Magkamit nin mga Bendisyon Paagi sa Hadeng May Paggiya kan Espiritu nin Dios!
Magkamit nin mga Bendisyon Paagi sa Hadeng May Paggiya kan Espiritu nin Dios!
“Mamumugtak sa saiya an espiritu ni Jehova.”—ISA. 11:2.
1. Anong mga kahaditan an ipinahayag nin nagkapira manongod sa mga problema kan kinaban?
“SA KINABAN na grabe an problema sa politika, sosyedad asin kapalibotan, makakayanan pa daw nin katawohan an masunod na 100 na taon?” Iyan an ihinapot kan astropisikong si Stephen Hawking kan 2006. An sarong artikulo sa magasin na New Statesman nagsabi: “Dai niato nahale an kadukhaan ni nahimong magkaigwa nin pambilog na kinaban na katoninongan. Imbes, minalataw na eksaktong kabaliktaran kaiyan an nagibo niato. Pero, bako man sa dai kita nagmaigot. Prinobaran na niatong gibohon an gabos poon sa komunismo sagkod sa kapitalismo; poon sa Liga de Naciones sagkod sa pagtipon nin mga armas nuklear tanganing malikayan an guerra. Kita nakipaglaban sa kadakol na ‘guerra tanganing taposon an guerra’ sa paniniwalang aram niato kun paano tataposon an guerra.”
2. Paano madali nang ipaheling ni Jehova an saiyang lehitimong soberaniya sa bilog na daga?
2 Dai ipinagngangalas kan mga lingkod ni Jehova an mga ipinahayag na iyan. Sinasabi sa sato kan Biblia na an mga tawo dai linalang tanganing pamahalaan an sadiri. (Jer. 10:23) Si Jehova sana an satong lehitimong Soberano. Bilang siring, sia an may deretsong magtao nin mga pamantayan sa sato, magsabi kun ano an maninigong magin katuyohan kan satong buhay, asin maggiya sa sato na maabot iyan. Dugang pa, sia madali nang humiro basado sa saiyang autoridad tanganing taposon an bakong mapangganang pagprobar nin katawohan na pamahalaan an sadiri. Kadungan kaiyan, lalaglagon nia an gabos na habo sa saiyang lehitimong soberaniya, na gustong magdanay an katawohan na oripon nin kasalan, pagkabakong sangkap, asin kan “dios kan sistemang ini nin mga bagay,” si Satanas na Diablo.—2 Cor. 4:4.
3. Ano an ihinula ni Isaias manongod sa Mesiyas?
3 Sa bagong kinaban na Paraiso, an mamomoton na soberaniya ni Jehova ikakapaheling sa katawohan paagi sa Mesiyanikong Kahadean. (Dan. 7:13, 14) Mapadapit sa Hade kaiyan, si Isaias naghula: “May maluwas na sadit na sanga hale sa pungo ni Jese; asin hale sa saiyang mga gamot magigin mabunga an sarong supang. Asin magdadanay sa saiya an espiritu ni Jehova, an espiritu nin kadonongan asin nin pakasabot, an espiritu nin paghatol asin nin pagkamakakamhan, an espiritu nin kaaraman asin nin takot ki Jehova.” (Isa. 11:1, 2) Sa anong espesipikong mga paagi pinagin kualipikado kan banal na espiritu nin Dios an “sadit na sanga hale sa pungo ni Jese”—si Jesu-Cristo—na mamahala sa katawohan? Ano an mga magigin bendisyon kan pamamahala nia? Asin ano an dapat tang gibohon tanganing makamtan iyan?
Pinagin Kualipikado nin Dios na Mamahala
4-6. Anong mahalagang marhay na kaaraman an makakatabang ki Jesus na magin madonong asin mapagmalasakit na Hade, Halangkaw na Saserdote, asin Hokom?
4 Gusto ni Jehova na an mga tawong sakop nia magin sangkap paagi sa paggiya nin saro na tunay na madonong asin mapagmalasakit na Hade, Halangkaw na Saserdote, asin Hokom. Iyan an dahelan kaya si Jesu-Cristo an pinili nin Dios, na paagi sa banal na espiritu pinagin kualipikado Nia para sa pinakamahalagang mga paninimbagan na iyan. Isip-isipa an nagkapira sa mga dahelan kun taano ta sangkap na maootob ni Jesus an mga katongdan na inasignar sa saiya nin Dios.
5 Si Jesus an pinakalubos na nakakamidbid sa Dios. An Ama mas haloy nang midbid kan bugtong na Aki kisa sa siisay man, na posibleng marhay na dakol na bilyon nang taon. Durante kan panahon na iyan, si Jesus nagkaigwa nin siring kalubos na kaaraman dapit ki Jehova, kaya puedeng sabihon na sia an mismong “ladawan kan Dios na dai naheheling.” (Col. 1:15) Si Jesus mismo nagsabi: “Sia na nakaheling sa sako nakaheling man sa Ama.”—Juan 14:9.
6 Ikaduwa ki Jehova, si Jesus an may pinakadakol na kaaraman dapit sa gabos na linalang, kaiba na an katawohan. An Colosas 1:16, 17 nagsasabi: “Paagi sa saiya [sa Aki nin Dios] an gabos na iba pang bagay linalang sa kalangitan asin sa daga, an mga bagay na naheheling asin an mga bagay na dai naheheling . . . Siring man, enot sia sa gabos na iba pang bagay asin paagi sa saiya ginibo an gabos na iba pang bagay.” Isip-isipa nanggad iyan! Si Jesus, bilang “ekspertong trabahador” nin Dios, nakikabtang sa gabos na iba pang aspekto nin paglalang. Huli kaini, nasasabotan nia an gabos na detalye kan bilog na uniberso, poon sa sadit na mga parte nin atomo sagkod sa makangangalas na hotok nin tawo. Iyo, talagang si Cristo an personipikadong kadonongan!—Tal. 8:12, 22, 30, 31.
7, 8. Paano si Jesus tinabangan kan espiritu nin Dios sa saiyang ministeryo?
7 Si Jesus linahidan nin banal na espiritu nin Dios. “An espiritu ni Jehova yaon sa sako,” an sabi ni Jesus, “huli ta linahidan nia ako na magpahayag kan maogmang bareta sa mga dukha, isinugo nia ako na maghulit nin pagkabutas sa mga bihag asin nin pakabalik nin pagheling kan mga buta, na magbutas sa mga inaapi, na maghulit kan taon nin pag-ako ni Jehova.” (Luc. 4:18, 19) Kan si Jesus bautismohan, minalataw na ipinagirumdom sa saiya kan banal na espiritu an mga bagay na nanodan nia bago sia nagin tawo, kaiba na an gustong ipahaman sa saiya nin Dios durante kan ministeryo nia sa daga bilang Mesiyas.—Basahon an Isaias 42:1; Lucas 3:21, 22; Juan 12:50.
8 Huling si Jesus tinawan nin kapangyarihan kan banal na espiritu asin sangkap an hawak saka isip, sia bako sanang an pinakadakulang tawo na nabuhay kasuarin man sa daga kundi an pinakadakulang Paratokdo man. Sa katunayan, an mga naghinanyog sa saiya “nagngalas nin labi-labi sa saiyang paagi nin pagtotokdo.” (Mat. 7:28) Enot, ikinapaheling nia an pinakadahelan kan problema nin katawohan—an kasalan, pagkabakong sangkap, asin pagkadaing aram sa espirituwal. Kaya man niang aramon an talagang nasa puso nin mga tawo asin trinatar sinda oyon dian.—Mat. 9:4; Juan 1:47.
9. Paano an paghorophorop dapit sa eksperyensia ni Jesus sa daga nakapakosog sa kompiansa nindo sa saiya bilang Tagapamahala?
9 Si Jesus namuhay bilang tawo. An saiya mismong eksperyensia bilang tawo asin an dayupot na pakikiasosyar sa bakong sangkap na mga tawo nakatabang na marhay na magin kualipikado si Jesus bilang Hade. Si apostol Pablo nagsurat: “Kinaipuhan [si Jesus na] magin kabaing kan saiyang ‘mga tugang’ sa gabos na bagay, tanganing sia magin maheherakon asin maimbod na halangkaw na saserdote sa mga bagay na manongod sa Dios, tanganing makapagdolot nin pampagian nin boot na atang para sa mga kasalan kan mga tawo. Huling sia mismo nagtios kan sia binabalo, matatabangan nia an mga binabalo.” (Heb. 2:17, 18) Huling si Jesus ‘binalo,’ makakapakidamay sia sa mga nag-aagi nin pagbalo. An pagmalasakit ni Jesus malinaw na naheling durante kan ministeryo nia sa daga. An mga may helang, baldado, inaapi—pati an mga aki—dai nag-alangan na magdolok sa saiya. (Mar. 5:22-24, 38-42; 10:14-16) An mga mahoyo asin nagugutom sa espirituwal nadagka man na rumani sa saiya. Sa ibong na lado, an mga mapalangkaw, arogante, asin an mga ‘mayo kan pagkamoot sa Dios’ nagsikwal, naongis, asin nagkontra sa saiya.—Juan 5:40-42; 11:47-53.
10. Sa anong dakulang paagi pinatunayan ni Jesus an pagkamoot nia para sa sato?
10 Itinao ni Jesus an saiyang buhay para sa sato. Tibaad an pinakadakulang patunay na mayo nang maorog pa ki Jesus bilang Tagapamahala iyo an pagigin andam nia na magadan para sa sato. (Basahon an Salmo 40:6-10.) “Mayo nin siisay man na may pagkamoot na orog pa kaini,” an sabi ni Cristo, “na itao nin saro an saiyang kalag para sa saiyang mga katood.” (Juan 15:13) Iyo, bakong arog kan bakong sangkap na mga tawong namamahala, na sa parate namumuhay nin maluho paagi sa materyal na mga bagay na gikan sa mga sakop ninda, itinao ni Jesus para sa katawohan an mismong buhay nia.—Mat. 20:28.
Tinawan nin Kapangyarihan na Itao an mga Pakinabang kan Pantubos
11. Taano ta lubos kitang makakasarig ki Jesus bilang satong Paratubos?
11 Bilang Halangkaw na Saserdote, angay nanggad na si Jesus an mangenot sa pagtao sa sato kan mga pakinabang kan atang na pantubos! Sa katunayan, durante kan ministeryo nia sa daga, tinawan kita ni Jesus nin patienot na ideya kan gigibohon nia bilang satong Paratubos durante kan saiyang Sangribong Taon na Paghade, na puede tang maeksperyensiahan kun kita maimbod. Pinaomayan nia an mga may helang asin baldado, binuhay an mga gadan, pinakakan an kadakol na tawo, asin kinontrol pa ngani an kamugtakan nin panahon. (Mat. 8:26; 14:14-21; Luc. 7:14, 15) Dugang pa, ginibo nia ini, bakong tanganing magpasikat kan saiyang autoridad asin kapangyarihan, kundi tanganing ipaheling an pagmalasakit asin pagkamoot nia. “Boot ko,” an sinabi nia sa may lepra na nakiolay na paomayan. (Mar. 1:40, 41) Ipapaheling ni Jesus an siring na pagmalasakit durante kan saiyang Milenyal na Paghade—alagad sa bilog na kinaban.
12. Paano maootob an Isaias 11:9?
12 Ipapadagos man ni Cristo asin kan kairiba niang mamamahala an espirituwal na edukasyon na pinonan ni Jesus mga 2,000 na taon na an nakaagi. Sa siring, maootob an sinabi sa Isaias 11:9: “An daga mapapano nanggad kan kaaraman dapit ki Jehova kun paanong an tubig nakakatahob sa mismong dagat.” Mayong duda na kaiba sa pagtotokdo na iyan nin Dios an instruksion kun paano aatamanon an daga asin an kadakol na linalang dian, arog kan ipinagibo kaidto ki Adan. Sa katapusan kan 1,000 taon, maootob na an orihinal na katuyohan nin Dios na nasa Genesis 1:28, asin lubos nang ikakatao an mga pakinabang kan atang na pantubos.
Tinawan nin Kapangyarihan na Maghokom
13. Paano ipinaheling ni Jesus an pagkamoot sa katanosan?
13 Si Cristo “an Saro na itinalaga nin Dios na magin hokom kan mga buhay asin gadan.” (Gibo 10:42) Kun siring, nakakaranga nanggad maaraman na si Jesus mayo nin karatan, na an katanosan saka kaimbodan siring sa higot na hagkos sa saiyang habayan! (Isa. 11:5) Ipinaheling nia na naoongis sia sa kahanaban, pagsaginsagin, asin iba pang karatan, saka kinondenar nia an mga mayong simpatiya sa pagsakit nin iba. (Mat. 23:1-8, 25-28; Mar. 3:5) Dugang pa, ipinaheling ni Jesus na dai sia nadadaya nin pangluwas na itsura, “huli ta aram nia mismo kun ano an nasa tawo.”—Juan 2:25.
14. Sa anong paagi ipinapaheling ngonyan ni Jesus an pagkamoot sa katanosan asin hustisya, asin ano an maninigo tang ihapot sa satong sadiri?
14 Padagos na ipinapaheling ni Jesus an pagkamoot sa katanosan asin hustisya paagi sa pagdirehir nia sa pinakamahiwas na paghuhulit asin pagtotokdo kasuarin man sa kinaban. Mayo nin tawo, gobyerno nin tawo, asin maraot na espiritu an makakaolang sa pagtapos kan gibohon na ini sagkod na lubos na kontento na an Dios. Huli kaini, may kompiansa nanggad kita na kun tapos na an Armagedon, mangingibabaw na an hustisya nin Dios. (Basahon an Isaias 11:4; Mateo 16:27.) Hapota an sadiri mo: ‘Ipinapaheling ko daw sa sakong ministeryo an saboot ni Jesus sa mga tawo? Itinatao ko daw ki Jehova an pinakamakakaya ko dawa kun tibaad limitado an magigibo ko huli sa sakong salud o kamugtakan?’
15. Ano an dapat niatong tandaan na makakatabang sa sato na itao sa Dios an satong pinakamakakaya?
15 Kun tatandaan niato na an paghuhulit gibohon nin Dios, makakatabang iyan sa sato na bilog na kalag na maglingkod sa saiya. Sia an nagboot kaiyan; dinidirehiran nia iyan paagi sa saiyang Aki; asin paagi sa banal na espiritu, tinatawan nia nin kosog an mga nakikikabtang dian. Pinapahalagahan daw nindo an pribilehio na magin kapwa trabahador nin Dios kaiba kan saiyang Aki na may paggiya nin espiritu? May iba pa daw apuera ki Jehova na makakapahiro sa labing siete milyones katawo—an kadaklan “hababa an inadalan asin ordinaryo”—na sabihon sa mga tawo sa 236 na kadagaan an mensahe kan Kahadean?—Gibo 4:13.
Bendisyonan an Sadiri Mo Paagi ki Cristo!
16. Ano an ipinaparisa kan Genesis 22:18 manongod sa bendisyon nin Dios?
16 Sinabi ni Jehova ki Abraham: “Paagi sa saimong banhi an gabos na nasyon sa daga magbebendisyon nanggad kan saindang sadiri huli sa bagay na ika naghinanyog sa sakong tingog.” (Gen. 22:18) Ipinaparisa kaini na an mga nagpapahalaga sa paglilingkod may kompiansang makakaasa sa mga bendisyon na itatao kan Mesiyanikong Banhi. Asin sinda aktibong naglilingkod ngonyan na nasa isip an mga bendisyon na iyan.
17, 18. Anong panuga ni Jehova an mababasa niato sa Deuteronomio 28:2, asin ano an kahulogan kaiyan para sa sato?
17 An Dios nagsabi kaidto sa literal na banhi ni Abraham, an nasyon nin Israel: “An gabos na bendisyon na ini [na nasa tipan nin Ley] maabot nanggad sa saimo asin aabotan ka, huli ta padagos kang naghihinanyog sa tingog ni Jehova na saimong Dios.” (Deut. 28:2) Totoo man iyan sa mga lingkod nin Dios ngonyan. Kun gusto nindong magkamit nin bendisyon ni Jehova, ‘padagos na maghinanyog’ sa tingog nia. Dangan an mga bendisyon nia ‘maabot nanggad sa saindo asin aabotan kamo.’ Pero, ano an kalabot sa ‘paghinanyog’?
18 Kalabot nanggad sa paghinanyog an pagsapuso kan sinasabi sa Tataramon nin Dios asin kan espirituwal na kakanon na itinatao nia. (Mat. 24:45) Nangangahulogan man iyan nin pagkuyog sa Dios asin sa Aki nia. Si Jesus nagsabi: “Bakong gabos na nagsasabi sa sako, ‘Kagurangnan, Kagurangnan,’ makakalaog sa kahadean kan kalangitan, kundi an naggigibo kan kabotan kan sakong Ama na nasa kalangitan.” (Mat. 7:21) Asin an paghinanyog sa Dios nangangahulogan nin gikan sa boot na pagpasakop sa areglong inestablisar nia, an Kristianong kongregasyon na may nombradong kamagurangan, na “balaog na mga lalaki.”—Efe. 4:8.
19. Paano kita puedeng magkamit nin bendisyon?
19 Kaiba sa ‘balaog na mga lalaking’ iyan an mga miembro kan Namamahalang Grupo, na representante kan bilog na Kristianong kongregasyon. (Gibo 15:2, 6) Sa katunayan, an pagtratar niato sa espirituwal na mga tugang ni Cristo magigin mahalagang basehan sa paghokom sa sato sa maabot na dakulang kahorasaan. (Mat. 25:34-40) Huli kaini, an sarong paagi na kita magkamit nin bendisyon iyo an maimbod na pagsuportar niato sa mga linahidan nin Dios.
20. (a) Ano an pangenot na paninimbagan kan “balaog na mga lalaki”? (b) Paano niato ikakapaheling na pinapahalagahan niato an mga tugang na ini?
20 Kaiba man sa “balaog na mga lalaki” an mga miembro kan mga Komite kan Sangang Opisina, nagbibiaheng paraataman, asin magurang sa kongregasyon—na gabos ninombrahan kan banal na espiritu. (Gibo 20:28) An pangenot na paninimbagan kan mga tugang na ini iyo na pakosogon an banwaan nin Dios “sagkod na [an] gabos makaabot sa pagkasararo sa pagtubod asin sa tamang kaaraman manongod sa Aki nin Dios, sa lubos na pagkatawo, sa pagdakula na kasokol kan kalubosan kan Cristo.” (Efe. 4:13) Totoo, sinda bakong sangkap arog niato. Pero, binebendisyonan niato an satong sadiri kun mapag-apresyar tang hinihimate an mamomoton na pagpastor ninda.—Heb. 13:7, 17.
21. Taano ta mahalagang marhay para sa sato ngonyan na kuyogon an Aki nin Dios?
21 Dai mahahaloy, lalaglagon na ni Cristo an maraot na sistema ni Satanas. Kun mangyari na iyan, an satong buhay madepende sa paghokom ni Jesus, huling sia an inautorisaran nin Dios na maggiya sa ihinulang “dakulang kadaklan” pasiring sa “mga burabod kan tubig nin buhay.” (Kap. 7:9, 16, 17) Huli kaini, gibohon niato ngonyan an satong pinakamakakaya na gikan sa boot asin mapag-apresyar na magpasakop sa Hade na may paggiya kan espiritu ni Jehova.
Ano an Nanodan Nindo sa . . .
• Gibo 10:42?
[Mga Hapot Para sa Pag-adal]
[Ritrato sa pahina 17]
Naheling an pagmalasakit ni Jesus kan buhayon nia liwat an aking babae ni Jairo
[Mga Ritrato sa pahina 18]
Dinidirehiran ni Jesu-Cristo an pinakamahiwas na paghuhulit kasuarin man