An Kristianong Pagkasararo Nagpapamuraway sa Dios
An Kristianong Pagkasararo Nagpapamuraway sa Dios
‘Maigot na hingoahon na otobon an pagkasararo kan espiritu.’—EFE. 4:3.
1. Paano an Dios napamuraway kan mga Kristiano sa Efeso kan enot na siglo?
AN PAGKASARARO kan Kristianong kongregasyon sa suanoy na Efeso nagpamuraway sa tunay na Dios, si Jehova. Sa asensadong sentro nin negosyo na iyan, minalataw na mayaman asin may mga oripon an nagkapirang Kristianong tugang, mantang mga oripon asin pobrehon gayod an iba. (Efe. 6:5, 9) An nagkapira mga Judio na nanodan an katotoohan durante kan tolong bulan na pagpahayag ni apostol Pablo sa saindang sinagoga. An iba dating nagsasamba ki Artemis asin nagsasagibo nin mahika. (Gibo 19:8, 19, 26) Malinaw nanggad na pinagkakasararo kan tunay na Kristianismo an mga tawo na manlaenlaen an pinaghalean. Aram ni Pablo na napapamuraway si Jehova paagi sa pagkasararo kan kongregasyon. An apostol nagsurat: “Mapasaiya an kamurawayan paagi sa kongregasyon.”—Efe. 3:21.
2. Taano ta nameligro an pagkasararo nin mga Kristiano sa Efeso?
2 Minsan siring, nameligro an maogmang pagkasararo kan kongregasyon sa Efeso. Pinatanidan ni Pablo an kamagurangan: “Hale mismo dian sa saindo may mga lalaking matindog asin mataram nin biribid na mga bagay tanganing maguyod ninda sa sainda an mga disipulo.” (Gibo 20:30) Siring man, dai pa lubos na nahahale nin nagkapirang tugang an nakakabangang kaisipan na, arog kan ipinatanid ni Pablo, “naghihiro . . . sa mga aki nin kasumbikalan.”—Efe. 2:2; 4:22.
Sarong Surat na Nagdoon nin Pagkasararo
3, 4. Paano an pagkasararo idinoon ni Pablo sa surat nia sa mga taga Efeso?
3 Aram ni Pablo na tanganing padagos na oroyon na magtarabangan an mga Kristiano, an lambang saro sa sainda dapat na maigot na maghingoang makakontribwir sa pagkasararo. Pinasabngan nin Dios si Pablo na magsurat sa mga taga Efeso dapit sa pagkasararo. Halimbawa, si Pablo nagsurat manongod sa katuyohan nin Dios na “tiponon giraray ki Cristo an gabos na bagay.” (Efe. 1:10) Ikinomparar man nia an mga Kristiano sa manlaenlaen na gapo na minakompuesto sa sarong edipisyo. “An bilog na edipisyo, huling oroyon na pinagsurugpon, nagdadakula na magin sarong banal na templo para ki Jehova.” (Efe. 2:20, 21) Dugang pa, idinoon ni Pablo an pagkasararo kan Judio asin Hentil na mga Kristiano saka ipinagirumdom man nia sa mga tugang na saro sana an pinaghalean ninda. Inapod nia si Jehova bilang an “Ama, na pinagkakautangan nin ngaran kan lambang pamilya sa langit asin sa daga.”—Efe. 3:5, 6, 14, 15.
4 Mantang sinisiyasat niato an kapitulo 4 kan Efeso, maaaraman niato kun taano ta kaipuhan sa pagkasararo an paghihingoa, kun paano kita tinatabangan ni Jehova na magkasararo, asin kun anong mga kualidad an matabang sa sato na magdanay na sararo. Taano ta dai basahon an bilog na kapitulo tanganing orog pa ngani kamong makinabang sa pag-adal?
Kun Taano ta Kaipuhan sa Pagkasararo an Maigot na Paghihingoa
5. Taano an mga anghel nin Dios ta sararong nakakapaglingkod, alagad taano ta tibaad mas depisil para sa sato na magkasararo?
5 Pinakiolayan ni Pablo an mga tugang nia sa Efeso na ‘maigot na maghingoang otobon an pagkasararo kan espiritu.’ (Efe. 4:3) Tanganing masabotan na an paghihingoa kaipuhan sa pagkasararo, isip-isipa an mga anghel nin Dios. Mayo nin duwang nabubuhay na bagay sa daga an lubos na magkapareho, kaya rasonable kitang makakapagsabi na magkakalaen an lambang saro sa minilyon na anghel ni Jehova. (Dan. 7:10) Pero, sararo sindang nakakapaglingkod ki Jehova huling gabos sinda nagdadangog sa saiya asin naggigibo kan kabotan nia. (Basahon an Salmo 103:20, 21.) An maimbod na mga anghel laen-laen an mga karakteristiko; asin arog man kaiyan an mga Kristiano. Pero, laen-laen pa an mga kaluyahan niato, kaya mas depisil para sa sato na magkasararo.
6. Anong mga kualidad an makakatabang sa sato na makipagtabangan sa mga tugang na may mga kaluyahan na laen kan sa sato?
6 Mantang pinoprobaran nin bakong sangkap na mga tawo na makipagtabangan, posible nanggad na may maglataw na mga problema. Halimbawa, paano kun an sarong mahoyong tugang na pirmeng huring mag-abot naglilingkod ki Jehova kaiba nin sarong tugang na dai nahuhuri alagad aranggoton? Tibaad an saro mag-isip na may problema sa ugale an tugang nia alagad tibaad malingawan nia na may problema man sa saiyang ugale. Paano an duwang tugang na iyan makakapaglingkod nin may pagkakaoyon? Mangnohon kun paano makakatabang sa sainda an mga kualidad na irinekomendar ni Pablo sa sunod na sinabi nia. Dangan, horophoropon kun paano kita makakakontribwir sa pagkasararo paagi sa pagpatalubo kan siring na mga kualidad. Si Pablo nagsurat: “[Ako] nakikimaherak sa saindo na kamo maglakaw nin angay . . . na igwa nin lubos na kababaan nin isip asin kahoyoan, na may pakatios, na nagtitiniriostiosan sa pagkamoot, na maigot na naghihingoa na otobon an pagkasararo kan espiritu sa nakakapasararong bogkos nin katoninongan.”—Efe. 4:1-3.
7. Taano ta mahalagang marhay na maghingoang magin kasaro nin ibang bakong sangkap na mga Kristiano?
7 Mahalagang marhay na makanood na sararong maglingkod sa Dios kaiba an bakong sangkap na mga tawo huling saro sanang hawak, o grupo, an tunay na mga parasamba. “Igwa nin sarong hawak, asin sarong espiritu, kun paano na kamo inapod sa sarong paglaom na dian kamo inapod; sarong Kagurangnan, sarong pagtubod, sarong bautismo, sarong Dios asin Ama kan gabos.” (Efe. 4:4-6) An espiritu asin mga bendisyon ni Jehova yaon sa sarong kasararoan nin magturugang na ginagamit nin Dios. Dawa kun may makakolog sa sato sa kongregasyon, saen pa kita maduman? Mayo na nin iba pang nagtotokdo dapit sa buhay na daing katapusan.—Juan 6:68.
An “Balaog na mga Lalaki” Nakakakontribwir sa Pagkasararo
8. Ano an ginagamit ni Jesus tanganing mapakosog kita tumang sa nakakabangang mga impluwensia?
8 Ginamit ni Pablo an sarong ordinaryo nang ginigibo nin mga soldados kan suanoy na mga panahon tanganing iilustrar kun paano si Jesus nagtatao nin “balaog na mga lalaki” tanganing makatabang na pagkasararoon an kongregasyon. Tibaad darahon nin nangganang soldados sa saiyang harong an sarong dayong bihag tanganing magin katabang kan saiyang agom sa mga gibohon. (Sal. 68:1, 12, 18) Kaagid kaiyan, huli sa kapangganahan ni Jesus sa kinaban nagkaigwa sia nin dakol na oripon na andam na kumuyog. (Basahon an Efeso 4:7, 8.) Paano nia ginamit an mga “bihag” na iyan? “Itinao nia an nagkapira bilang mga apostol, an nagkapira bilang mga propeta, an nagkapira bilang mga ebanghelisador, an nagkapira bilang mga pastor asin paratokdo, sa pagpakarhay giraray kan mga banal, para sa gibohon na paglingkod, para sa pagpakosog kan hawak kan Cristo, sagkod na kita gabos makaabot sa pagkasararo sa pagtubod.”—Efe. 4:11-13.
9. (a) Paano an “balaog na mga lalaki” nakakatabang sa pagpadanay kan satong pagkasararo? (b) Taano an lambang miembro kan kongregasyon ta maninigong magkontribwir sa pagkasararo kaiyan?
9 Bilang mamomoton na mga pastor, an “balaog na mga lalaki” na ini nagtatabang na mapagdanay an satong pagkasararo. Halimbawa, kun marisa nin sarong magurang sa kongregasyon an duwang tugang na “nagpupukaw nin pagdaraogan,” dakula an ikakakontribwir nia sa pagkasararo kan kongregasyon kun matao sia nin pribadong sadol tanganing “pakarhayon giraray [sinda] sa espiritu nin kahoyoan.” (Gal. 5:26–6:1) Bilang mga paratokdo, an “balaog na mga lalaki” na ini nagtatabang sa sato na makapatalubo nin marigon na pagtubod basado sa mga katokdoan sa Biblia. Sa siring, sinda nakakakontribwir sa pagkasararo asin nagtatabang sa sato na umoswag sa pagkamaygurang bilang Kristiano. Isinurat ni Pablo na an katuyohan kaini iyo na “tanganing dai na kita magin mga omboy, na inaanod nin mga alon asin ipinapadpad nin lambang doros nin katokdoan paagi sa pandadaya nin mga tawo, paagi sa katusohan sa pagpakana nin sala.” (Efe. 4:13, 14) An lambang Kristiano maninigong magkontribwir sa pagkasararo nin magturugang, kun paanong an lambang parte kan satong pisikal na hawak nagpapakosog sa iba paagi sa pagtabang na ikatao kun ano an kaipuhan.—Basahon an Efeso 4:15, 16.
Magpatalubo nin Bagong mga Kualidad
10. Paano an imoral na paggawe nagsasapeligro kan satong pagkasararo?
10 Nariparo daw nindo na ipinapaheling kan ikaapat na kapitulo kan surat ni Pablo sa mga taga Efeso na an pagsagibo nin pagkamoot iyo an liabe sa pagkasararo nin maygurang na mga Kristiano? Sunod, ipinapaheling kaiyan kun ano an kalabot sa pagkamoot. Halimbawa, an pagsunod sa dalan nin pagkamoot matabang sa sato na likayan an pakikisaro asin malaswang gawe-gawe. Sinadol ni Pablo an saiyang mga tugang na dai ‘magpadagos sa paglakaw na siring sa mga nasyon.’ An mga iyan “nawaran na kan gabos na pakamate sa moral,” asin “sinda nagpangana na kan saindang sadiri sa malaswang gawe-gawe.” (Efe. 4:17-19) An imoral na kinaban na kinabubuhayan niato nagsasapeligro kan satong pagkasararo. An pakikisaro nagigin tema nin surubahan, kanta, aling-alingan, asin ginigibo iyan nin mga tawo nin sekreto o hayag. Pero, dawa an pakikigitilan, na tibaad kalabot an pagpaheling nin seksuwal na pagkaakit sa saro na dai mo man intension na agomon, puedeng makaparayo sa saimo ki Jehova asin sa kongregasyon. Taano? Huling iyan madalion na magresulta sa pakikisaro. Siring man, an pakikigitilan na nagreresulta sa pagsambay daing herak na ikinakasuway an mga aki sa mga magurang asin an inosenteng mga agom sa saindang agom. Nakakabanga nanggad! Bakong makangangalas na si Pablo nagsurat: “Nanodan nindo na bakong siring kaiyan an Cristo”!—Efe. 4:20, 21.
11. Dinadagka kan Biblia an mga Kristiano na gumibo nin anong pagbabago?
11 Idinoon ni Pablo na maninigo niatong haleon an nakakaraot na mga kaisipan asin imbes pataluboon an mga kualidad na nagpapangyaring mamuhay kita na kaoyon nin iba. Sia nagsabi: “Maninigo nindong haleon an daan na personalidad na komporme sa dati nindong paggawe asin na nararaot segun sa saiyang [an daan na personalidad] mapandayang mga mawot; . . . kamo maninigong magin bago sa puersa na nagpapahiro sa saindong isip, asin maninigong magsulot kan bagong personalidad na linalang segun sa kabotan nin Dios sa tunay na katanosan asin kaimbodan.” (Efe. 4:22-24) Paano kita ‘mababago sa puersa na nagpapahiro sa satong isip’? Kun mapagpahalagang hinohorophorop niato an satong nanonodan sa Tataramon nin Dios sagkod sa marahay na halimbawa nin maygurang na mga Kristiano, paagi sa paghihingoa puede kitang magkaigwa kan bagong personalidad, “na linalang segun sa kabotan nin Dios.”
Magpatalubo nin Bagong mga Paagi nin Pagtaram
12. Paano an pagtaram nin katotoohan nakakakontribwir sa pagkasararo, asin taano ta depisil para sa iba na gibohon iyan?
12 An pagtaram nin katotoohan mahalagang marhay sa mga tawong kabtang nin sarong pamilya o kongregasyon. An prangka, sinsero, asin maboot na pananaram puedeng makapasararo sa mga tawo. (Juan 15:15) Alagad paano kun an saro nagpuputik sa saiyang tugang? Kun marisa iyan kan saiyang tugang, mararaot an tiwala ninda sa lambang saro. Masasabotan nindo kun taano ta isinurat ni Pablo: “An lambang saro sa saindo magtaram nin katotoohan sa saiyang kapwa, huli ta kita mga miembro na kabtang kan lambang saro.” (Efe. 4:25) An saro na natuod nang magputik, na tibaad ginigibo na nia iyan poon sa pagkaaki, tibaad masakitan na magpoon na magtaram nin katotoohan. Alagad papahalagahan ni Jehova an saiyang paghihingoa na magbago asin tatabangan Nia sia.
13. Ano an kalabot sa paghale sa mapang-abusong pagtaram?
13 Tinotokdoan kita ni Jehova na makakontribwir sa paggalang asin pagkasararo kan kongregasyon sagkod kan pamilya paagi sa pagbugtak nin estriktong mga limitasyon sa paagi nin pagtaram niato. “Dai kamo magpaluwas nin lapang tataramon sa saindong ngoso . . . Magkaharale na sa saindo an gabos na kapaitan na maraot an kamawotan asin kaanggotan asin grabeng pagkaanggot asin sirilyakan patin mapang-abusong pagtaram kaiba an gabos na karatan.” (Efe. 4:29, 31) An sarong paagi na malikayan an nakakakolog na pananaram iyo na magpatalubo nin mas magalang na saboot sa iba. Halimbawa, an sarong lalaki na mapang-abusong nagtataram sa saiyang agom maninigo na magmaigot na bagohon an saiyang saboot sa agom nia, nangorogna mantang nanonodan nia kun paano ni Jehova tinatawan nin onra an mga babae. Linalahidan pa ngani nin Dios nin banal na espiritu an nagkapirang babae, na tinatawan sinda nin paglaom na mamahala bilang mga hade kaiba ni Cristo. (Gal. 3:28; 1 Ped. 3:7) Kaagid kaiyan, an sarong babae na pirmeng kinukurahawan an saiyang agom maninigo na mapahiro na magbago mantang nanonodan nia kun paano ni Jesus kinontrol an saiyang sadiri kan pinupukaw na maanggot.—1 Ped. 2:21-23.
14. Taano ta peligroso an pagpahayag nin kaanggotan?
14 Konektadong gayo sa mapang-abusong pagtaram an dai pakakontrol sa kaanggotan. Ini puede man na makapasuway sa mga tawong kabtang nin sarong grupo. An kaanggotan garo kalayo. Iyan puedeng magin masakit kontrolon asin magresulta sa grabeng kapahamakan. (Tal. 29:22) An saro na may katanosan na magpahayag nin pagkasuya dapat na maingat na kontrolon an saiyang kaanggotan tanganing malikayan na maraot an mahalagang mga relasyon. An mga Kristiano maninigong maghingoa na magin mapagpatawad, na dai nagtatanom nin raot nin boot asin dai na nagkukulibat kan nangyari. (Sal. 37:8; 103:8, 9; Tal. 17:9) Sinadol ni Pablo an mga taga Efeso: “Maanggot kamo nin grabe, alagad ta dai kamo magkasala; dai nindo pagpasolnopon an saldang na kamo may kaanggotan, ni tawan man nin lugar an Diablo.” (Efe. 4:26, 27) An dai pakakontrol sa kaanggotan magtatao nin oportunidad sa Diablo na magtanom nin pagkabaranga asin iriwal pa ngani sa kongregasyon.
15. An pagkua kan bako niato puedeng magkaigwa nin anong epekto?
15 An pagpaheling nin paggalang sa pagsasadiri nin iba nakakakontribwir sa pagkasararo kan kongregasyon. Mababasa niato: “An parahabon dai na maghabon.” (Efe. 4:28) Sa pangkagabsan, nagtitiwala an mga lingkod ni Jehova sa lambang saro. Kun aabusohon nin sarong Kristiano an pagtitiwalang iyan paagi sa pagkua kan bako nia, mararaot nia an maogmang pagkasararo na iyan.
An Pagkamoot sa Dios Nakakapasararo sa Sato
16. Paano niato magagamit an nakakaparigon na pananaram sa pagpakosog kan satong pagkasararo?
16 Nagkakasararo an Kristianong kongregasyon huling gabos sinda napapahiro kan pagkamoot sa Dios na mamomoton na trataron an iba. An pag-apresyar sa kabootan ni Jehova nagpapahiro sa sato na maigot na maghingoa na iaplikar an hatol na ini: “[Isabi] an ano man na tataramon na marahay para sa pagpakosog sono sa pangangaipo, tangani na ikatao kaiyan an paborable sa mga nagdadangog. . . . Magin maboot sa lambang saro, mapagmalasakit sa mamomoton na paagi, na lubos na nagpapatarawadtawadan kun paanong an Dios man lubos na nagpatawad sa saindo paagi ki Cristo.” (Efe. 4:29, 32) Si Jehova maboot na nagpapatawad sa bakong sangkap na mga tawong arog niato. Bako daw na maninigo man niatong patawadon an iba kun may naheheling kitang pagkabakong sangkap sa sainda?
17. Taano ta maninigo kitang maigot na maghingoa na makakontribwir sa pagkasararo?
17 An pagkasararo kan banwaan nin Dios nagpapamuraway ki Jehova. Sa laen-laen na paagi, an saiyang espiritu nagpapahiro sa sato na makakontribwir sa pagkasararo. Seguradong habo niatong kontrahon an paggiya kan espiritu. Si Pablo nagsurat: “Dai nindo pagpamondoon an banal na espiritu nin Dios.” (Efe. 4:30) An pagkasararo sarong kayamanan na maninigong ingatan. Nagpapagayagaya iyan sa mga igwa kaiyan asin nagpapamuraway iyan ki Jehova. “Kun siring, magin kamong mga paraarog sa Dios, bilang mga aki na namomotan na marhay, asin padagos kamong maglakaw sa pagkamoot.”—Efe. 5:1, 2.
Ano an Isisimbag Nindo?
• Anong mga kualidad an nakakakontribwir sa pagkasararo kan mga Kristiano?
• Paano an satong paggawe nakakakontribwir sa pagkasararo sa kongregasyon?
• Paano an pananaram niato nakakatabang sa sato na makipagtabangan sa iba?
[Mga Hapot Para sa Pag-adal]
[Ritrato sa pahina 17]
An mga manlaenlaen an pinaghalean nagkakasararo
[Ritrato sa pahina 18]
Aram daw nindo an mga peligro nin pakikigitilan?