KUN may naggibo nin kabootan sa saimo, paano ka nagpapaheling nin pagpasalamat? Helinga kun paano ipinaheling kan mga hepe sa militar kan Israel an pagpasalamat ninda pagkatapos na makiguerra sa mga Midianita. Nangyari an ralaban pagkatapos na magkasala an Israel may koneksion sa Baal nin Peor. Pinapanggana nin Dios an banwaan nia, asin an mga nasamsam binanga para sa duwang grupo—sa 12,000 na soldados asin sa gabos na iba pa sa Israel. Kaoyon kan instruksion ni Jehova, tinawan kan mga soldados an mga saserdote nin sarong kabtang kan saindang kahirasan, asin tinawan man kan iba pang Israelita an mga Levita nin sarong kabtang kan saindang kahirasan.—Bil. 31:1-5, 25-30.

Minsan siring, orog pa dian an gustong gibohon kan mga hepe sa militar. “Binilang kan mga lingkod mo an gabos na lalaking parapakilaban na nasa pamamahala niamo asin mayo ni saro sa samo an ibinaretang nawawara,” an sabi ninda ki Moises. Nagdesisyon sindang magtao nin bulawan asin manlaenlaen na samno bilang dolot ki  Jehova. Labing 190 kilos an timbang kan gabos na samnong bulawan.—Bilang 31:49-54.

Ngonyan, dakol man an napapahiro na ipaheling an saindang pagpasalamat huli sa ginigibo sa sainda ni Jehova. Dugang pa, bako sanang nagdusay na mga lingkod nin Dios an igwa kan siring na pakamate nin pagpasalamat. Halimbawa, isip-isipa an sarong drayber nin bus na ipinagmaneho an sarong grupo nin mga delegado pasiring asin hale sa istadyum para sa internasyonal na kombension na ginibo sa Bologna, Italia, kan 2009. Huling sia maingaton na drayber asin kalmado, an nagsarakay sa bus nia nagdesisyon na tawan sia nin kard bilang pasasalamat asin nin tip kaiba an librong Ano Man Nanggad an Itinotokdo kan Biblia? Huli kaiyan, an drayber nagsabi: “Maogma kong inaako an kard asin an libro, alagad ibinabalik ko an kuarta huling gusto kong ikontribwir iyan tanganing makapagpadagos kamo sa saindong gibohon. Dawa ngani bako akong Saksi ni Jehova, gusto kong itao an kontribusyon na ini huli ta naheling ko na an mga ginigibo nindo motibado nin pagkamoot.”

Kun ika napapahiro nin pagpasalamat sa mga ginigibo ni Jehova para sa saimo, an sarong paagi na ikakapaheling mo iyan iyo an pagtao nin kontribusyon sa pambilog na kinaban na gibohon kan Mga Saksi ni Jehova. (Mat. 24:14) Nakalista sa kahon an mga paagi nin pagtao na pinipili nin nagkapira.