Mga Hapot Hale sa mga Parabasa

Sa Genesis 6:3, mababasa niato: “An sakuyang espiritu dai maghihiro para sa tawo sagkod sa panahon na daing talaan huli ta sia laman man. Huli kaiyan an saiyang mga aldaw magigin siento beinteng taon.” Linimitaran daw ni Jehova na sagkod 120 taon sana an buhay nin tawo, asin si Noe daw naghulit nin arog kaiyan kahaloy manongod sa maabot na Baha?

Dai an simbag sa duwang kabtang kan hapot na iyan.

Bago kan Baha, dakol na tawo an nabuhay nin dakol na siglo. Kan mag-abot an baha, si Noe 600 anyos na, asin sia uminabot sa edad na 950. (Gen. 7:6; 9:29) An nagkapira na namundag pagkatapos kan Baha nabuhay man nin mas halawig pa sa 120 taon. Si Arpaksad nagadan sa edad na 438 asin si Selah nagadan sa edad na 433. (Gen. 11:10-15) Pero, kan panahon ni Moises, an normal na lawig kan buhay nin tawo nagin 70 o 80 taon na sana. (Sal. 90:10) Kaya an Genesis 6:3 dai nagsasabi na sagkod 120 taon sana an buhay nin tawo o na iyan an normal na lawig nin buhay ninda.

Kun siring, an teksto daw na iyan pakikipag-olay nin Dios ki Noe manongod sa pagpatanid sa iba dapit sa kalaglagan na maabot pakalihis nin 120 taon? Bako. Sa dakol na beses, an Dios talagang nakipag-olay ki Noe. An ikasampulong bersikulo poon sa tekstong iyan nagsasabi: “An Dios nagsabi ki Noe: ‘Aram ko na katapusan na kan gabos na laman, huli ta an daga pano nin kadahasan.’” Sa nagsurunod na taon, natapos ni Noe an dakulaon na gibohon na pagtogdok kan arka, dangan “si Jehova nagsabi ki Noe: ‘Lumaog ka sa arka, ika asin an bilog mong kasararo sa harong.’”  (Gen. 6:13; 7:1) Asin may iba pang pagkakataon na kinaolay ni Jehova si Noe dapit sa nagkapirang bagay.—Gen. 8:15; 9:1, 8, 17.

Minsan siring, laen an sinasabi sa Genesis 6:3; dai kaiyan sinambit si Noe, ni sinabi man kaiyan na sia kinakaolay nin Dios. Puede iyan saboton na simpleng kapahayagan kan katuyohan o determinasyon nin Dios. (Ikomparar an Genesis 8:21.) Mahalagang mangnohon na sa makasaysayan na rekord nin mga pangyayari haloy pa bago kan panahon ni Adan, mababasa niato an pananaram na arog baga kan: “Sinabi nin Dios.” (Gen. 1:6, 9, 14, 20, 24) Malinaw na si Jehova mayong kaolay na tawo sa daga, huli ta dai pa man linalang an tawo kaidto.

Kun siring, makatanosan sanang magkongklusyon na an sinasabi sa Genesis 6:3 iyo an desisyon nin Dios na taposon an maraot na sistema nin mga bagay sa daga. Si Jehova nagsabi nin hudisyal na desisyon na gigibohon nia pakalihis nin 120 taon, minsan ngani dai pa iyan aram ni Noe. Alagad taano ta dapat magtalaan nin panahon? Taano ta dapat maghalat?

Nagtao si apostol Pedro nin mga dahelan: “An pasensia nin Dios naghahalat kan mga aldaw ni Noe, mantang ginigibo an arka, na dian pira sanang tawo, an boot sabihon, walong kalag, an nakaligtas sa tubig.” (1 Ped. 3:20) Iyo, kan magdesisyon an Dios dapit sa pagtalaan nin 120 taon, may mga bagay na kaipuhan pang mangyari. Pakalihis nin mga 20 taon, si Noe asin an saiyang agom nagkaigwa nin mga aki. (Gen. 5:32; 7:6) An tolo nindang aking lalaki nagdakula asin nag-agom kaya nagin “walong kalag” an pamilya ni Noe. Dangan kaipuhan nindang gibohon an arka, na bakong madali huling dakulaon iyan asin sadit sana an pamilya ni Noe. Iyo, huling nagpasensia an Dios nin 120 taon, nangyari an mga bagay na iyan asin nagin posible na maingatan an buhay, kaya walong maimbod na tawo an “nakaligtas sa tubig.”

Dai espesipikong sinabi sa Biblia an taon na ipinaaram ni Jehova ki Noe na mangyayari an Baha. Posibleng 40 o 50 taon pa bago an Baha, huling namundag, nagdakula, asin nakapag-agom pa an saiyang mga aki. Dangan, sinabi ni Jehova ki Noe: “Aram ko na katapusan na kan gabos na laman.” Sinabi pa nia na kaipuhan ni Noe na gumibo nin dakulaon na arka asin lumaog dian kaiba kan saiyang pamilya. (Gen. 6:13-18) Durante kan natatadang mga dekada, si Noe dai sana nagin halimbawa nin katanosan paagi sa pamumuhay nia. Sia nagin “parahulit nin katanosan” na may malinaw na marhay na mensahe nin pagpatanid na kaipuhan ipahayag—an desisyon nin Dios na laglagon an mga bakong diosnon kan panahon na idto. Dai patienot na naaraman ni Noe nin haloy pa kun anong taon mangyayari iyan, alagad aram nia na segurado iyan. Asin aram mo na talagang nangyari iyan.—2 Ped. 2:5.