Mga Pamilyang Kristiano—“Magpuka”

“Magpuka kita asin papagdanayon niato an toltol na pag-iisip.”—1 TES. 5:6.

1, 2. Ano an kaipuhan tanganing an pamilya makapagdanay talagang puka sa espirituwal?

MANONGOD sa “dakula asin makangingirhat na aldaw ni Jehova,” si apostol Pablo nagsurat sa mga Kristiano sa Tesalonica: “Mga tugang, mayo kamo sa kadikloman, tanganing abotan kamo kan aldaw na iyan nin siring sa mga parahabon, huli ta kamo gabos mga aki nin liwanag asin mga aki nin aldaw. Bako kitang sa banggi ni sa kadikloman.” Sinabi pa ni Pablo: “Kun siring, dai kita magtorog arog kan ginigibo kan iba, kundi magpuka kita asin papagdanayon niato an toltol na pag-iisip.”—Joel 2:31; 1 Tes. 5:4-6.

² An konseho ni Pablo sa mga taga Tesalonica nangorognang angay sa mga Kristianong nabubuhay sa “panahon kan katapusan.” (Dan. 12:4) Mientras na nagrarani an katapusan kan maraot na sistema nin mga bagay ni Satanas, determinado sia na italikod sa tunay na pagsamba an pinakadakol na makakaya nia. Kun siring, madonong na isapuso niato an konseho ni Pablo na magdanay na mapagbantay sa espirituwal. Tanganing makapagdanay talagang puka an pamilyang Kristiano, mahalagang isaabaga kan kada miembro an saiyang paninimbagan na sono sa Kasuratan. Kun siring, ano an papel kan mga agom na lalaki asin babae saka kan mga aki sa pagtabang sa saindang pamilya na “magpuka”?

Mga Agom na Lalaki—Arogon “an Marahay na Pastor”

3. Segun sa 1 Timoteo 5:8, ano an kaiba sa paninimbagan nin lalaki bilang payo nin pamilya?

³ ‘An payo nin babae iyo an lalaki,’ an sabi kan Biblia. (1 Cor. 11:3) Ano an kalabot sa paninimbagan nin lalaki bilang payo nin pamilya? Sa pagsambit sa sarong aspekto nin pagkapayo, an Kasuratan nagsasabi: “Kun an siisay man dai nagsusustento sa mga sadiri nia, asin orog na sa kasararo nia sa harong, sia nagpainda kan pagtubod asin orog pa karaot kisa sa tawong dai nin pagtubod.” (1 Tim. 5:8) Iyo, maninigong sustentohan nin lalaki an pamilya nia. Pero, tanganing matabangan nia an saiyang pamilya na makapagdanay na puka sa espirituwal, dapat na bako sana siang parasustento. Kaipuhan man niang parigonon sa espirituwal an pamilya nia, na tinatabangan an bilog na pamilya na pakosogon an saindang relasyon sa Dios. (Tal. 24:3, 4) Paano nia magigibo iyan?

4. Ano an makakatabang sa sarong lalaki tanganing mapangganang mapakosog sa espirituwal an pamilya nia?

⁴ Huling “an agom na lalaki iyo an payo kan saiyang agom na babae kun paanong an Cristo iyo man an payo kan kongregasyon,” maninigong siyasaton asin arogon nin lalaking may agom an klase nin pagkapayo ni Jesus sa kongregasyon. (Efe. 5:23) Pag-isipan kun paano ilinadawan ni Jesus an relasyon nia sa saiyang mga parasunod. (Basahon an Juan 10:14, 15.) Ano an liabe tanganing magin mapanggana an sarong lalaki na gustong pakosogon sa espirituwal an saiyang pamilya? Iyo ini: Pag-adalan an mga sinabi asin ginibo ni Jesus bilang “an marahay na pastor,” dangan ‘sunodon na marhay an saiyang mga lakad.’—1 Ped. 2:21.

5. Ano an aram kan Marahay na Pastor manongod sa kongregasyon?

⁵ An relasyon nin pastor asin mga karnero nakabasar sa pakamidbid asin pagtitiwala sa lambang saro. Aram kan pastor an gabos manongod sa mga karnero nia, asin sia midbid saka pinagtitiwalaan kan mga karnero. Midbid ninda asin sinusunod an boses nia. “Midbid ko an sakong mga karnero saka midbid ako kan sakong mga karnero,” an sabi ni Jesus. Bakong hababaw sana an pakamidbid nia sa kongregasyon. An Griegong tataramon digdi na trinadusir na “midbid” nagpaparisa nin “personal asin hararom na pakamidbid.” Iyo, midbid personalmente kan Marahay na  Pastor an mga karnero nia. Aram nia an mga pangangaipo kan kada saro sa sainda, an mga kaluyahan ninda, asin kun ano an positibo sa sainda. Mayong ano man na bagay manongod sa mga karnero nia an dai naririsa kan satong Arogan. Asin midbid nin lubos kan mga karnero an pastor asin nagtitiwala sinda sa pangengenot nia.

6. Paano maaarog nin mga agom na lalaki an Marahay na Pastor?

⁶ Tanganing an agom na lalaki makapamayo na inaarog si Cristo, dapat siang makanood na mansayon an saiyang sadiri bilang pastor asin an mga nasa pangangataman nia bilang mga karnero. Maninigo siang magmaigot na mamidbid niang marhay an pamilya nia. Posible daw talaga an siring na pakamidbid? Iyo, kun sia marahay makikomunikar sa gabos na miembro kan pamilya nia, naghihinanyog sa mga problema ninda, nangengenot sa mga aktibidad kan pamilya, asin kun sinisierto nia na marahay an mga desisyon nia sa mga bagay na arog kan pampamilyang pagsamba, pag-atender sa mga pagtiripon, paglilingkod sa langtad, pamamasyar, asin pag-aling-aling. Kun an pangengenot kan Kristianong agom na lalaki nakabasar bako sanang sa kaaraman sa Tataramon nin Dios kundi sa pakamidbid man sa mga ipinaniwala sa saiya, posibleng marhay na an mga kapamilya nia magtitiwala sa saiyang pamamayo asin na sia magkakaigwa nin satispaksion na maheling an pagdadanay nindang sararo sa tunay na pagsamba.

7, 8. Paano maaarog nin agom na lalaki an Marahay na Pastor sa pagpaheling nin kapadangatan sa mga nasa pangangataman nia?

⁷ Padangat man nin marahay na pastor an mga karnero nia. Kun pinag-aadalan niato an mga pagkasaysay sa Ebanghelyo dapit sa buhay asin ministeryo ni Jesus, naaapresyar nanggad niato an kapadangatan na ipinaheling ni Jesus sa mga disipulo nia. ‘Itinao pa ngani nia an saiyang kalag para sa mga karnero.’ Maninigong arogon nin mga agom na lalaki si Jesus sa pagpaheling nin kapadangatan sa mga nasa pangangataman ninda. Imbes na maisog na dominaron an saiyang agom, an lalaki na nagmamawot kan pag-oyon nin Dios padagos na mamomotan an saiyang agom “kun paanong namotan man kan Cristo an kongregasyon.” (Efe. 5:25) An pananaram nia maninigong magin maboot asin makonsiderasyon, huling angay na tawan nin onra an agom nia.—1 Ped. 3:7.

⁸ Sa pagsasanay sa mga aki, maninigong marigon na suportaran kan payo kan pamilya an diosnon na mga prinsipyo. Minsan siring, dapat nanggad siang magpaheling nin kapadangatan sa mga aki nia. An kaipuhan na disiplina maninigong itao sa mamomoton na paagi. An nagkapirang aki tibaad nangangaipo nin harohalawig na panahon bago ninda masabotan kun ano an inaasahan sa sainda. Sa kamugtakan na iyan, an sarong ama maninigong mas pasensioso sa sainda. Kun pirmeng sinusunod nin mga lalaki an halimbawa ni Jesus, nagigin ligtas asin tiwasay an kamugtakan sa harong. Nakakamtan kan pamilya ninda an klase nin espirituwal na katiwasayan na ilinaladawan sa awit kan salmista.—Basahon an Salmo 23:1-6.

9. Arog kan patriarkang si Noe, ano an paninimbagan nin Kristianong mga agom na lalaki, asin ano an makakatabang sa sainda na isaabaga iyan?

⁹ An patriarkang si Noe nabuhay sa panahon kan katapusan kan kinaban na kinabubuhayan nia. Alagad ‘ilinigtas sia ni Jehova kaibanan nin pito pa kan magpaabot Sia nin delubyo sa sarong kinaban nin mga tawong bakong diosnon.’ (2 Ped. 2:5) May paninimbagan si Noe na tabangan an pamilya nia na makaligtas sa Baha. An mga payo nin Kristianong pamilya nasa siring man na kamugtakan sa huring mga aldaw na ini. (Mat. 24:37) Mahalagang marhay nanggad na pag-adalan ninda an halimbawa kan “marahay na pastor” asin pagmaigotan na arogon sia!

Mga Agom na Babae—‘Pakosoga an Saindong Pamilya’

10. Ano an kahulogan nin pagpasakop nin agom na babae sa saiyang agom?

¹⁰ “Magpasakop an mga agom na babae sa saindang agom na lalaki nin siring sa Kagurangnan,” an isinurat ni apostol Pablo. (Efe. 5:22) An mga tataramon na ini dai sa ano man na paagi nagpaparisa nin papel na mayong dignidad. Bago lalangon an enot na babaeng si Eva, an tunay na Dios nagsabi: “Bakong marahay na an lalaki padagos na magsolo. Magibo ako nin katabang para sa saiya, bilang komplemento nia.” (Gen. 2:18) An papel nin “katabang” asin “komplemento”—na iyo an pagigin mapagsuportar sa agom nia mantang  inaasikaso kaini an mga paninimbagan sa pamilya—onorable nanggad.

11. Paano ‘pinapakosog nin arogan na agom na babae an pamilya nia’?

¹¹ An arogan na agom na babae nagmamaigot para sa ikakarahay kan pamilya nia. (Basahon an Talinhaga 14:1.) Bakong arog nin mangmang na babae, na mayong galang sa areglo nin pagkapayo, an madonong na babae may hararom na paggalang sa probisyon na ini. Imbes na ipaheling an karakteristiko kan kinaban na pagigin masinuway asin independiente, nagpapasakop sia sa agom nia. (Efe. 2:2) An mangmang na agom na babae dai nag-aalangan na magtaram nin negatibo dapit sa agom nia, mantang an madonong na agom na babae nagmamaigot tanganing an saiyang agom orog na irespeto kan mga aki nia asin kan iba. An siring na agom na babae nag-iingat na dai menoson an pagkapayo kan agom nia paagi sa pangriribok o pakipagdiskutiran sa saiya. Kalabot man an pag-ekonomiya. Posibleng marhay na minamalgastar nin mangmang na babae an pinagpagalan na kuarta kan pamilya nia. Bakong arog kaiyan an mapagsuportar na agom na babae. Nakikikooperar sia sa agom nia sa pinansial na mga bagay. Risang-risa sa mga pamamaagi nia an marahay na paghusgar asin pag-ekonomiya. Dai nia ginigipit an agom nia na mag-obertaym sa trabaho.

12. Ano an magigibo nin agom na babae tanganing matabangan an saiyang pamilya na “magpuka”?

¹² Tinatabangan nin arogan na agom na babae na “magpuka” an pamilya paagi sa pagtabang sa agom nia sa espirituwal na pagtotokdo sa mga aki. (Tal. 1:8) Aktibo niang sinusuportaran an programa nin Pampamilyang Pagsamba. Mapagsuportar man sia sa agom nia kun nagtatao ini nin konseho asin disiplina sa mga aki ninda. Laen nanggad sia sa dai nakikikooperar na agom na babae, na an mga aki napapabayaan sa pisikal asin espirituwal!

13. Taano ta mahalaga para sa agom na babae na suportaran an agom nia sa aktibong pakikikabtang kaini sa teokratikong mga aktibidad?

¹³ Ano daw an namamatean nin mapagsuportar na agom na babae kun naheheling an agom nia na may aktibong papel sa Kristianong kongregasyon? Iyo, magayagaya sia! Baga man an agom nia ministeryal na lingkod, magurang sa kongregasyon, o tibaad miembro nin Hospital Liaison Committee o Regional Building Committee, maogma sia sa pribilehio kaini. An aktibong pagsuportar sa agom nia paagi sa tataramon asin gibo siertong may kalabot na pagsasakripisyo nia. Alagad aram nia na an pakikikabtang kan agom nia sa teokratikong mga aktibidad nakakatabang sa bilog na pamilya na magdanay na puka sa espirituwal.

14. (a) Ano an tibaad magin depisil sa mapagsuportar na agom na babae, asin paano nia iyan puedeng atubangon? (b) Paano an agom na babae nakakakontribwir sa ikakarahay kan bilog na pamilya?

¹⁴ An pagigin arogan sa pagsuportar sa agom tibaad magin depisil sa agom na babae kun dai sia oyon sa desisyon kan agom nia. Dawa pa siring, sia nagpapaheling nin “toninong asin mahoyong espiritu” asin nakikikooperar tanganing magin mapanggana an desisyon kan agom nia. (1 Ped. 3:4) Pinagmamaigotan nin marahay na agom na  babae na sunodon an marahay na halimbawa nin diosnon na mga babae kaidto, arog ni Sara, Rut, Abigail, asin ni Maria na ina ni Jesus. (1 Ped. 3:5, 6) Inaarog man nia an may edad nang mga babae ngonyan na “magalang sa hiro.” (Tito 2:3, 4) Paagi sa pagpaheling nin pagkamoot asin paggalang sa agom nia, an arogan na agom na babae may dakulang ikinakakontribwir sa kapangganahan kan saindang pag-agoman asin sa ikakarahay kan bilog na pamilya. An saiyang harong sarong lugar nin karangahan asin katiwasayan. Para sa sarong espirituwal na lalaki, an mapagsuportar na agom na babae daing kaagid sa halaga!—Tal. 18:22.

Mga Hoben—‘Magturuhok sa mga Bagay na Dai Naheheling’

15. Paano an mga hoben makikikooperar sa saindang mga magurang tanganing “magpuka” an pamilya?

¹⁵ Kamong mga hoben, paano kamo makikikooperar sa mga magurang nindo tanganing “magpuka” sa espirituwal an saindong pamilya? Isip-isipa an premyo na iinaalok sa saindo ni Jehova. Tibaad poon pa sa pagkaaki, ipinapaheling na sa saindo kan mga magurang nindo an mga retrato dapit sa buhay sa Paraiso. Mientras na nagdadakula kamo, tibaad ginagamit ninda an Biblia asin Kristianong mga publikasyon tanganing tabangan kamo na maimahinar kun anong klase an buhay na daing katapusan sa bagong kinaban. Kun kamo danay na nakaturuhok sa paglilingkod ki Jehova asin pinaplano nindo an saindong buhay oyon dian, matatabangan kamo kaiyan na “magpuka.”

16, 17. Ano an magigibo nin mga hoben tanganing mapangganang makadalagan sa paorumbasan para sa buhay?

¹⁶ Isapuso an mga tataramon ni apostol Pablo sa 1 Corinto 9:24. (Basahon.) Dumalagan sa paorumbasan para sa buhay na determinadong manggana. Pumili nin dalan na maresulta sa pagkamit kan premyo na buhay na daing katapusan. Tinogotan nin dakol na madisturbo sinda sa saindang pagturuhok sa premyo huli sa pagmamaigot na magkamit nin materyal na mga bagay. Kamangmangan nanggad iyan! An pagplano na nakasentro sa pagkamit nin kayamanan dai minagiya sa tunay na kaogmahan. An mga bagay na mababakal nin kuarta temporaryo sana. Kaya, magturuhok kamo sa “mga bagay na dai naheheling.” Taano? Huling “an mga bagay na dai naheheling daing katapusan.”—2 Cor. 4:18.

¹⁷ Kaiba sa “mga bagay na dai naheheling” an mga bendisyon kan Kahadean. Magplano tanganing makapamuhay sa paagi na makakamit an mga iyan. An tunay na kaogmahan naggigikan sa paggamit kan saindong buhay sa paglilingkod ki Jehova. An paglilingkod sa tunay na Dios nagtatao nin mga oportunidad na aboton an pangmadalian asin panghaloyan na mga pasohan. * An pagkaigwa nin realistikong espirituwal na mga pasohan makakatabang sa saindo na magdanay na nakapokus sa paglilingkod sa Dios na may katuyohan na makamit an premyo na buhay na daing katapusan.—1 Juan 2:17.

18, 19. Paano maaaraman nin sarong hoben kun ikinasapuso na nia an katotoohan?

¹⁸ Mga hoben, an enot na lakdang sa dalan pasiring sa buhay iyo an pagsapuso nindo kan katotoohan. Nagibo na daw nindo iyan? Hapoton an sadiri: ‘Ako daw espirituwal na tawo, o an sako daw na pakikikabtang sa espirituwal na mga aktibidad nakadepende sa sakong mga magurang? Pinapatalubo ko daw an mga kualidad na nakakapaogma sa Dios? Naghihingoa daw ako na mapagdanay an daing liwat-liwat na rutina nin pakikikabtang sa mga aktibidad na konektado sa tunay na pagsamba, arog nin regular na pamimibi, pag-adal, pag-atender sa mga pagtiripon, asin paglilingkod sa langtad? Minarani daw ako sa Dios paagi sa pagpatalubo nin personal na relasyon sa saiya?’—Sant. 4:8.

 ¹⁹ Horophoropon an halimbawa ni Moises. Dawa ngani nagdakula sa kultura nin ibang nasyon, mas pinili niang mamidbid na parasamba ki Jehova imbes na aki kan aking babae ni Faraon. (Basahon an Hebreo 11:24-27.) Mga Kristianong hoben, kaipuhan man nindong magin determinado na maimbod na maglingkod ki Jehova. Sa paggibo kaiyan, makakamit nindo an tunay na kaogmahan, an pinakamarahay na klase nin buhay ngonyan, asin an paglaom na “makapangapot nin marigon sa tunay na buhay.”—1 Tim. 6:19.

20. Sa paorumbasan para sa buhay, sairisay an magkakamit kan premyo?

²⁰ Sa suanoy na karawat, saro sana an nanggagana sa paorumbasan. Bakong arog kaiyan sa paorumbasan para sa buhay. Kabotan nin Dios “na an gabos na klase nin tawo makaligtas asin makaabot sa tamang kaaraman dapit sa katotoohan.” (1 Tim. 2:3, 4) Dakol an mapanggana nang nagdalagan na naenot sa saindo, asin dakol an nagdadalagan pa kasabay nindo. (Heb. 12:1, 2) An premyo makakamtan kan gabos na dai nagsusuko. Kaya magin determinadong manggana!

21. Ano an totokaron sa sunod na artikulo?

²¹ “An dakula asin makangingirhat na aldaw ni Jehova” dai malilikayan. (Mal. 4:5) An mga pamilyang Kristiano dai maninigong abotan kaiyan na bakong andam. Mahalagang marhay na isaabaga kan bilog na pamilya an saindang paninimbagan na sono sa Kasuratan. Ano pa an magigibo nindo tanganing magdanay na listo sa espirituwal asin mapakosog an relasyon nindo sa Dios? Totokaron sa sunod na artikulo an tolong bagay na may epekto sa espirituwal na ikakarahay kan bilog na pamilya.

[Nota sa Ibaba]

Ano an Nanodan Nindo?

• Taano ta kaipuhan kan mga pamilyang Kristiano na “magpuka”?

• Paano maaarog nin agom na lalaki an Marahay na Pastor?

• Ano an magigibo nin arogan na agom na babae tanganing magin mapagsuportar sa agom nia?

• Paano makakatabang an mga hoben tanganing magdanay na puka sa espirituwal an saindang pamilya?

[Mga Hapot Para sa Pag-adal]

[Ritrato sa pahina 9]

An mapagsuportar na agom na babae daing kaagid sa halaga para sa sarong espirituwal na lalaki