tanganing dalawon si apostol Pablo, na nabilanggo huli sa saiyang pagtubod. Si Epafrodito an nagin representante kan mga taga Filipos. Dai nia sana dinara an saindang regalo sa apostol kundi plinano man nia na magdanay na kaiba ni Pablo tanganing tabangan ini sa abot kan saiyang makakaya mantang ini nasa masakit na situwasyon. Minsan siring, mantang nasa Roma, si Epafrodito nagkahelang “na haros magadan na.” Huling an pagmate nia dai nia nagibo an saiyang misyon, nagmondo nin makuri si Epafrodito.—Fil. 2:25-27.
11. (a) Taano ta dai niato maninigong ipagngalas kun an nagkapira sa kongregasyon nagmomondo nin makuri? (b) Ano an irinekomendar ni Pablo may koneksion ki Epafrodito?
11 Huli sa manlaenlaen na kasakitan, may mga tawo ngonyan na nagmomondo nin makuri. Ipinapaheling kan estadistika hale sa World Health Organization na 1 sa kada 5 katawo an nag-aagi nin depresyon sa sarong peryodo sa saindang buhay. Naeeksperyensiahan iyan dawa kan banwaan ni Jehova. An mga problema sa pagsuportar sa pamilya, helang, pagkadesganar huli sa mga pagkukulang, o iba pang bagay puedeng makapaluya nin boot. Ano an ikakatabang kan mga taga Filipos ki Epafrodito? Si Pablo nagsurat: “Itao nindo sa saiya an pinagkatodan na pag-ako dian sa Kagurangnan sa bilog na kagayagayahan; asin padagos nindong kamotan an siring na mga lalaki, huli ta dahel sa gibohon kan Kagurangnan diit pa siang magadan, na ibinugtak sa peligro an saiyang kalag, tangani na lubos niang mahipnoan an pagigin mayo nindo digdi sa pagtao nin personal na paglilingkod sa sako.”—Fil. 2:29, 30.
12. Ano an puedeng makaranga sa mga nagmomondo nin makuri?
12 Maninigo man niatong parigonon an boot kan mga tugang na pinangluluyahan nin boot o nagmomondo nin makuri. Daing duda na may masasabi kitang positibong mga bagay manongod sa saindang paglilingkod ki Jehova. Tibaad naggibo sinda nin dakulang mga pagliliwat sa saindang buhay tanganing magin Kristiano o bilog na panahon na ministro. Pinapahalagahan niato an mga paghihingoang iyan, asin puede niatong siertohon sa sainda na pinapahalagahan man iyan ni Jehova. Dawa ngani dai na nagigibo kan mga maimbod na may edad na o may helang an gabos na nagigibo ninda dati, maninigo pa man giraray sinda sa satong paggalang huli sa saindang dakol na taon nin paglilingkod. Ano man an kamugtakan, an sadol ni Jehova sa gabos na maimbod sa saiya iyo na: “Magtaram na may pagranga sa mga kalag na nagmomondo nin makuri, suportaran an mga maluya, magin matinios sa gabos.”—1 Tes. 5:14.
‘Maboot Nindo Siang Patawadon Asin Rangahon’
13, 14. (a) Anong seryosong aksion an ginibo kan kongregasyon nin Corinto, asin taano? (b) Ano an epekto kan pagtitiwalag na iyan?
13 Sa kongregasyon nin Corinto kan enot na siglo, may lalaki na daing pagsolsol na nakikisaro. An paggawe nia nagsapeligro kan kadalisayan kan kongregasyon asin nagin iskandalo dawa sa mga bakong kapagtubod. Huli kaini, angay sanang nagsadol si Pablo na haleon an lalaki sa kongregasyon.—1 Cor. 5:1, 7, 11-13.
14 Marahay an nagin epekto kan pagdisiplinang iyan. Naprotehiran an kongregasyon sa nakakaraot na impluwensia, asin an nagkasala nakapag-isip-isip dangan sinserong nagsolsol. Huling ipinaheling kan lalaki paagi sa saiyang mga gibo na nagsosolsol sia, ipinarisa ni Pablo sa ikaduwa niang surat sa kongregasyon na iyan na maninigo nang ibalik an lalaki. Minsan siring, bako sana ini an kaipuhan. Sinadol man ni Pablo an kongregasyon na “maboot na patawadon asin rangahon [an nagkasala na nagsosolsol], tanganing minsan paano an siring na tawo dai madaog kan saiyang pagigin labi-labi kamamondo.”—Basahon an 2 Corinto 2:5-8.
15. Paano niato maninigong mansayon an nagsosolsol na mga nagkasala na ibinalik na sa kongregasyon?
15 Ano an manonodan niato sa pagkasaysay na ini? Namomondo kita kun may natitiwalag. Tibaad nagtao sinda nin katuyawan sa ngaran nin Dios asin naraot ninda an reputasyon kan kongregasyon. Tibaad nagkasala ngani sinda sa sato personalmente. Pero, kun an kamagurangan na inasignaran na magsiyasat sa kaso magdesisyon, kaoyon kan paggiya ni Jehova, na dapat nang ibalik sa kongregasyon an nagkasala na nagsosolsol, ipinaparisa kaiyan na pinatawad na sia ni Jehova. (Mat. 18:17-20) Bako daw na maninigo kitang maghingoa na arogon Sia? Sa katunayan, an pagigin daing herak asin bakong mapagpatawad garo man sana pagtumang ki Jehova. Tanganing makakontribwir sa katoninongan asin pagkasararo kan kongregasyon nin Dios asin tanganing oyonan ni Jehova, bako daw na maninigo niatong ‘patunayan an satong pagkamoot’ sa mga nagkasala na nagsosolsol talaga asin ibinalik na?—Mat. 6:14, 15; Luc. 15:7.
“Magagamit Ko Sia”
16. Taano ta desganado si Pablo sa ginibo ni Marcos?
16 An saro pang sono sa Kasuratan na pagkasaysay nagpapaheling na dai kita maninigong magtanom nin negatibong mga saboot sa mga nakapadesganar sa sato. Halimbawa, desganadong gayo si apostol Pablo sa ginibo ni Juan Marcos. Taano? Kan ponan ni Pablo asin Bernabe an enot nindang pagbiahe bilang misyonero, nag-iba si Marcos tanganing tabangan sinda. Alagad durante kan pagmimisyonerong iyan asin huli sa dai sinambit na dahelan, binayaan ni Juan Marcos an saiyang kairiba asin puminuli sia. Desganadong gayo si Pablo sa desisyon na ini kaya kan nagpaplano sia para sa ikaduwang pagbiahe, nakadiskusyon nia si Bernabe kun baga iiiba pa ninda si Marcos. Huli sa nangyari kan enot na pagbiahe, habo ni Pablo na iiba ninda si Marcos.—Basahon an Gibo 13:1-5, 13; 15:37, 38.
17, 18. Paano niato naaraman na naresolberan an dai pagkakaintindihan ni Pablo saka Marcos, asin ano an manonodan niato digdi?
17 Minalataw na dai tinogotan ni Marcos na mangluyang gayo an saiyang boot dahel sa pagsayuma ni Pablo, huling nagpadagos sia kaiba ni Bernabe sa pagmimisyonero sa ibang teritoryo. (Gibo 15:39) Nagkapirang taon pagkatapos kaidto, ipinaheling ni Pablo sa isinurat nia manongod ki Marcos na nagin maimbod asin mapagtitiwalaan ini. Kan si Pablo bilanggo sa Roma, ipinaapod nia si Timoteo paagi sa surat. Sa surat man sanang iyan, si Pablo nagsabi: “Kuanon mo si Marcos asin iiba mo sia, huli ta sia magagamit ko sa paglilingkod.” (2 Tim. 4:11) Iyo, sa heling ni Pablo nag-oswag na si Marcos.
18 May leksion kitang manonodan digdi. Napatalubo ni Marcos an mga kualidad nin marahay na misyonero. Dai sia nasingkog sa pagsayuma ni Pablo kan enot. Sia asin si Pablo parehong espirituwal na tawo, asin mayo nin nagdanay na raot nin boot sa sainda. Sa kabaliktaran, kan huri minidbid ni Pablo si Marcos bilang mahalagang marhay na katabangtabang. Kaya kun napangganahan na nin mga tugang an mga kadepisilan asin kun tapos na an mga problema, an tamang gibohon iyo na lingawan na iyan asin padagos na tabangan an iba na umoswag sa espirituwal. An pagigin positibo nakakapakosog sa kongregasyon.
Ika Asin an Kongregasyon
19. Anong tabang an ikakatao nin gabos na miembro kan Kristianong kongregasyon sa lambang saro?
19 Sa “delikadong mga panahon na [ini na] masakit pakibagayan,” kaipuhan mo an tabang kan saimong mga tugang sa kongregasyon, asin kaipuhan man ninda an tabang mo. (2 Tim. 3:1) Tibaad dai pirmeng aram nin indibiduwal na mga Kristiano an gigibohon tanganing mapangganang maatubang an mga situwasyon ninda, alagad aram iyan ni Jehova. Asin puede niang gamiton an manlaenlaen na miembro kan kongregasyon—kaiba ka—tanganing tabangan an iba na sundon an tamang dalan. (Isa. 30:20, 21; 32:1, 2) Kun siring, isapuso mo nanggad an sadol ni apostol Pablo! Padagos na “rangahon asin pakosogon an lambang saro, siring sa ginigibo na ngani nindo.”—1 Tes. 5:11.
Ano an Isisimbag Nindo?
• Taano an pagpakosog sa iba ta kaipuhan sa Kristianong kongregasyon?
• Puede nindong tabangan an iba na mapangganahan an anong klaseng mga kadepisilan?
• Taano ta kaipuhan niato an tabang nin ibang miembro kan satong kongregasyon?
[Mga Hapot Para sa Pag-adal]
[Ritrato sa pahina 11]
Puede kitang tumabang kun an sarong kapwa Kristiano napapaatubang sa depisil na situwasyon
[Ritrato sa pahina 12]
Dakula an potensial nin dakol na hoben sa Kristianong kongregasyon ngonyan