Mga Hapot Hale sa mga Parabasa

Taano ta masasabi ni Jesus sa sarong babaeng midbid na parakasala na pinatawad na an mga kasalan kaini?—Luc. 7:37, 48.

Mantang si Jesus nakahilay sa sarong karakanan sa harong nin Fariseo na si Simon, sarong babae an ‘nagpuesto sa likod ni Jesus sa may pamitisan kaini.’ Paagi sa saiyang mga luha, binasa nia an mga bitis ni Jesus asin pinunasan nia ini kan saiyang buhok. Dangan may kabootan niang hinadokan an mga bitis ni Jesus asin linahidan iyan nin ungguento. An babae “midbid sa siudad na sarong parakasala,” an sabi kan pagkasaysay sa Ebanghelyo. Siempre, an gabos na bakong sangkap na tawo parakasala, alagad parateng ginagamit kan Kasuratan an terminong ini tanganing iladawan an saro na an mga kasalan hayag nanggad o na igwa nin reputasyon sa pagkakasala. Posibleng marhay na an babae sarong patotot. Sa siring na tawo sinabi ni Jesus: “Ipinatawad na an saimong mga kasalan.” (Luc. 7:36-38, 48) Ano an boot sabihon ni Jesus kaiyan? Huling dai pa ikinakadolot an atang na pantubos, paano magigin posible an kapatawadan na ini?

Pagkatapos hugasan asin lahidan kan babae an mga bitis ni Jesus alagad bago sia patawadon, si Jesus naggamit nin ilustrasyon tanganing ipaliwanag sa nag-imbitar sa saiya, ki Simon, an sarong mahalagang punto. An kasalan iinagid ni Jesus sa dakulaon na utang na masakit bayadan, asin sia nagsabi ki Simon: “Duwang lalaki an may utang sa sarong nagpapautang; an saro may utang na kinyentos na denario, alagad an saro pa singkuenta. Kan mayo sindang ikabayad, pareho sinda pinatawad nia nin lubos. Kun siring, siisay sa sainda an mamomoot sa saiya nin orog?” Bilang simbag si Simon nagsabi: “Sa heling ko an saro na lubos niang pinatawad nin orog.” Si Jesus nagsimbag: “Tama an paghusgar mo.” (Luc. 7:41-43) Kita gabos dapat na magkuyog sa Dios, kaya kun dai niato sia kinukuyog asin huli kaiyan nagkakasala kita, dai niato ikinakatao sa Dios an maninigo sa saiya. Sa siring, nagkakautang kita. Pero, si Jehova siring sa sarong nagpapautang na andam na magpatawad nin mga utang. Iyan an dahelan na dinagka ni Jesus an mga parasunod nia na mamibi sa Dios asin makiolay: “Ipatawad mo sa samo an samong mga utang, siring na kami man nagpatawad sa mga may utang sa samo.” (Mat. 6:12) Sa Lucas 11:4 an mga utang na ini inapod na mga kasalan.

Kaidto, ano an basehan nin Dios sa pagpapatawad sa mga kasalan? Segun sa saiyang sangkap na hustisya, kagadanan an penalidad sa kasalan. Huli kaini, buhay ni Adan an ibinayad nia sa saiyang kasalan. Minsan siring, sa Ley na itinao nin Dios sa nasyon nin Israel, an nagkasala puedeng mapatawad sa mga kasalan nia paagi sa pag-atang nin hayop ki Jehova. Si apostol Pablo nagsabi: “Haros gabos na bagay nalilinig nin dugo sono sa Ley, asin kun dai nin pagpabolos nin dugo dai nin kapatawadan.” (Heb. 9:22) An mga Judio mayong aram na ibang paagi tanganing makamtan an kapatawadan nin Dios. Kun siring, bakong makangangalas na kinontra kan mga nagmamasid kan panahon ni Jesus an sinabi nia sa babae. An mga nakahilay na kaiba ni Jesus sa lamesa nagsabi sa saindang sadiri: “Siisay an tawong ini na nagpapatawad pa ngani nin mga kasalan?” (Luc. 7:49) Kun siring, sa ano ikakabasar an pagpatawad sa mga paglapas kan makasalan na gayong babaeng ini?

An pinakaenot na hula na sinabi pakatapos na magrebelde an enot na mag-agom nagsambit kan katuyohan ni Jehova na magbangon nin “banhi” na an bool lulugadon ni Satanas asin kan “banhi” kaini. (Gen. 3:15) An paglugad na ini nangyari kan si Jesus gadanon kan mga kaiwal nin Dios. (Gal. 3:13, 16) An pinabolos na dugo ni Cristo nagseserbing pantubos na nagpapatalingkas sa katawohan sa kasalan asin kagadanan. Huling mayo nin ano man na makakaolang ki Jehova sa pag-otob nia kan saiyang katuyohan, pakasabi nia tolos kan mga tataramon sa Genesis 3:15, an pantubos garo man sana nabayadan na sa pagmansay nin Dios. Puede na niang patawadon an mga nagtutubod sa saiyang mga panuga.

 Kan mga panahon bago kan mga Kristiano, ibinilang ni Jehova na matanos an dakol na indibiduwal. Kaiba sa sainda si Enoc, Noe, Abraham, Rahab, asin Job. May pagtubod nindang inantisipar an kaotoban kan mga panuga nin Dios. “Si Abraham nagtubod ki Jehova,” an isinurat ni disipulo Santiago, “asin iyan ibinilang sa saiya na katanosan.” Dapit ki Rahab, si Santiago nagsabi: “Sa iyo man na paagi bakong si Rahab man na patotot ipinahayag na matanos paagi sa mga gibo?”—Sant. 2:21-25.

Si Hadeng David kan suanoy na Israel nakakomiter nin nagkapirang magabat na kasalan, alagad sia may makosog na pagtubod sa tunay na Dios asin nagpaheling nin tunay na pagsolsol kada magkasala. Dugang pa, an Kasuratan nagsasabi: “Ibinugtak [si Jesus] nin Dios bilang dolot na pampagian nin boot paagi sa pagtubod sa saiyang dugo. Ini para sa pagpahayag kan saiyang sadiring katanosan, huli ta saiyang ipinapatawad an mga kasalan na nangyari kan nakaagi mantang an Dios nagtitios; tanganing ipaheling an saiyang sadiring katanosan sa presenteng panahon na ini, tanganing sia magin matanos minsan pa kun saiyang ipinapahayag na matanos an tawo na igwa nin pagtubod ki Jesus.” (Roma 3:25, 26) Basado sa atang na pantubos ni Jesus na dai pa kaidto ikinakatao, puedeng patawadon ni Jehova an mga paglapas ni David na dai man ikinokompromiso an mismong mga kahagadan Nia sa hustisya.

Minalataw na kaagid kaiyan an situwasyon kan babaeng naglahid sa mga bitis ni Jesus. Imoral an nagin pamumuhay nia, alagad nagsolsol sia. Aram nia na kaipuhan nia an pagkabalukat sa kasalan asin saiyang ipinaheling paagi sa gibo na talagang pinapahalagahan nia an saro na ginamit ni Jehova para sa pagbalukat na iyan. Minsan ngani itatao pa sana kaidto an atang, iyan sierto nanggad kaya puede nang iaplikar an halaga kaiyan sa mga indibiduwal arog nia. Huli kaini, si Jesus nagsabi sa saiya: “Ipinatawad na an saimong mga kasalan.”

Arog kan malinaw na ipinapaheling kan pagkasaysay na ini, dai ni Jesus rinayoan an mga parakasala. Ginibohan nia sinda nin marahay. Dugang pa, si Jehova andam na magpatawad sa nagsosolsol na mga parakasala. Iyan marahayon asin nakakaparigon nanggad na pagsierto para sa sato na bakong sangkap na mga tawo!

[Ritrato sa pahina 7]

Ibinilang iyan sa sainda na katanosan