Kun Paano Kita Ikinakaligtas kan Pantubos

“An nagtutubod sa Aki igwa nin buhay na daing katapusan; an dai nagkukuyog sa Aki dai makakaheling nin buhay, kundi nagdadanay sa saiya an grabeng kaanggotan nin Dios.”—JUAN 3:36.

1, 2. Ano an sarong dahelan na ipinublikar sa kapoonpooni an Zion’s Watch Tower?

“MAYONG maigot na estudyante kan Biblia an dai makakarisa kan pagdodoon na itinatao sa kagadanan ni Cristo,” an sabi kan ikaapat na isyu kan magasin na ini kaidtong Oktubre 1879. An artikulong iyan nagkongklusyon paagi sa seryosong pananaram na ini: “Mag-ingat kita sa ano man na nagbabasangbasang, o nagbabaliwala, sa kagadanan ni Cristo bilang dolot asin pampagian nin boot para sa kasalan.”—Basahon an 1 Juan 2:1, 2.

² An saro sa mga dahelan na enot na ipinublikar an Zion’s Watch Tower kan Hulyo 1879 iyo na tanganing idepensa an katokdoan sa Biblia dapit sa pantubos. Iyan nagtao nin “kakanon sa tamang panahon,” huling kan huring mga taon kan ika-19 siglo, pinonan na kuestionon nin nagdadakol na naghihingakong Kristiano kun paanong an kagadanan ni Jesus magigin pantubos sa satong mga kasalan. (Mat. 24:45) Kan panahon na iyan, dakol an nabibiktima kan teoriya nin ebolusyon, sarong ideya na kontra sa katunayan na nawara nin tawo an pagkasangkap. Itinotokdo kan mga ebolusyonista na an tawo natural na nag-ooswag asin dai na nangangaipo nin pantubos. Kun siring, angay nanggad an hatol ni apostol Pablo ki Timoteo: “Ingatan mo an ipinaniwala sa saimo, na linilikayan an basang na orolay na minalapas sa banal asin an mga pagkakaturumang kan falsong inaapod na ‘kaaraman.’ Huli sa pagpasikat nin siring na kaaraman an nagkapira napasuhay sa pagtubod.”—1 Tim. 6:20, 21.

3. Anong mga hapot an pag-oolayan niato ngonyan?

³ Mayong duda na determinado kang ‘dai mapasuhay sa pagtubod.’ Sa katuyohan na iyan, marahay na pag-olayan niato an mga hapot na ini: Taano ta kaipuhan ko an pantubos? Anong pagsakripisyo  an kalabot dian? Paano ako makikinabang sa mahalagang marhay na probisyon na ini na puedeng magligtas sa sako sa grabeng kaanggotan nin Dios?

Puedeng Makaligtas sa Grabeng Kaanggotan nin Dios

4, 5. Ano an nagpapatunay na an grabeng kaanggotan nin Dios nagdadanay sa presenteng maraot na sistema nin mga bagay?

⁴ Ipinapaheling kan Biblia asin kan tunay na mga pangyayari sa kasaysayan na poon pa kan magkasala si Adan, an grabeng kaanggotan nin Dios ‘nagdadanay na sa’ katawohan. (Juan 3:36) Risang-risa ini sa bagay na mayong tawo an nakalibre sa kagadanan. An karibal na soberaniya, na ki Satanas, dai nanggad nakaprotehir sa katawohan sa nagpapadagos na mga kapahamakan, asin mayong gobyerno nin tawo an may kakayahan na itao an pundamental na mga pangangaipo kan gabos na siudadano kaiyan. (1 Juan 5:19) Kaya, an katawohan padagos na dinadamat nin guerra, krimen, asin pagtios.

⁵ Kun siring, malinaw nanggad na an bendisyon ni Jehova mayo sa presenteng maraot na sistema nin mga bagay. Si Pablo nagsabi na “an grabeng kaanggotan nin Dios nahahayag hale sa langit tumang sa gabos na pagkabakong diosnon.” (Roma 1:18-20) Kun siring, an mga mayong pagsolsol na namumuhay nin bakong diosnon dai makakalibre sa mga epekto kan saindang paggawe. Ngonyan, ihinahayag an grabeng kaanggotan nin Dios paagi sa mga mensahe nin paghokom na iinuula na siring sa mga damat sa kinaban ni Satanas, asin an siring na impormasyon yaon sa dakol sa satong mga publikasyon na basado sa Biblia.—Kap. 16:1.

6, 7. Anong gibohon an pinangengenotan nin linahidan na mga Kristiano, asin anong oportunidad an bukas pa sa mga indibiduwal na kabtang kan kinaban ni Satanas?

⁶ Nangangahulogan daw ini na hurihon na para sa mga indibiduwal na makatalingkas sa pagdominar ni Satanas asin mag-ako kan pag-oyon nin Dios? Dai, huling bukas pa an oportunidad na makipag-ulian ki Jehova. An linahidan na mga Kristiano, na “mga embahador na kasalida ni Cristo,” nangengenot sa pampublikong ministeryo na paagi kaiyan an mga tawo sa gabos na nasyon dinadagka: “Makiulian kamo sa Dios.”—2 Cor. 5:20, 21.

⁷ Sinabi ni apostol Pablo na ‘iliniligtas kita ni Jesus sa grabeng kaanggotan na madatong.’ (1 Tes. 1:10) An pangultimong kapahayagan na iyan nin kaanggotan ni Jehova maresulta sa daing katapusan na pagkalaglag kan mga parakasala na habong magsolsol. (2 Tes. 1:6-9) Siisay an makakaligtas? An Biblia nagsasabi: “An nagtutubod sa Aki igwa nin buhay na daing katapusan; an dai nagkukuyog sa Aki dai makakaheling nin buhay, kundi nagdadanay sa saiya an grabeng kaanggotan nin Dios.” (Juan 3:36) Iyo, kun an sistemang ini mag-abot na sa katapusan kaiyan, an gabos na nabubuhay saka nagtutubod ki Jesus asin sa pantubos makakaligtas sa mga epekto kan pangultimong aldaw nin grabeng kaanggotan nin Dios.

Kun Ano an Epekto kan Pantubos

8. (a) Anong marahayon na oportunidad igwa kaidto si Adan asin Eva? (b) Paano pinatunayan ni Jehova na sia Dios nin sangkap na hustisya?

⁸ Si Adan asin Eva linalang na sangkap. Kun nagdanay sindang makinuyog sa Dios, an daga pano na kutana kan maogmang mga naggikan sa sainda na kaiba nindang nabubuhay sa Paraiso. Minsan siring, makamomondo na an satong enot  na mga magurang tuyong binalga an pagboot nin Dios. Bilang resulta, sinda sinentensiahan nin daing sagkod na kagadanan asin pinalayas sa orihinal na Paraiso. Kan si Adan asin Eva magkaaki, an kasalan nakaapektar na sa katawohan, asin pag-abot nin panahon an enot na lalaki asin babae naggurang asin nagadan. Pinapatunayan kaini na dai nagpuputik si Jehova. Dugang pa, sia Dios nin sangkap na hustisya. Pinatanidan ni Jehova si Adan na an pagkakan kan ipinagbabawal na bunga maresulta sa kagadanan—asin iyan talaga an nangyari.

9, 10. (a) Taano ta nagagadan an mga naggikan ki Adan? (b) Paano kita makakaligtas sa daing sagkod na kagadanan?

⁹ Bilang mga naggikan ki Adan, nagmana kita nin bakong sangkap na hawak na may tendensiang magkasala asin na sa kahurihurihi magagadan. Kan magkasala si Adan, dai pa kita namumundag. Kaya kabale kita sa sentensiang kagadanan. Kun hahaleon ni Jehova an paggurang asin kagadanan na mayong bayad na pantubos, minalataw na nagpuputik sia. Si Pablo garo man sana nagtataram para sa sato gabos kan sia magsabi: “Kita nakakaaram na an Ley espirituwal; alagad ako laman, na ipinabakal sa kaoripnan nin kasalan. Herak man sa sako! Siisay an maligtas sa sako hale sa hawak na napapairarom sa kagadanan na ini?”—Roma 7:14, 24.

¹⁰ Solamenteng si Jehova Dios an makakatao kan legal na basehan na paagi kaiyan makatanosan niang mapapatawad kita sa satong mga kasalan asin makakalda kita sa penalidad na daing sagkod na kagadanan. Ginibo nia ini paagi sa pagsugo sa saiyang namomotan na Aki hale sa langit tanganing mamundag bilang sangkap na tawo, na makakatao kan saiyang buhay bilang pantubos para sa sato. Bakong arog ni Adan, si Jesus nagdanay na sangkap. Sa katunayan, “dai sia nakaginibo nin kasalan.” (1 Ped. 2:22) Sa siring, si Jesus may potensial na magin ama nin sangkap na rasa nin tawo. Pero, imbes na gibohon iyan, tinogotan nia an mga kaiwal nin Dios na gadanon sia tanganing paagi kaiyan maampon nia an makasalan na mga naggikan ki Adan asin magkaigwa nin buhay na daing katapusan an mga nagtutubod sa saiya. An Kasuratan nagpapaliwanag: “Igwa nin sarong Dios, asin sarong parapangoltanan sa tahaw nin Dios asin nin mga tawo, an sarong tawo, si Cristo Jesus, na nagtao kan saiyang sadiri bilang katimbang na pantubos para sa gabos.”—1 Tim. 2:5, 6.

11. (a) Paano puedeng iilustrar an mga pakinabang kan pantubos? (b) Sairisay an makikinabang sa pantubos?

¹¹ An epekto kan pantubos puedeng iilustrar sa situwasyon nin mga tawo na naubos an gabos na idineposito huli sa pangloloko nin madayang bangko kaya nagkautang sinda. An mga kagsadiri kan bangko makatanosan na sinentensiahan nin dakol na taon na pagkabilanggo. Alagad kumusta an inosenteng mga biktima? Huling tios na, mayo na sindang magigibo apuera sana kun may maboot asin mayaman na tawo na mabakal kan bangko asin mabalik sa mga biktima kan gabos na idineposito ninda, kaya makakabayad na sinda sa saindang utang. Sa kaagid na paagi, binakal ni Jehova Dios asin kan saiyang namomotan na Aki an mga naggikan ki Adan asin kinanselar ninda an mga utang kaini basado sa pinabolos na dugo ni Jesus. Iyan an dahelan kaya masasabi ni Juan na Bautisador dapit ki Jesus: “Uya, an Kordero nin Dios na naghahale kan kasalan kan kinaban!” (Juan 1:29) Kaiba sa kinaban nin katawohan na pinatawad sa mga kasalan bako sana an mga buhay kundi pati an mga gadan.

Kun Anong Pagsakripisyo an Kalabot sa Pantubos

12, 13. Ano an manonodan niato sa pagigin andam ni Abraham na idolot si Isaac?

¹² Imposible para sa sato na masabotan nin eksakto kun gurano kadakula an isinakripisyo kan satong langitnon na Ama asin kan saiyang namomotan na Aki para sa pantubos. Alagad an Biblia nagsasaysay nin mga eksperyensia na makakatabang sa sato na horophoropon ini. Halimbawa, imahinara kun ano an siertong namatean ni Abraham mantang tolong aldaw siang nagbaklay pasiring sa Moria bilang pagkuyog sa pagboot nin Dios: “Daraha tabi an saimong aki, an bugtong mong aki na namomotan mong gayo, si Isaac, asin paduman ka sa daga nin Moria asin duman idolot mo sia bilang dolot na tinotong sa saro sa mga bukid na sasabihon ko sa saimo.”—Gen. 22:2-4.

¹³ Sa katapustapusi nakaabot si Abraham sa lugar na sinabi sa saiya. Isip-isipa kun gurano kasakit para ki Abraham na gaposon an mga kamot asin bitis  ni Isaac saka pahigdaon ini sa altar na ginibo nia mismo. Seguradong makologon para ki Abraham na iitaas an kutsilyo na gagamiton nia sa paggadan sa saiyang aki! Imahinara an namatean ni Isaac mantang nakahigda sia sa altar, na hinahalat an makologon na saksak na ikakagadan nia. Kan mismong sasaksakon na si Isaac, pinugolan kan anghel ni Jehova si Abraham. An ginibo ni Abraham asin Isaac kan panahon na iyan nakakatabang sa sato na masabotan kun ano an isinakripisyo ni Jehova kan togotan Nia an mga representante ni Satanas na gadanon an Saiyang Aki. Malinaw na iiniilustrar kan pakikikooperar ni Isaac ki Abraham an pagigin andam ni Jesus na magsakit asin magadan para sa sato.—Heb. 11:17-19.

14. Anong pangyayari sa buhay ni Jacob an nakakatabang sa sato na pahalagahan an pagsakripisyong kalabot sa pantubos?

¹⁴ An pagsakripisyong kalabot sa pantubos puede man na iilustrar nin sarong pangyayari sa buhay ni Jacob. Sa gabos niang aking lalaki, si Jose an pinakapadangat ni Jacob. Makamomondo, an mga tugang ni Jose nauri asin naongis sa saiya. Pero, andam si Jose na sugoon kan saiyang ama tanganing aramon an kamugtakan kan mga tugang nia. Kan panahon na iyan, pinapastoran ninda an aripompon ni Jacob mga 100 kilometros paamihanan hale sa saindang harong sa Hebron. Imahinara kun ano an namatean ni Jacob kan an saiyang mga aki magbalik dara an gubing ni Jose na pano nin dugo! “Iyo ini an halabang gubing kan aki ko!” an sinabi nia. “Sarong maisog na layas na hayop an siertong suminiba sa saiya! Seguradong rinotang si Jose!” An gabos na ini nagkaigwa nin grabeng epekto ki Jacob, na nagmondo huli ki Jose sa laog nin dakol na aldaw. (Gen. 37:33, 34) An reaksion ni Jehova bakong eksaktong arog kan sa mga tawong bakong sangkap. Pero, an paghorophorop sa pangyayaring ini sa buhay ni Jacob tibaad makatabang sa sato, sa nagkapirang paagi, na masabotan an seguradong namatean nin Dios kan an saiyang namomotan na Aki maltratohon asin maringis na gadanon bilang sarong tawo sa daga.

Kun Paano Makikinabang sa Pantubos

15, 16. (a) Paano ipinaheling ni Jehova na inako nia an pantubos? (b) Paano ka nakinabang sa pantubos?

¹⁵ Binuhay liwat ni Jehova Dios an saiyang maimbod na Aki na may mamuraway na espiritung hawak. (1 Ped. 3:18) Sa laog nin 40 aldaw, an  binuhay liwat na si Jesus nagpaheling sa saiyang mga disipulo, na pinapakosog an saindang pagtubod asin iinaandam sinda sa dakulang pag-ebanghelyo na mangyayari. Dangan nagsakat sia sa langit. Duman idinolot nia sa Dios an halaga kan saiyang pinabolos na dugo, na gagamiton sa kapakanan kan tunay na mga parasunod nia, na nagtutubod sa halaga kan saiyang atang na pantubos. Ipinaheling ni Jehova Dios na inako nia an pantubos ni Cristo paagi sa pag-asignar ki Jesus na ibubo an banal na espiritu sa saiyang mga disipulo na nagtiripon sa Jerusalem kan aldaw nin Pentecostes 33 C.E.—Gibo 2:33.

¹⁶ Pinonan tolos kan linahidan na mga parasunod na ini ni Cristo na sadolon an saindang mga kapwa na likayan an grabeng kaanggotan nin Dios paagi sa pagpabautismo sa ngaran ni Jesu-Cristo para sa kapatawadan kan saindang mga kasalan. (Basahon an Gibo 2:38-40.) Poon sa makasaysayan na aldaw na iyan sagkod ngonyan, minilyon hale sa gabos na nasyon an nadadagka na magin dayupot sa Dios basado sa pagtubod sa atang na pantubos ni Jesus. (Juan 6:44) Sa puntong ini, kaipuhan niatong pag-olayan an duwa pang hapot: Igwa daw nin siisay man sa sato na natawan kan paglaom na buhay na daing katapusan huli sa sato mismong marahay na mga gibo? Kun inako na niato an marahayon na paglaom na ini, posible daw na mawara pa niato iyan?

17. Paano nindo maninigong mansayon an marahayon na bendisyon nin pagigin katood nin Dios?

¹⁷ Talagang bako kitang maninigo sa pantubos. Alagad paagi sa pagtubod dian, minilyon ngonyan an nagin mga katood nin Dios, na may paglaom na mabuhay na daing katapusan sa sarong paraisong daga. Minsan siring, an pagigin katood ni Jehova bakong garantiya na magdadanay kitang katood nia. Tanganing makaligtas sa maabot na aldaw nin grabeng kaanggotan nin Dios, dapat kitang padagos na magpaheling nin hararom na pagpahalaga sa “pantubos na ibinayad ni Cristo Jesus.”—Roma 3:24; basahon an Filipos 2:12.

Padagos na Magtubod sa Pantubos

18. Ano an kaiba sa pagtubod sa pantubos?

¹⁸ Ipinapaheling kan Juan 3:36, an pinakatemang teksto kan artikulong ini, na kaiba sa pagtubod sa Kagurangnan na Jesu-Cristo an pagigin makinuyog sa saiya. An pagpahalaga sa pantubos maninigong magpahiro sa sato na mamuhay kaoyon kan mga katokdoan ni Jesus, kaiba na an itinokdo nia manongod sa mga pamantayan sa moral. (Mar. 7:21-23) “An grabeng kaanggotan nin Dios maabot” sa gabos na daing pagsolsol na nakikikabtang sa mga gibohon na arog nin pakikisaro, bastos na surubahan, asin “gabos na klase nin pagkamaati,” na kaiba an nakaugalean nang pagheling nin pornograpiya.—Efe. 5:3-6.

19. Sa anong positibong mga paagi ikakapaheling niato an satong pagtubod sa pantubos?

¹⁹ An satong pagpahalaga sa pantubos maninigo na magpahiro sa sato na magdanay na sibot sa mga “gibo nin diosnon na debosyon.” (2 Ped. 3:11) Magtagama kita nin igo nanggad na panahon para sa regular asin odok na pamimibi, personal na pag-adal sa Biblia, pag-atender sa mga pagtiripon, pampamilyang pagsamba, asin maigot na paghuhulit kan Kahadean. Asin logod na “dai [niato] paglingawan an paggibo nin marahay asin an paghiras nin mga bagay sa iba, huli ta sa siring na mga atang naoogmang gayo an Dios.”—Heb. 13:15, 16.

20. Anong bendisyon sa ngapit an malalaoman kan gabos na padagos na nagtutubod sa pantubos?

²⁰ Kun an grabeng kaanggotan ni Jehova umabot na sa maraot na sistemang ini nin mga bagay, ikakaogma nanggad niato na kita nagtubod sa pantubos asin padagos na nagpapahalaga dian! Asin sa ipinanuga nin Dios na bagong kinaban, daing sagkod kitang magpapasalamat huli sa marahayon na probisyon na ini na nagligtas sa sato sa grabeng kaanggotan nin Dios.—Basahon an Juan 3:16; Kapahayagan 7:9, 10, 13, 14.

Ano an Isisimbag Nindo?

• Taano ta kaipuhan niato an pantubos?

• Anong pagsakripisyo an kalabot sa pantubos?

• Anong mga pakinabang an itinatao kan pantubos?

• Paano kita nagpapaheling nin pagtubod sa atang na pantubos ni Jesus?

[Mga Hapot Para sa Pag-adal]

[Ritrato sa pahina 13]

Bukas pa an oportunidad na makipag-ulian ki Jehova

[Mga Ritrato sa pahina 15]

An paghorophorop sa mga pangyayaring ini na kalabot si Abraham, Isaac, asin Jacob makakatabang sa sato na pahalagahan an dakulang isinakripisyo para sa pantubos