Mga Hapot Hale sa mga Parabasa

Taano ta naanggot si Moises sa mga aking lalaki ni Aaron na si Eleazar asin Itamar pagkagadan kan mga tugang nindang lalaki na si Nadab asin Abihu, asin paano sia napakalma?—Lev. 10:16-20.

Dai nahaloy pagkatapos na an mga saserdote ibugtak sa katongdan para sa paglilingkod sa tabernakulo, ginadan ni Jehova an mga aki ni Aaron na si Nadab asin Abihu huling nagdolot sinda sa Saiya nin iba man na kalayo. (Lev. 10:1, 2) Pinagbotan ni Moises an natadang mga aking lalaki ni Aaron na dai pagtangisan an nagadan na mga tugang ninda. Dangan, dai nahaloy, naanggot si Moises ki Eleazar asin Itamar huling dai ninda kinakan an kanding na dolot manongod sa kasalan. (Lev. 9:3) Taano ta arog kaiyan an reaksion ni Moises?

An mga ley na itinao ni Jehova ki Moises espesipikong nagsabi na an saserdoteng nagdolot nin dolot manongod sa kasalan dapat na magkakan nin parte kaiyan sa patyo kan tolda nin katiriponan. An paggibo kaiyan ibinibilang na pag-ako kan paninimbagan para sa mga kasalan kan mga nag-atang. Minsan siring, an dolot dai dapat kakanon kun an ibang dugo kan atang dinara sa Banal na Lugar, an enot na kuarto kan santuaryo. Imbes, dapat iyan na totongon.—Lev. 6:24-26, 30.

Minalataw na pagkatapos kan makaturotristeng mga nangyari kan aldaw na idto, naheling ni Moises an pangangaipong siertohon na nasunod an gabos na pagboot ni Jehova. Kan madiskobre nia na tinotong an kanding na dolot manongod sa kasalan, anggot niang hinapot si Eleazar asin Itamar kun taano ta dai ninda kinakan iyan siring sa ipinagboot, huling an dugo kaiyan dai iinatubang ki Jehova sa Banal na Lugar.—Lev. 10:17, 18.

Si Aaron an nagsimbag sa hapot ni Moises, huling an natadang mga saserdote malinaw na huminiro na may pag-aprobar nia. Huli sa pagkagadan kan duwa sa mga aki nia, tibaad nag-isip-isip si Aaron kun baga sa aldaw na iyan an siisay man sa mga saserdote puedeng kumakan, na may marahay na konsensia, kan dolot manongod sa kasalan. Tibaad inisip nia na an pagkakan ninda kaiyan dai makakapaogma ki Jehova, dawa ngani mayo man sindang direktang paninimbagan sa pagkakasala ni Nadab asin Abihu.—Lev. 10:19.

Tibaad nangorognang nangatanosan si Aaron na sa aldaw na enot na ginibo kan mga kapamilya nia an saindang mga katongdan bilang saserdote, nag-ingat kutana sindang marhay tanganing mapaogma si Jehova dawa sa pinakasadit na detalye. Minsan siring, an ngaran ni Jehova linanghadan ni Nadab asin Abihu, asin naglaad an kaanggotan ni Jehova sa sainda. Kaya, tibaad naisip ni Aaron na an mga kapamilya nin mga saserdoteng nakagibo kan siring na kasalan dai maninigong makikabtang sa banal na dolot.

Minalataw na inako ni Moises an simbag kan tugang nia, huling an teksto nagkongklusyon: “Kan iyan madangog ni Moises, nagin kawiliwili iyan sa pagheling nia.” (Lev. 10:20) Minalataw na pati si Jehova nakontento sa simbag ni Aaron.