Mga Pagrason​—Ano an Pagmansay Dian ni Jehova?

“AN BABAE na itinao mo tanganing makaibanan ko, sia an nagtao sa sako nin bunga gikan sa kahoy kaya kuminakan ako,” an sabi kan lalaki. “An halas—dinaya ako kaiyan kaya kuminakan ako,” an simbag kan babae. Sa mga tataramon na iyan, na sinabi sa Dios kan satong enot na mga magurang, si Adan asin Eva, nagpoon an halawig na kasaysayan nin pagrason kan katawohan.—Gen. 3:12, 13.

Kan hokoman ni Jehova si Adan asin Eva huli sa saindang tuyong pagsuway, nagin malinaw na dai nia inako an saindang pagrason. (Gen. 3:16-19) Kun siring, makakapagkongklusyon daw kita na dai inaako ni Jehova an gabos na pagrason? O may mga pagrason daw na minamansay niang balido? Kun igwa, paano niato maaaraman an pagkakalaen kan balido asin kan bako? Tanganing masimbag iyan, aramon nguna niato an kahulogan kan pagrason.

An pagrason nangangahulogan nin pagpaliwanag kun taano ta nagibo, dai nagibo, o dai gigibohon an sarong bagay. An pagrason puedeng balidong paliwanag kun taano ta dai nagibo an sarong bagay asin tibaad kaiba dian an sinserong paghagad nin dispensa na nagtatao nin basehan tanganing an saro kaherakan o patawadon. Minsan siring, arog ki Adan asin Eva, an pagrason puede man na pananarahotan sana, na puedeng salang rason tanganing itago an tunay na dahelan. Huling parateng arog kaiyan an mga pagrason, pirme iyan na pinagdududahan.

Kun nagrarason—nangorogna kun iyan may koneksion sa satong paglilingkod sa Dios—dapat kitang mag-ingat na dai ‘pagdayaon an satong sadiri paagi sa putik na pangangatanosan.’ (Sant. 1:22) Kun siring, helingon niato an nagkapirang halimbawa asin prinsipyo sa Biblia na makakatabang sa sato na “padagos na seguradohon kun ano an inaako kan Kagurangnan.”—Efe. 5:10.

An Inaasahan nin Dios na Gigibohon Niato

Mababasa niato sa Tataramon nin Dios an espesipikong mga pagboot na kaipuhan tang kuyogon bilang banwaan ni Jehova. Halimbawa, an sugo ni Cristo na ‘paduman asin gumibo nin mga disipulo sa mga tawo kan gabos na nasyon’ sarong pagboot na aplikado sagkod ngonyan sa gabos na tunay na parasunod ni Cristo. (Mat. 28:19, 20) Sa katunayan, mahalagang marhay na otobon an pagboot na iyan kaya sinabi ni apostol Pablo: “Herak man sa sako kun dai ako magpahayag kan maogmang bareta!”—1 Cor. 9:16.

Minsan siring, an nagkapira na haloy nang nakikipag-adal sa sato sa Biblia nag-aalangan pa man giraray na maghulit kan maogmang bareta kan Kahadean nin Dios. (Mat. 24:14) An iba na dati nang naghuhulit nagpondo na. Ano an irinarason kun beses kan mga dai naghuhulit? Ano an nagin reaksion ni Jehova sa mga nag-alangan na kuyogon an saiyang espesipikong mga pagboot kan nakaagi?

Mga Pagrason na Dai Inaako nin Dios

“Masakiton iyan.” Lalo na sa mga masusupgon, garo baga masakiton nanggad na maghulit. Pero, helingon kun ano an manonodan niato sa halimbawa ni Jonas. Tinawan sia nin asignasyon na para sa saiya masakit nanggad—sinabihan sia ni Jehova na ipahayag an nagdadangadang na kalaglagan kan Ninive. Masasabotan niato kun taano ta para ki Jonas masakit na gibohon iyan. An Ninive iyo an kabisera kan Asiria, asin an mga Asirio midbid na grabe karingis. Tibaad inisip-isip ni Jonas: ‘Ano daw an mangyayari sa sako kun mapaatubang ako sa  mga taga duman? Ano daw an gigibohon ninda sa sako?’ Dai naghaloy, duminulag sia. Pero, dai inako ni Jehova an rason ni Jonas. Kundi, sinugo giraray sia ni Jehova na maghulit sa mga taga Ninive. Sa pagkakataon na ini, makosog an boot na inotob ni Jonas an asignasyon sa saiya, asin binendisyonan ni Jehova an resulta kaiyan.—Jon. 1:1-3; 3:3, 4, 10.

Kun sa paghona mo masakiton para sa saimo na maghulit kan maogmang bareta, girumdomon na “an gabos na bagay posible sa Dios.” (Mar. 10:27) Makakasierto ka na papakosogon ka ni Jehova kun padagos mong hinahagad an saiyang tabang asin na bebendisyonan ka nia kun pinagmamaigotan mong magin makosog an boot sa pag-otob kan saimong ministeryo.—Luc. 11:9-13.

“Habo ko.” Ano an puede mong gibohon kun bako gayong odok sa puso mo an pag-otob sa saimong Kristianong ministeryo? Girumdomon na si Jehova puedeng makapahiro sa saimo asin makaimpluwensia sa mga pagmawot mo. Si Pablo nagsabi: “An Dios, huli sa pinagmarahay nia, iyo an nagpapahiro sa saindo tanganing kamo magmawot sagkod humiro.” (Fil. 2:13) Huli kaini, puede mong hagadon ki Jehova na logod magmawot ka na gibohon an kabotan nia. Iyan mismo an ginibo ni Hadeng David. Nakimaherak sia ki Jehova: “Palakawa ako sa saimong katotoohan.” (Sal. 25:4, 5) Magigibo mo man iyan paagi sa odok na pamimibi na logod pahiroon ka ni Jehova na magmawot na gibohon an ikinakaogma nia.

Totoo, kun kita pagal o pinangluluyahan nin boot, kun minsan tibaad kaipuhan niatong piriton an satong sadiri na mag-atender sa pagtiripon sa Kingdom Hall o makikabtang sa ministeryo. Kun nangyayari iyan sa sato, masasabi na daw niato na talagang dai niato namomotan si Jehova? Dai nanggad. Kaipuhan man kan maimbod na mga lingkod nin Dios kan nakaagi na magmaigot na marhay tanganing magibo an kabotan nin Dios. Halimbawa, sinabi ni Pablo na garo baga ‘linalanog nia an saiyang hawak’ tanganing makuyog nia an mga pagboot nin Dios. (1 Cor. 9:26, 27) Kaya dawa kun kaipuhan niatong piriton an satong sadiri tanganing magibo an ministeryo, makakasierto kita na bebendisyonan kita ni Jehova. Taano? Huli ta pinipirit niato an satong sadiri na gibohon an kabotan nin Dios na may tamang motibo—an pagkamoot ki Jehova. Sa paggibo kaiyan, nasisimbag niato an akusasyon ni Satanas sa mga lingkod nin Dios na Sia papaindahan ninda kun sinda baloon.—Job 2:4.

“Sibot-sibot ako.” Kun dai ka nakikikabtang sa ministeryo huli ta sa heling mo sibot-sibot ka, mahalagang marhay na pag-isipan giraray kun ano an mga prioridad mo. “Kun siring, padagos na hanapon nguna an kahadean,” an sabi ni Jesus. (Mat. 6:33) Tanganing masunod an naggigiyang prinsipyong iyan, tibaad kaipuhan mong pasimplehon an saimong estilo nin pamumuhay o bawasan an panahon sa pag-aling-aling asin gamiton iyan sa ministeryo. Siempre, kaipuhan man an pag-aling-aling asin iba pang personal na gibohon, alagad bako iyan balidong rason na pabayaan an ministeryo. An intereses kan Kahadean iyo an pangenot sa buhay nin sarong lingkod nin Dios.

“Kulang an kakayahan ko.” Tibaad sa heling mo bako kang kualipikado na magin  ministro kan maogmang bareta. Namatean nin nagkapirang maimbod na lingkod ni Jehova kan mga panahon kan Biblia na kulang an kakayahan ninda na gibohon an iinasignar sa sainda ni Jehova. Halimbawa baga si Moises. Kan si Jehova may espesipikong isugo sa saiya, si Moises nagsabi: “Dispensara ako, Jehova, alagad bako akong matibay magtaram, poon man kasuodma ni poon pa bago kaiyan ni poon pa kan makipag-olay ka sa saimong lingkod, huli ta maluya an sakong ngoso asin maluya an sakong dila.” Minsan ngani pinarigon sia ni Jehova, si Moises nagsimbag: “Dispensara ako, Jehova, alagad magsugo ka na sana tabi nin iba na gusto mong sugoon.” (Ex. 4:10-13) Ano an nagin reaksion ni Jehova?

Si Moises dai pinalibre ni Jehova sa paggibo kan asignasyon. Minsan siring, si Aaron ninombrahan ni Jehova tanganing tabangan si Moises sa paggibo kaiyan. (Ex. 4:14-17) Dugang pa, kan suminunod na mga taon, si Moises sinuportaran ni Jehova asin tinawan nin ano man na kaipuhan nia tanganing maotob an mga asignasyon sa saiya nin Dios. Ngonyan, makakasarig ka na papahiroon ni Jehova an eksperyensiadong mga kapagtubod na tabangan ka man sa pag-otob kan saimong ministeryo. Orog sa gabos, sinisierto sa sato kan Tataramon nin Dios na gigibohon kita ni Jehova na magin kualipikado sa gibohon na ipinagboot nia sa sato.—2 Cor. 3:5; helingon an kahon na  “An Pinakamaogmang mga Taon sa Buhay Ko.”

“May nakakolog sa boot ko.” An nagkapira nagpondo sa pakikikabtang sa ministeryo o pag-atender sa mga pagtiripon kan kongregasyon huling nakolgan an boot ninda, na nag-iisip na seguradong aakoon ni Jehova an sarahotan na ini sa pagigin inaktibo ninda. Minsan ngani natural  sanang maanggot kita kun may nakakolog sa boot niato, iyan daw talagang balidong rason na pumondo sa Kristianong mga aktibidad? Seguradong nakolgan an boot ni Pablo asin kan kapagtubod na si Bernabe kan sinda dai magkaoyon na nagresulta sa “grabeng pagputok nin kaanggotan.” (Gibo 15:39) Alagad nagpondo daw sa ministeryo an siisay man sa sainda huli kaiyan? Dai nanggad!

Kaagid kaiyan, kun nakolgan an boot mo nin sarong kapagtubod, girumdomon na an kaiwal mo bako an saimong Kristianong tugang na bakong sangkap kundi si Satanas, na gusto kang sibaon. Pero, an Diablo dai magigin mapanggana kun ika ‘maninindogan tumang sa saiya, na marigon sa pagtubod.’ (1 Ped. 5:8, 9; Gal. 5:15) Kun ika igwa nin siring na pagtubod, dai ka nanggad “madedesganar.”—Roma 9:33.

Limitado an Kaya Niatong Gibohon

Basado sa mga halimbawang ini nin pagrason, malinaw na mayo nin balido asin sono sa Kasuratan na mga rason tanganing dai magibo an espesipikong mga pagboot ni Jehova, kaiba na an sugo na ihulit an maogmang bareta. Minsan siring, tibaad igwa kita nin balidong mga rason kaya limitado an nagigibo niato sa ministeryo. An ibang mga paninimbagan na sono sa Kasuratan tibaad makaina sa panahon na ginagamit niato sa paghuhulit. Kun minsan man, tibaad talagang pagalon na kita o grabe an helang, kaya dai niato nagigibo an gusto tang magibo sa paglilingkod ki Jehova. Minsan siring, sinisierto sa sato kan Tataramon nin Dios na aram ni Jehova an satong odok sa pusong pagmawot asin kinokonsiderar an satong mga limitasyon.—Sal. 103:14; 2 Cor. 8:12.

Kun siring, kaipuhan tang mag-ingat na dai basta paghusgaran an satong sadiri o an iba sa bagay na ini. Si apostol Pablo nagsurat: “Siisay ka tanganing maghokom sa oripon nin iba? Sa saiyang sadiring kagurangnan sia nagtitindog o napupukan.” (Roma 14:4) Imbes na ikomparar sa iba an satong situwasyon, maninigo niatong girumdomon na “an lambang saro sa sato maninimbag sa Dios para sa saiyang sadiri.” (Roma 14:12; Gal. 6:4, 5) Kun kita minadolok ki Jehova sa pamibi asin sinasabi sa saiya an mga rason niato, an lambang saro sa sato nagmamawot na gibohon iyan na may “sadiosan na konsensia.”—Heb. 13:18.

Kun Taano ta Nakakapagayagaya sa Sato an Paglilingkod ki Jehova

Kita gabos makakapaglingkod ki Jehova na may odok sa pusong kagayagayahan huli ta an saiyang mga kahagadan pirmeng rasonable asin kayang aboton, ano man an satong kamugtakan sa buhay. Taano ta masasabi niato iyan?

An Tataramon nin Dios nagsasabi: “Dai ipanguri an marahay sa mga nangangaipo kaiyan, kun kaya mo man sanang gibohon iyan.” (Tal. 3:27) Ano an narisa nindo sa talinhagang ini dapit sa mga kahagadan nin Dios? Dai kamo pinagbobotan ni Jehova na magmaigot na pantayan an makakaya kan saindong tugang kundi paglingkodan Sia segun sa kun ano an ‘kaya mong gibohon.’ Iyo, an lambang saro sa sato—gurano man kita kaluya o kakosog—puedeng odok sa pusong maglingkod ki Jehova.—Luc. 10:27; Col. 3:23.

[Kahon/Ritrato sa pahina 14]

 “An Pinakamaogmang mga Taon sa Buhay Ko”

Dawa kun igwa kita nin seryosong mga limitasyon sa pisikal o emosyon, dai kita maninigong magkongklusyon tolos na makakaolang ini sa lubos na pakikikabtang sa ministeryo. Bilang halimbawa, isip-isipa an nangyari ki Ernest na Kristianong tugang sa Canada.

Si Ernest may depekto sa pagtaram asin masusupgon. Kan sia magkaigwa nin grabeng diperensia sa likod, kaipuhan niang magpondo bilang trabahador sa konstruksion. Minsan ngani baldado na, mas dakol na panahon an nagagamit nia sa ministeryo huli sa pagbabago kan kamugtakan nia. Napahiro sia kan mga pagdagka sa mga pagtiripon kan kongregasyon dapit sa pag-auxiliary payunir. Minsan siring, sa pagmate nia bako siang kualipikado sa arog kaiyan na klase nin ministeryo.

Tanganing patunayan sa saiyang sadiri na dai nia kayang mag-auxiliary payunir, nag-aplay sia bilang auxiliary payunir nin sarong bulan. Napangalas nanggad sia kan mapanggana niang nagibo an asignasyon. Dangan sinabi nia sa saiyang sadiri, ‘Aram kong dai ko na noarin man magigibo giraray iyan.’ Tanganing patunayan iyan, nag-aplay sia sa ikaduwang bulan—asin sa giraray, nagibo nia iyan.

Si Ernest nag-auxiliary payunir nin sarong taon, alagad an sabi nia, “Nasisierto ko na dai ako noarin man magigin regular payunir.” Sa giraray, tanganing patunayan iyan, nag-aplay sia bilang regular payunir. Napangalas sia kan matapos nia an saiyang enot na taon nin pagregular payunir. Sia nagdesisyon na magpadagos asin magayagayang nakapagregular payunir nin duwang taon, sagkod kan sia magadan huli sa mga komplikasyon kan saiyang diperensia sa likod. Minsan siring, bago sia magadan, parate niang sinasabi na may pagluha sa mga nagbibisita sa saiya, “An mga taon na idto nin paglilingkod ki Jehova bilang payunir an pinakamaogmang mga taon sa buhay ko.”

[Ritrato sa pahina 13]

Kaya niatong mapangganahan an ano man na puedeng makaolang sa sato sa ministeryo

[Ritrato sa pahina 15]

Naoogma si Jehova kun kita bilog na pusong naglilingkod sa saiya paagi sa paggibo kan gabos na itinotogot kan satong kamugtakan