Nagigirumdoman daw Nindo?

Napahalagahan daw nindo an pagbasa kan dai pa sana nahahaloy na mga isyu kan An Torrengbantayan asin The Watchtower? Bueno, helingon kun masisimbag nindo an minasunod na mga hapot:

• Taano ta makakapagtiwala kita na totoong lugar an hardin nin Eden?

Ilinaladawan iyan kan Biblia bilang totoo, na nagtatao nin espesipikong mga detalye manongod sa lokasyon kaiyan. An duwa sa mga salog na nasambitan sa pagkasaysay yaon pa ngonyan. Bakong arog kaini ipinepresentar an mga eroestorya o fairy tale. Si Jesus, an pinakamasasarigan na Saksi, nagtaram dapit ki Adan asin Eva bilang tunay na mga tawo.—1/1, pahina 5-6, 9.

• Aram daw nin Dios na magkakasala si Adan asin Eva?

Dai. Tinawan sinda ni Jehova nin intelihensia asin libreng kabotan, na huli kaiyan makakapili sinda kun makuyog o dai. Minsan ngani may kakayahan na aramon nin patienot an mangyayari, mapamili an Dios sa paggamit kan kakayahan na iyan.—1/1, pahina 13-15.

• Ginagamit daw kan tunay na mga Kristiano an ngaran nin Dios bilang anting-anting?

An nagkapira minamansay an sarong bagay o simbolo bilang anting-anting na milagrosong nagpoprotehir sa sainda, alagad an banwaan nin Dios bakong arog kaiyan an pagmansay sa ngaran nia. Nagtutubod sinda ki Jehova asin naghihingoang gibohon an kabotan nia, sa siring nagpapaili sinda sa ngaran nia. (Sof. 3:12, 13)—1/15, pahina 5-6.

• Sairisay sa Israel an nakinabang sa kaugalean na pag-arahit o pagsimot sa inanihan?

Nakinabang an gabos. Sa mga dukha na kaipuhan mansimot sa inanihan, itinotokdo kaiyan an pagigin mahigos. An iba nadagka na magin matinao asin magsarig sa bendisyon nin Dios.—2/1-E, pahina 15.

• Taano ta isinikwal ni Jehova si Hadeng Saul?

Si Saul dapat kutanang naghalat sa propeta nin Dios na idolot kaini an atang, alagad dai iyan kinuyog kan hade asin idinolot nia mismo an atang. Kan huri, dai nia kinuyog an pagboot na pohoon an mga kaiwal.—2/15, pahina 22-23.

• Paano niato ikakapaheling na naoongis kita sa katampalasanan?

Dai kita mapaoripon sa alkohol, lilikayan niato an mga gibong okulto, asin hihimateon niato an patanid ni Jesus manongod sa imoralidad. Halimbawa, lilikayan niato an pornograpiya asin an mga pantasia na posibleng magin resulta kaiyan. (Mat. 5:27, 28) Dai man kita makikiasosyar sa mga tiwalag.—2/15, pahina 29-32.

• Ano an pambihira sa nadiskobre kan mga arkeologo na suanoy na mga harong nin putyukan sa presenteng Israel?

An mga arkeologo nakadiskobre nin labing 30 harong nin putyukan, na kinakarkulo kan mga iskolar na nakakagibo nin sagkod sa kabangang toneladang tangguli kada taon. Ipinaparisa kaini na nag-aataman kaidto nin putyukan sa daga na sinabi nin Dios na ‘magbobolos an gatas asin tangguli.’ (Ex. 3:8)—3/1-E, pahina 15.

• Paano si Jeremias arog nin kahoy “na itinanom sa kataed kan katubigan, na pinapakanap an mga gamot kaiyan”? (Jer. 17:7, 8)

Sia nungkang nagpondo sa pagigin mabunga; ni nagpaimpluwensia man sia sa mga paraolog-olog. Imbes, nagdanay sia sa Gikanan nin tubig na nagsusustenir sa buhay, na isinasapuso an sinasabi sa saiya nin Dios.—3/15, pahina 14.

• Ano an punto ni Jesus sa pagsabi ki Marta na pira sanang bagay an kaipuhan o saro sana? (Luc. 10:41, 42)

Dai nia sinasabing materyalistiko si Marta huli sa pag-andam nin manlaenlaen na putahe; ni binabaliwala man nia an pagmamaigot kaini. Imbes, idinodoon nia kun ano an dapat na mga prioridad. Dai inaaprobetsaran ni Marta an daing kaagid na oportunidad na pararomon an pagtubod nia.—4/1, pahina 12-13.

• Ano an nagkapirang ilegalidad sa pagbista ki Jesus?

An korte mayo nin dinangog na mga argumento para sa pag-absuelto. Falsong mga testigo an kinua. Banggi dinangog an kaso. An pagbista pinonan asin dinesisyonan sa iyo man sanang aldaw.—4/1, pahina 20.