‘Magpaili sa Ngaran ni Jehova’
‘Magpaili sa Ngaran ni Jehova’
“Mawalat nanggad ako . . . nin sarong banwaan na mapakumbaba asin may kababaan an boot, asin sinda magpapaili nanggad sa ngaran ni Jehova.”—SOF. 3:12.
1, 2. Anong piguratibong bagyo an madali nang mag-abot sa katawohan?
KINAIPUHAN na daw nindong magpaili sa sarong kubo o sa sirong nin tulay huli sa makosogon na oran? Puede nanggad kamong magpaili sa sarong kubo o sa sirong nin tulay, alagad daing gayo iyan makakaprotehir sa saindo kun may bagyo.
2 Sarong laen na klase nin bagyo an nagdadangadang—na puedeng ikapara kan rasa nin tawo. Iyan sarong piguratibong “aldaw nin bagyo.” An ‘dakulang aldaw na ini ni Jehova’ makakaapektar sa bilog na katawohan. Minsan siring, manonompongan niato an pailihan na kaipuhan niato. (Basahon an Sofonias 1:14-18.) Paano niato magigibo iyan durante kan “aldaw kan kabangisan ni Jehova” na madali nang magpoon?
Mga Aldaw nin Bagyo kan mga Panahon kan Biblia
3. Anong “nag-uurog-udog na bagyo” an uminabot sa sampulong tribong kahadean nin Israel?
3 An aldaw ni Jehova biglang mapoon paagi sa paglaglag sa gabos na falsong sistema nin relihion sa daga. Dapit sa kun paano makakanompong nin pailihan, puede niatong makua an simbag sa kasaysayan kan suanoy na banwaan nin Dios. An paghokom ni Jehova sa apostatang sampulong tribong kahadean nin Israel iinagid ni Isaias, na nabuhay kan ikawalong siglo B.C.E., sa sarong “nag-uurog-udog na bagyo” na dai malilikayan nin mga tawo. (Basahon an Isaias 28:1, 2.) Naotob an hulang iyan kan 740 B.C.E. kan sakyadahon kan Asiria an daga kan mga tribong iyan, na an pinakaprominente sa sampulo iyo an Efraim.
4. Paano an sarong “dakulang aldaw ni Jehova” nag-abot sa Jerusalem kan 607 B.C.E.?
4 An paghokom sa bakong maimbod na Israel sinundan kan 607 B.C.E. paagi sa “dakulang aldaw ni Jehova” tumang sa Jerusalem asin sa kahadean nin Juda. Nangyari iyan huling an mga tawo kan Juda nagin apostata man. An mga Babilonyo sa pamamahala ni Nabucodonosor naghuma sa Juda asin sa kabisera kaiyan, an Jerusalem. An mga Judeano nagsarig sa “pailihan na kaputikan,” na iyo an saindang politikal na pakipag-alyansa sa Egipto. Minsan siring, arog sa sarong mapanglaglag na bagyo, pinara kan mga Babilonyo an “pailihan” na iyan.—Isa. 28:14, 17.
5. Ano an mangyayari sa banwaan nin Dios bilang grupo durante kan paglaglag sa gabos na falsong relihion?
5 An dakulang aldaw ni Jehova na nag-abot sa Jerusalem indikasyon kan paghokom na maabot sa apostatang Kakristianohan sa panahon niato. Apuera kaiyan, lalaglagon man an iba pang kabtang kan “Dakulang Babilonya,” an pambilog na kinaban na imperyo nin falsong relihion. Pagkatapos kaiyan, popohoon an nagkataradang kabtang kan maraot na sistema nin mga bagay ni Satanas. Pero, makakaligtas an banwaan nin Dios bilang grupo huling nagpapaili sinda ki Jehova.—Kap. 7:14; 18:2, 8; 19:19-21.
Espirituwal Asin Pisikal na Pailihan
6. Paano an banwaan ni Jehova makakanompong nin pailihan?
6 Paano an banwaan nin Dios makakanompong nin pailihan dawa ngonyan durante kan panahon na ini nin katapusan? Nakakanompong kita nin espirituwal na pailihan paagi sa mapagngayongayong ‘paghorophorop sa ngaran nin Dios’ asin maigot na paglilingkod sa saiya. (Basahon an Malaquias 3:16-18.) Pero, aram ta na kaipuhan niatong gumibo nin orog pa sa paghorophorop sana sa ngaran nia. Mababasa niato: “An gabos na nag-aapod sa ngaran ni Jehova maliligtas.” (Roma 10:13) Magkakonektar an pag-apod sa ngaran ni Jehova asin an ipinapaabot niang kaligtasan huli kaiyan. Asin dakol na sadiosan an puso an nakakaheling kan pagkakalaen kan tunay na mga Kristiano, na may paggalang na “naghohorophorop sa saiyang ngaran” asin naglilingkod bilang saiyang mga Saksi, saka kan mga dai naglilingkod sa saiya.
7, 8. Sa anong paagi an mga Kristiano kan enot na siglo nakaeksperyensia nin pisikal na kaligtasan, asin paano iyan nakakapareho kan mangyayari ngonyan?
7 Pero, an kaligtasan na puede tang kamtan dai limitado sa pakanompong nin espirituwal na pailihan. An banwaan nin Dios pinanugaan nin pisikal na kaligtasan. Ipinaparisa ini kan nangyari kan 66 C.E. pagkatapos na an Jerusalem sakyadahon nin Romanong hukbo sa pangengenot ni Cestio Gallo. Ihinula ni Jesus na an mga aldaw kan kahorasaan na iyan “papahalipoton.” (Mat. 24:15, 16, 21, 22) Nangyari iyan kan an hukbong Romano biglang mag-atras sa pagsalikop sa siudad, na nagin dahelan na ‘makaligtas’ an nagkapirang “laman,” na iyo an tunay na mga Kristiano. Nakadulag sinda sa siudad asin sa palibot kaiyan. An nagkapira nagbalyo sa Jordan asin nagpaili sa kabukidan sa sirangan na kampi kan salog na iyan.
8 May maheheling kitang pagkakapareho kan mga Kristianong idto asin kan banwaan nin Dios ngonyan. Nagpaili an mga Kristiano kan enot na siglo, asin gigibohon man iyan kan mga lingkod nin Dios ngonyan. Minsan siring, sa panahon na ini mayo nang aktuwal na pagdulag pasiring sa saro sanang lugar, huling an tunay na mga Kristiano lakop sa bilog na kinaban. Pero, bilang sarong banwaan, an “mga pinili” asin an saindang maimbod na kairiba makakaligtas, sa pisikal na paagi, sa katapusan kan apostatang Kakristianohan paagi sa pagpaili ki Jehova asin sa arog-bukid na organisasyon nia.
9. Siisay an nagmaigot na gumibo nin mga paagi tanganing malingawan nin mga tawo an ngaran ni Jehova? Magtao nin halimbawa.
9 Sa ibong na lado, an Kakristianohan maninigo sa maabot na kalaglagan huling dai ninda itinokdo sa saindang mga parasunod an espirituwal na mga katotoohan asin huli sa risang-risang pagkaongis ninda sa ngaran nin Dios. Kan Edad Media, an personal na ngaran nin Dios aram na marhay sa Europa. An ngaran na iyan, na irinerepresentar kan apat na letrang Hebreo na inaapod na Tetragrammaton asin na an parateng transliterasyon iyo an YHWH (o JHVH), maheheling sa mga sinsilyo, sa atubangan nin mga harong, sa dakol na libro saka Biblia, asin dawa sa nagkapirang simbahan nin mga Katoliko asin Protestante. Minsan siring, dai pa sana nahahaloy, pinonan na haleon nin dakol an ngaran nin Dios sa mga traduksion kan Biblia asin sa iba pang pinaggagamitan kaiyan. An sarong ebidensia kaini iyo an Letter to the Bishops’ Conferences on ‘the Name of God,’ na may petsang Hunyo 29, 2008 asin ilinuwas kan Congregation for Divine Worship and the Discipline of the Sacraments. Nagsadol dian an Iglesia Katolika Romana na an Tetragrammaton, sa manlaenlaen na traduksion kaiyan, maninigong ribayan nin “Kagurangnan.” An Vatican nagtao nin instruksion na an ngaran nin Dios dai maninigong gamiton o sambiton sa mga kanta asin pamibi sa relihiosong mga seremonya kan Katoliko. Asin an mga lider nin ibang relihion na kabtang asin bakong kabtang kan Kakristianohan itinago man sa milyon-milyon na parasamba an ngaran kan tunay na Dios.
Proteksion Para sa mga Nagpapabanal kan Ngaran nin Dios
10. Paano an ngaran nin Dios tinatawan nin onra ngonyan?
10 Kabaliktaran na marhay sa ginigibo nin ibang relihion, an Mga Saksi ni Jehova nagtataong onra asin nagpapamuraway sa ngaran nin Dios. Pinapakangbanal ninda iyan paagi sa may dignidad na paggamit kaiyan. Si Jehova naoogma sa mga nagtitiwala sa saiya, asin sia nagigin an ano man na kaipuhan tanganing bendisyonan asin protehiran an saiyang banwaan. “Namimidbid nia an mga nagpapaili sa saiya.”—Nah. 1:7; Gibo 15:14.
11, 12. Sairisay an nagsuportar sa ngaran ni Jehova sa suanoy na Juda, asin sairisay an naggigibo kaiyan sa presenteng panahon?
11 Minsan ngani nagin apostata an kadaklan sa suanoy na Juda, may nagkapira kaidto na ‘nagpaili sa ngaran ni Jehova.’ (Basahon an Sofonias 3:12, 13.) Iyo, kan padusahan nin Dios an bakong maimbod na Juda paagi sa pagtogot sa mga Babilonyo na sakopon an daga asin bihagon an mga tawo duman, nakaligtas an nagkapira arog ni Jeremias, Baruc, asin Ebed-melec. Nabuhay sinda “sa tahaw” nin apostatang nasyon. An iba nagdanay na maimbod mantang bihag. Kan 539 B.C.E., sinakop an Babilonya kan mga Medo asin Persiano sa pangengenot ni Ciro. Dai nahaloy, si Ciro nagpaluwas nin dekreto na nagtotogot sa natatadang mga Judio na bumalik sa dagang tinuboan ninda.
12 Mapadapit sa mga makakaeksperyensia kan pagbabalik na iyan kan tunay na pagsamba, si Sofonias naghula na ililigtas sinda ni Jehova asin na maggagayagaya Sia huli sa sainda. (Basahon an Sofonias 3:14-17.) Totoo man ini sa satong panahon. Pagkaestablisar kan Kahadean nin Dios sa langit, an maimbod na natatada sa mga linahidan ilinigtas ni Jehova sa espirituwal na pagkabihag sa Dakulang Babilonya. Asin sagkod ngonyan naggagayagaya sia huli sa sainda.
13. Anong katalingkasan an naeeksperyensiahan kan mga tawo kan gabos na nasyon?
13 An mga may paglaom na mabuhay sagkod lamang sa daga luminuwas man sa Dakulang Babilonya asin nakakaeksperyensia nin espirituwal na katalingkasan sa mga katokdoan nin falsong relihion. (Kap. 18:4) Sa siring, an dakulang kaotoban kan Sofonias 2:3 nangyayari sa satong panahon: “Hanapa nindo si Jehova, kamo gabos na mahoyo sa daga.” An mga mahoyo kan gabos na nasyon, langitnon man o daganon an paglaom, nagpapaili na ngonyan sa ngaran ni Jehova.
Bakong Anting-Anting an Ngaran nin Dios
14, 15. (a) Ano an ginamit nin nagkapira bilang mga anting-anting? (b) Ano an dai maninigong gamiton bilang anting-anting?
14 Minansay nin nagkapirang Israelita an templo bilang anting-anting na maprotehir sa sainda sa mga kalaban. (Jer. 7:1-4) Bago kaiyan, para sa mga Israelita sarong anting-anting an kaban kan tipan na maprotehir sa sainda sa ralaban. (1 Sam. 4:3, 10, 11) An mga kalasag kan mga soldados ni Constantinong Dakula pinintahan nia kan mga letrang Griego na khi asin rho, an enot na duwang letra kan titulong “Cristo” sa Griego, sa paglaom na maprotehir iyan sa saiyang mga soldados sa ralaban. Asin sinasabi man na si Hadeng Gustav Adolph II kan Sweden, na nakipaglaban sa Treintang Taon na Guerra, nagsulot kan pangalasag na ipinapaheling sa pahina 7. Mangnohon na heling-heling dian an ngaran na “Iehova.”
15 An nagkapirang lingkod nin Dios na inatake nin mga demonyo nakanompong nin pailihan ki Jehova paagi sa makosog na pag-apod sa ngaran nia. Pero, an sarong bagay na igwa kan ngaran nin Dios dai maninigong ibilang o gamiton na anting-anting sa pang-aroaldaw na buhay na garo baga igwa iyan nin milagrosong kapangyarihan na magprotehir. Bako ini an boot sabihon kan pagpaili sa ngaran ni Jehova.
Pagpaili Ngonyan
16. Sa espirituwal na paagi, paano kita makakapagpaili ngonyan?
16 Nakakanompong kita ngonyan nin pailihan huli sa espirituwal na katiwasayan na naeeksperyensiahan kan banwaan nin Dios sa kabilogan. (Sal. 91:1) Paagi sa “maimbod asin mapagmansay na oripon” asin sa kamagurangan sa kongregasyon, napapatanidan kita dapit sa mga nauuso sa kinaban na puedeng magsapeligro kan katiwasayan na iyan. (Mat. 24:45-47; Isa. 32:1, 2) Isip-isipa kun gurano kaparate kitang pinapatanidan dapit sa materyalismo, asin kun paano an siring na mga patanid nakaprotehir sa sato sa espirituwal na kapahamakan. Asin kumusta man an peligro nin pagigin parelaksrelaks, na puedeng magresulta na kita magin inaktibo sa paglilingkod ki Jehova? An Tataramon nin Dios nagsasabi: “An pagigin parelaksrelaks kan mangmang an malaglag sa sainda. Kun dapit sa naghihinanyog sa sako, sia mag-eerok na may katiwasayan asin dai mariribok nin grabeng takot sa kapahamakan.” (Tal. 1:32, 33) An pagmamaigot na magdanay na malinig sa moral nakakatabang man sa sato na mapagdanay an espirituwal na katiwasayan niato.
17, 18. Ano an nakakatabang sa minilyon na tawo na magpaili sa ngaran ni Jehova ngonyan?
17 Isip-isipa man an pagdagka kan maimbod na oripon na sunodon an pagboot ni Jesus na ihulit an maogmang bareta kan Kahadean sa bilog na ineerokan na daga. (Mat. 24:14; 28:19, 20) Si Sofonias may sinambit na pagbabago na makakatabang sa mga tawo na magpaili sa ngaran nin Dios. Mababasa niato: “Sa panahon na iyan itatao ko sa mga banwaan an pagbago na magkaigwa nin dalisay na lenguahe, tanganing sinda gabos mag-apod sa ngaran ni Jehova, tanganing daramay na maglingkod sa saiya.”—Sof. 3:9.
18 Ano an dalisay na lenguaheng ini? An dalisay na lenguahe iyo an katotoohan manongod ki Jehova Dios asin sa mga katuyohan nia na mababasa sa ipinasabong na Tataramon nia. Garo man sana ginagamit nindo an lenguaheng iyan kun ipinapaabot nindo sa iba an tamang pakasabot dapit sa Kahadean nin Dios asin kun paano kaiyan papakangbanalon an saiyang ngaran, kun idinodoon nindo an pagbindikar sa soberaniya nin Dios, asin kun maogma nindong ipinapakipag-olay an daing katapusan na mga bendisyon na maeeksperyensiahan nin maimbod na mga tawo. Huling dakolon an nagtataram kan piguratibong lenguaheng ini, nagdadakol an ‘nag-aapod sa ngaran ni Jehova’ asin ‘daramay na naglilingkod sa saiya.’ Iyo, minilyon sa bilog na kinaban an nakakanompong na ngonyan nin pailihan ki Jehova.—Sal. 1:1, 3.
19, 20. Paano nasudya an pagtitiwala sa “pailihan na kaputikan” kan mga panahon kan Biblia?
19 Kaipuhan na atubangon kan mga tawo sa kinaban an garo baga dai mapapangganahan na mga problema. Huling desperado na maresolberan an saindang mga problema, dakol an naglalaom sa bakong sangkap na mga tawo. O naglalaom sinda nin mga solusyon sa politikal na mga institusyon, kun paanong an suanoy na Israel kun beses naglaom sa kataraed na nasyon para sa suporta paagi sa pakipag-alyansa sa sainda. Pero, aram nindo na an paggibo kaiyan dai nakatabang sa Israel. Asin mayo nin politikal na estado ngonyan, ni an organisasyon na Naciones Unidas, an biyong makakaresolber sa mga problema nin katawohan. Kaya taano ta ibibilang nin saro na pailihan an politikal na mga institusyon asin alyansa? Sa Biblia, an mga iyan makahulang inaapod na “pailihan na kaputikan.” Tama sanang mansayon iyan nin siring huling an gabos na naglalaom dian masusudya nanggad an linalaoman.—Basahon an Isaias 28:15, 17.
20 Dai na mahahaloy, an piguratibong bagyo kan aldaw ni Jehova maabot sa daga. An mga programa nin tawo dai makakapagtao nin proteksion; ni an nuklear na mga pandepensa ni an kayamanan. Idinodoon kan Isaias 28:17: “Paparaon kan graniso an pailihan na kaputikan, asin sasanopon kan katubigan an mismong tagoan.”
21. Anong pakinabang an maeeksperyensiahan niato sa pagsunod sa teksto kan taon para sa 2011?
21 Ngonyan asin durante kan pangyayaring iyan sa ngapit, an banwaan nin Dios tunay nanggad na poprotehiran kan saindang Dios, si Jehova. An ngaran ni Sofonias, na nangangahulogan na “Itinago ni Jehova,” nagpapaheling kun siisay an tunay na gikanan na ini nin tagoan. Angay nanggad, an satong teksto kan taon para sa 2011 iyo an madonong na sadol: ‘Magpaili sa ngaran ni Jehova.’ (Sof. 3:12) Dawa ngonyan, puede asin maninigo kitang magpaili sa ngaran ni Jehova, na lubos na nagtitiwala sa saiya. (Sal. 9:10) Isaisip niato aroaldaw an ipinasabong na pag-asegurar na ini: “An ngaran ni Jehova masarig na torre. Dian minadalagan an matanos asin tinatawan nin proteksion.”—Tal. 18:10.
Nagigirumdoman daw Nindo?
• Paano kita makakapagpaili ngonyan sa ngaran ni Jehova?
• Taano ta dai kita maninigong magtiwala sa “pailihan na kaputikan”?
• Anong pailihan an inaasegurar sa sato para sa ngapit?
[Mga Hapot Para sa Pag-adal]
[Blurb sa pahina 6]
An teksto kan taon para sa 2011: ‘Magpaili sa ngaran ni Jehova.’ —Sofonias 3:12.
[Picture Credit Line sa pahina 7]
Thüringer Landesmuseum Heidecksburg Rudolstadt, Waffensammlung “Schwarzburger Zeughaus”
