An Aktibong Lider Niato Ngonyan
An Aktibong Lider Niato Ngonyan
“Sia nagluwas na nandadaog asin tanganing taposon an saiyang pandadaog.” —KAP. 6:2.
1, 2. (a) Paano ilinadawan sa Biblia an aktibidad ni Cristo bilang hade poon kan 1914? (b) Ano an mga ginibo ni Cristo poon kan magtukaw sia sa trono?
KAN 1914, si Cristo pinatukaw sa trono bilang Hade kan Mesiyanikong Kahadean ni Jehova. Ano an naiimahinar niato sa saiya ngonyan? Bilang mapaghorophorop na hade na nakatukaw sana sa saiyang trono, na paminsanminsan nagheheling sa daga tanganing aramon an kamugtakan kan saiyang kongregasyon? Kun arog kaiyan an naiimahinar niato, maninigo niatong bagohon an satong opinyon. Ilinaladawan sia kan Salmo asin kan libro nin Kapahayagan bilang makosog na hadeng nangangabayo na “nandadaog asin tanganing taposon an saiyang pandadaog” sagkod na magin “mapanggana.”—Kap. 6:2; Sal. 2:6-9; 45:1-4.
2 An enot na ginibo ni Cristo pagkatukaw nia sa trono bilang hade iyo an pagdaog nia sa ‘dragon asin sa mga anghel kaiyan.’ Bilang an arkanghel na si Miguel na nagboboot sa saiyang mga anghel, iinapon ni Cristo si Satanas asin an saiyang mga demonyo hale sa banal na kalangitan pasiring sa daga asin dai na sinda makakahale dian. (Kap. 12:7-9) Dangan, sa papel nia bilang “mensahero [ni Jehova] kan tipan,” si Jesus nag-abot kaiba kan saiyang Ama tanganing siyasaton an espirituwal na templo. (Mal. 3:1) Hinokoman nia an Kakristianohan, an pinakanakakabaldeng kabtang kan “Dakulang Babilonya,” bilang may sala sa pagpabolos nin dugo asin nin espirituwal na pakipagsambay sa politikal na sistema kan kinaban na ini.—Kap. 18:2, 3, 24.
Paglinig sa Saiyang Oripon sa Daga
3, 4. (a) Ano an nahaman ni Cristo bilang “mensahero” ni Jehova? (b) Ano an naheling kan siyasaton an templo, asin bilang Payo kan kongregasyon, anong pagnombra an ginibo ni Jesus?
3 Sa pagsiyasat ni Jehova asin kan saiyang “mensahero,” naheling man ninda sa daganon na patyo kan espirituwal na templong iyan na may sarong grupo nin tunay na mga Kristiano, na bakong kabtang kan mga iglesia nin Kakristianohan. Minsan siring, dawa an linahidan na mga Kristianong ini, o “mga aking lalaki ni Levi,” kinaipuhan na malinigan. Iyan arog kan ihinula ni Malaquias: “Sia [si Jehova] dapat na tumukaw bilang paradalisay asin paralinig nin plata asin dapat na linigan an mga aking lalaki ni Levi; asin dapat na dalisayon nia sinda siring sa bulawan asin siring sa plata, asin para ki Jehova sinda magigin nanggad banwaan na nagtatao nin dolot na regalo na may katanosan.” (Mal. 3:3) Ginamit ni Jehova an saiyang “mensahero kan tipan,” si Cristo Jesus, tanganing linigan an espirituwal na mga Israelitang ini.
4 Pero, nanompongan ni Cristo na ginigibo kan iyo man sanang maimbod na linahidan na mga Kristianong ini an saindang pinakamakakaya tanganing magtao nin napapanahon na espirituwal na kakanon sa mga kapagtubod. Poon pa kan 1879, sa marahay man o sa masakit na kamugtakan, nagpapaabot na sinda nin basado sa Biblia na mga katotoohan manongod sa Kahadean nin Dios paagi sa magasin na ini. Ihinula ni Jesus na “sa pagdatong” nia tanganing magsiyasat sa saiyang “mga lingkod sa harong” durante kan “pagtatapos kan sistema nin mga bagay,” makakanompong sia nin oripon na nagtatao sa sainda nin “kakanon sa tamang panahon.” Ipapahayag nia na maogma an oripon na iyan asin “nonombrahan nia sia na mamahala sa gabos niang rogaring” sa daga. (Mat. 24:3, 45-47) Bilang Payo kan Kristianong kongregasyon, ginagamit ni Cristo an “maimbod asin mapagmansay na oripon” na ini tanganing pamahalaan an intereses kan Kahadean Nia sa daga. Paagi sa sarong Namamahalang Grupo, dinidirehiran nia an linahidan na “mga lingkod sa harong” asin an kairiba nindang “ibang mga karnero.”—Juan 10:16.
Pag-ani sa Daga
5. Anong aktibidad nin hade an naheling ni apostol Juan sa bisyon?
5 Nagkaigwa nin bisyon si apostol Juan dapit sa iba pang gigibohon kan Mesiyanikong Hade sa “aldaw kan Kagurangnan,” pagkatukaw Nia sa trono kan 1914. Si Juan nagsurat: “Uya! naheling ko an sarong puting panganoron, asin sa ibabaw kan panganoron may nakatukaw na agid sa aki nin tawo, na may koronang bulawan sa saiyang payo asin matarom na kagot sa saiyang kamot.” (Kap. 1:10; 14:14) Nadangog ni Juan na sinasabihan nin sarong anghel ni Jehova an Paraaning ini na itigpas an saiyang kagot, huling “biyo nang hinog an anihon sa daga.”—Kap. 14:15, 16.
6. Ano an sinabi ni Jesus na mangyayari sa paglihis nin panahon?
6 An ‘pag-aning ini sa daga’ nagpapagirumdom sa sato kan parabola ni Jesus dapit sa trigo asin mga doot. Iinagid ni Jesus an sadiri nia sa sarong tawo na nagsabwag nin banhi nin trigo sa saiyang oma sa katuyohan na makaani nin marahay na trigo na mayong salak, na nagrerepresentar sa “mga aki kan kahadean,” an tunay na mga Kristiano na linahidan tanganing makaibanan nia sa saiyang Kahadean. Alagad durante kan banggi, sarong kaiwal, “an Diablo,” an nagsabwag man sa oma nin mga doot, “an mga aki kan saro na marigsok.” Ininstruksionan kan parasabwag an saiyang mga trabahador na pabayaan na tumubo na magkaibanan an trigo asin mga doot sagkod sa tig-anihan, sa “pagtatapos kan sistema nin mga bagay.” Sa panahon na iyan, isusugo nia an saiyang mga anghel tanganing isuway an trigo sa mga doot.—Mat. 13:24-30, 36-41.
7. Paano ni Cristo isinasagibo ‘an pag-ani sa daga’?
7 Bilang kaotoban kan bisyon na itinao ki Juan, si Jesus may ginigibong pambilog na kinaban na pag-aani. ‘An pag-ani sa daga’ nagpoon paagi sa pagtipon sa mga natatada kan 144,000 na “mga aki kan kahadean,” “an trigo” sa parabola ni Jesus. An pagkakalaen kan tunay asin falsong mga Kristiano nagin mas risang-risa pagkatapos kan Guerra Mundial I, kaya nakakontribwir ngani iyan sa ikaduwang kabtang kan ‘pag-ani sa daga’—an pagtipon sa ibang mga karnero. Bako ini “an mga aki kan kahadean” kundi, imbes, “sarong dakulang kadaklan” nin andam na kumuyog na mga sakop kan Kahadean na iyan. Inaani sinda hale sa gabos na ‘banwaan, grupo nasyonal asin lenguahe.’ Nagpapasakop sinda sa Mesiyanikong Kahadean, na kompuesto ni Cristo Jesus asin kan 144,000 na “mga banal” na makakaibanan nia sa langitnon na gobyernong iyan.—Kap. 7:9, 10; Dan. 7:13, 14, 18.
Pangengenot sa mga Kongregasyon
8, 9. (a) Ano an nagpapaheling na inoobserbaran ni Cristo bako sana an paggawe kan bilog na kongregasyon kundi pati an pamumuhay kan indibiduwal na mga miembro kaiyan? (b) Arog kan ilinaladawan sa pahina 26, anong “harararom na bagay ni Satanas” an maninigo niatong likayan?
8 Narisa niato sa naenot na artikulo na maingat na inobserbaran ni Jesus an espirituwal na kamugtakan kan lambang kongregasyon kan enot na siglo C.E. Sa satong panahon, bilang nakatukaw na Hade na igwa kan “gabos na autoridad sa langit asin sa daga,” si Cristo na satong Lider aktibong namamayo sa mga kongregasyon sa bilog na kinaban saka sa mga paraataman dian. (Mat. 28:18; Col. 1:18) ‘Ginibo sia ni Jehova na magin payo kan gabos na bagay sa kongregasyon’ nin mga linahidan. (Efe. 1:22) Huli kaiyan, naheheling nia an gabos na nangyayari sa laog kan lambang saro sa labing 100,000 na kongregasyon nin Mga Saksi ni Jehova.
9 Sa suanoy na kongregasyon nin Tiatira, ipinaabot ni Jesus an mensaheng ini: “Ini an mga bagay na sinasabi kan Aki nin Dios, sia na an mga mata siring sa laad nin kalayo, . . . ‘Aram ko an saimong mga gibo.’” (Kap. 2:18, 19) Sinaway nia an mga miembro kan kongregasyon na iyan huli sa saindang pamumuhay na imoral asin mapagpanigo sa sadiri, na sinasabi sa sainda: “Ako iyo an nagsisiyasat kan mga bato asin puso, asin itatao ko sa lambang saro sa saindo an segun sa saindong mga gibo.” (Kap. 2:23) Ipinaparisa kan pananaram na iyan na inoobserbaran ni Cristo bako sana an paggawe kan lambang kongregasyon sa pangkagabsan kundi pati an pamumuhay kan indibiduwal na mga miembro kaiyan. Kinomendaran ni Jesus an mga Kristiano sa Tiatira na ‘dai nakaaram kan “harararom na bagay ni Satanas.”’ (Kap. 2:24) Ngonyan, naoogma man sia sa mga hoben o gurang na dai nagsisiyasat sa “harararom na bagay ni Satanas” paagi sa Internet o madahas na mga video game, o sa konsintidor na mga pangangatanosan nin tawo. Naoogma nanggad siang obserbaran an mga paghihingoa asin sakripisyo kan dakol na Kristiano ngonyan na ginigibo an saindang pinakamakakaya na sumunod sa saiya sa gabos na aspekto kan buhay ninda!
10. Paano ilinaladawan an pagdirehir ni Cristo sa kamagurangan sa kongregasyon, alagad anong areglo an kaipuhan na midbidon?
10 Mamomoton na pinangangatamanan ni Cristo an saiyang mga kongregasyon sa daga paagi sa nombradong kamagurangan. (Efe. 4:8, 11, 12) Kan enot na siglo, an gabos na paraataman pinaniaki nin espiritu. Ilinadawan sinda sa Kapahayagan bilang mga bitoon sa toong kamot ni Cristo. (Kap. 1:16, 20) Ngonyan, an kadaklan sa kamagurangan sa kongregasyon kabilang sa ibang mga karnero. Ninonombrahan sinda pagkatapos nin pamibi asin sa paggiya kan banal na espiritu, kaya masasabi man na sinda nasa irarom kan pagdirehir, o naggigiyang kamot, ni Cristo. (Gibo 20:28) Minsan siring, minimidbid ninda na naggagamit si Cristo nin sadit na grupo nin linahidan na Kristianong mga lalaki bilang Namamahalang Grupo tanganing pangenotan asin direhiran an saiyang mga disipulo sa daga.—Basahon an Gibo 15:6, 28-30.
“Madia Na, Kagurangnan na Jesus”
11. Taano ta gusto nanggad niatong maheling an satong Lider na magdatong nin madali?
11 Sa kapahayagan na itinao ki apostol Juan, nagkapirang beses na sinabi ni Jesus na madatong siang madali. (Kap. 2:16; 3:11; 22:7, 20) Mayong duda na an sinasabi nia iyo an saiyang pagdatong tanganing isagibo an paghokom sa Dakulang Babilonya asin sa iba pang kabtang kan maraot na sistema nin mga bagay ni Satanas. (2 Tes. 1:7, 8) Huling gusto nanggad na maheling an pagkaotob kan pambihirang mga pangyayari na ihinula, an gurang nang si apostol Juan nagsabi: “Amen! Madia na, Kagurangnan na Jesus.” (Kap. 22:20) Kita na nabubuhay sa panahon kan katapusan kan maraot na sistemang ini nin mga bagay nagmamawot man na maheling an satong Lider asin Hade na minadatong bilang tagapamahala kan Kahadean nin Dios tanganing mapakangbanal an ngaran kan saiyang Ama asin mabindikar an Saiyang soberaniya.
12. Anong gibohon an tataposon ni Jesus bago butasan an mga doros nin kalaglagan?
12 Bago si Jesus magdatong tanganing laglagon an naheheling na organisasyon ni Satanas, aakoon kan ultimo sa 144,000 na miembro nin espirituwal na Israel an pangultimong tatak. Malinaw na sinasabi kan Biblia na dai bubutasan an mga doros nin kalaglagan sa sistema ni Satanas sagkod na dai pa tapos an pagtatak na ini sa 144,000.—Kap. 7:1-4.
13. Paano ipaparisa ni Cristo an saiyang presensia durante kan enot na kabtang kan “dakulang kahorasaan”?
13 An “presensia” ni Cristo poon kan 1914 dai narisa kan kadaklan sa mga nag-iistar sa daga. (2 Ped. 3:3, 4) Minsan siring, dai na mahahaloy, ipaparisa nia an saiyang presensia paagi sa pagsagibo kan mga paghokom ni Jehova sa manlaenlaen na elemento kan sistema nin mga bagay ni Satanas. An paglaglag sa “tawo nin katampalasanan,” an klero nin Kakristianohan, magigin malinaw na ‘kapahayagan kan saiyang presensia.’ (Basahon an 2 Tesalonica 2:3, 8.) Matao iyan nin masarig na ebidensia na si Cristo naghihiro bilang nombradong Hokom ni Jehova. (Basahon an 2 Timoteo 4:1.) An pagkapara kan pinakanakakabaldeng kabtang kan Dakulang Babilonya maserbing kapinonan kan biyong pagkalaglag kan maraot na pambilog na kinaban na imperyong iyan nin falsong relihion. Ibubugtak nin Dios sa puso nin politikal na mga lider na biyong pohoon an espirituwal na patotot na ini. (Kap. 17:15-18) Iyan an magigin enot na kabtang kan “dakulang kahorasaan.”—Mat. 24:21.
14. (a) Taano ta papahalipoton an enot na kabtang kan dakulang kahorasaan? (b) Ano an magigin kahulogan kan “tanda kan Aki nin tawo” para sa banwaan ni Jehova?
14 Sinabi ni Jesus na an mga aldaw kan kahorasaan na iyan papahalipoton “huli sa mga pinili,” an mga natatada kan linahidan na mga Kristiano na nasa daga pa. (Mat. 24:22) Sa paglaglag na ini sa falsong relihion, dai totogotan ni Jehova na mapoho an linahidan na mga Kristiano asin an kairiba nindang ibang mga karnero. Sinabi pa ni Jesus na ‘pakatapos kan kahorasaan kan mga aldaw na idto,’ magkakaigwa nin mga tanda sa saldang, bulan, asin mga bitoon, “dangan an tanda kan Aki nin tawo malataw sa langit.” Huli kaini “tutubtobon kan [mga nasyon sa] daga an saindang sadiri sa pananangis.” Dai iyan mangyayari sa mga linahidan, na may langitnon na paglaom, asin sa kairiba ninda, na may daganon na paglaom. ‘Matindog sinda nin tanos asin ititingag ninda an saindang mga payo huli ta an saindang pagkaligtas naghaharani na.’—Mat. 24:29, 30; Luc. 21:25-28.
15. Ano an gigibohon ni Cristo pagdatong nia?
15 Bago taposon an saiyang pandadaog, an Aki nin tawo madatong sa saro pang paagi. Ihinula nia: “Kun an Aki nin tawo dumatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamuraway na trono. Asin an gabos na nasyon titiponon sa atubangan nia, asin pagsusuruwaysuwayon nia an mga tawo, kun paanong isinusuway nin pastor an mga karnero sa mga kanding. Asin ibubugtak nia an mga karnero sa saiyang too, alagad an mga kanding sa saiyang wala.” (Mat. 25:31-33) Nanonongod ini sa pagdatong ni Cristo bilang Hokom tanganing an mga tawo kan “gabos na nasyon” pagsuruwaysuwayon sa duwang kategoriya: “an mga karnero,” an mga aktibong nagsusuportar sa saiyang espirituwal na mga tugang (linahidan na mga Kristiano sa daga) asin an “mga kanding,” an mga “dai nagkukuyog kan maogmang bareta manongod sa satong Kagurangnan na Jesus.” (2 Tes. 1:7, 8) An mga karnero, na ilinaladawan na “mga matanos,” mag-aako nin “buhay na daing katapusan” sa daga, alagad an mga kanding “maduman sa pagkaparang daing katapusan,” o pagkalaglag.—Mat. 25:34, 40, 41, 45, 46.
Tinatapos ni Jesus an Pandadaog Nia
16. Paano tataposon ni Cristo na satong Lider an saiyang pandadaog?
16 Kun matatakan na an gabos na kaiba nia na hadeng saserdote asin kun maaraman na kun siisay an mga karnero saka ikalaag na an mga ini sa saiyang too para sa kaligtasan, puede nang “taposon [ni Cristo] an saiyang pandadaog.” (Kap. 5:9, 10; 6:2) Sa pangengenot nia sa hukbo nin makapangyarihan na mga anghel asin sa saiyang binuhay liwat na mga tugang, lalaglagon nia an bilog na politikal, militar, asin komersial na sistema sa daga. (Kap. 2:26, 27; 19:11-21) An pandadaog ni Cristo matatapos kun laglagon na nia an maraot na sistema ni Satanas. Dangan lalaomon nia sa bungaw si Satanas asin an mga demonyo sa laog nin sangribong taon.—Kap. 20:1-3.
17. Pasiring sa ano gigiyahan ni Cristo an ibang mga karnero durante kan Sangribong Taon na Paghade, asin ano an maninigo niatong magin determinasyon?
17 Mapadapit sa “dakulang kadaklan” nin ibang mga karnero, na makakaligtas sa dakulang kahorasaan, ihinula ni apostol Juan na “an Kordero, na yaon sa tahaw kan trono, magpapastor sa sainda, asin magiya sa sainda sa mga burabod kan tubig nin buhay.” (Kap. 7:9, 17) Iyo, sa bilog na Sangribong Taon na Paghade nia, an ibang mga karnero, na naghihinanyog talaga sa saiyang tingog, padagos na pangengenotan ni Cristo asin gigiyahan nia pasiring sa buhay na daing katapusan. (Basahon an Juan 10:16, 26-28.) Logod na maimbod niatong sundon an satong makahadeng Lider—ngonyan asin sagkod sa ipinanuga ni Jehova na bagong kinaban!
Bilang Repaso
• Ano an ginibo ni Cristo pagkatukaw nia sa trono?
• Sairisay an ginagamit ni Cristo digdi sa daga tanganing pangenotan an mga kongregasyon?
• Sa anong mga paagi madatong pa si Cristo na satong Lider?
• Paano kita padagos na pangengenotan ni Cristo sa bagong kinaban?
[Mga Hapot Para sa Pag-adal]
[Ritrato sa pahina 29]
An kalaglagan kan maraot na sistema ni Satanas magpaparisa kan presensia ni Cristo