An Pagkaalisto May Marahay na mga Resulta

ALISTO daw kamo sa mga oportunidad sa paghuhulit na tibaad biglang mag-abot sa teritoryo kan saindong kongregasyon? Nagin alisto an Kristianong mga tugang niato sa makasaysayan na duongan na siudad nin Turku, Finland, asin nagkaigwa iyan nin marahay na mga resulta.

Dai pa sana nahahaloy, narisa nin mga tugang sa Turku an pag-abot sa saindang lugar nin sarong grupo nin mga lalaking taga Asia tanganing hamanon an dakulang barkong panglayag na ginigibo sa sarong gibohan nin barko duman. Paghaloyhaloy, naaraman nin sarong tugang kun saen na mga hotel nagdadagos an mga taga ibang lugar na iyan. Naaraman man nia na kun amay na aga, an mga trabahador kinukua nin mga bus sa saindang hotel sa sentro kan banwaan asin ihinahatod sa duongan. Ibinareta nia tolos ini sa mga tugang sa kongregasyon sa Turku na Ingles an lenguahe.

Huli sa kadakol na taga ibang nasyon na ini, naisip kan kamagurangan sa kongregasyon na iyan na nagkaigwa sinda nin dai inaasahan na oportunidad na sabihon sa mga ini an mensahe kan Kahadean, asin tolos sindang nag-areglo nin espesyal na kampanya. Kan Domingo kan semanang iyan, alas siete nin aga, sampulong parahayag an nagtiripon harani sa pondohan nin bus. Kan enot, mayo sindang naheling na trabahador. ‘Hurihon na daw kita?’ an inisip kan mga tugang. ‘Naghale na daw sinda sa Turku?’ Alagad paghaloyhaloy, nag-abot an sarong trabahador na nakasulot nin bado na overall. Nag-abot an saro pa, asin dakol pa an nag-arabot. Dai naghaloy, kadakol nang trabahador an nagkatiripon harani sa pondohan nin bus. Pinonan kan mga parahayag an paghuhulit, na dinodolok an mga trabahador gamit an Ingles na mga publikasyon. Marahay sana ta inabot nin mga sarong oras bago nakasakay sa mga bus an gabos na trabahador, kaya an mga tugang nagkaigwa nin igong panahon na makaolay an kadaklan sa sainda. Kan maghale an mga bus, dara kan mga trabahador an 126 na buklet asin 329 magasin!

An marahay na mga resulta nakadagka sa mga tugang na otrohon an kampanya kan suminunod na semana, durante kan pagsongko kan paraataman sa sirkito. Kan alas sais y media nin aga, dawa nag-ooran, pinangenotan kan paraataman sa sirkito an pagtiripon bago maglingkod sa langtad, asin 24 parahayag an nagpasiring sa pondohan nin bus. Sa panahon na ini, nagdara man sinda nin mga literaturang Tagalog huling narisa ninda na hale sa Pilipinas an kadaklan sa mga taga ibang nasyon na idto. Kan agang iyan, kan an mga bus magpasiring sa duongan, dara kan mga trabahador an 7 libro, 69 buklet, asin 479 magasin. Imahinara nanggad an kagayagayahan kan mga tugang na nakikabtang sa kampanyang iyan!

Bago an mga trabahador magbaralik sa sadiri nindang nasyon, nadalaw kan mga tugang an nagkapira sa sainda sa mga hotel na dinadagosan ninda asin mas detalyadong ipaliwanag an mensahe kan Kahadean. An nagkapirang trabahador nagsabi na dati na sindang nakaolay nin mga Saksi sa ibang parte kan kinaban. Pinasalamatan kan mga trabahador an mga tugang huli sa paghihingoa kan mga ini na kaolayon sinda durante kan saindang pag-istar sa Finland.

Alisto daw kamo sa mga oportunidad na tibaad biglang mag-abot sa teritoryo kan saindong kongregasyon? Hinihingoa daw nindo na dolokon an mga tawo na manlaenlaen an pinaghalean? Kun iyo, tibaad maeksperyensiahan man nindo an arog kan naeksperyensiahan kan mga tugang niato sa Turku.

[Mapa/Ritrato sa pahina 32]

(Para sa aktuwal na format, hilingon an publikasyon)

FINLAND

HELSINKI

Turku

[Credit Line]

STX Europe