Nangengenot daw Kamo sa Pagtaong Onra sa mga Kapagtubod?
Nangengenot daw Kamo sa Pagtaong Onra sa mga Kapagtubod?
“Sa pagkamoot na sa magturugang magkaigwa kamo nin mamomoton na kapadangatan sa lambang saro. Sa pagtaong onra sa lambang saro mangenot kamo.”—ROMA 12:10.
1, 2. (a) Ano an ikinonseho ni Pablo sa saiyang surat sa mga taga Roma? (b) Anong mga hapot an pag-oolayan niato?
SA SURAT ni apostol Pablo sa mga taga Roma, idinoon nia na mahalaga para sa sato bilang mga Kristiano na magpaheling nin pagkamoot sa laog kan kongregasyon. Ipinagirumdom nia sa sato na an pagkamoot niato maninigong ‘dai nin pagsaginsagin.’ Sinambit man nia an “pagkamoot na sa magturugang” asin nagsabi na an siring na pagkamoot maninigong ipaheling na may “mamomoton na kapadangatan.”—Roma 12:9, 10a.
2 Siempre, an pagkaigwa nin pagkamoot na sa magturugang bako sanang pakamate nin kapadangatan sa iba. An siring na kapadangatan kaipuhan na ipaheling paagi sa gibo. Total, mayo nin makakaaram kan satong pagkamoot asin kapadangatan kun dai niato iyan ipapaheling. Huli kaini, idinagdag ni Pablo an konseho na: “Sa pagtaong onra sa lambang saro mangenot kamo.” (Roma 12:10b) Ano an kalabot sa pagtaong onra? Taano ta mahalagang mangenot sa pagtaong onra sa mga kapagtubod? Paano niato iyan magigibo?
Paggalang Asin Onra
3. Ano an kahulogan kan terminong “onra” sa orihinal na mga lenguahe kan Biblia?
3 An pangenot na termino sa Hebreo para sa “onra” literal na nangangahulogan na “pagigin magabat.” An saro na tinatawan nin onra ibinibilang na matimbang o mahalaga. An terminong iyan sa Hebreo parate man na tinatradusir sa Kasuratan na “kamurawayan,” na nagpaparisa pa nin halangkaw na pagpahalaga sa saro na tinatawan nin onra. (Gen. 45:13) An termino sa Griego na trinadusir sa Biblia na “onra” nangangahulogan nin halangkaw na pagheling, pagpahalaga, asin pagigin mahalagang marhay. (Luc. 14:10) Iyo, mahalagang marhay sa sato an mga tinatawan niato nin onra.
4, 5. Ano an koneksion kan pagtaong onra asin paggalang? Iilustrar.
4 Ano an kalabot sa pagtaong onra sa iba? Nagpopoon iyan sa paggalang. Sa katunayan, an terminong “onra” asin “paggalang” parateng ginagamit na magkaibanan huling iyan magkakonektar na marhay. An pagtaong onra nangangahulogan nin pagpaheling nin paggalang. Sa ibang pagtaram, an paggalang sa pangenot nanonongod sa kun paano niato minamansay an satong tugang, mantang an pagtaong onra nanonongod sa kun paano niato tinatratar an satong tugang.
5 Paano an sarong Kristiano makakatao nin tunay na onra sa mga kapagtubod kun sia mayo nin odok sa pusong paggalang sa sainda? (3 Juan 9, 10) Kun paanong an sarong tinanom matalubo asin magdadanay sana kun iyan nakagamot sa marahay na daga, an pagtao man nin onra magigin tunay asin nagdadanay sana kun iyan nakagamot sa odok sa pusong paggalang. Huling an pagtaong onra na bakong sinsero dai minagikan sa tunay na paggalang, iyan mawawara pag-abot nin panahon. Kun siring, bakong makangangalas na bago kan konseho ni Pablo dapit sa pagtaong onra, ini an malinaw niang sinabi: “Dai magkaigwa nin pagsaginsagin an saindong pagkamoot.”—Roma 12:9; basahon an 1 Pedro 1:22.
Tawan nin Onra an mga Linalang “na Kabaing nin Dios”
6, 7. Taano ta kaipuhan tang igalang an iba?
6 Mantang an odok sa pusong paggalang kahagadan sa pagtaong onra, nungka tang lingawan an sono sa Kasuratan na mga dahelan kun taano ta iginagalang niato an gabos na tugang. Kun siring, pag-olayan niato an duwa sa mga dahelan.
7 Bakong arog nin ibang linalang sa daga, an mga tawo linalang “na kabaing nin Dios.” (Sant. 3:9) Huli kaini, kita igwa kan diosnon na mga kualidad na pagkamoot, kadonongan, asin hustisya. Mangnohon kun ano pa an itinao sa sato kan satong Kaglalang. An salmista nagsabi: ‘O Jehova, ika na an dignidad isinasaysay sa itaas nin kalangitan! Ginibo mo man an tawo na hababa nin kadikit sa mga agid sa Dios, asin kinoronahan mo sia nin kamurawayan asin kagayonan.’ (Sal. 8:1, 4, 5; 104:1) * An mga tawo sa pangkagabsan kinokoronahan nin Dios o sinasamnohan nin dignidad, kamurawayan, asin onra. Huli kaini, kun tinatawan niato nin dignidad an iba, garo man sana minimidbid niato an Gikanan kan dignidad nin tawo, si Jehova. Ngonyan, kun kita may balidong mga dahelan na igalang an mga tawo sa pangkagabsan, mas lalo nang dapat tang igalang an mga kapagtubod!—Juan 3:16; Gal. 6:10.
Mga Miembro nin Sarong Pamilya
8, 9. Anong dahelan an sinambit ni Pablo kun taano ta iginagalang niato an mga kapagtubod?
8 Sinambit ni Pablo an saro pang dahelan kun taano ta iginagalang niato an lambang saro. Bago nia itao an konseho dapit sa pagtaong onra, sia nagsabi: “Sa pagkamoot na sa magturugang magkaigwa kamo nin mamomoton na kapadangatan sa lambang saro.” An ekspresyon sa Griego na trinadusir na “mamomoton na kapadangatan” nanonongod sa makosog na bogkos na nakakapasararo sa pamilyang may pagkamoot asin pagsuportar sa lambang saro. Huli kaini, paagi sa paggamit kan ekspresyon na iyan, idinoon ni Pablo na an mga miembro kan kongregasyon maninigong magkaigwa nin makosog asin mamomoton na relasyon sa lambang saro siring sa sarong dayupot na pamilya. (Roma 12:5) Apuera dian, girumdomon na isinurat iyan ni Pablo sa linahidan na mga Kristiano, na gabos inampon bilang mga aki kan iyo man sanang Ama, si Jehova. Kaya sa mahalagang marhay na kahulogan kaiyan, sinda talagang dayupot na pamilya. Huli kaini, an linahidan na mga Kristiano kan panahon ni Pablo tunay na may mapuersang dahelan na igalang an lambang saro. Totoo man iyan sa mga linahidan ngonyan.
9 Kumusta man an kabilang sa “ibang mga karnero”? (Juan 10:16) Minsan ngani dai pa sinda inaampon bilang mga aki nin Dios, angay sindang mag-inapodan nin tugang huling sinda pambilog na kinaban na Kristianong pamilya na nagkakasararo. (1 Ped. 2:17; 5:9) Huli kaini, kun lubos na nasasabotan kan kabilang sa ibang mga karnero an paggamit ninda kan terminong “tugang,” kun siring, sinda may mapuersa man na dahelan na odok sa pusong igalang an mga kapagtubod.—Basahon an 1 Pedro 3:8.
Taano ta Mahalagang Marhay?
10, 11. Taano ta mahalagang marhay an paggalang asin pagtaong onra?
10 Taano ta mahalagang marhay an paggalang asin pagtaong onra? Huli sa dahelan na ini: Paagi sa pagtaong onra sa satong mga tugang, nakakatabang nanggad kita sa ikakarahay asin pagkasararo kan bilog na kongregasyon.
11 Siempre, aram niato na an pagigin harani ki Jehova asin pag-ako kan tabang kan saiyang espiritu iyo an pinakamapuersang mga ginigikanan kan satong kosog bilang tunay na mga Kristiano. (Sal. 36:7; Juan 14:26) Kadungan kaiyan, kun kita pinapahalagahan nin mga kapagtubod, kita napaparigon. (Tal. 25:11) Naoogma kita huli sa sinserong kapahayagan nin pagpahalaga asin paggalang sa sato. Mas napapakosog kita kaiyan na padagos na maglakaw sa dalan pasiring sa buhay na may kagayagayahan asin determinasyon. Mayong duda na kamo mismo nakamate na kaiyan.
12. Paano an lambang saro sa sato makakatabang sa pagkaigwa nin kapadangatan asin pagkamoot sa laog kan kongregasyon?
12 Ngonyan, mantang aram ni Jehova an satong natural nang pangangaipo na igalang, sinasadol nia kita paagi sa saiyang Tataramon na “mangenot sa pagtaong galang sa gabos.” (Roma 12:10, An Marahay na Bareta Biblia; basahon an Mateo 7:12.) An gabos na Kristiano na isinasapuso an nagdadanay na hatol na iyan nakakatabang sa pagkaigwa nin kapadangatan asin pagkamoot sa laog kan Kristianong kasararoan nin magturugang. Huli kaini, marahay na pumondo nguna asin hapoton an satong sadiri, ‘Kasuarin ako huring nagpahayag, paagi sa mga tataramon asin gibo, kan sakong odok sa pusong paggalang sa sarong tugang sa kongregasyon?’—Roma 13:8.
Espesipikong Asignasyon Para sa Gabos
13. (a) Siisay an maninigong mangenot sa pagtaong onra? (b) Ano an ipinaparisa kan mga tataramon ni Pablo sa Roma 1:7?
13 Siisay an maninigong mangenot sa pagtaong onra? Sa surat ni Pablo sa mga Hebreo, ilinadawan nia an Kristianong kamagurangan bilang “mga nangengenot sa saindo.” (Heb. 13:17) Totoo, kamagurangan an nangengenot sa dakol na aktibidad. Bilang mga pastor kan aripompon, kaipuhan nanggad nindang mangenot sa pagtaong onra sa mga kapagtubod—pati na sa mga kapwa magurang sa kongregasyon. Halimbawa, kun an kamagurangan nagmimiting dapit sa espirituwal na mga pangangaipo kan kongregasyon, sinda nagtataong onra sa lambang saro paagi sa paghinanyog nin maingat sa mga komento kan siisay man sa kapwa magurang. Apuera dian, kun sinda nagdedesisyon, sinda nagtataong onra paagi sa pagturotimbang sa mga punto de vista asin sinabi kan gabos na magurang. (Gibo 15:6-15) Pero, maninigo tang girumdomon na an surat ni Pablo sa mga taga Roma bako sanang para sa kamagurangan kundi para sa bilog na kongregasyon. (Roma 1:7) Kaya, aplikado man sa sato gabos ngonyan an konseho na mangenot sa pagtaong onra.
14. (a) Iilustrar an pagkakalaen kan pagtaong onra asin pangengenot sa pagtaong onra. (b) Ano an puede tang ihapot sa satong sadiri?
14 Mangnohon man an aspektong ini kan hatol ni Pablo. Sinadol nia an saiyang mga kapagtubod sa Roma na dai sana magtaong onra kundi mangenot sa pagtaong onra. Taano ta magkalaen iyan? Isip-isipa an halimbawang ini. Dadagkahon daw nin paratokdo na mag-adal bumasa an sarong grupo nin mga estudyante na nakakabasa na? Dai. Tatao na sinda. Imbes, gugustohon kan paratokdo na tabangan an mga estudyanteng iyan na magin mas matibay bumasa. Kaagid kaiyan, igwa na kita kan tandang nagpapamidbid sa tunay na mga Kristiano— an pagkaminorootmootan, na nagpapahiro sa sato na magtaong onra. (Juan 13:35) Minsan siring, kun paanong mapapaoswag pa kan mga estudyanteng tatao nang bumasa an saindang kakayahan na iyan, kita man maoswag pa paagi sa pangengenot sa pagtaong onra. (1 Tes. 4:9, 10) An espesipikong asignasyon na iyan itinatao sa lambang saro sa sato. Puede tang hapoton an satong sadiri, ‘Ginigibo ko daw iyan—an pag-enot na magtaong onra sa mga nasa kongregasyon?’
Tawan nin Onra an “mga Hamak”
15, 16. (a) Sa pagtaong onra, sairisay sa kongregasyon an dai niato maninigong paglingawan, asin taano? (b) Paano niato maaaraman na odok sa puso niatong iginagalang an gabos na tugang?
15 Kun nagtataong onra, sairisay sa kongregasyon an dai niato maninigong paglingawan? Sabi kan Tataramon nin Dios: “An nagpapaheling nin pabor sa hamak nagpapautang ki Jehova, asin an saiyang pagtratar babayadan Nia sa saiya.” (Tal. 19:17) Ano an maninigong magin epekto sa sato kan prinsipyo sa mga tataramon na iyan mantang kita naghihingoang mangenot sa pagtaong onra?
16 Maoyon kamo na kadaklan sa mga tawo nakakapagtaong onra sa mga nakakalangkaw sa sainda, alagad an mga tawo man sanang iyan tibaad daing gayo o dai ngani nagtataong galang sa mga ibinibilang nindang mas hababa sa sainda. Alagad, bakong arog kaiyan si Jehova. Sia nagsabi: “An mga nagtataong onra sa sako tatawan ko nin onra.” (1 Sam. 2:30; Sal. 113:5-7) Tinatawan ni Jehova nin onra an gabos na naglilingkod asin nagtataong onra sa saiya. Dai nia binabaliwala an “mga hamak.” (Basahon an Isaias 57:15; 2 Cron. 16:9) Siempre, gusto tang arogon si Jehova. Huli kaini, kun gusto tang siyasaton kun gurano kita karahay sa pagtao nin tunay na onra, marahay na hapoton niato an satong sadiri, ‘Paano ko tinatratar an mga mayo nin pangenot o responsableng katongdan sa kongregasyon?’ (Juan 13:14,15) Dakol an ihinahayag kan simbag sa hapot na iyan manongod sa rarom kan satong odok sa pusong paggalang sa iba.—Basahon an Filipos 2:3, 4.
Pagtaong Onra Paagi sa Pagtao kan Satong Panahon
17. Ano an sarong mahalagang paagi na kita puedeng mangenot sa pagtaong onra, asin taano man?
17 Ano an sarong mahalagang paagi na kita puedeng mangenot sa pagtaong onra sa gabos na nasa kongregasyon? Paagi sa pagtao sa iba kan satong panahon. Taano man? Bilang mga Kristiano, kita sibot asin dakol na panahon an nagagamit sa paggibo kan satong kadakol na mahalagang aktibidad sa kongregasyon. Kun siring, bakong makangangalas na mahalagang marhay sa sato an panahon. Nasasabotan man niato na dai niato maninigong obligaron an satong mga tugang na tawan kita nin kadakol na panahon. Siring man, inaapresyar niato kun nasasabotan nin iba sa kongregasyon na dai ninda kita maninigong obligaron na tawan sinda nin panahon.
18. Arog kan maheheling sa retrato sa pahina 18, paano niato ikakapaheling na andam kitang magtao nin panahon sa mga kapagtubod?
18 Minsan siring, aram man niato (nangorogna kan mga naglilingkod bilang pastor sa kongregasyon) na an pagigin andam tang pumondo nguna sa mga aktibidad niato tanganing tawan nin panahon an mga kapagtubod nagpapaheling na sinda iginagalang niato. Sa anong paagi? Paagi sa pagpondo nguna sa mga aktibidad niato, garo man sana sinasabi niato sa sainda, ‘Mahalaga kang marhay sa sako kaya mas importanteng tawan taka nin panahon imbes na ipadagos an ginigibo ko.’ (Mar. 6:30-34) Totoo man an kabaliktaran kaiyan. Kun kita nag-aalangan na pumondo nguna sa satong mga aktibidad tanganing tawan nin panahon an tugang niato, tibaad mamatean nia na sia bako gayong mahalaga sa sato. Siempre, nasasabotan niato na may mga panahon na dai puedeng pondohon an sarong importanteng bagay. Pero, an satong pagigin andam—o pag-alangan—na magtao nin panahon sa iba dakol nanggad an ihinahayag manongod sa kun gurano kaodok sa puso an paggalang niato sa satong mga tugang.—1 Cor. 10:24.
Magin Determinadong Mangenot
19. Apuera sa satong pagtao nin panahon, sa ano pang paagi kita makakataong onra sa mga kapagtubod?
19 May iba pang mahahalagang paagi na kita makakataong onra sa mga kapagtubod. Halimbawa, kun sinda tinatawan niato nin panahon, maninigo man na sinda tawan niato nin atension. Sa giraray, si Jehova nagtatao nin halimbawa. An salmistang si David nagsabi: “An mga mata ni Jehova nakaturuhok sa mga matanos, asin an saiyang mga talinga nagdadangog sa saindang pag-agrangay para sa tabang.” (Sal. 34:15) Nagmamaigot kitang arogon si Jehova paagi sa pagheling asin pagdangog—pagtao kan satong bilog na atension—sa satong mga tugang, nangorogna an mga nagdodolok sa sato para sa tabang. Sa paggibo kaiyan, sinda tinatawan niato nin onra.
20. Anong mga pagirumdom manongod sa pagtaong onra an gusto tang isaisip?
20 Arog kan napag-olayan niato, gusto tang isaisip nin malinaw kun taano ta maninigo na odok sa puso niatong igalang an mga kapagtubod. Apuera kaiyan, kita naghahanap nin mga oportunidad na iyo an enot na magtaong onra sa gabos, pati na sa mga hamak. Paagi sa paggibo kan mga lakdang na ini, mapapakosog niato an bogkos nin sa magturugang na pagkamoot asin pagkasararo sa kongregasyon. Kun siring, magpadagos kita gabos na dai sana magtaong onra kundi nangorognang mangenot sa pagtaong onra sa lambang saro. Kamo daw determinado nanggad na gibohon iyan?
[Nota sa Ibaba]
^ par. 7 An mga tataramon ni David sa ika-8 Salmo may makahula man na kahulogan, na nagtotokdo sa sangkap na tawong si Jesu-Cristo.—Heb. 2:6-9.
Nagigirumdoman daw Nindo?
• Ano an koneksion kan pagtaong onra asin paggalang?
• Ano an mga dahelan kun taano ta tinatawan niato nin onra an mga kapagtubod?
• Taano ta mahalaga na magtaong onra sa lambang saro?
• Sa anong mga paagi kita makakataong onra sa mga kapagtubod?
[Mga Hapot Para sa Pag-adal]
[Ritrato sa pahina 18]
Paano kita makakataong onra sa mga kapagtubod?