An Pagkasararo Midbidan kan Tunay na Pagsamba

“Sa pagkasararo ibubugtak ko sinda, siring sa aripompon sa toril.”—MIQ. 2:12.

1. Paano an mga linalang nagtataong ebidensia kan kadonongan nin Dios?

SARONG salmista an mapuersang nagsabi: “Kanigoan kadakol kan saimong gibo, O Jehova! Iyan gabos ginibo mo sa kadonongan. An daga pano kan saimong mga ginibo.” (Sal. 104:24) Heling-heling an kadonongan nin Dios sa pagtinarabangan kan minilyon na manlaenlaen na tinanom, insekto, hayop, asin bakterya sa makangangalas na komplikadong pagkakoronektar nin buhay sa daga. Siring man, an saindong hawak may rinibong laen-laen na mekanismo, poon sa dakulang mga organo sagkod sa saditon na mga kabtang kan saindong mga selula, na nagtatarabangan tanganing magkaigwa kamo nin marahay asin makosog na hawak.

2. Arog kan ilinaladawan sa pahina 13, taano an pagkasararo kan mga Kristiano ta garo baga milagro nanggad?

² Linalang ni Jehova an katawohan sa paagi na kaipuhan nindang magtinarabangan. An katawohan manlaenlaen an itsura, personalidad, asin kakayahan. Saro pa, tinawan nia an enot na mag-agom nin diosnon na mga kualidad na paagi kaiyan sinda magtitinabangan asin magsisinarigan. (Gen. 1:27; 2:18) Minsan siring, an kinaban nin katawohan sa pangkagabsan suway ngonyan sa Dios asin, sa kabilogan, dai noarin man nahimong magkasararo. (1 Juan 5:19) Sa dahelan na iyan, garo baga milagro nanggad an pagkasararo kan Kristianong kongregasyon kaidtong enot na siglo kun iisipon na kompuesto iyan nin manlaenlaen na tawo arog nin mga oripon na taga Efeso, bantog na mga babaeng Griego, edukadong mga lalaking Judio, asin mga dating nagsasamba sa idolo.—Gibo 13:1; 17:4; 1 Tes. 1:9; 1 Tim. 6:1.

3. Paano ilinaladawan kan Biblia an pagkasararo nin mga Kristiano, asin ano an pag-oolayan niato sa pag-adal na ini?

³ Paagi sa tunay na pagsamba, an mga tawo may pagkaoroyon na nagtatarabangan siring sa mga parte kan sato mismong hawak. (Basahon an 1 Corinto 12:12, 13.) An nagkapirang aspekto na pag-oolayan niato sa artikulong ini iyo an: Paano pinagkakasararo kan tunay na pagsamba an mga tawo? Taano ta si Jehova sana an makakapagpasararo sa minilyon na tawo hale sa gabos na nasyon? Tinatabangan kita ni Jehova na mapangganahan an anong mga olang sa pagkasararo? Asin kun dapit sa pagkasararo, paano an tunay na Kristianismo napapalaen sa Kakristianohan?

Paano Pinagkakasararo kan Tunay na Pagsamba an mga Tawo?

4. Paano pinagkakasararo kan tunay na pagsamba an mga tawo?

⁴ Aram kan mga nagsasagibo nin tunay na pagsamba na huling si Jehova an naglalang kan gabos na bagay, sia an tunay na Soberano kan uniberso. (Kap. 4:11) Kaya minsan ngani an tunay na mga Kristiano yaon sa dakol na lugar asin manlaenlaen an kamugtakan, pararehong ley nin Dios asin pararehong prinsipyo sa Biblia an kinukuyog ninda gabos. An gabos na tunay na parasamba angay na inaapod si Jehova na “Ama.” (Isa. 64:8; Mat. 6:9) Sa siring, sinda gabos magturugang sa espirituwal asin puedeng maogmang magkasararo arog kan ilinadawan kan salmista: “Uya! Kanigoan karahay asin kanigoan kaogma na an magturugang mag-erok na magkairiba na may pagkasararo!”—Sal. 133:1.

5. Anong kualidad an nakakakontribwir sa pagkasararo kan tunay na mga parasamba?

⁵ Minsan ngani bakong sangkap an tunay na mga Kristiano, iriba sindang nagsasamba na may pagkasararo huling nanodan nindang kamotan an lambang saro. Mayong makakaagid sa pagtotokdo ni Jehova sa sainda na mamoot. (Basahon an 1 Juan 4:7, 8.) An saiyang Tataramon nagsasabi: “Isulot nindo an mamomoton na mga pagmate nin pagmalasakit, kabootan, kababaan nin isip,  kahoyoan, asin pakatios. Padagos kamong magtiniriostiosan asin lubos na magpatarawadtawadan kun an siisay man igwa nin dahelan na magreklamo tumang sa saro. Kun paanong kamo lubos na pinatawad ni Jehova, siring man an gibohon nindo. Alagad, laen pa sa gabos na bagay na ini, isulot nindo an pagkamoot, huli ta iyan sangkap na bogkos nin pagkasararo.” (Col. 3:12-14) An sangkap na bogkos na ini nin pagkasararo—an pagkamoot—iyo an kualidad na pangenot na midbidan kan tunay na mga Kristiano. Dai daw nindo naheheling, basado sa saindong eksperyensia, na an pagkasararong ini sarong nagpapamidbid na kabtang kan tunay na pagsamba?—Juan 13:35.

6. Paano an paglaom sa Kahadean nakakatabang sa sato na magkasararo?

⁶ An tunay na mga parasamba nagkakasararo man huling nagtutubod sinda na an Kahadean nin Dios an solamenteng paglaom kan katawohan. Aram ninda na dai na mahahaloy sasalidahan kan Kahadean nin Dios an mga gobyerno nin tawo asin na paagi kaiyan bebendisyonan an makinuyog na katawohan nin tunay asin nagdadanay na katoninongan. (Isa. 11:4-9; Dan. 2:44) Sa siring, sinusunod kan mga Kristiano an sinabi ni Jesus manongod sa mga parasunod nia: “Sinda bakong kabtang kan kinaban, kun paanong ako bakong kabtang kan kinaban.” (Juan 17:16) An tunay na mga Kristiano nagdadanay na neutral sa mga iriwal sa kinaban; huli kaini, nagkakasararo sinda dawa napapalibotan nin mga nag-iiriwal.

An Solamenteng Gikanan nin Espirituwal na Pagtotokdo

7, 8. Paano nakakakontribwir sa satong pagkasararo an pagtotokdo basado sa Biblia?

⁷ An mga Kristiano kan enot na siglo nagkasararo huling saro sana an gikanan kan pamparigon na inako ninda gabos. Minidbid ninda na si Jesus nagtotokdo asin naggigiya sa kongregasyon paagi sa sarong namamahalang grupo, na kompuesto kan mga apostol asin kamagurangan na lalaki sa Jerusalem. Ibinabasar kan debotong mga lalaking ini an saindang mga desisyon sa Tataramon nin Dios asin ginagamit ninda an nagbibiaheng mga paraataman tanganing ipaabot an mga instruksion sa mga kongregasyon sa dakol na lugar. Mapadapit sa nagkapirang paraataman na iyan, an Biblia nagsasabi: “Mantang sinda nagbibiahe sa mga siudad itinatao ninda sa mga yaon duman an mga kasugoan na ootobon na napagdesisyonan kan mga apostol asin kan kamagurangan na lalaki na yaon sa Jerusalem.”—Gibo 15:6, 19-22; 16:4.

⁸ Ngonyan man, sarong Namamahalang Grupo na kompuesto nin mga Kristianong linahidan nin espiritu an nakakakontribwir sa pagkasararo kan pambilog na kinaban na kongregasyon. An Namamahalang Grupo nagpupublikar nin nakakaparigon sa espirituwal na mga babasahon sa dakol na lenguahe. An espirituwal na kakanon na ini nakabasar sa Tataramon nin Dios. Sa siring, an itinotokdo bakong hale sa tawo kundi ki Jehova.—Isa. 54:13.

9. Paano an satong gibohon na itinao nin Dios nakakatabang sa sato na magkasararo?

⁹ An Kristianong mga paraataman nagdadagka man nin pagkasararo paagi sa pangengenot sa paghuhulit. An pagigin dayupot kan mga iribang naglilingkod sa Dios orog nanggad kisa sa pagigin dayupot nin iba sa kinaban na nag-iiribanan sana bilang magbararkada. An Kristianong kongregasyon inestablisar, bakong bilang sarong organisasyon nin magbararkada, kundi  tanganing magtaong onra ki Jehova asin otobon an gibohon na paghuhulit kan maogmang bareta, paggibo nin mga disipulo, asin pagpakosog sa kongregasyon. (Roma 1:11, 12; 1 Tes. 5:11; Heb. 10:24, 25) Sa siring, masasabi ni apostol Pablo dapit sa mga Kristiano: “Kamo marigon na naninindogan sa sarong espiritu, na bilang sarong kalag daramay na nagmamaigot para sa pagtubod sa maogmang bareta.”—Fil. 1:27.

10. Sa anong mga paagi na nagkakasararo kita bilang banwaan nin Dios?

¹⁰ Huli kaiyan, bilang banwaan ni Jehova, nagkakasararo kita huling inaako niato an soberaniya ni Jehova, namomotan an satong mga tugang, naglalaom sa Kahadean nin Dios, asin iginagalang an mga ginagamit nin Dios na mangenot sa sato. Tinatabangan kita ni Jehova na mapangganahan an nagkapirang ugale na, huli sa pagkabakong sangkap niato, puedeng makaraot sa satong pagkasararo.—Roma 12:2.

Pakapanggana sa Kapalangkawan Asin Pagkauri

11. Taano ta nakakapasuruway an kapalangkawan, asin paano kita tinatabangan ni Jehova na mapangganahan iyan?

¹¹ Pinagsusuruway nin kapalangkawan an mga tawo. An tawong mapalangkaw gustong ibilang an saiyang sadiri na nakakalabi asin sa parate nagkakaigwa nin makasadiring kaogmahan huli sa pagpaabaw-abaw. Alagad sa parate nakakaolang ini sa pagkasararo; an mga tawong nakakadangog kan pagpaabaw-abaw tibaad mauri. Si disipulo Santiago prangkang nagsabi sa sato: “An gabos na siring na pag-oorgolyo maraot.” (Sant. 4:16) Bakong mamomoton kun tatrataron niato an iba bilang mas hababa. Si Jehova pambihirang halimbawa nin kapakumbabaan huli sa pagtao nia nin atension sa bakong sangkap na mga tawo arog niato. Si David nagsurat: “An saimong [sa Dios] kapakumbabaan an minagibo sa sako na dakula.” (2 Sam. 22:36) Tinatabangan kita kan Tataramon nin Dios na mapangganahan an kapalangkawan paagi sa pagtokdo sa sato na mangatanosan nin tama. Si Pablo pinasabngan na maghapot: “Siisay an nagpapalaen sa saimo? Sa katunayan, ano an yaon sa saimo na dai mo inako? Ngonyan, kun iyan talagang inako mo, tadaw ta naghahambog ka na garo baga dai mo iyan inako?”—1 Cor. 4:7.

12, 13. (a) Taano ta madali sa sato na mauri? (b) Ano an nagigin resulta kan pag-arog sa pagmansay ni Jehova sa iba?

¹² An pagkauri saro pang parateng olang sa pagkasararo. Huli sa minanang pagkabakong sangkap, gabos kita “may tendensiang mauri,” asin dawa an haloy nang mga Kristiano tibaad kun minsan naaara sa mga kamugtakan, rogaring, pribilehio, o kakayahan nin iba. (Sant. 4:5) Halimbawa, an sarong de pamilyang tugang na lalaki tibaad maara sa mga pribilehio nin sarong bilog na panahon na ministro, na dai narerealisar na an bilog na panahon na ministrong iyan tibaad medyo naaara man sa de pamilyang lalaki na may mga aki. Paano niato malilikayan na makaraot sa satong pagkasararo an siring na pagkaara?

¹³ Tanganing tabangan kita na mahale an pagkauri, girumdomon na ikinomparar kan Biblia an linahidan na mga miembro kan Kristianong kongregasyon sa mga kabtang kan hawak nin tawo. (Basahon an 1 Corinto 12:14-18.) Halimbawa, minsan ngani tibaad mas naririsa an saindong mata kisa sa puso nindo, bako daw na pareho iyan mahalaga sa saindo? Kaagid kaiyan, pinapahalagahan ni Jehova an gabos na miembro kan kongregasyon dawa ngani may panahon na tibaad mas naririsa an nagkapira kisa sa iba. Kaya arogon niato an pagmansay ni Jehova sa satong mga tugang. Imbes na mauri sa iba, puede kitang magpaheling nin pagmakolog asin personal na interes sa sainda. Paagi kaiyan, nakakakontribwir kita sa pagigin napapalaen kan tunay na mga Kristiano sa mga iglesia nin Kakristianohan.

Kakristianohan—Midbid sa Pagkabaranga

14, 15. Paano nagkabaranga an apostatang Kristianismo?

¹⁴ An pagkasararo kan tunay na mga Kristiano  kabaliktaran kan pagkabaranga kan mga iglesia nin Kakristianohan. Pag-abot kan ikaapat na siglo, lakop nang gayo an apostatang Kristianismo mala ngani ta sarong paganong emperador nin Roma an nagkontrol kaiyan, na nakakontribwir sa paglakop kan Kakristianohan. Dangan, huli sa sunod-sunod na pagkabaranga, dakol na kahadean an nagsuway sa Roma asin nagbilog nin sadiri nindang mga iglesia kan Estado.

¹⁵ Dakol sa mga kahadean na idto an nagralabanlaban sa laog nin mga siglo. Durante kan ika-17 asin ika-18 siglo, sinuportaran kan mga tawo sa Britania, Pransia, asin Estados Unidos an pagpaheling nin debosyon sa saindang Estado, kaya an nasyonalismo garo man sana nagin relihion. Durante kan ika-19 asin ika-20 siglo, an nasyonalismo nagpoon na mangibabaw sa isip kan kadaklan na tawo. Pag-abot nin panahon, an mga iglesia nin Kakristianohan nagkabaranga sa dakol na sekta, na an kadaklan sa mga ini kinonsinte an nasyonalismo. An mga parasimba nakiguerra pa ngani sa mga karelihion ninda sa ibang nasyon. Ngonyan, an Kakristianohan baranga huli sa laen-laen na paniniwala nin mga sekta asin huli sa nasyonalismo.

16. Anong mga isyu an nakakapabanga sa Kakristianohan?

¹⁶ Kan ika-20 siglo, an nagkapira sa ginatos na sekta nin Kakristianohan naggibo nin paghihingoa para sa pagkasararo. Alagad pagkatapos nin dakol na dekada nin paghihingoa, pira sanang iglesia an nagkasararo, asin an mga parasimba nagkakabaranga pa man giraray sa mga isyu na arog kan ebolusyon, aborsion, homoseksuwalidad, asin ordenasyon nin mga babae. Pinoprobaran nin nagkapirang lider nin mga iglesia nin Kakristianohan na pagkasararoon an laen-laen na sekta paagi sa daing gayo pagtao nin atension sa mga doktrina na dati dahelan nin pagkabaranga. Minsan siring, iyan nagreresulta sa hababaw na pagtubod nin mga tawo asin dai nanggad kaiyan napagkakasararo an barangang Kakristianohan.

Pakapanggana sa Nasyonalismo

17. Paano ihinula na mapagkakasararo kan tunay na pagsamba an mga tawo “sa huring kabtang kan mga aldaw”?

¹⁷ Minsan ngani an katawohan mas grabe nanggad an pagkabaranga ngonyan kisa kasuarin man, an pagkasararo padagos na nagigin midbidan kan tunay na mga parasamba. An propeta nin Dios na si Miqueas naghula: “Sa pagkasararo ibubugtak ko sinda, siring sa aripompon sa toril.” (Miq. 2:12) Ihinula ni Miqueas an pagigin mas halangkaw kan tunay na pagsamba kisa sa gabos na iba pang pagsamba, baga man sa falsong mga dios o sa Estado bilang dios. Sia nagsurat: “Mangyayari sa huring kabtang kan mga aldaw na an bukid kan harong ni Jehova marigon na mapapatindog na halangkaw pa sa alitoktok kan mga bukid, asin iyan ilalangkaw nanggad na mas halangkaw pa sa mga bulod; asin dian maburunyog an mga banwaan. Huli ta an gabos na banwaan, kun para sa sainda, an lambang saro maglalakaw sa ngaran kan saiyang dios; alagad, kun para sa sato, kita maglalakaw sa ngaran ni Jehova na satong Dios.”—Miq. 4:1, 5.

18. Tinatabangan kita kan tunay na pagsamba na gumibo nin anong mga pagbabago?

¹⁸ Ilinadawan man ni Miqueas kun paano pagkakasararoon kan tunay na pagsamba an mga dating magkaiwal. ‘An mga tawo hale sa dakol na nasyon maduruman nanggad asin masarabi: “Madia kamo, asin magturukad kita sa bukid ni Jehova asin sa harong kan Dios ni Jacob; asin totokdoan nia kita manongod sa saiyang  mga dalan, asin magraralakaw kita sa saiyang mga dana.” Asin pupulpogon ninda an saindang mga espada na magin tarom nin arado asin an saindang mga budyak na magin mga kagot na pantakras. Dai sinda mabingat nin espada, an nasyon tumang sa nasyon, ni mag-aadal pa man sinda nin pakikiguerra.’ (Miq. 4:2, 3) An mga minabaya sa pagsamba sa mga dios na gibo nin tawo o sa mga nasyon tanganing sambahon si Jehova nakakaeksperyensia nin pangglobong pagkasararo. Tinotokdoan sinda nin Dios manongod sa dalan nin pagkamoot.

19. An pagkasararo kan minilyon na tawo sa tunay na pagsamba malinaw na ebidensia nin ano?

¹⁹ An pangglobong pagkasararo kan tunay na mga Kristiano ngonyan mayong kaagid asin malinaw na ebidensia kan padagos na paggiya ni Jehova sa saiyang banwaan paagi sa espiritu nia. An mga indibiduwal hale sa gabos na nasyon nagkakasararo sa paaging dai pa noarin man naheling sa kasaysayan nin tawo. Ini pambihirang kaotoban kan ipinaparisa sa Kapahayagan 7:9, 14, asin ipinapaheling kaiyan na dai na mahahaloy bubutasan kan mga anghel nin Dios an mga “doros” na malaglag sa presenteng maraot na sistema nin mga bagay. (Basahon an Kapahayagan 7:1-4, 9, 10, 14.) Bako daw na sarong pribilehio na mapabilang sa pambilog na kinaban na kasararoan nin magturugang? Paano an lambang saro sa sato makakakontribwir sa pagkasararong iyan? Pag-oolayan ini sa sunod na artikulo.

Ano an Isisimbag Nindo?

• Paano pinagkakasararo kan tunay na pagsamba an mga tawo?

• Paano niato malilikayan na makaraot sa satong pagkasararo an pagkauri?

• Taano ta dai nagkakabaranga an tunay na mga parasamba huli sa nasyonalismo?

[Mga Hapot Para sa Pag-adal]

[Ritrato sa pahina 13]

Manlaenlaen an pinaghalean kan mga Kristiano kan enot na siglo

[Mga Ritrato sa pahina 15]

Paano an pagtabang nindo sa mga gibohon sa Kingdom Hall makakakontribwir sa pagkasararo?