Kun Ano an Ihahayag kan Aldaw ni Jehova

“An aldaw ni Jehova madatong siring sa parahabon, . . . asin an daga asin an mga gibo-gibo dian mahahayag.”—2 PED. 3:10.

1, 2. (a) Paano matatapos an presenteng maraot na sistema nin mga bagay? (b) Anong mga hapot an pag-oolayan niato?

AN PRESENTENG maraot na sistema nin mga bagay nakabasar sa pundamental na kaputikan na an daga mapangganang mapamamahalaan nin tawo dawa independiente ki Jehova. (Sal. 2:2, 3) Puede daw na magdanay sagkod lamang an sarong bagay na nakabasar sa kaputikan? Siertong dai! Pero, dai niato kaipuhan na halaton na malaglag an kinaban ni Satanas sa sadiri sana kaiyan. Imbes, lalaglagon iyan nin Dios sa itinalaan niang panahon asin sa sadiri niang paagi. An paglaglag nin Dios sa maraot na kinaban na ini magpapabanaag, sa sangkap na paagi, kan saiyang hustisya sagkod pagkamoot.—Sal. 92:7; Tal. 2:21, 22.

² Isinurat ni apostol Pedro na “an aldaw ni Jehova madatong siring sa parahabon, na dian an kalangitan mawawara na may nagsasagitsit na ribok, alagad an mga elemento mantang labi-labi kainit matutunaw, asin an daga asin an mga gibo-gibo dian mahahayag.” (2 Ped. 3:10) Ano “an kalangitan” asin “daga” na sinambit digdi? Ano “an mga elemento” na matutunaw? Asin ano an boot sabihon ni Pedro kan mga tataramon na an “daga asin an mga gibo-gibo dian mahahayag”? An pakaaram kan simbag sa mga hapot na ini matabang sa sato na magin andam para sa makangingirhat na mga mangyayari sa haraning ngapit.

An Kalangitan Asin an Daga na Mawawara

3. Ano an “kalangitan” na nasambitan sa 2 Pedro 3:10, asin paano iyan mawawara?

³ Kun an tataramon na “kalangitan” ginagamit sa Biblia sa simbolikong paagi, sa parate nanonongod iyan sa mga namamahala, na mas halangkaw kisa sa mga sakop ninda. (Isa. 14:13, 14; Kap. 21:1, 2) “An kalangitan [na] mawawara” nagrerepresentar sa pamamahala nin tawo sa bakong diosnon na sosyedad. An pagkawara kan mga ini na may makosog na “nagsasagitsit na ribok”—o “makosog na pag-urog-udog,” segun sa saro pang traduksion—tibaad nagpaparisa nin marikas na pagkapara kan kalangitan na ini.

4. Ano an “daga,” asin paano iyan malalaglag?

⁴ An “daga” nagrerepresentar sa kinaban nin katawohan na siblag sa Dios. Arog kaiyan an kinaban kan panahon ni Noe asin, sa pagboot nin Dios, natapos iyan paagi sa Baha. “Sa iyo man sanang tataramon an kalangitan asin an daga na yaon ngonyan itinatagama sa kalayo asin irinereserba sa aldaw nin paghokom asin kalaglagan kan bakong diosnon na mga tawo.” (2 Ped. 3:7) Bakong arog kan Baha na sararoan na linaglag an gabos na bakong diosnon, an maabot na kalaglagan durante kan “dakulang kahorasaan” kompuesto nin mga kabtang. (Kap. 7:14) Sa enot na kabtang kan kahorasaan na iyan, papahiroon nin Dios an politikal na mga namamahala sa kinaban na ini na laglagon an “Dakulang Babilonya,” asin sa siring ipinapaheling an pagkabalde nia sa relihiosong patotot na iyan. (Kap. 17:5, 16; 18:8) Dangan, sa ultimong kabtang kan dakulang kahorasaan, an guerra sa Armagedon, popohoon ni Jehova mismo an gabos na iba pang kabtang kan kinaban ni Satanas.—Kap. 16:14, 16; 19:19-21.

“An mga Elemento . . . Matutunaw”

5. Ano an kaiba sa piguratibong mga elemento?

⁵ Ano “an mga elemento” na “matutunaw”? Tinawan nin kahulogan nin sarong diksionaryo sa Biblia an “mga elemento” bilang “pundamental na mga sangkap.” Sinabi kaiyan na an terminong ini “ginamit na nanonongod sa mga letra kan alpabeto, bilang mga elemento kan pagtaram.” Sa siring, “an mga elemento” na nasambitan ni Pedro nanonongod sa pundamental na mga dahelan  kan bakong diosnon na mga karakteristiko, ugale, gibo-gibo, asin pasohan kan kinaban. Kaiba sa “mga elemento” “an espiritu kan kinaban,” na ‘naghihiro sa mga aki nin kasumbikalan.’ (1 Cor. 2:12; basahon an Efeso 2:1-3.) An espiritung iyan, o “aire,” lakop sa kinaban ni Satanas. Iniimpluwensiahan kaiyan an mga tawo na mag-isip, magplano, magtaram, asin maghiro sa mga paagi na nagpapabanaag kan isip ni Satanas, an mapalangkaw asin mapang-angat na “namamahala sa autoridad kan aire.”

6. Paano ipinapabanaag kan kinaban an espiritu kaiyan?

⁶ Kun siring, aram man ninda o dai, an mga naiimpluwensiahan kan espiritu kan kinaban nagtotogot na makontrol ni Satanas an isip asin puso ninda, kaya mababanaag sa sainda an saiyang kaisipan asin ugale. Bilang resulta, ginigibo ninda an gusto ninda na dai iniintindi an kabotan nin Dios. Sinda minagawe na may kapalangkawan o kaimotan, nagpapabanaag nin rebelyosong ugale sa autoridad, asin nagpapadara sa ‘mawot kan laman asin mawot kan mga mata.’—Basahon an 1 Juan 2:15-17. *

7. Taano ta dapat niatong ‘ingatan an satong puso’?

⁷ Kun siring, mahalaga nanggad na ‘ingatan an satong puso’ paagi sa paggamit nin diosnon na kadonongan sa satong pagpili nin mga kaibaiba, babasahon, aling-alingan, asin Web site sa Internet! (Tal. 4:23) Si apostol Pablo nagsurat: “Mag-ingat kamo: tibaad may saro na makadara sa saindo bilang saiyang biktima paagi sa pilosopiya asin daing kamanungdanan na pandadaya segun sa tradisyon nin mga tawo, segun sa pundamental na mga bagay kan kinaban asin bakong segun ki Cristo.” (Col. 2:8) An pagboot na iyan nagigin orog na importante mantang nagdadangadang an aldaw ni Jehova, huling tutunawon kan daing kaagid na ‘init’ kaiyan an gabos na “elemento” kan sistema ni Satanas, na nagpapatunay na dai makakaya kan mga ini an init kan kaanggotan nin Dios. Ipinapagirumdom kaini sa sato an sinabi sa Malaquias 4:1: “An aldaw madatong na naglalaad siring sa horno, asin an gabos na pangahas asin an gabos na naggigibo nin marigsok magigin siring sa pinaggapasan. Asin tutumtomon nanggad sinda kan aldaw na minadatong.”

“An Daga Asin an mga Gibo-Gibo Dian Mahahayag”

8. Paano “mahahayag” an daga asin an mga gibo-gibo dian?

⁸ Ano an boot sabihon ni Pedro kan isurat nia na “an daga asin an mga gibo-gibo dian mahahayag”? An tataramon na ‘mahayag’ puede man na itradusir na “maaraman” o “mabuyagyag.” An boot sabihon ni Pedro iyo na durante kan dakulang kahorasaan, ibubuyagyag ni Jehova an kinaban ni Satanas, na ihinahayag na tumang iyan sa Saiya saka sa Kahadean Nia asin sa siring maninigong laglagon. Sa makahulang pagsambit dapit sa panahon na iyan, an Isaias 26:21 nagsasabi: “Si Jehova minadatong hale sa saiyang lugar tanganing pabayadan an kasalan kan nag-eerok sa daga tumang sa saiya, asin an daga siertong mabuyagyag kan saiyang pagpabolos nin dugo asin dai na matahob sa saiyang mga gadan.”

9. (a) Ano an maninigong isikwal niato, asin taano? (b) Ano an maninigong pataluboon niato, asin taano?

⁹ Durante kan aldaw ni Jehova, ipapaheling kan mga namolde kan kinaban asin kan maraot na espiritu kaiyan kun ano talaga sinda, na naggagaradanan pa ngani. Sa katunayan, posibleng marhay na an dakol na klase nin madahas na aling-alingan na popular ngonyan kinokondisyon an isip nin dakol para sa panahon na dian an kamot nin lambang tawo “totoong ibibingat tumang sa kamot kan saiyang kaiba.” (Zac. 14:13) Kun siring, mahalaga nanggad na isikwal niato an ano man—mga pelikula, libro, video game, asin iba pa—na tibaad magin dahelan na makapatalubo kita nin mga kualidad na ikinakauyam nanggad nin Dios, siring baga nin kapalangkawan asin pagkamoot sa kadahasan! (2 Sam. 22:28; Sal. 11:5) Imbes, pataluboon niato an bunga kan banal na espiritu nin Dios, huling makakaya kan siring na mga kualidad an piguratibong init kan aldaw ni Jehova.—Gal. 5:22, 23.

Sarong “Bagong Kalangitan Asin Sarong Bagong Daga”

10, 11. Ano an “bagong kalangitan” asin “bagong daga”?

¹⁰ Basahon an 2 Pedro 3:13. An “bagong kalangitan”  iyo an langitnon na Kahadean nin Dios na inestablisar kan 1914 kan matapos “an itinalaan na mga panahon kan mga nasyon.” (Luc. 21:24) An makahadeng gobyerno na ini kompuesto ni Cristo Jesus asin kan 144,000 na kaiba niang tagapamahala, na an kadaklan sa sainda nag-ako na kan saindang langitnon na balos. Sa libro nin Kapahayagan, an mga piniling ini ilinaladawan bilang “an banal na siudad, an Bagong Jerusalem, na naghihilig hale sa langit gikan sa Dios asin inandam siring sa nobya na sinamnohan para sa saiyang agom na lalaki.” (Kap. 21:1, 2, 22-24) Kun paanong an daganon na Jerusalem iyo an kabisera kan gobyerno sa suanoy na Israel, an Bagong Jerusalem asin an Nobyo kaini iyo an minakompuesto sa gobyerno kan bagong sistema nin mga bagay. An langitnon na siudad na ini ‘mahilig hale sa langit’ paagi sa pagtao nin atension sa daga.

¹¹ An “bagong daga” nanonongod sa bagong sosyedad nin mga tawo sa daga na nakapagpatunay na andam sindang magpasakop sa Kahadean nin Dios. An espirituwal na paraiso na naeeksperyensiahan dawa ngonyan kan banwaan nin Dios sa katapustapusi mamumugtak na sa lugar na angay iyan—sa magayon na “ineerokan na daga na madatong.” (Heb. 2:5) Paano kita magigin kabtang kan bagong sistemang iyan nin mga bagay?

Mag-andam Para sa Dakulang Aldaw ni Jehova

12. Taano ta makukubhanan an kinaban sa pagdatong kan aldaw ni Jehova?

¹² Parehong ihinula ni Pablo asin Pedro na an aldaw ni Jehova madatong na ‘kabaing nin parahabon’—dai risa asin dai linalaoman. (Basahon an 1 Tesalonica 5:1, 2.) Dawa an tunay na mga Kristiano, na padagos na naghahalat sa aldaw na iyan, makukubhanan sa pagigin bigla kaiyan. (Mat. 24:44) Minsan siring, orog pa nanggad sa pagkakubhan an maeeksperyensiahan kan kinaban. Si Pablo nagsurat: “Kun noarin sinda [na mga siblag ki Jehova] nagsasarabi: ‘Katoninongan asin katiwasayan!’ dangan an biglang pagkalaglag maabot tolos sa sainda siring sa kolog nin bados na babae; asin dai sinda makakaligtas minsan sa anong paagi.”—1 Tes. 5:3.

13. Paano niato malilikayan na madaya kan pagkurahaw nin “Katoninongan asin katiwasayan!”?

¹³ An pagkurahaw nin “Katoninongan asin katiwasayan!” magigin saro sana giraray na kaputikan na ipinasabong nin mga demonyo; pero, dai kaiyan maloloko an mga lingkod ni Jehova. “Mayo kamo sa kadikloman,” an isinurat ni Pablo, “tanganing abotan kamo kan aldaw na iyan nin siring sa mga parahabon, huli ta kamo gabos mga aki nin liwanag asin mga aki nin aldaw.” (1 Tes. 5:4, 5) Kaya, magdanay kita sa liwanag, harayo sa kadikloman kan kinaban ni Satanas. Si Pedro nagsurat: “Mga namomotan, mantang kamo igwa na kan patienot na kaaraman na ini, mag-ingat kamo na dai kamo madara kaiba ninda [falsong mga paratokdo sa laog kan Kristianong kongregasyon] paagi sa sala kan mga tawong paratumang sa ley asin mahulog kamo hale sa saindong sadiring karigonan.”—2 Ped. 3:17.

14, 15. (a) Paano si Jehova nagtatao sa sato nin dignidad? (b) Anong ipinasabong na mga tataramon an maninigong isapuso niato?

¹⁴ Mangnohon na dai sana kita sinasabihan ni Jehova na “mag-ingat” dangan pinapabayaan na kita. Imbes, tinatawan nia kita nin dignidad paagi sa maboot na pagtao sa sato nin “patienot na kaaraman,” na pundamental na paliwanag dapit sa mga mangyayari sa ngapit.

¹⁵ Pero, makamomondo, binabaliwala nin nagkapira o pinagdududahan pa ngani ninda an mga  pagirumdom mapadapit sa pangangaipo na magdanay na puka. ‘Dakol nang dekada na nadadangog mi an pagirumdom na iyan,’ an tibaad sabihon ninda. Minsan siring, maninigong isaisip nin mga tawong iyan na sa pagkomento nin arog kaiyan, an talagang kinukuestion ninda iyo si Jehova asin an saiyang Aki, bako sanang an grupong maimbod na oripon. ‘Padagos na maghalat,’ an sabi ni Jehova. (Hab. 2:3) Siring man, si Jesus nagsabi: “Magdanay kamong mapagbantay . . . huli ta dai nindo aram kun sa anong aldaw madatong an saindong Kagurangnan.” (Mat. 24:42) Dugang pa, isinurat ni Pedro: “Isipon kun dapat na magin anong klaseng tawo kamo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!” (2 Ped. 3:11, 12) Nungkang babaliwalaon kan grupong maimbod na oripon asin kan Namamahalang Grupo kaiyan an seryosong mga tataramon na idto!

16. Anong saboot an maninigong likayan niato, asin taano?

¹⁶ Sa katunayan, an “maraot na oripon” an nagkokongklusyon na naaatraso an Kagurangnan. (Mat. 24:48) Kabilang an maraot na oripon na iyan sa grupong ilinadawan sa 2 Pedro 3:3, 4. “Sa huring mga aldaw,” an isinurat ni Pedro, ‘madatong an mga paraolog-olog’ na, “segun sa saindang sadiring mga mawot,” tutuyatuyaon an mga makinuyog na pinapagdadanay na harani sa isip an aldaw ni Jehova. Iyo, imbes na magkonsentrar sa intereses kan Kahadean, an siring na mga paraolog-olog nagkokonsentrar sa saindang sadiri asin sa maimot na mga pagmawot ninda. Nungka niatong pataluboon an siring na masinuway asin peligrosong saboot! Imbes, logod na “ibilang [niatong] kaligtasan an pagpapasensia kan satong Kagurangnan” paagi sa pagdadanay na sibot sa paghuhulit kan Kahadean asin paggibo nin mga disipulo saka dai paghadit nin labi-labi sa iskedyul nin mga pangyayari na si Jehova Dios sana an nakakaaram.—2 Ped. 3:15; basahon an Gibo 1:6, 7.

Magtiwala sa Dios nin Kaligtasan

17. Paano hinimate kan maimbod na mga Kristiano an konseho ni Jesus na dumulag parayo sa Jerusalem, asin taano?

¹⁷ Pagkatapos na sakyadahon kan mga hukbo nin Roma an Judea kan 66 C.E., huminiro an maimbod na mga Kristiano kaoyon kan konseho ni Jesus na magdulag parayo sa siudad nin Jerusalem sa enot na oportunidad ninda. (Luc. 21:20-23) Taano ta tolos-tolos asin may pagkadesidido sindang huminiro? Mayong duda na pinagdanay nindang harani sa isip an patanid ni Jesus. Siertong inasahan ninda na may kalabot na kadepisilan an saindang desisyon, arog kan ipinatanid ni Cristo. Alagad aram man ninda na nungkang papabayaan ni Jehova an mga maimbod sa saiya.—Sal. 55:22.

18. Paano an mga tataramon ni Jesus sa Lucas 21:25-28 nakakaimpluwensia sa saimong pagmansay sa maabot na dakulang kahorasaan?

¹⁸ Kita man dapat na lubos na magtiwala ki Jehova, huling sia sana an makakapagligtas sa sato kun mangyari na sa presenteng sistema an pinakadakulang kahorasaan sa bilog na kasaysayan nin  tawo. Pagkatapos na magpoon an dakulang kahorasaan alagad bago isagibo ni Jehova an saiyang paghokom sa gabos na iba pa sa kinaban, an mga tawo ‘malulunosan huli sa takot asin paghalat sa mga bagay na maabot sa ineerokan na daga.’ Minsan siring, mantang an mga kaiwal nin Dios nagtatakig sa takot, an maimbod na mga lingkod ni Jehova dai matatakot nin grabe. Sa kabaliktaran, sinda maggagayagaya huling aram ninda na harani na an saindang kaligtasan.—Basahon an Lucas 21:25-28.

19. Ano an pag-oolayan sa sunod na artikulo?

¹⁹ Iyo, nakakaogmang ngapit nanggad an naghahalat sa mga nagdadanay na siblag sa kinaban asin sa “mga elemento” kaiyan! Minsan siring, arog kan ipapaliwanag kan sunod na artikulo, kun gusto niatong magkamit nin buhay, bako sanang paglikay sa maraot an dapat niatong gibohon. Kaipuhan niatong pataluboon an mga kualidad na nakakapaogma ki Jehova asin gibohon an mga bagay na inaako nia.—2 Ped. 3:11.

[Nota sa Ibaba]

Ikakapaliwanag daw Nindo?

• Sa ano nagrerepresentar an . . .

presenteng ‘kalangitan asin daga’?

“mga elemento”?

‘bagong kalangitan asin bagong daga’?

• Taano ta lubos kitang nagtitiwala sa Dios?

[Mga Hapot Para sa Pag-adal]

[Ritrato sa pahina 5]

Paano mo mahihimong ‘ingatan an saimong puso’ asin magdanay na siblag sa kinaban?

[Ritrato sa pahina 6]

Paano niato ipinapaheling na ‘ibinibilang niatong kaligtasan an pagpapasensia kan satong Kagurangnan’?