Ikinakaongis daw Nindo an Katampalasanan?
Ikinakaongis daw Nindo an Katampalasanan?
Naongis ka [Jesus] sa katampalasanan.”—HEB. 1:9.
1. Ano an itinokdo ni Jesus dapit sa pagkamoot?
BILANG pagdoon sa kahalagahan nin pagkamoot, sinabihan ni Jesu-Cristo an mga disipulo nia: “Tinatawan ko kamo nin bagong togon, na kamo magkaminorootmootan; siring kan pagkamoot ko sa saindo, na kamo man magkaminorootmootan. Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:34, 35) Pinagbotan ni Jesus an mga parasunod nia na magpaheling nin mapagsakripisyong pagkamoot sa lambang saro. An pagkamoot na iyan an magigin midbidan ninda. Sinadol man sinda ni Jesus: “Padagos na kamotan an saindong mga kaiwal asin ipamibi an mga nagpepersegir sa saindo.”—Mat. 5:44.
2. Maninigong pataluboon kan mga parasunod ni Cristo an pagkaongis sa ano?
2 Minsan siring, apuera sa pagtokdo sa mga disipulo nia manongod sa pagkamoot, itinokdo man sa sainda ni Jesus kun ano an ikakaongis. Ipinanongod ki Jesus an mga tataramon na ini: “Namoot ka sa katanosan, asin naongis ka sa katampalasanan [karatan].” (Heb. 1:9; Sal. 45:7) Ipinapaheling kaini na dapat niatong pataluboon bako sanang an pagkamoot sa katanosan kundi an pagkaongis man sa kasalan, o katampalasanan. Mahalagang mangnohon na si apostol Juan espesipikong nagsabi: “An gabos na nagsasagibo nin kasalan nagsasagibo man nin katampalasanan, kaya an kasalan katampalasanan.”—1 Juan 3:4.
3. Kun dapit sa pagkaongis sa katampalasanan, anong mga aspekto nin buhay an pag-oolayan sa artikulong ini?
3 Kun siring, bilang mga Kristiano, marahay na ihapot niato sa satong sadiri, ‘Ikinakaongis ko daw an katampalasanan?’ Siyasaton niato kun paano niato ikakapaheling an pagkaongis sa maraot sa minasunod na apat na aspekto nin buhay: (1) an atitud niato sa pag-abuso sa inomon na de alkohol, (2) an pagmansay niato sa okulto, (3) an reaksion niato sa imoralidad, asin (4) an pagmansay niato sa mga namomoot sa katampalasanan.
Dai Magpaoripon sa Alkohol
4. Taano ta igwa si Jesus nin katalingkasan sa pagtaram kan magpatanid manongod sa makosog na pag-inom?
4 Si Jesus nag-iinom nin arak paminsanminsan, na minamansay iyan na sarong balaog hale sa Dios. (Sal. 104:14, 15) Minsan siring, nungka niang inabuso an balaog na ini paagi sa pagpangana sa pag-inom. (Tal. 23:29-33) Huli kaini, si Jesus may katalingkasan sa pagtaram kan magsadol sia tumang sa siring na gibo. (Basahon an Lucas 21:34.) An salang paggamit nin inomon na de alkohol puedeng magresulta sa iba pang magabat na kasalan. Kaya, si apostol Pablo nagsurat: “Dai kamo maburat sa arak, na dian igwa nin karigsokan, kundi padagos kamong mapano nin espiritu.” (Efe. 5:18) Sinadol man nia an may edad nang mga babae sa kongregasyon na dai magin “oripon nin dakol na arak.”—Tito 2:3.
5. Ano an mga puedeng ihapot sa sadiri kan mga nag-iinom nin alkohol?
5 Kun nag-iinom ka nin alkohol, marahay na ihapot mo man sa saimong sadiri: ‘An atitud ko daw dapit sa makosog na pag-inom arog kan ki Jesus? Kun kaipuhan kong sadolon an iba dapit digdi, ako daw may katalingkasan sa pagtaram? Nag-iinom daw ako tanganing makadulag sa mga problema o makaginhawa sa tension? Gurano kadakol na alkohol an naiinom ko kada semana? Ano an reaksion ko kun may nagpaparisa na tibaad sobra na an pag-inom ko? Nangangatanosan daw ako o naaanggot pa ngani?’ An pagpaoripon niato sa dakol na arak makakaapektar sa satong kakayahan na mangatanosan nin tama asin magdesisyon nin madonong. An mga parasunod ni Cristo nagmamaigot na ingatan an saindang kakayahan na mag-isip.—Tal. 3:21, 22.
Likayan an mga Gibong Okulto
6, 7. (a) Ano an ginibo ni Jesus ki Satanas asin sa mga demonyo? (b) Taano ta lakop na marhay ngonyan an mga gibong okulto?
6 Mantang nasa daga, marigon na kinontra ni Jesus si Satanas asin an mga demonyo. Dai sia nagpadara sa direktang mga pag-atake ni Satanas sa saiyang kaimbodan. (Luc. 4:1-13) Aram man nia an tusong mga pagprobar na impluwensiahan an saiyang isip saka paggawe asin isinikwal nia an mga iyan. (Mat. 16:21-23) An mga maninigo tinabangan ni Jesus na makadulag sa maringis na pagdominar kan mga demonyo.—Mar. 5:2, 8, 12-15; 9:20, 25-27.
7 Pagkatukaw sa trono bilang Hade kan 1914, hinale ni Jesus sa kalangitan an nakakaolakit na impluwensia ni Satanas asin kan mga demonyo. Huli kaiyan, si Satanas mas determinado—ngonyan orog kisa kasuarin man—sa ‘panglalagalag sa bilog na ineerokan na daga.’ (Kap. 12:9, 10) Kun siring, dai kita maninigong magngalas kun lakop asin nag-oorog an pagkawili sa okulto. Ano an mga magigibo niato tanganing protehiran an satong sadiri?
8. Anong pagsiyasat sa sadiri an maninigong gibohon mapadapit sa satong pagpili nin aling-alingan?
8 Malinaw na nagpapatanid an Biblia dapit sa mga peligrong konektado sa espiritismo. (Basahon an Deuteronomio 18:10-12.) Ngonyan, iniimpluwensiahan ni Satanas asin kan mga demonyo an isip nin mga tawo paagi sa mga pelikula, libro, asin elektronikong mga kawat na nagpapalakop nin mga gibong okulto. Kun siring, kun nagpipili nin aling-alingan, an kada saro sa sato maninigong hapoton an saiyang sadiri: ‘Sa nakaaging mga bulan, nagin aling-alingan ko daw an mga pelikula, programa sa TV, elektronikong mga kawat, libro, o komiks na nagtatampok nin misteryosong mga gibo? Nasasabotan ko daw an kahalagahan kan pagsayuma sa impluwensia nin okulto, o an mga peligro daw na ini dai kong gayo iniintindi? Inisip ko lamang daw kun ano an tibaad mamatean ni Jehova manongod sa pagpili ko nin aling-alingan? Kun tinawan ko nin lugar sa sakong buhay an siring na maraot na mga impluwensia, papahiroon daw ako kan pagkamoot ko ki Jehova asin sa matanos na mga prinsipyo nia na desididong humiro tanganing isikwal iyan?’—Gibo 19:19, 20.
Himatea an Patanid ni Jesus Manongod sa Imoralidad
9. Paano an saro tibaad nagpapatalubo nin pagkamoot sa katampalasanan?
9 Sinuportaran ni Jesus an pamantayan ni Jehova sa seksuwal na moralidad. Sinabi nia: “Dai daw nindo nabasa na sia na naglalang sa sainda sa kapinonan ginibo sindang lalaki asin babae asin nagsabi, ‘Huli kaini babayaan nin lalaki an saiyang ama asin an saiyang ina asin magdadanay sa saiyang agom na babae, asin an duwa magigin sarong laman’? Kaya bako na sindang duwa, kundi sarong laman. Kun siring, an pinagsaro nin Dios dai pagsuwayon nin siisay man.” (Mat. 19:4-6) Aram ni Jesus na an ilinalaog niato sa isip paagi sa satong mata puedeng makaapektar sa satong puso. Kaya, sa saiyang Sermon sa Bukid, sinabi nia: “Nadangog nindo na sinabi, ‘Dai ka magsambay.’ Alagad ako nagsasabi sa saindo na an lambang saro na nagpaparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.” (Mat. 5:27, 28) An totoo, an mga nagbabaliwala kan patanid ni Jesus nagpapatalubo kan pagkamoot sa katampalasanan.
10. Magsaysay nin eksperyensia na nagpapaheling na an saro puedeng makatalingkas sa pornograpiya.
10 Nagpapalakop si Satanas nin seksuwal na imoralidad paagi sa pornograpiya. An presenteng sistema nin mga bagay pano kaiyan. An mga nagheheling nin pornograpiya nasasakitan na lingawan an imoral na mga eksena. Puede pa ngani sindang maadikto sa pornograpiya. Isip-isipa an nangyari sa sarong Kristiano. Sinabi nia: “Patago akong nagheheling nin pornograpiya. Garo man sana naglaog ako sa sarong kinaban nin pantasia na suway sa kinaban na dian pinaglilingkodan ko si Jehova. Aram ko na sala ini alagad sinabi ko sa sakong sadiri na inaako pa man giraray nin Dios an sakong paglilingkod.” Ano an nakapabago sa isip kan tugang na lalaking ini? Sinabi nia: “Maski ngani idto an pinakamasakit na ginibo ko, nagdesisyon ako na sabihon sa kamagurangan an sakong problema.” Sa kahurihurihi, nakatalingkas an tugang na ini sa nakakaraot na ugaleng ini. “Kan mahale ko na sa sakong buhay an kasalan na ini,” an pag-admitir nia, “namatean ko sa katapustapusi na talagang malinig na an konsensia ko.” An mga naoongis sa katampalasanan dapat na makanood na ikaongis an pornograpiya.
11, 12. Paano niato ikakapaheling an pagkaongis sa katampalasanan kun dapit sa satong pagpili nin musika?
11 An musika asin an liriko kaiyan puedeng makaimpluwensiang marhay sa satong emosyon asin, kun siring, sa satong piguratibong puso. An musika mismo sarong balaog hale sa Dios asin haloy nang ginagamit sa tunay na pagsamba. (Ex. 15:20, 21; Efe. 5:19) Alagad an maraot na kinaban ni Satanas nagpapalakop nin musika na nagpapamuraway sa imoralidad. (1 Juan 5:19) Paano nindo maaaraman kun baga an dinadangog nindong musika nakakaramog o dai?
12 Puede kamong magpoon paagi sa paghapot sa sadiri: ‘An dinadangog ko daw na mga kanta nagpapamuraway sa paggadan, pagsambay, pakikisaro, asin paglanghad? Kun babasahon ko sa sarong tawo an liriko nin nagkapirang kanta, iisipon daw nia na ikinakaongis ko an katampalasanan, o maririsa daw sa liriko na naramogan an sakong puso?’ Dai niato masasabi na ikinakaongis niato an katampalasanan kun pinapamuraway niato iyan sa kanta. “An mga bagay na minaluwas sa ngoso gikan sa puso,” an sabi ni Jesus, “asin an mga iyan an nakakaparamog sa tawo. Halimbawa, gikan sa puso minaluwas an maraot na mga pangangatanosan, mga paggadan, mga pagsambay, mga pakikisaro, mga paghabon, putik na mga patotoo, mga paglanghad.”—Mat. 15:18, 19; ikomparar an Santiago 3:10, 11.
Arogon an Pagmansay ni Jesus sa mga Namomoot sa Katampalasanan
13. Paano minansay ni Jesus an mga natuod na sa paggibo nin kasalan?
13 Sinabi ni Jesus na sia nagdatong tanganing apodon an mga parakasala, o mga tampalasan, na magsolsol. (Luc. 5:30-32) Pero, paano nia minansay an mga natuod na sa paggibo nin kasalan? Mapuersang nagpatanid si Jesus tumang sa pagpaimpluwensia sa sainda. (Mat. 23:15, 23-26) Malinaw man niang sinabi: “Bakong gabos na nagsasabi sa sako, ‘Kagurangnan, Kagurangnan,’ makakalaog sa kahadean kan kalangitan, kundi an naggigibo kan kabotan kan sakong Ama na nasa kalangitan. Dakol an masarabi sa sako sa aldaw na iyan [kun isagibo na nin Dios an paghokom], ‘Kagurangnan, Kagurangnan, bakong kami naghula sa ngaran mo, asin nagpaluwas nin mga demonyo sa ngaran mo, patin naggibo nin dakol na makapangyarihan na gibo sa ngaran mo?’” Minsan siring, isisikwal nia an mga daing pagsolsol na nagsasagibo nin katampalasanan, na sinasabi: “Rumayo kamo sa sako.” (Mat. 7:21-23) Taano ta arog kaiyan an paghokom sa sainda? Huling linalapastangan ninda an Dios asin dinadanyaran an iba paagi sa saindang tampalasan na mga gibo.
14. Taano an habong magsolsol na mga parakasala ta hinahale sa kongregasyon?
14 Ipinagboot kan Tataramon nin Dios na haleon sa kongregasyon an habong magsolsol na mga parakasala. (Basahon an 1 Corinto 5:9-13.) Kaipuhan ini huli sa kisiera tolong dahelan: (1) tanganing mapagdanay na daing katuyawan an ngaran ni Jehova, (2) tanganing maprotehiran an kongregasyon sa maraot na impluwensia, asin (3) tanganing matabangan an nagkasala na magsolsol kun posible.
15. Kun gusto niatong magdanay na maimbod ki Jehova, anong seryosong mga hapot an maninigo niatong pag-isipan?
15 An pagmansay daw niato sa mga natuod na sa saindang tampalasan na pamumuhay arog kan ki Jesus? Kaipuhan niatong pag-isipan an mga hapot na ini: ‘Makikiasosyar daw ako nin regular sa tiwalag o sa nagdisasosyar kan sadiri nia sa Kristianong kongregasyon? Paano kun sia sarong kapamilya na dai mi na kaibanan sa harong?’ An siring na situwasyon puedeng magin pagbalo nanggad sa satong pagkamoot sa katanosan asin sa kaimbodan niato sa Dios. *
16, 17. Anong kadepisilan an inatubang nin sarong Kristianang ina, asin ano an nakatabang sa saiya na suportaran an areglo nin pagtitiwalag sa habong magsolsol na mga parakasala?
16 Isip-isipa an eksperyensia nin sarong tugang na babae na may adultong aking lalaki na dating namomoot ki Jehova. Minsan siring, pag-abot nin panahon, guminibo ini nin katampalasanan asin dai nagsolsol. Huli kaini, itiniwalag sia sa kongregasyon. Namomotan kan satong tugang na babae si Jehova, alagad namomotan man nia an aki nia asin nagin masakiton nanggad sa saiya na iaplikar an sono sa Kasuratan na pagboot na likayan an pakikiiba sa aki nia.
17 Ano kutana an itatao mong sadol sa tugang na ini? Tinabangan sia nin sarong magurang sa kongregasyon na marealisar na nasasabotan ni Jehova an kolog na namamatean nia. Dinagka sia kaini na isip-isipon an kolog na posibleng marhay na naeksperyensiahan ni Jehova kan magrebelde an nagkapira sa saiyang mga aking anghel. Ipinaliwanag sa saiya kan magurang sa kongregasyon na dawa ngani aram ni Jehova kun gurano kakolog an siring na pangyayari, kahagadan nia na itiwalag an habong magsolsol na mga parakasala. Isinapuso kan tugang na babae an mga pagirumdom asin maimbod niang sinuportaran an areglo nin pagtitiwalag. * An siring na kaimbodan nagpapaogma sa puso ni Jehova.—Tal. 27:11.
18, 19. (a) An dai na niato pakikikomunikar sa sarong paragibo nin katampalasanan nagpapatunay kan satong pagkaongis sa ano? (b) Ano an puedeng magin resulta kun maimbod kita sa Dios asin sa areglo nia?
18 Kun arog kaiyan an situwasyon mo, girumdoma tabi na kadamay mo si Jehova. Paagi sa dai na pakikikomunikar sa tiwalag o disasosyado, ipinapaheling mo na naoongis ka sa mga saboot asin paggawe na nagin dahelan kaiyan. Minsan siring, ipinapaheling mo man na namomotan mo an nagkasala asin huli kaiyan gusto mong gibohon an pinakaikakarahay nia. Huli sa kaimbodan mo ki Jehova, tibaad mas dakula an posibilidad na an nadisiplina magsolsol asin magbalik ki Jehova.
19 An sarong natiwalag dangan kan huri nakabalik nagsurat: “Naoogma ako na huli sa pagkamoot ni Jehova sa saiyang banwaan, sinierto nia na an saiyang organisasyon danay na malinig. An tibaad sobra kaestrikto sa pagheling kan mga taga luwas parehong kaipuhan asin mamomoton nanggad na gibohon.” Sa heling mo, natabangan daw an tawong ini na magkongklusyon nin arog kaiyan kun an mga miembro kan kongregasyon, kaiba na an pamilya nia, regular pa man giraray na nakikikomunikar sa saiya mantang tiwalag sia? An satong pagsuportar sa sono sa Kasuratan na areglo nin pagtitiwalag nagpapatunay na namomotan niato an katanosan asin minimidbid niato an deretso ni Jehova na magtao kan mga pamantayan sa paggawe.
“Ikaongis Nindo an Maraot”
20, 21. Taano ta mahalagang manodan na ikaongis an katampalasanan?
20 “Papagdanayon nindo an toltol na pag-iisip, magin mapagbantay,” an patanid ni apostol Pedro. Taano? Huling “an saindong kaiwal, an Diablo, naglalakaw na siring sa nagngangarob na leon, na naghahanap nin masisiba.” (1 Ped. 5:8) Ika daw an masisiba na iyan? Nakadependeng marhay iyan sa kun gurano mo nanonodan na ikaongis an katampalasanan.
21 An pagpatalubo nin pagkaongis sa maraot bakong madali. Namundag kita sa kasalan, asin nabubuhay kita sa kinaban na nagpapanigo sa makalaman na mga kamawotan. (1 Juan 2:15-17) Minsan siring, paagi sa pag-arog ki Jesu-Cristo asin pagpatalubo nin hararom na pagkamoot ki Jehova Dios, makakapanggana kita sa pagpatalubo nin pagkaongis sa katampalasanan. Magin determinado kitang ‘ikaongis an maraot,’ na lubos na nagtitiwala na ‘binabantayan ni Jehova an saiyang mga maimbod; sa kamot kan mga marigsok iliniligtas nia sinda.’—Sal. 97:10.
[Mga Nota sa Ibaba]
^ par. 15 Para sa detalyadong pagtokar sa temang ini, helingon an Setyembre 15, 1981 isyu kan The Watchtower, pahina 26-31.
^ par. 17 Helingon man an Enero 15, 2007 isyu kan An Torrengbantayan, pahina 17-20.
Ano an Isisimbag Nindo?
• Ano an makakatabang sa sato na siyasaton an satong atitud sa mga inomon na de alkohol?
• Anong pag-iingat an puede niatong gibohon laban sa mga gibong okulto?
• Taano ta peligroso an pornograpiya?
• Paano niato ikakapaheling an pagkaongis sa katampalasanan kun tiwalag an sarong namomotan niato?
[Mga Hapot Para sa Pag-adal]
[Ritrato sa pahina 29]
Kun nag-iinom ka nin alkohol, ano an maninigo mong isip-isipon?
[Ritrato sa pahina 30]
Mag-ingat sa maraot na impluwensia na nasa aling-alingan
[Ritrato sa pahina 31]
An nagheheling nin pornograpiya nagpapatalubo nin pagkamoot sa ano?
