Pinapakosog na Mapangganahan an Ano Man na Pagbalo

“Igwa ako kan kosog para sa gabos na bagay huli sa saiya na nagtatao nin puersa sa sako.”—FIL. 4:13.

1. Taano an mga lingkod ni Jehova ta napapaatubang sa dakol na kasakitan?

AN MGA lingkod ni Jehova bakong libre sa manlaenlaen na kasakitan. An nagkapirang pagbalo epekto kan sato mismong pagkabakong sangkap o kan sistema nin mga bagay na kinabubuhayan niato. An iba resulta kan pagkakakontrahan kan mga naglilingkod sa Dios asin kan mga dai naglilingkod sa saiya. (Gen. 3:15) Poon pa sa kapinonan kan kasaysayan nin tawo, tinatabangan na nin Dios an maimbod niang mga lingkod na makaya an relihiosong persekusyon, labanan an nakakaraot na panggigipit nin kairiba, asin tagalan an gabos na iba pang kasakitan. An saiyang banal na espiritu makakapakosog sa sato na gibohon man iyan.

Tinatabangan na Makaya an Relihiosong Persekusyon

2. Ano an katuyohan kan relihiosong persekusyon, asin sa anong mga paagi iyan puedeng mangyari?

² An relihiosong persekusyon iyo an tuyong pangriribok o pangongolog sa mga tawo huli sa saindang pagtubod o mga paniniwala. An katuyohan kaiyan iyo na paraon an siring na mga paniniwala, olangon an paglakop kan mga ini, o raoton an integridad kan mga nagtutubod dian. An persekusyon puedeng mangyari sa laen-laen na  paagi, an iba hayag, an iba dai risa. An mga pag-atake ni Satanas iinaagid kan Biblia sa mga pag-atake nin ogbon na leon asin nin rimoranon.—Basahon an Salmo 91:13.

3. Paano nindo ilaladawan an arog-leon asin arog-rimoranon na persekusyon?

³ Arog nin maringis na leon, si Satanas parateng nag-aatake nin hayagan paagi sa kadahasan, pagbilanggo, o pagbawal. (Sal. 94:20) Sa Yearbook, na nagsasaysay kan mga aktibidad kan Mga Saksi ni Jehova sa presenteng panahon, dakol kitang mababasa dapit sa siring na mga taktika. An mga lingkod nin Dios sa dakol na lugar minamaltrato nin mga sururog na masinuhay sa ley, na an nagkapira sa sainda pinangengenotan nin mga klerigo o mga panatiko sa politika. An arog-leon na mga pag-atakeng ini nakapasingkog sa nagkapira. Arog nin rimoranon, an Diablo tuso man na nag-aatake hale sa tagong mga lugar tanganing hilohon an isip nin mga tawo asin dayaon sinda na an gibohon iyo an kabotan nia. An arog kaining pag-atake dinisenyo tanganing paluyahon o raoton kita sa espirituwal. Alagad paagi sa banal na espiritu nin Dios, makakaya niato an duwang klaseng iyan nin persekusyon.

4, 5. Ano an pinakamarahay na paagi tanganing pag-andaman an persekusyon, asin taano? Magtao nin halimbawa.

⁴ An pagparaisip dapit sa manlaenlaen na eksena nin posibleng mangyaring persekusyon bako an pinakamarahay na paagi tanganing pag-andaman iyan. An totoo, dai talaga niato maaaraman kun anong persekusyon an posibleng mapaatubang sa sato, kaya daing gayo kita makikinabang sa pagparahadit sa mga bagay na tibaad dai noarin man mangyari. Minsan siring, may magigibo kita. An kadaklan sa mga nakatagal sa persekusyon nagin mapanggana paagi sa paghorophorop sa halimbawa kan maimbod na mga lingkod na nasambitan sa Kasuratan, saka sa mga katokdoan asin halimbawa ni Jesus. Huli kaini, mas nagrarom an pagkamoot ninda ki Jehova. Asin an pagkamoot na iyan nakatabang sa sainda na labanan an ano man na pagbalo na napaatubang sa sainda.

⁵ Helingon niato an halimbawa kan duwa niatong tugang na babae sa Malawi. Sa pamimirit sa sainda na magbakal nin kard nin partido politika, sinda binugbog, hinubaan, asin tinakot na lupigan nin madahas na sururog. Putik na sinabihan sinda kan sururog na dawa an mga Bethelite nagkua na nin mga kard nin partido. Ano an simbag ninda? “Si Jehova Dios sana an pinaglilingkodan mi. Kaya dawa kun nagbakal nin mga kard an mga tugang sa sangang opisina, dai kaiyan mababago an paninindogan mi. Dai kami makikikompromiso, dawa pa gadanon nindo kami!” Pagkatapos na manindogan nin may kosog nin boot, binutasan sinda.

6, 7. Paano pinapakosog ni Jehova an mga lingkod nia na atubangon an persekusyon?

⁶ Sinambit ni apostol Pablo na inako kan mga Kristiano sa Tesalonica an mensahe kan katotoohan “sa ibong nin grabeng kahorasaan” pero “may kagayagayahan hale sa banal na espiritu.” (1 Tes. 1:6) Iyo, dakol na Kristiano, kaidto asin ngonyan, na napaatubang asin nakapanggana sa persekusyon an nagsabi na sa kasagsagan kan mga pagbalo sa sainda, nakamate sinda nin panglaog na katoninongan, na sarong aspekto kan bunga kan banal na espiritu nin Dios. (Gal. 5:22) Asin an katoninongan na iyan nakatabang na maingatan an saindang puso asin isip. Iyo, ginagamit ni Jehova an saiyang aktibong puersa tanganing pakosogon an mga lingkod nia na makaya an mga pagbalo asin madonong na humiro sa panahon nin kasakitan. *

⁷ An mga nagmamasid napapangalas sa determinasyon kan mga lingkod nin Dios na magdanay na may integridad sa ibong nin maringis na persekusyon. An mga Saksi garo baga pano nin kosog na nakakalabi sa tawo, asin iyo man nanggad. Inaasegurar kita ni apostol Pablo: “Kun kamo pinag-oolog-olog huli sa ngaran ni Cristo, maogma kamo, huli ta an espiritu nin kamurawayan, minsan an espiritu nin Dios, nag-oontok dian sa saindo.” (1 Ped. 4:14) An pagpersegir sa sato huli sa paninindogan sa matanos na mga pamantayan nagpaparisa na inooyonan kita nin Dios. (Mat. 5:10-12; Juan 15:20) Nagpapagayagaya nanggad an ebidensiang ini kan bendisyon ni Jehova!

 Tinatabangan na Labanan an Panggigipit nin Kairiba

8. (a) Ano an nagpahiro ki Josue asin Caleb na labanan an panggigipit nin kairiba? (b) Ano an manonodan niato sa halimbawa ni Josue asin Caleb?

⁸ An sarong mas dai risang klase nin pagtumang na dapat tagalan kan mga Kristiano iyo an nakakaraot na panggigipit nin kairiba. Minsan siring, huling mas makapangyarihan nanggad an espiritu ni Jehova kisa sa espiritu kan kinaban, malalabanan niato an mga tawo na nagtutuyatuya sa sato, nagpapalakop nin mga kaputikan manongod sa sato, o nagpoprobar na piriton kita na arogon an mga pamantayan ninda. Halimbawa, ano an nagpahiro ki Josue asin Caleb na dai mag-oyon sa mga punto de vista kan sampulong iba pang espiya na isinugo sa Canaan? An banal na espiritu nagpahiro sa sainda na magkaigwa nin laen na “espiritu,” o kaisipan.—Basahon an Bilang 13:30; 14:6-10, 24.

9. Taano an mga Kristiano ta dapat na magin andam na mapalaen sa mayoriya?

⁹ An banal na espiritu nagpakosog man sa mga apostol ni Jesus na kuyogon an Dios imbes na an mga minimidbid nin dakol bilang mga paratokdo nin tunay na relihion. (Gibo 4:21, 31; 5:29, 32) Mas pinipili nin kadaklan na tawo na arogon na sana an ginigibo nin mayoriya, tanganing malikayan an dai pagkakaoroyon o iriwal. Pero, sa parate, an tunay na mga Kristiano kaipuhan na manindogan sa kun ano an aram nindang tama. Dawa siring, sa tabang kan kosog na itinatao kan aktibong puersa nin Dios, dai sinda natatakot na mapalaen. (2 Tim. 1:7) Helingon niato an sarong kamugtakan na dian dai kita dapat magpadara sa panggigipit nin kairiba.

10. Anong alanganon na kamugtakan an tibaad mapaatubang sa nagkapirang Kristiano?

¹⁰ An nagkapirang hoben tibaad mamugtak sa alanganon kun maaraman nindang an sarong katood may ginibo na bakong sono sa Kasuratan. Tibaad isipon ninda na an paghagad nin espirituwal na tabang para sa katood ninda makakaraot sa tiwala kaini sa sainda; kaya, dai ninda iyan sinasabi sa iba huli sa salang pakamate nin kaimbodan. Tibaad piriton pa ngani nin nagkasala an mga katood nia na itago an kasalan nia. Siempre, an arog kaining problema bako sanang sa mga hoben nangyayari. May mga adulto man na tibaad nadedepisilan na ipakipag-olay sa kamagurangan sa kongregasyon an dapit sa maraot na gibo nin sarong katood o kapamilya. Alagad ano an maninigong gibohon nin tunay na mga Kristiano sa siring na panggigipit?

11, 12. Ano an pinakamarahay na gibohon kun kinokombensir ka nin sarong miembro kan kongregasyon na dai isumbong an maraot na gibo nia, asin taano?

¹¹ Imahinara an situwasyon na ini. Ipamugtak ta baga na naaraman ni Alex, sarong hoben na tugang, na ugale na kan amigo nia sa kongregasyon na si Steve na magheling nin pornograpiya. Sinasabihan ni Alex si Steve na nahahadit siang gayo sa ginigibo kaini. Minsan siring, daing gayo iyan inintindi ni Steve. Kan sadolon sia ni Alex na ipakipag-olay iyan sa kamagurangan, sinabi ni Steve na kun talagang mag-amigo sinda, dai masumbong si Alex. Ikakatakot daw ni Alex an posibilidad na madanyaran an saindang pagigin mag-amigo? Tibaad isip-isipon nia kun siisay an paniniwalaan kan kamagurangan kun negaran ni Steve an gabos. Pero, dai magrarahay an situwasyon  kun padagos na dai magirong si Alex. An totoo, puede iyan na makaraot sa relasyon ni Steve ki Jehova. Marahay na girumdomon ni Alex na “an pagtakig sa mga tawo sarong siod, alagad an nagtitiwala ki Jehova iingatan.” (Tal. 29:25) Ano pa an magigibo ni Alex? Puede niang mamomoton na kaolayon giraray si Steve asin ipasabot na sala an ginibo kaini. Mangangaipo iyan nin kosog nin boot. Pero, posibleng marhay na sa pagkakataon na ini andam na si Steve na pag-olayan an problema nia. Maninigong dagkahon giraray ni Alex si Steve na makipag-olay sa kamagurangan asin sabihon nia sa saiya na kun dai nia iyan gigibohon sa laog nin rasonableng panahon, si Alex na an masabi sa sainda.—Lev. 5:1.

¹² Kun mapaatubang ka sa siring na situwasyon, sa enot tibaad dai pahalagahan kan katood mo an saimong paghihingoa na tumabang. Alagad, pag-abot nin panahon, tibaad marealisar nia na an ginigibo mo para sa pinakaikakarahay nia. Kun inako kan nagkasala an tabang, tibaad bilog na buhay siang magpapasalamat sa saimo huli sa kosog nin boot asin kaimbodan mo. Sa ibong na lado, kun nagdanay siang anggot sa saimo, sia daw talaga an klase nin katood na gusto mo? An pagpaogma sa pinakadakula tang Katood, si Jehova, iyo an pirmeng tamang gibohon. Kun ineenot niato sia, igagalang kita kan mga namomoot sa saiya huli sa satong kaimbodan asin sinda magigin tunay na mga katood niato. Nungka niatong tawan nin lugar an Diablo sa laog kan Kristianong kongregasyon. Ta kun gigibohon niato iyan, mapapamondo nanggad niato an banal na espiritu ni Jehova. Minsan siring, naghihiro kita kaoyon kaiyan paagi sa paghihingoa na mapagdanay na dalisay an Kristianong kongregasyon.—Efe. 4:27, 30.

Pinapakosog na Tagalan an Gabos na Klase nin Kasakitan

13. Anong mga kasakitan an napapaatubang sa mga lingkod ni Jehova, asin taano ta lakop na marhay iyan?

¹³ Manlaenlaen an kasakitan—pagkapierde, pagkawara nin trabaho, natural na kalamidad, pagkagadan nin namomotan, problema sa salud, asin iba pa. Huling nabubuhay kita sa “delikadong mga panahon,” laoman niato na maabot an panahon na gabos kita mapapaatubang sa pagbalo. (2 Tim. 3:1) Kun mangyari iyan, mahalagang dai mataranta. Mapapakosog kita kan banal na espiritu na tagalan an ano man na kasakitan.

14. Ano an nagpakosog ki Job na tagalan an mga kasakitan nia?

¹⁴ Sunod-sunod na kasakitan an inagihan ni Job. Nawara an saiyang kabuhayan, mga aki, mga katood, saka marahay na salud, asin an saiyang agom nawaran nin tiwala ki Jehova. (Job 1:13-19; 2:7-9) Pero, naranga nanggad sia ni Eliu. An mensahe kaini, saka an pinakapunto kan mensahe mismo ni Jehova ki Job, iyo ini: “Pumondo ka asin magtao ka nin atension sa makangangalas na mga gibo nin Dios.” (Job 37:14) Ano an nakatabang ki Job na tagalan an mga pagbalo sa saiya? Asin ano an makakatabang sa sato na tagalan man an mga pagbalo sa sato? Paagi sa paggirumdom asin paghorophorop kan manlaenlaen na kapahayagan kan banal na espiritu asin kapangyarihan ni Jehova. (Job 38:1-41; 42:1, 2) Tibaad nagigirumdoman niato an mga panahon sa sato mismong buhay na naheling niato an ebidensia kan pagmakolog nin Dios sa sato personalmente. Nagmamakolog pa man giraray sia sa sato.

15. Ano an nakapakosog ki apostol Pablo na tagalan an mga pagbalo?

¹⁵ Huli sa saiyang pagtubod, tinagalan ni apostol Pablo an dakol na kasakitan na nagsapeligro kan buhay nia. (2 Cor. 11:23-28) Paano sia  nagdanay na balanse asin marigon an boot sa masakit na mga kamugtakan na idto? Paagi sa mapagngayongayong pagsarig ki Jehova. Sa panahon kan pagbalo na minalataw na suminagkod sa kagadanan nia bilang martir, si Pablo nagsurat: “An Kagurangnan nagtindog harani sa sako asin tinawan ako nin puersa, tanganing paagi sa sako lubos na magibo an paghuhulit asin madangog iyan kan gabos na nasyon; asin ilinigtas ako sa ngoso kan leon.” (2 Tim. 4:17) Kun siring, basado sa personal na eksperyensia, maaasegurar ni Pablo an mga kapagtubod na dai kaipuhan na “maghadit sa ano man na bagay.”—Basahon an Filipos 4:6, 7, 13.

16, 17. Magtao nin halimbawa kun paano pinapakosog ni Jehova an mga lingkod nia na makaya an mga kasakitan ngonyan.

¹⁶ Naeksperyensiahan mismo kan payunir na si Roxana kun paano sinusuportaran ni Jehova an mga lingkod nia. Kan magpaaram sia sa saiyang among na mabakasyon sia nin pirang aldaw tanganing mag-atender sa saro sa satong mga kombension, anggot ining nagsimbag na kun magdagos sia, sisisantehon sia kaini. Nagdagos man giraray si Roxana, na odok na namibi na logod dai sia masisante. Pagkatapos kaiyan, kalmado na sia. Arog nanggad kan sinabi sa saiya, kan Lunes pagkatapos kan kombension, talagang sinisante sia kan among nia. Nahadit si Roxana. Kaipuhan nia an trabahong iyan, dawa hababa an sueldo, tanganing makatabang sa pagsustento sa pamilya nia. Sia namibi giraray, asin hinorophorop nia an katunayan na sinuportaran sia nin Dios sa espirituwal paagi sa kombension, kaya siertong susuportaran man sia nin Dios sa pisikal. Mantang naglalakaw papuli, naheling ni Roxana an karatula na “Help Wanted” para sa mga eksperyensiado sa pagpadalagan nin mga makinang pantahi na ginagamit sa mga pabrika, asin nag-aplay sia. Naaraman kan manedyer na mayo siang eksperyensia, alagad inalok man giraray sia nin trabaho, na an sueldo haros doble kan dating sueldo nia. Namatean ni Roxana na sinimbag an mga pamibi nia. Minsan siring, an pinakadakulang bendisyon iyo na napaabotan nia kan maogmang bareta an nagkapira sa mga katrabaho nia. An lima sa sainda, kaiba an manedyer, nag-ako kan katotoohan asin nabautismohan.

¹⁷ Kun beses, tibaad garo baga dai sinisimbag an satong mga pamibi, o kun iyo man, bakong tolos-tolos o sa paagi na linalaoman niato. Kun arog kaiyan, daing duda na may marahay na dahelan. Aram iyan ni Jehova, alagad tibaad magigin malinaw sana iyan sa sato pag-abot nin panahon. Makakasierto kita sa sarong bagay—dai pinapabayaan nin Dios an mga maimbod sa saiya.—Heb. 6:10.

Tinatabangan na Mapangganahan an mga Pagbalo Asin Sugot

18, 19. (a) Taano ta makakalaom kita nin mga pagbalo asin sugot? (b) Paano mo mapapangganahan an mga pagbalo?

¹⁸ An mga lingkod ni Jehova dai nagngangalas kun napapaatubang sa sugot, pangluluya nin boot, persekusyon, asin panggigipit nin kairiba. An kinaban naoongis sa sato. (Juan 15:17-19) Pero, an banal na espiritu makakatabang sa sato na mapangganahan an ano man na kadepisilan na tibaad mapaatubang sa sato sa paglilingkod sa Dios. Dai itotogot ni Jehova na masugotan kita nin labi sa satong makakaya. (1 Cor. 10:13) Dai nia nanggad kita babayaan ni papabayaan sa ano man na paagi. (Heb. 13:5) An pagkuyog sa saiyang ipinasabong na Tataramon nagpoprotehir asin nagpaparigon sa sato. Apuera dian, puedeng pahiroon kan espiritu nin Dios an mga kapagtubod na itao sa sato an tabang sa panahon na talagang kaipuhan niato iyan.

¹⁹ Kita gabos logod na padagos na maghagad kan banal na espiritu paagi sa pamibi asin pag-adal kan Kasuratan. Logod na padagos kitang ‘pakosogon sa bilog na puersa sono sa mamuraway na kapangyarihan nin Dios tanganing lubos na makatagal asin magin matinios na may kagayagayahan.’—Col. 1:11.

[Nota sa Ibaba]

Ano an Isisimbag Nindo?

• Paano ka makakapag-andam na makaya an persekusyon?

• Ano an gigibohon mo kun may magkombensir sa saimo na dai isumbong an salang gibo?

• Sa ano ka makakasarig kun napapaatubang sa ano man na kasakitan?

[Mga Hapot Para sa Pag-adal]

[Ritrato sa pahina 28]

Ano an manonodan niato ki Josue asin Caleb?

[Ritrato sa pahina 29]

Paano mo matatabangan an sarong katood na nakagibo nin sala?