Naririsa daw Nindo an Ebidensia kan Paggiya nin Dios?

DAI pa nakaheling nin arog kaini an mga Israelita ni an mga Egipcio. Mantang an mga Israelita lagdoan na naghaharale sa Egipto, sarong hariging panganoron an nasa harani ninda asin nagdanay na kaiba ninda. Kun banggi, iyan nagigin sarong hariging kalayo. Pambihira nanggad! Alagad saen iyan hale? Ano an katuyohan kaiyan? Asin pakalihis nin mga 3,500 na taon, ano an manonodan niato sa nagin pagmansay kan Israel sa “hariging kalayo asin panganoron”?—Ex. 14:24.

Ihinahayag kan Tataramon nin Dios an ginigikanan asin katuyohan kan harigi, na nagsasabi: “Si Jehova nangengenotan sa sainda kun aldaw sa sarong hariging panganoron tanganing maggiya sa sainda sa dalan, asin kun banggi sa sarong hariging kalayo tanganing tawan sinda nin liwanag sa pagbaklay kun aldaw asin kun banggi.” (Ex. 13:21, 22) Ginamit ni Jehova Dios an hariging kalayo asin panganoron tanganing giyahan an banwaan nia paluwas sa Egipto asin mantang nasa kaawagan. Kaipuhan na andam sindang humiro tanganing sundan iyan. Kan aatakehon na an banwaan nin Dios kan naglalapag na mga hukbo kan Egipto, buminalyo an harigi sa tahaw kan duwang grupo tanganing protehiran an mga Israelita. (Ex. 14:19, 20) Minsan ngani dai itinokdo kan harigi an pinakadirektang ruta, an pagsunod sa paggiya kaiyan iyo an solamenteng paagi na an mga Israelita makaabot sa Dagang Panuga.

An pagkaigwa kan harigi nag-asegurar sa banwaan nin Dios na yaon sa sainda si Jehova. Nagrepresentar iyan ki Jehova, asin kun beses nagtataram sia hale dian. (Bil. 14:14; Sal. 99:7) Ipinapaheling man kan panganoron na si Moises an ninombrahan ni Jehova na gumiya sa nasyon. (Ex. 33:9) Siring man, an huring nakarekord na pagpaheling kan panganoron nagpatunay na ninombrahan ni Jehova si Josue bilang kasalihid ni Moises. (Deut. 31:14, 15) Tunay nanggad, an kapangganahan kan lagdoan na pagharale kan mga Israelita nakadepende sa pakarisa ninda sa ebidensia kan paggiya nin Dios dangan pagsunod dian.

Nalingawan Ninda an Ebidensia

Kan enot na maheling kan mga Israelita an hariging iyan, posibleng marhay na namungnan sinda. Pero makamomondo, dawa pirmeng naheheling kan mga Israelita an milagrong iyan, dai pa man giraray sinda nagkaigwa nin nagdadanay na kompiansa ki Jehova. Nagkapirang beses nindang kinuestion an paggiya nin Dios. Kan linalapag sinda kan hukbo nin Egipto, dai sinda nagpaheling nin tiwala sa kapangyarihan ni Jehova na magligtas. Imbes, an lingkod nin Dios na si Moises inakusaran ninda na ginigiyahan sinda pasiring sa saindang kagadanan. (Ex. 14:10-12) Pagkaligtas ninda sa Dagat na Pula, naggumodgumod sinda tumang ki Moises, Aaron, asin Jehova huli sa soboot kakulangan nin kakanon asin tubig. (Ex. 15:22-24; 16:1-3; 17:1-3, 7) Asin pirang semana pagkatapos kaiyan, pinirit ninda si Aaron na gumibo nin bulawan na ogbon na baka. Imahinara na sana! Sa sarong lugar sa kampo, naheheling kan mga Israelita an hariging kalayo asin panganoron—an kahangahangang ebidensia kan Saro na naggiya sa sainda paluwas sa Egipto—asin bakong harayo hale dian, nagpoon sindang sumamba sa daing buhay na idolo, na nagsasabi: “Ini an saimong Dios, O Israel, na naggiya sa saimo paluwas sa daga nin Egipto.” ‘Grabe nanggad na kawaran nin galang’!—Ex. 32:4; Neh. 9:18.

An rebelyosong mga gibo kan Israel nagpaheling nin risang marhay na pagbaliwala sa paggiya ni Jehova. An problema bako sa saindang literal na pagheling kundi sa espirituwal na pananaw ninda. Naheheling ninda an harigi, alagad dai na  ninda napapahalagahan an kahulogan kaiyan. Minsan ngani ‘nakolgan an boot pati kan Banal kan Israel’ huli sa mga ginigibo ninda, si Jehova maheherakon asin padagos na nagtao nin paggiya paagi sa harigi sagkod na makaabot sa Dagang Panuga an Israel.—Sal. 78:40-42, 52-54; Neh. 9:19.

Helingon an Ebidensia kan Paggiya nin Dios Ngonyan

Sa presenteng panahon man, nungkang pinapabayaan ni Jehova an banwaan nia na mayo nin malinaw na paggiya. Kun paanong dai nia inasahan an mga Israelita na humanap nin sadiri nindang ruta, dai man hinahagad sa sato ngonyan na magsadiri sa paghanap kan dalan pasiring sa ipinanugang bagong kinaban. Si Jesu-Cristo an iinasignar na Lider kan kongregasyon. (Mat. 23:10; Efe. 5:23) May ipinagkatiwala siang autoridad sa grupong maimbod na oripon, na kompuesto kan maimbod na mga Kristiano na linahidan nin espiritu. Dangan, an grupong oripon na iyan nagnonombra nin mga paraataman sa Kristianong kongregasyon.—Mat. 24:45-47; Tito 1:5-9.

Paano kita makakasierto kun siisay an grupong maimbod na oripon, o mayordomo, na iyan? Mangnoha kun paano iyan ilinaladawan mismo ni Jesus: “Siisay man nanggad an maimbod na mayordomo, an mapagmansay, na nonombrahan kan saiyang kagurangnan na mamahala sa saiyang grupo nin mga katabang tanganing padagos na magtao sa sainda nin igong kakanon sa tamang panahon? Maogma an oripon na iyan, kun sa pagdatong kan saiyang kagurangnan maabotan siang naggigibo nin siring!”—Luc. 12:42, 43.

Huli kaini, an grupong mayordomo “maimbod,” na nungkang tinatraydor o binabayaan si Jehova, si Jesus, an mga katotoohan sa Biblia, o an banwaan nin Dios. Huling “mapagmansay,” an grupong mayordomo nagpapaheling nin marahay na paghusgar sa pagdirehir sa mahalagang marhay na paghuhulit kan ‘maogmang bareta kan kahadean’ asin paggibo nin “mga disipulo sa mga tawo kan gabos na nasyon.” (Mat. 24:14; 28:19, 20) “Sa tamang panahon,” an grupong mayordomo makinuyog na nagdidistribwir nin espirituwal na kakanon na nakakarahay asin masustansia. An pag-oyon ni Jehova naheheling paagi sa mga bendisyon na itinatao nia sa saiyang banwaan, siring kan pag-oswag, paggiya sa mahahalagang desisyon, orog na pakasabot sa mga katotoohan sa Biblia, proteksion na dai mapara sa kamot kan mga kaiwal ninda, asin katoninongan nin isip saka puso.—Isa. 54:17; Fil. 4:7.

Maghimate sa Paggiya nin Dios

Paano niato ikakapaheling na pinapahalagahan niato an paggiya nin Dios? Si apostol Pablo nagsabi: “Magin makinuyog kamo sa mga nangengenot sa saindo asin magin mapagpasakop.” (Heb. 13:17) An paggibo kaiyan tibaad bakong pirmeng pasil. Sa pag-ilustrar: Ipamugtak na saro kang Israelita kan panahon ni Moises. Imahinara na pagkatapos mong maglakaw nin harohalawig, nagpondo an harigi. Sagkod noarin daw iyan dian? Sarong aldaw? Sarong semana? Nagkapirang bulan? Nag-isip-isip ka, ‘Sulit daw na iruluwas ko an gabos na nakaimpake kong gamit?’ Sa primero, tibaad an iruluwas mo sana iyo an mga pinakakaipuhan. Pero, pakalihis nin pira sanang aldaw, huling nauyam ka sa pagparabutbot sa mga gamit mo, pinonan mong iluwas an gabos. Alagad, kan haros ikinaluwas mo na gabos, naheling mong nag-iitaas an harigi—asin kaipuhan mong mag-impake giraray! Iyan bakong pasil o kombenyente. Pero, kaipuhan kan mga Israelita na ‘humale tolos.’—Bil. 9:17-22.

Kun siring, ano an reaksion niato kun tinatawan kita nin instruksion hale sa Dios? Hinihingoa daw niatong iaplikar “tolos” iyan? O padagos sana daw niatong ginigibo an mga bagay-bagay arog kan kinatodan niato? Pamilyar daw kita sa pinakabagong mga instruksion, arog kan mapadapit sa pagkondukta nin pag-adal sa Biblia, paghuhulit sa mga tawo na iba an lenguahe, regular na pakikikabtang sa pampamilyang pagsamba, pakikikooperar sa mga Hospital Liaison Committee, asin angay na paggawe sa mga kombension? Ipinapaheling man niato an satong pagpahalaga sa paggiya nin Dios paagi sa pag-ako nin konseho. Kun kaipuhan na gumibo nin mahalagang mga desisyon, dai kita nagtitiwala sa sadiri niatong kadonongan kundi nagpapagiya kita ki Jehova asin sa organisasyon nia. Asin kun paanong an sarong aki minahanap nin  proteksion sa mga magurang nia kun may bagyo, minahanap man kita nin proteksion sa organisasyon ni Jehova kun minaabot sa sato an mga problema kan kinaban na ini siring sa makosog na bagyo.

Siempre, bakong perpekto an mga nangengenot sa daganon na kabtang kan organisasyon nin Dios, asin iyo man si Moises. Dawa siring, an harigi padagos na nagin ebidensia nin pagnombra asin pag-oyon sa saiya nin Dios. Mangnohon man na bakong an kada Israelita an madeterminar kun noarin sinda mapadagos sa pagbaklay. Imbes, minahiro an banwaan “sa pagboot ni Jehova paagi ki Moises.” (Bil. 9:23) Sa siring, posibleng marhay na an nagtatao nin senyal na humiro iyo si Moises, an pinakapaagihan kan instruksion nin Dios.

Ngonyan, an grupong mayordomo ni Jehova nagtatao nin klarong instruksion kun kaipuhan nang humiro. Paano iyan ginigibo kan mayordomo? Paagi sa mga artikulo sa An Torrengbantayan asin An Satong Ministeryo sa Kahadean, bagong mga publikasyon, asin mga pahayag sa mga asamblea saka kombension. An mga instruksion ipinapaabot man sa mga kongregasyon paagi sa nagbibiaheng mga paraataman, mga surat, o mga pagsasanay na inaatenderan kan mga tugang na lalaki na may mga paninimbagan sa kongregasyon.

Malinaw daw nindong naririsa an ebidensia kan paggiya nin Dios? Ginagamit ni Jehova an organisasyon nia tanganing giyahan kita na banwaan nia sa huring mga aldaw na ini mantang nasa arog-kaawagan na maraot na kinaban ni Satanas. Bilang resulta, igwa kita nin pagkasararo, pagkamoot, asin seguridad.

Kan makaabot an Israel sa Dagang Panuga, si Josue nagsabi: “Aram nindong marhay sa bilog nindong puso asin sa bilog nindong kalag na mayo ni sarong tataramon sa gabos na marahay na tataramon na sinabi sa saindo ni Jehova na saindong Dios an nasudya. Iyan gabos naotob para sa saindo.” (Jos. 23:14) Siring man, an banwaan nin Dios ngonyan daing saltong makakaabot sa ipinanugang bagong kinaban. Minsan siring, kun baga personal kitang makakaiba duman dependeng marhay sa satong pagigin mapakumbaba asin andam na sumunod sa paggiya nin Dios. Kun siring, logod na kita gabos magpadagos sa pagrisa kan ebidensia kan paggiya ni Jehova!

[Mga Ritrato sa pahina 5]

Ginigiyahan kita kan organisasyon ni Jehova ngonyan

Mga publikasyon na ilinuwas sa kombension

Pag-adal sa teokratikong mga paadalan

Pagsasanay sa mga pagtiripon bago maglingkod