Aprobetsaran an Saimong Pagigin Daing Agom
Aprobetsaran an Saimong Pagigin Daing Agom
“An makakatao nin lugar dian magtao nin lugar dian.”—MAT. 19:12.
1, 2. (a) Paano minansay ni Jesus, Pablo, asin nin iba pa an pagigin daing agom? (b) Taano ta tibaad dai ibinibilang nin nagkapira na balaog an pagigin daing agom?
DAING duda na an pag-agoman saro sa pinakamahalagang mga balaog nin Dios sa katawohan. (Tal. 19:14) Pero, dakol na Kristianong daing agom an igwa man nin makahulogan asin nakakakontentong buhay. An 95 anyos na tugang na si Harold, na dai nag-agom, nagsabi: “Minsan ngani ikinakaogma ko an pakikiiba asin pag-istimar sa ibang tawo, nungka akong mamondo kun nagsosolo ako. Sa heling ko masasabi nanggad na igwa ako kan balaog na pagigin daing agom.”
2 Iyo, sinabi ni Jesu-Cristo asin apostol Pablo na an pagigin daing agom balaog hale sa Dios, arog kan pag-agoman. (Basahon an Mateo 19:11, 12; 1 Corinto 7:7.) Pero, totoo na bakong gabos na daing agom nasa siring na kamugtakan huling iyan an pinili ninda. Kun beses, huli sa kamugtakan, depisil maghanap nin angay na magigin agom. O pagkalihis nin dakol na taon nin pagigin may agom, dai linalaoman na nagin solo an nagkapira huli sa diborsio o pagkagadan nin agom. Kun siring, paano puedeng magin balaog an pagigin daing agom? Asin paano maaaprobetsaran kan mga Kristianong daing agom an saindang kamugtakan?
Sarong Pambihirang Balaog
3. Ano an parateng mga bentaha nin mga Kristianong daing agom?
3 Sa parate, an saro na daing agom mas dakol an panahon asin mas libre kisa sa may agom. (1 Cor. 7:32-35) Huli sa pambihirang mga bentahang ini, mapapahiwas nia an saiyang ministeryo asin pagkamoot sa iba, asin magigin mas harani sia ki Jehova. Kaya, inaapresyar nin dakol na Kristiano an mga bentaha nin pagigin daing agom asin nagdesisyon sinda na “magtao nin lugar dian,” dawa sa laog sana nin sarong panahon. An iba tibaad kan enot dai plinanong magdanay na daing agom, alagad kan magbago an kamugtakan ninda, mapagngayongayo nindang hinorophorop iyan asin narealisar ninda na sa tabang ni Jehova puede man sindang makontento sa saindang kamugtakan. Kaya, inako na ninda iyan asin nagtao sinda nin lugar para sa pagigin daing agom.—1 Cor. 7:37, 38.
4. Taano an mga Kristianong daing agom ta puedeng makamate na sinda mayo nin kulang mantang naglilingkod sa Dios?
4 Aram nin mga Kristianong daing agom na dai ninda kaipuhan na mag-agom tanganing midbidon o pahalagahan ni Jehova o kan organisasyon nia. Namomotan kita nin Dios bilang indibiduwal. (Mat. 10:29-31) Mayo nin siisay man o ano man na bagay an makakapasuhay sa sato sa pagkamoot nin Dios. (Roma 8:38, 39) May agom man o mayo, igwa nanggad kita nin dahelan na makamate na kita mayo nin kulang mantang naglilingkod sa Dios.
5. Ano an kaipuhan tanganing magin lubos na kapakipakinabang an pagigin daing agom?
5 Pero, arog nin mga balaog na talento sa musika o isport, an balaog na pagigin daing agom kaipuhan na pataluboon tanganing magin lubos na kapakipakinabang iyan. Kaya, paano inaaprobetsaran kan mga Kristianong daing agom ngonyan an saindang kamugtakan sa buhay—baga man lalaki o babae, hoben o may edad na, daing agom huling iyan pinili ninda o huli sa kamugtakan? Pag-olayan niato an nagkapirang nakakaparigon sa boot na halimbawa hale sa enot na Kristianong kongregasyon asin helingon niato kun ano an satong manonodan.
Pagigin Daing Agom Mantang Hoben Pa
6, 7. (a) Anong pribilehio sa paglilingkod sa Dios an inako kan mga aking daraga ni Felipe? (b) Sa anong mga paagi ginamit ni Timoteo sa marahay na paagi an mga taon nin pagigin daing agom, asin paano sia binendisyonan huli sa pagigin andam niang maglingkod mantang hoben pa?
6 An ebanghelisador na si Felipe may apat na aking daraga na maigot sa pag-ebanghelyo arog kan saindang ama. (Gibo 21:8, 9) An paghula saro sa milagrosong mga balaog kan banal na espiritu, asin ginamit kan mga daragang ini an balaog na iyan bilang kaotoban kan Joel 2:28, 29.
7 An hoben na si Timoteo ginamit sa marahay na paagi an saiyang pagigin daing agom. Poon sa pagkaomboy, itinokdo sa saiya kan saiyang ina na si Eunice asin lola na si Loida “an banal na mga kasuratan.” (2 Tim. 1:5; 3:14, 15) Alagad posibleng marhay na inako ninda an Kristianismo kaidto sanang enot na pagsongko ni Pablo sa Listra, an dagang tinuboan ninda, kan mga 47 C.E. Pakalihis nin duwang taon, sa ikaduwang pagsongko ni Pablo, posibleng mga 20 anyos kaidto si Timoteo. Dawa ngani medyo hoben pa asin bagohan sa katotoohan, “marahay an sinasabi” dapit sa saiya kan Kristianong kamagurangan sa Listra asin sa kaharaning Iconio. (Gibo 16:1, 2) Kaya inimbitaran ni Pablo si Timoteo na magin kaibaiba nia sa pagbiahe. (1 Tim. 1:18; 4:14) Dai niato segurado kun si Timoteo nagdanay na daing agom. Alagad aram nanggad niato na bilang hoben, maogma niang inako an imbitasyon ni Pablo, asin sa laog nin dakol na taon pagkalihis kaiyan, maogma siang naglingkod bilang daing agom na misyonero asin paraataman.—Fil. 2:20-22.
8. Ano an nakatabang ki Juan Marcos na magmaigot sa espirituwal na mga pasohan, asin ano an nagin mga bendisyon nia huli kaiyan?
8 Kan hoben pa, inaprobetsaran man ni Juan Marcos an mga taon nin pagigin daing agom. Sia asin an saiyang ina na si Maria, saka an pinsan niang si Bernabe, enot na mga miembro kan kongregasyon sa Jerusalem. An pamilya ni Marcos posible man na marahay an pagbuhay huling may sadiri sindang harong sa siudad asin may katabang. (Gibo 12:12, 13) Pero, sa ibong kan mga bentahang ini asin dawa hoben pa, si Marcos bakong mapagpanigo sa sadiri o sadiri sana an iniintindi; ni kontento man sia na magpamilya na sana asin mamuhay nin komportable. Posibleng marhay na huli sa pakikiibaiba nia sa mga apostol mantang hoben pa, nagkaigwa sia nin pagmawot na magmisyonero. Kaya, sia maogmang nag-iba ki Pablo asin Bernabe sa saindang enot na pagbiahe sa pagmimisyonero asin nagin katabang ninda. (Gibo 13:5) Paghaloyhaloy, nag-iba sia ki Bernabe, asin paghaloyhaloy pa, mababasa niato na naglilingkod sia kaiba ni Pedro sa Babilonya. (Gibo 15:39; 1 Ped. 5:13) Dai niato aram kun gurano kahaloy na nagdanay na daing agom si Marcos. Alagad nagkaigwa sia nin marahayon na reputasyon bilang saro na andam na maglingkod sa iba asin gumibo pa nin orog sa paglilingkod sa Dios.
9, 10. Anong mga oportunidad an bukas ngonyan sa mga Kristianong hoben na daing agom tanganing mapahiwas an saindang ministeryo? Magtao nin halimbawa.
9 Dakol na hoben sa kongregasyon ngonyan an maogma man na ginagamit an saindang pagigin daing agom tanganing pahiwason an paglilingkod ninda sa Dios. Arog ni Marcos asin Timoteo, nasasabotan ninda na huli sa pagigin daing agom ‘danay sindang nakakapaglingkod sa Kagurangnan na mayo nin disturbo.’ (1 Cor. 7:35) Saro nanggad ining bentaha. Dakolon an oportunidad—pagpapayunir, paglilingkod kun saen mas kaipuhan an mga parahulit kan Kahadean, pag-adal nin ibang lenguahe, pagtabang sa pagtogdok nin Kingdom Hall o sangang opisina, pag-adal sa Paadalan sa Ministeryal na Pagsasanay, asin paglilingkod sa Bethel. Kun ika hoben pa asin mayong agom, inaaprobetsaran mo daw an mga oportunidad na bukas sa saimo?
10 An tugang na si Mark nagpoon na magpayunir bago sia mag-20 anyos, nag-adal sa Paadalan sa Ministeryal na Pagsasanay, asin nadestino sa manlaenlaen na nasyon. Sa paggirumdom kan 25 taon na bilog na panahon na paglilingkod, sinabi nia: “Hiningoa kong makipagtabangan sa gabos na nasa kongregasyon, na nakikikabtang sa ministeryo kaiba ninda, nagsosongko sa sainda bilang pagpastor, nag-iimbitar sa sainda na magkakan sa harong, asin nag-aareglo pa ngani nin nakakapakosog na mga pagtiripontipon. An gabos na ini nagtao sa sako nin dakulang kaogmahan.” Arog kan ipinapaheling kan sinabi ni Mark, an pinakadakulang kaogmahan sa buhay naggigikan sa pagtao, asin an buhay na sibot sa sagradong paglilingkod may dakol na oportunidad na magtao sa iba. (Gibo 20:35) Ano man an saimong mga pinagkakainteresan, mga abilidad, o eksperyensia sa buhay, dakol an magigibo kan mga hoben ngonyan sa gibohon kan Kagurangnan.—1 Cor. 15:58.
11. Ano an nagkapirang bentaha nin dai paghidali sa pag-agom?
11 Minsan ngani an kadaklan na hoben gustong mag-agom pag-abot nin panahon, may marahay na mga dahelan na dai maghidali sa pag-agom. Dinadagka ni Pablo an mga hoben na maghalat kisiera sagkod na lihis na sinda sa “pagbukad nin pagkahoben,” na dian makosogon an seksuwal na mga pagmawot. (1 Cor. 7:36) Kaipuhan nin panahon tanganing masabotan an sadiri mo asin magkaigwa kan eksperyensia sa buhay na kaipuhan sa pagpili nin angay na magigin agom. An sumpaan sa kasal sarong seryosong bagay, na maninigong otobon sagkod na nabubuhay.—Ecl. 5:2-5.
Pagigin Daing Agom Mantang Nagkakaedad Na
12. (a) Paano inatubang kan balong si Ana an nagbagong kamugtakan nia? (b) Nagkaigwa sia nin anong pribilehio?
12 Si Ana, na nasambit sa Ebanghelyo ni Lucas, posibleng marhay na nagmondong gayo kan an saiyang agom magadan na dai linalaoman pagkatapos nin pito sanang taon na pag-iibanan ninda. Dai niato aram kun baga nagkaaki sinda o kun inisip pa niang mag-agom giraray. Alagad sinasabi kan Biblia na sa edad na 84, balo pa man giraray si Ana. Sa sinabi kan Biblia, makakakongklusyon kita na ginamit ni Ana an nagbagong kamugtakan nia tanganing magin mas harani ki Jehova. Sia “dai noarin man nagpapalta sa templo, na naggigibo nin sagradong paglilingkod banggi asin aldaw na may mga pag-ayuno asin pagngayongayo.” (Luc. 2:36, 37) Kaya, espirituwal na mga bagay an inenot nia sa buhay. Nangaipo nanggad iyan nin determinasyon asin paghihingoa, alagad sia nag-ako nin dakulang balos. Nagkapribilehio sia na maheling an omboy pang si Jesus, asin nagpatotoo sia sa iba manongod sa katalingkasan na mangyayari paagi sa magigin Mesiyas na ini.—Luc. 2:38.
13. (a) Ano an nagpaparisa na aktibong nagtabang si Dorcas sa kongregasyon? (b) Paano nagkaigwa nin balos si Dorcas huli sa saiyang karahayan asin kabootan?
13 Sarong babae na an ngaran Dorcas, o Tabita, an nag-iistar sa Jope, sarong suanoy na pier sa amihanan-solnopan kan Jerusalem. Huling mayong sinambit na agom sa Biblia, posibleng marhay na mayo siang agom kaidto. Si Dorcas “kadakol nin marahay na gibo asin balaog nin pagkaherak.” Malinaw na naggibo sia nin dakol na gubing para sa tios na mga balo saka sa iba pa, asin huli kaiyan pinadangat nanggad sia ninda. Kaya kan bigla siang magkahelang asin magadan, pinaduman kan bilog na kongregasyon si Pedro tanganing pakimaherakan ini na buhayon liwat an namomotan nindang tugang. Kan an bareta dapit sa pagkabuhay nia liwat makalakop sa bilog na Jope, dakol an nagkaigwa nin pagtubod. (Gibo 9:36-42) Paagi sa ekstraordinaryong kabootan ni Dorcas, tibaad natabangan nia mismo an nagkapira sa sainda.
14. Ano an nagpapahiro sa mga Kristianong daing agom na orog na rumani ki Jehova?
14 Arog ni Ana asin Dorcas, dakol na miembro kan mga kongregasyon ngonyan an daing agom mantang nagkakaedad na. An nagkapira tibaad dai nakakahanap nin angay na magigin agom. An iba diborsiado o balo. Huling mayo nin agom na masasabihan kan nasa boot ninda, sa parate nanonodan nin mga Kristianong daing agom na orog nanggad na magsarig ki Jehova. (Tal. 16:3) Saro ining bendisyon para ki Silvia, na daing agom na tugang na labi nang 38 taon sa Bethel. “Kun beses nagsasawa na ako na pirme na sanang ako an nagpapakosog sa iba,” an pag-admitir nia. “Iniisip ko, ‘Siisay an magpapakosog sa sako?’” Alagad sinabi pa nia: “An pagtitiwala na mas aram ni Jehova kisa sa sako kun ano an kaipuhan ko nakakatabang sa sako na magin mas harani sa saiya. Asin an pagparigon sa boot nag-aabot pirme, na kun beses dai ko lamang linalaoman an pinaggigikanan kaiyan.” Kada orog kitang minarani ki Jehova, pirme siang minasimbag sa paaging mamomoton asin nakakapakosog nanggad sa boot.
15. Paano an mga Kristianong daing agom puedeng “humiwas” sa saindang pagkamoot?
15 An pagigin daing agom nagtatao nin espesyal na oportunidad na “humiwas” sa pagkamoot. (Basahon an 2 Corinto 6:11-13.) Si Jolene, na daing agom na tugang na ginamit an nakalihis na 34 taon sa bilog na panahon na paglilingkod, nagsabi: “Hiningoa kong magin dayupot, bako sanang sa mga kaedad ko, kundi sa gabos na klase nin tawo. An pagigin daing agom sarong oportunidad nanggad na magtao ki Jehova, sa saimong pamilya, mga tugang, saka sa ibang tawo. Mientras na nagkakaedad ako, mas ikinakaogma ko an sakong pagigin daing agom.” Siertong pinapahalagahan kan mga may edad na, maluya an hawak, nagsosolong magurang, hoben, asin iba pa sa kongregasyon an daing kaimotan na pagsuportar sa sainda kan mga daing agom. Iyo, kada magpaheling kita nin pagkamoot sa iba, nag-ooswag an satong pagpahalaga sa sadiri. Puede ka man daw na “humiwas” sa saimong pagkamoot sa iba?
Daing Agom sa Bilog na Buhay
16. (a) Taano ta nagdanay si Jesus na daing agom? (b) Paano madonong na ginamit ni Pablo an saiyang pagigin daing agom?
16 Si Jesus dai nag-agom; kinaipuhan niang mag-andam para sa saiyang ministeryo asin otobon iyan. Nagbaklay sia nin hararayo, ginibo an saiyang mga gibohon poon sa amay na aga sagkod sa matanga, asin kan huri itinao an buhay nia bilang atang. Bentaha an saiyang pagigin daing agom. Si apostol Pablo nagbaklay nin rinibong kilometro asin napaatubang sa grabeng mga kadepisilan sa ministeryo. (2 Cor. 11:23-27) Minsan ngani tibaad may agom sia kan enot, pinili ni Pablo na magdanay na daing agom poon kan isugo sia bilang apostol. (1 Cor. 7:7; 9:5) Para sa ministeryo, pinakosog ni Jesus asin Pablo an iba na arogon sinda kun posible. Pero, dai ninda sinabi na kahagadan sa mga ministro na magdanay na daing agom.—1 Tim. 4:1-3.
17. Paano si Jesus asin Pablo inaarog nin nagkapira ngonyan, asin taano ta makakasierto kita na pinapahalagahan ni Jehova an mga nagsasakripisyo nin siring?
17 Ngonyan, nagdesisyon man an nagkapira na magdanay na daing agom tanganing mas maotob ninda an saindang ministeryo. Si Harold, na nasambitan sa enotan, labing 56 na taon nang naglilingkod sa Bethel. “Kan makasampulong taon na ako sa Bethel,” an sabi nia, “naobserbaran ko na dakol na mag-agom an naghahale sa Bethel huli sa helang o huling kaipuhan nindang atamanon an naggugurang nang magurang. Gadan na an mga magurang ko. Alagad gustong-gusto ko an Bethel kaya habo kong isapeligro an pribilehiong iyan huli sa pag-agom.” Siring man, mga taon na an nakaagi, an haloy nang payunir na si Margaret nagsabi: “Nagkaigwa ako nin mga oportunidad na mag-agom, alagad dai ko lang talaga iyan tinawan nin panahon. Imbes, nagamit ko an libreng panahon ko bilang daing agom tanganing magdanay na sibot sa ministeryo, asin nagtao ini sa sako nin dakulang kaogmahan.” Siertong dai noarin man lilingawan ni Jehova an siisay man na naggigibo nin siring na daing kaimotan na sakripisyo para sa tunay na pagsamba.—Basahon an Isaias 56:4, 5.
Aprobetsaran an Kamugtakan Mo
18. Paano mapapakosog asin masusuportaran nin iba an mga Kristianong daing agom?
18 Angay sanang sinserong komendaran asin pakosogon niato an gabos na Kristianong daing agom na ginigibo an pinakamakakaya ninda tanganing paglingkodan si Jehova. Namomotan niato sinda huli sa marahay na mga kualidad ninda bilang indibiduwal asin huli sa mahalagang nagigibo ninda sa kongregasyon. Dai sinda noarin man mamomondo kun kita magigin tunay nindang espirituwal na “mga tugang na lalaki asin mga tugang na babae asin mga ina asin mga aki.”—Basahon an Marcos 10:28-30.
19. Ano an magigibo mo tanganing aprobetsaran an saimong pagigin daing agom?
19 Baga man ika daing agom huli ta iyan an pinili mo o huli sa mga kamugtakan, logod na an mga halimbawang ini sa Kasuratan asin sa presenteng panahon makaasegurar sa saimo na puede kang mamuhay na maogma asin mabunga. May mga balaog na inaantisipar nanggad niato, mantang an iba biyong dai linalaoman. May mga napapahalagahan tolos, mantang an iba napapahalagahan sana sa paglihis nin panahon. Kaya, sa parate nakadepende iyan sa satong saboot. Ano an magigibo mo tanganing aprobetsaran an saimong pagigin daing agom? Orog na rumani ki Jehova, gumibo nin dakol sa paglilingkod sa Dios, asin humiwas sa saimong pagkamoot sa iba. Arog kan pag-agoman, an pagigin daing agom puedeng magin nakakakontento kun mamansayon niato iyan segun sa pagmansay nin Dios asin madonong na gagamiton an balaog na ini.
Nagigirumdoman daw Nindo?
• Sa anong mga paagi puedeng magin balaog an pagigin daing agom?
• Paano an pagigin daing agom puedeng magin bendisyon sa pagkahoben?
• Anong mga oportunidad an bukas sa mga Kristianong daing agom na orog na rumani ki Jehova asin humiwas sa pagkamoot?
[Mga Hapot Para sa Pag-adal]
[Mga Ritrato sa pahina 18]
Inaaprobetsaran mo daw an saimong mga oportunidad sa paglilingkod sa Dios?
