Mapanggana an Espesyal na Kampanya sa Bulgaria

“An anihon mahiwas, alagad an mga paraani kakadikit. Kun siring, makimaherak kamo sa Kagurangnan kan anihon na magsubol nin mga paraani sa saiyang anihon.”—MAT. 9:37, 38.

AN MGA tataramon na iyan ni Jesus angay nanggad sa situwasyon sa Bulgaria, sarong magayon na nasyon sa Balkan na nasa timog-sirangan na Europa! Dakol nanggad na paraani an kaipuhan tanganing ikapaabot an maogmang bareta sa labing siete milyones na nag-iistar duman. Mga 1,700 an parahayag sa Bulgaria, alagad dai ninda kayang mahulitan an bilog na teritoryo. Huli kaiyan, inaprobaran kan Namamahalang Grupo an pag-imbitar sa mga Saksing nagtataram nin Bulgario hale sa nagkapirang nasyon sa Europa na magduman asin makikabtang sa sarong espesyal na kampanya nin paghuhulit kan 2009. An kampanya iiniskedyul na gibohon sa laog nin pitong semana sa panahon nin tig-init, na natapos sa “Magdanay Kamong Mapagbantay!” na Pandistritong Kombension sa Sofia, kan Agosto 14-16, 2009.

Dakolon an Naghimate

Inisip kan mga tugang sa sangang opisina sa Sofia kun pira an mahimate sa Alemania, España, Grecia, Italia, Polandia, asin Pransia. An mga maboluntaryo sa Bulgaria kaipuhan na magduman sa sadiri nindang gastos asin gamiton an saindang bakasyon para sa paghuhulit. Nakakaogma nanggad na serosemana nagdadakol an nagpapalista, sagkod na uminabot iyan sa 292! Huling dakolon an naghimate, ikakaasignar an mga boluntaryong ini sa tolong siudad sa Bulgaria: Kazanlak, Sandanski, asin Silistra. Inimbitaran kan mga paraataman sa sirkito sa Bulgaria an mga payunir asin parahayag na taga duman na suportaran man an kampanya. Uminabot nin 382 an nagboluntaryo, na maigot na naghulit sa mga teritoryo na bihirang mapaabotan kan maogmang bareta.

An mga tugang sa kaharaning mga kongregasyon patienot na pinaduman tanganing maghanap nin mga dadagosan. Nag-arkila sinda nin mga apartment asin nagpareserba sa baratong mga hotel. An mga tugang na ini mahigos na nagtabang sa mga boluntaryong nag-arabot tanganing ikahatod an mga ini sa mga dadagosan dangan maasikaso an mga pangangaipo ninda. Sa tolong siudad na idto, nag-arkila nin mga lugar para sa pagtiripon. Naggibo nin mga areglo tanganing pangenotan kan nagdadalaw na mga tugang an mga pagtiripon kan kongregasyon. Nakakaogmang maheling na sa mga lugar na mayo ni sarong Saksi na nakaistar, 50 parahayag an nagtitiripon tanganing omawon si Jehova.

Pambihira an kaigotan kan mga dayong idto na nagduman para sa kampanya. Kun tig-init, an temperatura sa Bulgaria nag-aabot nin labing 40 grado Centigrado. Minsan siring, mayong makakapugol sa maigot na mga tugang na ini. Sa enot na tolong semana, lubos na napatotoohan an Silistra, sarong siudad sa may Salog nin Danube na labing 50,000 an nag-iistar. Kaya, an mga tugang naghulit pa sa kaharaning mga baryo, na nakaabot pa ngani sa Tutrakan, na 55 kilometros sa solnopan kan Silistra. Sa parate, pinoponan ninda an saindang ministeryo nin alas 9:30 nin aga. Pagkatapos nin pahingalo sa udto, sa parate nagpapadagos sinda sagkod alas 7 nin banggi o mas banggi pa. Huli sa pambihirang kaigotan kan mga boluntaryo, an kampanya sa Kazanlak  asin Sandanski nakaabot man sa kaharaning mga baryo asin siudad.

Ano an Nahaman?

Pambihirang patotoo an ikinatao durante kan pitong semanang idto. Arog kan nasabi kan panahon kan mga apostol, an mga nag-iistar sa mga siudad na ini makakapagsabi, ‘Nalakopan nindo an samong siudad kan saindong katokdoan.’ (Gibo 5:28) An nakikabtang na mga Saksi nakapasakamot nin mga 50,000 na magasin asin nakapoon nin 482 na pag-adal sa Biblia. Nakakaogma, kan Setyembre 1, 2009, sarong kongregasyon an naestablisar sa Silistra, asin may mga grupo na sa Kazanlak asin Sandanski. Nakakaogma man na maheling an marahay na pag-oswag sa espirituwal kan mga indibiduwal na sa kampanyang ini enot na nadangog an maogmang bareta.

Sa enot na semana kan kampanya, sarong babaeng espesyal payunir na taga España na nagtataram nin Bulgario an naghulit sa sarong babae sa Silistra, si Karina, na nagtitinda nin diaryo sa tinampo. Si Karina nagpaheling nin interes asin nag-atender sa pagtiripon. Nag-ako tolos sia nin pag-adal sa Biblia. Ateista an saiyang agom, kaya nakiolay sia na sa parke sinda mag-adal nin Biblia. Kaiba sa pag-adal sa Biblia an duwa niang aking babae. An matua, si Daniela, nagpaheling nin pambihirang pagpahalaga sa katotoohan sa Biblia. Binasa nia sa laog nin sarong semana an librong Itinotokdo kan Biblia asin iinaplikar nia tolos an sinasabi kan Biblia na dai maggamit nin mga imahen sa pagsamba. Dangan pinonan niang sabihon sa saiyang mga katood an katotoohan. Tolong semana sana pagkatapos kan enot niang pag-atender sa pagtiripon kan kongregasyon, sinabi nia sa tugang na nagkokondukta kan pag-adal: “Pagmate ko Saksi na man ako. Ano an dapat kong gibohon tanganing makapaghulit na man ako?” Si Daniela padagos na nag-ooswag, kaiba kan saiyang ina asin nguhod na tugang.

Sa Kazanlak, sarong tugang na lalaking Bulgario, si Orlin, na hale sa Italia asin nagduman para sa kampanya, an naglalakaw pabalik sa dinadagosan nia pagkatapos na maglingkod sa langtad. Mantang papuli sia, nagpatotoo si Orlin sa duwang hoben na lalaking nakatukaw sa parke. Winalatan nia sinda nin librong Itinotokdo kan Biblia asin iinareglo nia na dalawon sinda liwat sa suminunod na aldaw. Sa pagdalaw na iyan, pinonan ni Orlin na adalan sa Biblia si Svetomir, na ipinagpadagos kan suminunod mismong aldaw. Sa laog nin siyam na aldaw, walong beses na inadalan ni Orlin sa Biblia si Svetomir. Si Svetomir nagsabi: “Duwang aldaw bago taka nakaolay, namibi ako sa Dios na tabangan nia ako na mamidbid sia. Asin nanuga ako na kun tatabangan nia ako, idudusay ko an sakong buhay sa saiya.” Kan magpuli na si Orlin sa Italia, padagos na inadalan sa Biblia si Svetomir kan mga tugang duman, asin isinasapuso kaini an katotoohan.

 Abundang Bendisyon Para sa mga Nagsasakripisyo

Ano an namamatean kan mga ginamit nin bulaos an saindang bakasyon asin, sa sadiring gastos, nagduman sa ibang nasyon tanganing maghulit kan maogmang bareta? An sarong magurang sa kongregasyon sa España nagsurat: “Huli sa kampanya, nagin mas dayupot an mga tugang sa España na Bulgario an lenguahe. Dakula an nagin epekto kan kampanya sa mga tugang na nakikabtang dian.” An sarong mag-agom na taga Italia nagsurat: “Ini an nagin pinakamaogmang bulan sa samong buhay!” Sinabi pa ninda: “Binago kan kampanya an samong buhay! Ibang tawo na kami ngonyan.” Seryoso nang pinag-iisipan kan mag-agom na ini kun puede sindang bumalyo nin permanente sa Bulgaria tanganing maglingkod sa lugar na mas dakula an pangangaipo. Si Carina, sarong daragang regular payunir na taga España, nagsuportar sa kampanya sa Silistra. Pagkatapos kaiyan, sia naghale sa saiyang trabaho sa España asin nagbalyo sa Bulgaria tanganing suportaran an bagong kongregasyon sa siudad na iyan. May tipon siang kuarta na igo tanganing makapag-istar nin sarong taon sa Bulgaria. Manongod sa saiyang desisyon, sinabi ni Carina: “Ogmahon ako na tinotogotan ako ni Jehova na maglingkod digdi sa Bulgaria, asin logod makapaghaloy ako digdi. Lima na an inaadalan ko sa Biblia, asin nag-aatender na sa mga pagtiripon an tolo sa sainda.”

Gusto nin sarong tugang na Italiana na mag-iba sa kampanya, alagad, huling bagohan sa trabaho, mayo pa sia nin bakasyon. Huling dai nadesganar, naghagad sia nin sarong bulan na bakasyon na mayong sueldo, asin andam siang maghale sa trabaho kun dai iyan itogot. Nagngalas sia kan sabihon kan saiyang among: “Sige, basta sa sarong kondisyon: Padarahan mo ako nin postkard hale sa Bulgaria.” Segurado an tugang na ini na sinimbag ni Jehova an pamibi nia.

Si Stanislava, sarong hoben na tugang na babae sa siudad nin Varna sa Bulgaria, nagtatrabaho nin bilog na panahon asin halangkaw an sueldo. Nagbakasyon sia sa saiyang trabaho tanganing makikabtang sa kampanya sa Silistra. Napahibi sia kan maheling nia an kaogmahan kan dakol na payunir na hale sa harayoon na lugar asin nagduman tanganing ihulit an maogmang bareta sa saiyang nasyon. Nag-isip-isip sia dapit sa ginigibo nia sa saiyang buhay, an pagmamaigot nia para sa sekular na trabaho. Kan magpuli sia pagkatapos nin duwang semana, naghale sia sa saiyang trabaho asin nagregular payunir. Ngonyan maogma nanggad sia, na ginigirumdom an Kaglalang nia sa saiyang pagkahoben.—Ecl. 12:1.

Sarong bendisyon nanggad na magin aktibo sa paglilingkod ki Jehova. Mayo na nin maorog pa sa paggamit kan saindong panahon asin kosog sa mahalagang gibohon na pagtotokdo asin paghuhulit kan maogmang bareta. Igwa daw kamong magigibo personalmente tanganing orog na makikabtang sa nagliligtas-buhay na ministeryong ini? Tibaad igwa sa nasyon nindo nin mga lugar na mas dakula an pangangaipo. Puede daw kamong bumalyo sa saro sa mga lugar na iyan? O puede nindong pag-isipan an pag-adal nin ibang lenguahe tanganing tabangan an mga tawo sa nasyon nindo na napapaha sa katotoohan sa Biblia. Ano man na mga pagliliwat an magigibo nindo tanganing orog na makikabtang sa ministeryo, makakasierto kamo na abunda kamong bebendisyonan ni Jehova.—Tal. 10:22.

[Kahon/Ritrato sa pahina 32]

Sarong Dai Malilingawan na Aldaw

Dakol sa mga hale sa ibang mga nasyon sa Europa, na nagduman sa Bulgaria tanganing suportaran an espesyal na kampanya sa nasyon na iyan, an nagplanong mag-atender sa “Magdanay Kamong Mapagbantay!” na Pandistritong Kombension sa Sofia. Nakakaparigon na marhay sa mga tugang duman na mamidbid an dakolon na bisita hale sa manlaenlaen na nasyon. An 2,039 nag-atender ogmahon nanggad kan iluwas ni Tugang na Geoffrey Jackson kan Namamahalang Grupo an kompletong New World Translation of the Holy Scriptures sa lenguaheng Bulgario! An gabos na nag-atender kan aldaw nin Biernes nagpahayag kan saindang odok sa pusong pagpahalaga paagi sa entusiastiko asin halawig na pag-upak. Napaluha pa ngani sa kagayagayahan an dakol. An tamang traduksion na ini na madaling saboton makakatabang sa sinserong mga Bulgario na mamidbid si Jehova.

[Mapa sa pahina 30, 31]

(Para sa aktuwal na format, hilingon an pablikasyon)

BULGARIA

SOFIA

Sandanski

Silistra

Kazanlak

[Mga Ritrato sa pahina 31]

Pambihirang patotoo an ikinatao durante kan pitong semanang idto