Helinga an Ngaran sa Kababan

ST. MORITZ. Pamilyar daw kamo sa ngaran na iyan? Posible, huling an lugar na iyan, na nasa Kababan nin Engadine sa Switzerland, bantog sa bilog na kinaban bilang bakasyonan. Alagad an St. Moritz saro sanang lugar sa magayon na kababan na ini, na haloy nang dinudumanan nin mga tawo asin nasa natatakopan nin niebe na Alps sa timog-sirangan na poro kan Switzerland harani sa Italia. Yaon man dian an Swiss National Park, na huli sa natural na kagayonan asin dakolon na manlaenlaen na pananom asin hayop naoomaw an satong Kaharohalangkaweng Kaglalang, si Jehova. (Sal. 148:7-10) Alagad nagtatao man nin pag-omaw an kabtang nin tradisyon na kaidto pang kabangaan kan ika-17 siglo.

Tibaad makaapod kan saindong atension an pambihirang detalye sa dakol na harong sa kababan na ini. An ngaran nin Dios maheheling pa man giraray na nakasurat sa atubangan nin mga harong, arog baga sa itaas kan pinto. Kan nakaaging mga  siglo, nagin tradisyon an pagbugtak sa luwas nin mga harong nin nakasurat na mga dekorasyon, na ipininta sa lanob, kinaros sa palitada, o inukit sa gapo. Maheheling nindo digdi an retrato nin harong sa baryo nin Bever. Ini an traduksion kan nakasurat: “Taon 1715. Si Jehova an kapinonan, asin si Jehova an katapusan. An gabos na bagay paagi sa Dios, asin mayo nin ano man kun mayo sia.” Iyo, an personal na ngaran nin Dios duwang beses na nasambitan sa lumang dekorasyon na iyan.

Makakaheling kamo nin mas luma pa nganing nakasurat na dekorasyon sa baryo nin Madulain. Ini nagsasabi: “Salmo 127. Sagkod na bakong si Jehova an magtogdok kan harong, basang sana an pagpapagal dian kan mga nagtotogdok kaiyan. Lucius Rumedius. Taon 1654.”

Taano ta may siring kaiyan na pagpaheling sa publiko kan ngaran nin Dios sa kababan na ini? Kaidtong kapanahonan kan Reporma, ipinublikar an Biblia sa Romansh, sarong lenguaheng basado sa Latin na ginagamit sa Engadine. An totoo, iyan an enot na libro na trinadusir sa lenguaheng iyan. Huling napahiro kan nabasa ninda sa Tataramon nin Dios, an dakol duman nagsurat sa luwas kan harong ninda bako sanang kan ngaran mismo ninda kundi pati kan mga kotasyon hale sa Biblia na nasasambitan an personal na ngaran nin Dios.

Iyo, sagkod sa panahon na ini, an mga nakasurat na dekorasyon na ini nagpapahayag pa kan ngaran ni Jehova asin nag-oomaw pa sa saiya dawa mga siglo na an nakaagi poon kan enot iyan na isurat sa mga harong. An mga bisita patin residente sa kababan na ini iniimbitaran na makanood nin orog pa manongod sa marahayon na Dios, si Jehova, paagi sa pagbisita sa saro pang edipisyo na igwa kan ngaran nia—an Kingdom Hall kan Mga Saksi ni Jehova sa Bever.

[Picture Credit Line sa pahina 7]

© Stähli Rolf A/age fotostock