Naghihinanyog si Jehova sa Agrangay kan Pinangluluyahan nin Boot

AROG kan naobserbaran kan madonong na si Hadeng Salomon kan suanoy na Israel, “an panahon asin pagkanorongod nangyayari sa [sato] gabos.” (Ecl. 9:11) An sarong trahedya o grabeng kasakitan puedeng makapurisaw na gayo sa sato. Halimbawa, an biglang pagkagadan nin sarong haraning kapamilya puedeng makapaluyang gayo sa boot. Sa pag-agi nin mga semana asin bulan, puedeng maggrabe an kamondoan asin kawaran nin paglaom. An saro puedeng maribaraw na gayo kaya an pagmate nia dai na sia angay na magdolok ki Jehova sa pamibi.

Sa siring na situwasyon, an saro nangangaipo nin pagparigon, konsiderasyon, asin pagkamoot. Nakakapakosog nanggad an awit kan salmistang si David: “Inaalalayan ni Jehova an gabos na natutumba, asin ibinabangon an gabos na napapalaob.” (Sal. 145:14) Sinasabi sa sato kan Biblia na ‘an mga mata ni Jehova naglilibot sa bilog na daga tanganing ipaheling an saiyang kosog para sa mga bilog an puso para sa saiya.’ (2 Cron. 16:9) Sia “kaiba kan saro na biyong nangluluya asin may kababaan an boot, tanganing buhayon an espiritu kan mga hamak asin tanganing buhayon an puso kan mga biyong nangluluya.” (Isa. 57:15) Paano sinusuportaran asin rinaranga ni Jehova an biyong nangluluya an boot?

“An Tataramon na Nasa Tamang Panahon”

An saro sa mga paagi na itinatao ni Jehova an tabang sa tamang panahon iyo an Kristianong kasararoan nin magturugang. An mga Kristiano sinasadol na “magtaram na may pagranga sa mga kalag na nagmomondo nin makuri.” (1 Tes. 5:14) An mga kapahayagan nin pagmakolog asin pagkamoot hale sa mapagmalasakit na mga kapagtubod puedeng makapakosog sa saro sa panahon nin kasakitan asin kamondoan. An nakakarangang mga tataramon dawa sa halipot na pag-oolay makakatabang na marhay sa pagpakosog sa pinangluluyahan nin boot. An siring na pinag-isipan na mga tataramon puedeng maggikan sa saro na nakaeksperyensia man nin grabeng kapurisawan asin kamondoan. O iyan puedeng may pakarorop na mga tataramon hale sa sarong amigo o amiga na dakol nang eksperyensia sa buhay. Sa praktikal na marhay na mga paaging ini, mapapakosog ni Jehova an pinangluluyahan nin boot.

Isip-isipa an nangyari ki Alex, sarong magurang sa kongregasyon na bago pa sanang kasalon asin biglang nagadan an agom huli sa helang na dai nabobolong. Sarong maduminamay na nagbibiaheng paraataman an nagpakosog ki Alex paagi sa nakakarangang mga tataramon. Nagadan man an agom nia pero sia nag-agom na giraray. Ipinaliwanag kan nagbibiaheng paraataman kun paano sia mismo nasakitan na gayo huli sa pangluluya nin boot. Marahay an pagmate nia kun sia kaibanan nin mga tugang sa ministeryo asin sa  mga pagtiripon kan kongregasyon. Minsan siring, paglaog nia sa kuarto asin pagkasera kan pinto, grabe an kapungawan nia. “Nakakarangang maaraman na an namamatean ko natural sana asin namatean na man nin iba,” an sabi ni Alex. Tunay nanggad, “an tataramon na nasa tamang panahon” puedeng magin nakakarangang suporta sa panahon nin kamondoan.—Tal. 15:23.

An saro pang magurang sa kongregasyon, na may nagkapirang kamidbid na nagadan man an agom, napahiro na magsabi ki Alex nin nakakaparigon sa boot na mga tataramon. Huling nasasabotan nia an pagmate kan tugang, sia mamomoton na nagsabing aram ni Jehova an namamatean asin an kaipuhan niato. “Kun pag-abot nin panahon mamatean mo na kaipuhan mo nin kaibaiba,” an sabi kan tugang, “an mamomoton na probisyon ni Jehova iyo an pag-agom giraray.” Siempre, bakong gabos na nagadan an agom, asin sa huri gustong mag-agom giraray, nakakapag-agom liwat. Alagad sa pag-isip-isip kan sinabi kan tugang, si Alex nagsabi, “Huli sa pagpagirumdom sa saimo na ini probisyon ni Jehova, nawawara an ano man na negatibong kaisipan na ika magigin bakong maimbod sa agom mo asin sa areglo ni Jehova na pag-agoman kun ika mag-agom giraray pag-abot nin panahon.”—1 Cor. 7:8, 9, 39.

An salmistang si David, na personalmenteng nakaeksperyensia nin dakol na pagbalo asin kasakitan, nagsabi: “An mga mata ni Jehova nakaturuhok sa mga matanos, asin an saiyang mga talinga nagdadangog sa saindang agrangay para sa tabang.” (Sal. 34:15) Sierto nanggad na masisimbag ni Jehova sa tamang panahon an agrangay kan pinangluluyahan nin boot paagi sa may pakarorop asin pakabatid na mga tataramon nin mapagmalasakit asin maygurang na mga kapwa Kristiano. An siring na probisyon parehong mahalagang marhay asin praktikal.

Tabang Paagi sa Kristianong mga Pagtiripon

An pinangluluyahan nin boot madaling magkaigwa nin negatibong kaisipan na puedeng magin dahelan na isuway an sadiri. Minsan siring, an Talinhaga 18:1 nagpapatanid: “An isinusuway an sadiri mahanap kan saiya mismong maimot na kamawotan; sasarongaton nia an gabos na praktikal na kadonongan.” Inadmitir ni Alex: “Kun magadan an agom mo, napapano an isip mo nin negatibong mga bagay.” Nagigirumdoman  nia na hinapot nia an saiyang sadiri: “‘Ano daw kutana an dapat kong ginibo? Ano daw kutana kun nagin mas makonsiderasyon asin mas mapagsabot ako?’ Habo kong magsolo. Gusto ko talagang may agom. Depisilon mahale an arog kaining kaisipan huling aroaldaw aram ko na ako nagsosolo.”

Orog kisa kasuarin man, an biyong nangluluya an boot nangangaipo nin nakakarahay na pakikiasosyar. Ini madaling makukua sa mga pagtiripon kan kongregasyon. Sa siring na kamugtakan, binubukasan niato an satong isip sa positibo asin nakakapakosog na kaisipan nin Dios.

An Kristianong mga pagtiripon nakakatabang sa sato na magkaigwa nin tamang pagmansay sa situwasyon niato. Mantang hinihinanyog asin hinohorophorop niato an mga teksto sa Biblia, ikinokonsentrar niato an satong isip sa talagang mahahalagang isyu—an pagbindikar sa soberaniya ni Jehova asin an pagpakangbanal sa ngaran nia—bako sanang sa personal na kasakitan niato. Dugang pa, durante kan siring na espirituwal na pagtotokdo, napapakosog kita sa pakaaram na dawa kun an iba dai nakakaaram kan kasakitan na inaatubang niato o dai nakakasabot kan namamatean niato, si Jehova siertong iyo. Aram nia na “huli sa kakologan kan puso nagsasakit an espiritu.” (Tal. 15:13) Gusto kitang tabangan kan tunay na Dios, asin ini an nagmomotibar asin nagpapakosog sa sato na magpadagos.—Sal. 27:14.

Kan grabe an pagsakit ni Hadeng David huli sa saiyang mga kaiwal, sia nag-agrangay sa Dios: “An sakong espiritu nangluluya sa laog ko; sa tahaw ko an sakong puso namamagol.” (Sal. 143:4) Huli sa mga problema, parateng nauubos an pisikal asin emosyonal na kosog nin saro, na nakakapabagol pa ngani sa puso. Kita tibaad magsakit nin grabe huli sa helang o haloy nang pisikal na kamatean. Makakasarig kita na tatabangan kita ni Jehova na makatagal. (Sal. 41:1-3) Minsan ngani dai milagrosong pinapaomayan nin Dios an siisay man ngonyan, an nagsasakit talagang tinatawan nia nin kadonongan asin kosog na kaipuhan tanganing makayanan an kamugtakan nia. Tandaan na kan si David nagagabatan huli sa mga pagbalo, sia nagdolok ki Jehova. “Ginigirumdom ko an mga aldaw kaidtong suanoy,” an inawit nia. “Hinohorophorop ko an gabos mong aktibidad; gikan sa boot na dayaday kong inatoman an gibo kan saimong mga kamot.”—Sal. 143:5.

Huling nasa Biblia an ipinasabong na mga tataramon na ini, ipinapaheling kaini na nasasabotan ni Jehova an namamatean niato. An siring na mga tataramon garantiya na hinihinanyog nia an pakimaherak niato. Kun inaako niato an tabang ni Jehova, ‘sia mismo an matabang sa sato.’—Sal. 55:22.

“Mamibi nin Daing Pondo”

An Santiago 4:8 nagsasabi: “Rumani kamo sa Dios, asin sia marani sa saindo.” An sarong paagi na kita makakarani sa Dios iyo an pamimibi. Sinadol kita ni apostol Pablo na “mamibi nin daing pondo.” (1 Tes. 5:17) Dawa kun nadedepisilan kitang sabihon nin eksakto an namamatean niato, “an espiritu mismo an nakikimaherak para sa sato na may mga agrangay na dai masayod.” (Roma 8:26, 27) Siertong nasasabotan ni Jehova an namamatean niato.

Si Monika, na siring kadayupot ki Jehova, nagsabi: “Paagi sa pamimibi, pagbasa sa Biblia, asin personal na pag-adal, namamatean ko na si Jehova an nagigin pinakaharaning Katood ko. Sia tunay na marhay sa sako kaya namamatean ko na pirme nia akong tinatabangan. Nakakarangang maaraman na dawa kun dai ko ikinakapaliwanag an namamatean ko, nasasabotan nia ako. Aram ko na mayong katapusan an saiyang kabootan asin mga bendisyon.”

Kun siring, akoon nanggad niato an mamomoton asin nakakarangang mga tataramon kan mga kapwa Kristiano, iaplikar an maboot na hatol asin nakakapakosog sa pagtubod na mga pagirumdom na nadadangog sa Kristianong mga pagtiripon, asin biyo niatong sabihon ki Jehova sa pamibi an nasa puso niato. An napapanahon na mga probisyon na ini paagi ni Jehova tanganing ipaheling na sia nagmamakolog sa sato. Basado sa personal na eksperyensia, si Alex nagsabi, “Kun inaaprobetsaran niato an gabos na probisyon ni Jehova Dios tanganing kita magdanay na makosog sa espirituwal, magkakaigwa kita nin ‘puersa na labi sa ordinaryo’ tanganing matagalan an ano man na pagbalong tibaad mapaatubang sa sato.”—2 Cor. 4:7.

[Kahon/Ritrato sa pahina 18]

Karangahan Para sa Pinangluluyahan nin Boot

An mga salmo dakol nin kapahayagan dapit sa emosyon nin tawo kaiba na an paorootrong pagsierto na si Jehova talagang naghihinanyog sa agrangay nin saro na nasasakitan na gayo huli sa pangluluya nin boot. Helinga an minasunod na mga teksto:

“Sa sakuyang kasakitan padagos akong nag-aarang ki Jehova, asin sa sakong Dios padagos akong nag-aagrangay para sa tabang. Hale sa saiyang templo nadangog nia an sakuyang tingog, asin an sakong inagrangay sa atubangan nia para sa tabang nakaabot na sa saiyang talinga.”—Sal. 18:6.

“Si Jehova harani sa mga nalugadan an puso; asin an mga biyong nangluluya an boot iliniligtas nia.”—Sal. 34:18.

“Pinapaomayan [ni Jehova] an mga nalugadan an puso, asin binobogkosan an makolog na mga kabtang ninda.” —Sal. 147:3.

[Ritrato sa pahina 17]

“An tataramon na nasa tamang panahon” nakakaranga sa panahon nin kamondoan!