‘O an Rarom kan Kadonongan nin Dios!’
‘O an Rarom kan Kadonongan nin Dios!’
“O an rarom kan mga kayamanan asin kadonongan patin kaaraman nin Dios! Dai nanggad marorop an saiyang mga paghokom asin dai nanggad masusog an saiyang mga dalan!”—ROMA 11:33.
1. Ano an pinakadakulang pribilehio para sa bautisadong mga Kristiano?
ANO an pinakadakulang pribilehio na itinao kasuarin man sa saimo? Tibaad an enot na magsabong sa isip mo iyo an sarong asignasyon o onra na itinao sa saimo. Minsan siring, para sa bautisadong mga Kristiano, an pinakadakulang pribilehio iyo an pagtogot sa sato na magkaigwa nin dayupot na relasyon sa solamenteng tunay na Dios, si Jehova. Huli kaini, kita ‘namidbid nia.’—1 Cor. 8:3; Gal. 4:9.
2. Taano ta dakulaon na pribilehio an mamidbid si Jehova asin mamidbid man nia kita?
2 Taano ta dakulaon na pribilehio an mamidbid si Jehova asin mamidbid man nia kita? Huling sia bako sanang an pinakadakulang Persona sa bilog na uniberso kundi sia man an Paraprotehir sa mga namomotan nia. Si propeta Nahum pinasabngan na magsurat: “Si Jehova marahay, sarong pailihan sa aldaw nin kasakitan. Asin namimidbid nia an mga nagpapaili sa saiya.” (Nah. 1:7; Sal. 1:6) Sa katunayan, an mismong paglaom niato para sa buhay na daing sagkod nakadepende sa satong pakamidbid sa tunay na Dios asin sa saiyang Aki na si Jesu-Cristo.—Juan 17:3.
3. Ano an kalabot sa pakamidbid sa Dios?
3 An pakamidbid sa Dios bako sanang an pakaaram sa literal na ngaran nia. Dapat tang mamidbid sia bilang Katood, na nasasabotan niato an saiyang mga gusto asin dai gusto. An pamumuhay niato kaoyon kan kaaraman na iyan igwa man nin mahalagang marhay na papel sa pagpaheling niato na midbid tang marhay an Dios. (1 Juan 2:4) Alagad may kaipuhan pa kun talagang gusto niatong mamidbid si Jehova. Kaipuhan niatong maaraman bako sanang kun ano an saiyang ginibo kundi kun paano asin kun taano ta siring kaiyan an paghiro nia. Mientras na mas nasasabotan niato an mga katuyohan ni Jehova, mas napapangalas man kita sa “rarom kan kadonongan nin Dios.”—Roma 11:33.
Dios na May Katuyohan
4, 5. (a) Arog kan pagkagamit sa Biblia, sa ano nanonongod an tataramon na “katuyohan”? (b) Iilustrar kun paanong an sarong katuyohan bako sanang sa sarong paagi puedeng aboton.
4 Si Jehova sarong Dios na may katuyohan, asin nasasambitan sa Biblia an saiyang “daing sagkod na katuyohan.” (Efe. 3:10, 11) Ano man nanggad an kahulogan kan pananaram na ini? Arog kan pagkagamit sa Biblia, an tataramon na “katuyohan” nanonongod sa espesipikong pasohan, o intension, na bako sanang sa sarong paagi puedeng aboton.
5 Sa pag-ilustrar: Tibaad gusto nin saro na magbiahe pasiring sa sarong espesipikong lugar. Kaya, an makaabot sa lugar na iyan iyo an saiyang pasohan, o katuyohan. Tibaad may laen-laen siang pagpipilian dapit sa puede niang lunadan asin agihan. Mantang nagbibiahe sa pinili niang ruta, tibaad mapaatubang sia sa dai inaasahan na kamugtakan nin panahon, grabeng trapik, asin pagsera nin mga tinampo kaya kaipuhan niang magbago nin ruta. Pero, ano man na pagbabago an gibohon nia, maaabot pa man giraray nia an saiyang pasohan kun makaabot sia sa saiyang destinasyon.
6. Paano ipinaheling ni Jehova na andam siang gumibo nin mga pagbabago sa pag-otob kan saiyang katuyohan?
6 Ipinaheling man ni Jehova na andam siang gumibo nin mga pagbabago sa pag-otob kan saiyang daing sagkod na katuyohan. Huling kinokonsiderar nia an katalingkasan na magdesisyon kan may intelihensiang mga linalang, andam niang bagohon an paagi nin pag-otob nia kan saiyang katuyohan. Halimbawa, pag-olayan niato kun paano inootob ni Jehova an katuyohan nia dapit sa ipinanugang Banhi. Sa kapoonpooni, sinabi ni Jehova sa enot na mag-agom: “Magbunga asin magdakol kamo asin panoon nindo an daga patin sakopon nindo iyan.” (Gen. 1:28) An sinambit daw na katuyohan na iyan naolang kan pagrebelde sa hardin nin Eden? Dai nanggad! Huli sa bagong situwasyon na iyan, tolos na naghiro si Jehova paagi sa pagbago nin “ruta” tanganing maotob an katuyohan nia. Ihinula nia an pag-abot nin “banhi” na mahale kan danyos na ginibo kan mga rebelde.—Gen. 3:15; Heb. 2:14-17; 1 Juan 3:8.
7. Ano an manonodan niato sa paglaladawan ni Jehova sa saiyang sadiri na mababasa sa Exodo 3:14?
7 An kakayahan ni Jehova na makibagay sa bagong mga kamugtakan mantang inootob an saiyang katuyohan kaoyon nin paglaladawan nia sa saiyang sadiri. Kan iatubang ni Moises ki Jehova an posibleng mga olang sa asignasyon na itinao sa saiya, inasegurar sia ni Jehova paagi sa pagsabi: “‘Ako magigin ano man na gusto kong ako magin.’ Asin idinugang nia: ‘Ini an sasabihon mo sa mga aki ni Israel, “Isinugo ako sa saindo ni ako magigin.”’” (Ex. 3:14) Iyo, kaya ni Jehova na magin ano man na kaipuhan niang magin tanganing lubos na otobon an saiyang katuyohan! Magayon an pagkailustrar kaini ni apostol Pablo sa kapitulo 11 kan libro nin Roma. Dian, sinambit nia an sarong simbolikong poon nin olibo. An pagsiyasat sa ilustrasyon na ini makakapatalubo kan satong pag-apresyar sa rarom kan kadonongan ni Jehova, baga man an paglaom niato sa langit o buhay na daing sagkod digdi sa daga.
An Katuyohan ni Jehova Mapadapit sa Ihinulang Banhi
8, 9. (a) Anong apat na pundamental na katotoohan an makakatabang sa sato na masabotan an ilustrasyon dapit sa poon nin olibo? (b) Anong hapot an pag-oolayan niato ngonyan, asin ano an ihahayag kaiyan manongod ki Jehova?
8 Bago niato masabotan an ilustrasyon dapit sa poon nin olibo, kaipuhan niatong maaraman an apat na katotoohan mapadapit sa pagkaotob kan katuyohan ni Jehova may koneksion sa ihinulang banhi. Enot, nanuga si Jehova ki Abraham na “an gabos na nasyon sa daga magbebendisyon nanggad kan saindang sadiri” paagi sa saiyang banhi, o mga naggikan sa saiya. (Gen. 22:17, 18) Ikaduwa, an nasyon nin Israel na naggikan ki Abraham inalokan kan oportunidad na sa sainda maggikan an sarong “kahadean nin mga saserdote.” (Ex. 19:5, 6) Ikatolo, kan an Mesiyas dai inako kan kadaklan sa mga Israelita sa laman, guminibo si Jehova nin ibang paagi tanganing mabilog an sarong “kahadean nin mga saserdote.” (Mat. 21:43; Roma 9:27-29) Ultimo, minsan ngani si Jesus an pangenot na kabtang kan banhi ni Abraham, an iba tinawan man kan pribilehio na magin kabtang kan banhing iyan.—Gal. 3:16, 29.
9 Apuera sa apat na pundamental na katotoohan na ini, manonodan niato sa libro nin Kapahayagan na 144,000 na indibiduwal an mamamahala kaiba ni Jesus bilang mga hade asin saserdote sa langit. (Kap. 14:1-4) Inaapod man sindang “mga aki ni Israel.” (Kap. 7:4-8) Alagad an 144,000 daw gabos Israelita, o Judio, sa laman? An simbag dian naghahayag na si Jehova andam na gumibo nin pagbabago tanganing maotob an saiyang katuyohan. Helingon niato ngonyan kun paano an surat ni apostol Pablo sa mga taga Roma makakatabang sa sato na masimbag iyan.
Sarong “Kahadean nin mga Saserdote”
10. Anong oportunidad an itinao sana kaidto sa nasyon nin Israel?
10 Arog kan nasambitan sa enotan, an nasyon nin Israel sana an may oportunidad na paggikanan kan magigin mga miembro nin “kahadean nin mga saserdote asin banal na nasyon.” (Basahon an Roma 9:4, 5.) Alagad ano an mangyayari kun umabot na an ipinanugang Banhi? Makokompleto daw kan nasyon nin Israel sa laman an 144,000 na espirituwal na Israelita na magigin sekondaryong kabtang kan banhi ni Abraham?
11, 12. (a) Kasuarin nagpoon an pagpili kan magigin mga miembro kan langitnon na Kahadean, asin ano an reaksion kan kadaklan sa mga Judiong nabubuhay kan panahon na idto? (b) Paano kinompleto ni Jehova an “bilog na bilang” kan mga magigin banhi ni Abraham?
11 Basahon an Roma 11:7-10. Bilang sarong nasyon, isinikwal si Jesus kan mga Judio kan enot na siglo. Kaya bako na sanang sinda an may oportunidad na paggikanan kan banhi ni Abraham. Minsan siring, kan ponan kan Pentecostes 33 C.E. an pagpili sa magigin mga miembro kan langitnon na “kahadean nin mga saserdote,” an imbitasyon inako nin nagkapirang Judio na tama an kamugtakan nin puso. An mga ini, na pirang ribo sana, arog sa “sarong natatada” kun ikokomparar sa bilog na Judiong nasyon.—Roma 11:5.
12 Pero, paano kokompletohon ni Jehova an “bilog na bilang” kan mga magigin banhi ni Abraham? (Roma 11:12, 25) Mangnohon an simbag na itinao ni apostol Pablo: “An nangyari bakong siring baga sa nasudya an tataramon nin Dios. Huli ta bakong gabos na gikan sa Israel [sa laman] talagang ‘Israel.’ Ni huling banhi [gikan] sinda ni Abraham mga aki na man sinda gabos [kabtang kan banhi ni Abraham] . . . An boot sabihon, an mga aki sa laman bako nanggad an mga aki nin Dios, kundi an mga aki paagi sa panuga iyo an ibinibilang na banhi.” (Roma 9:6-8) Kaya, an pagigin naggikan ki Abraham sa laman bakong estriktong kahagadan sa kaotoban kan katuyohan ni Jehova mapadapit sa banhi.
An Simbolikong Poon nin Olibo
13. Sa ano nagrerepresentar an (a) poon nin olibo, (b) gamot kaiyan, (c) hawak kaiyan, asin (d) mga sanga kaiyan?
13 An mga kabtang kan banhi ni Abraham ikinomparar ni apostol Pablo sa mga sanga sa simbolikong poon nin olibo. * (Roma 11:21) An kinultibar na poon na ini nin olibo nagrerepresentar sa kaotoban kan katuyohan nin Dios mapadapit sa Abrahamikong tipan. An gamot kan kahoy banal asin nagrerepresentar ki Jehova bilang an nagtatao nin buhay sa espirituwal na Israel. (Isa. 10:20; Roma 11:16) An hawak kan kahoy nagrerepresentar ki Jesus bilang an pangenot na kabtang kan banhi ni Abraham. Sa kabilogan, an mga sanga nagrerepresentar sa “bilog na bilang” kan mga kaiba sa sekondaryong kabtang kan banhi ni Abraham.
14, 15. Sairisay an “pinutol” sa kinultibar na poon nin olibo, asin sairisay an isinugpon dian?
14 Sa ilustrasyon dapit sa poon nin olibo, an mga Judio sa laman na nagsikwal ki Jesus iinagid sa mga sanga nin olibo na “pinutol.” (Roma 11:17) Paagi kaiyan, nawara ninda an oportunidad na magin kabtang kan banhi ni Abraham. Alagad sairisay an masalida sa sainda? Sa punto de vista kan mga Judio sa laman, na ipinag-oorgolyo an pagigin gikan ninda ki Abraham, imposibleng salidahan sinda kan mga tawo kan mga nasyon. Alagad patienot na sindang pinatanidan ni Juan na Bautisador na kun bobooton ni Jehova, kaya Niang magbangon nin mga aki ki Abraham hale sa mga gapo mismo.—Luc. 3:8.
15 Kun siring, ano an ginibo ni Jehova tanganing otobon an saiyang katuyohan? Ipinaliwanag ni Pablo na an mga sanga nin layas na poon nin olibo isinugpon sa kinultibar na poon nin olibo tanganing isalida sa mga pinutol. (Basahon an Roma 11:17, 18.) Kaya, an linahidan nin espiritu na mga Kristiano na hale sa mga nasyon, arog nin nagkapira sa kongregasyon sa Roma, piguratibong isinugpon sa simbolikong poon na ini nin olibo. Sa paaging ini, sinda nagin kabtang kan banhi ni Abraham. Kan enot, sinda arog nin mga sanga nin layas na olibo na mayo lamang nin oportunidad na magin kabtang kan espesyal na tipan na ini. Alagad tinawan sinda ni Jehova nin oportunidad na magin espirituwal na mga Judio.—Roma 2:28, 29.
16. Paano ipinaliwanag ni apostol Pablo an pagbilog kan bagong espirituwal na nasyon?
16 Ipinaliwanag ni apostol Pablo an situwasyon sa paaging ini: “Para sa saindo [espirituwal na mga Israelita, kaiba an Hentil na mga Kristiano], kun siring, na sia [Jesu-Cristo] mahalagang marhay, huli ta kamo nagtutubod; alagad para sa mga dai nagtutubod, ‘an mismong gapo na isinikwal kan mga paratogdok nagin an pamayohan kan anggulo,’ asin ‘sarong gapong nakakapasingkog asin gapong nakakapadasmag.’ . . . Alagad kamo ‘rasang pinili, grupo nin mga saserdote na hade, banal na nasyon, banwaan na magigin espesyal na pagsadiri, tanganing ipahayag nindo nin mahiwas an mga kamurawayan’ kan saro na nag-apod sa saindo hale sa kadikloman pasiring sa saiyang makangangalas na liwanag. Huli ta kamo kaidto bakong banwaan, alagad ngonyan banwaan na nin Dios; kamo kaidto an dai kinaherakan, alagad ngonyan iyo na an mga kinaherakan.”—1 Ped. 2:7-10.
17. Paano masasabing “bakong natural” an ginibo ni Jehova?
17 May ginibo si Jehova na para sa dakol dai nanggad linalaoman. Ilinadawan ni Pablo na an nangyari “bakong natural.” (Roma 11:24) Paano nagin siring? Bueno, garo pambihira asin bako nganing natural na isugpon sa kinultibar na poon nin kahoy an layas na sanga, alagad iyan an ginibo nin nagkapirang paraoma kan enot na siglo. * Sa kaagid na paagi, may ekstraordinaryong ginibo si Jehova. Sa punto de vista nin mga Judio, dai kaya kan mga Hentil na mamunga nin maaakong bunga. Minsan siring, an mga ini mismo ginibo ni Jehova na kabtang nin “sarong nasyon” na namumunga kan bunga kan Kahadean. (Mat. 21:43) Poon sa paglahid ki Cornelio—an enot na nakombertir na bakong turing Hentil—kan 36 C.E., nagin bukas sa bakong turing mga Hentil an oportunidad na ikasugpon sa simbolikong poon na ini nin olibo.—Gibo 10:44-48. *
18. Pagkatapos kan 36 C.E., may anong oportunidad an mga Judio sa laman?
18 Nangangahulogan daw ini na pagkatapos kan 36 C.E., mayo na nin ano man na oportunidad an mga Judio sa laman na magin kabtang kan banhi ni Abraham? Dai. Si Pablo nagpaliwanag: “Kun dai sinda magdanay sa saindang kawaran nin pagtubod, sinda [mga Judio sa laman] isusugpon man; huli ta kaya nin Dios na isugpon giraray sinda. Huling kun ika pinutol sa poon nin olibong layas, asin bakong natural na isinugpon sa kinultibar na poon nin olibo, lalo na nanggad na an mga ini na natural isusugpon sa sainda mismong poon nin olibo!” *—Roma 11:23, 24.
“Maliligtas an Bilog na Israel”
19, 20. Ano an inootob ni Jehova arog kan iiniilustrar kan simbolikong poon nin olibo?
19 Iyo, an katuyohan ni Jehova dapit sa “Israel nin Dios” naootob sa makangangalas na paagi. (Gal. 6:16) Arog kan sinabi ni Pablo, “maliligtas an bilog na Israel.” (Roma 11:26) Sa itinalaan na panahon ni Jehova, “an bilog na Israel”—na iyo an kompletong bilang kan espirituwal na mga Israelita—magigin mga hade asin saserdote sa langit. Mayo nin makakaolang sa kaotoban kan katuyohan ni Jehova!
20 Arog kan ihinula, an banhi ni Abraham—si Jesu-Cristo kaiba an 144,000—matao nin mga bendisyon sa “mga tawo kan mga nasyon.” (Roma 11:12; Gen. 22:18) Sa paaging ini, an gabos na lingkod nin Dios makikinabang sa areglong ini. Tunay nanggad, mantang hinohorophorop niato an kaotoban kan daing sagkod na katuyohan ni Jehova, napapangalas nanggad kita sa “rarom kan mga kayamanan asin kadonongan patin kaaraman nin Dios.”—Roma 11:33.
[Mga Nota sa Ibaba]
^ par. 13 Minalataw na an poon nin olibo dai naglaladawan sa Israel sa laman. Minsan ngani may mga hade asin saserdote na naggikan sa Israel sa laman, dai nagin kahadean nin mga saserdote an nasyon na iyan. Segun sa ley, an mga hade nin Israel dai puedeng magin saserdote. Kun siring, an simbolikong poon nin olibo dai naglaladawan sa Israel sa laman. Iiniilustrar ni Pablo kun paano an katuyohan nin Dios na magbilog nin “kahadean nin mga saserdote” naotob may koneksion sa espirituwal na Israel. Paglilinaw ini kan ipinublikar sa Watchtower na Agosto 15, 1983, pahina 14-19.
^ par. 17 Helingon an kahon na “Pagsugpon nin mga Sanga nin Layas na Olibo—Taano?”
^ par. 17 Nangyari ini sa katapusan kan tolo may kabangang taon na itinaong oportunidad sa mga Judio sa laman na magin kabtang kan bagong espirituwal na nasyon. An pangyayaring ini nasambitan sa hula dapit sa 70 semana nin mga taon.—Dan. 9:27.
^ par. 18 An Griegong prefix na trinadusir na “kinultibar” sa Roma 11:24 hale sa tataramon na nangangahulogan na “marahay, ekselente” o “angay nanggad sa katuyohan kaiyan.” Nangorognang ginagamit iyan sa mga bagay na nakakaotob sa katuyohan kan paggibo sa mga ini.
Nagigirumdoman daw Nindo?
• Ano an manonodan niato manongod ki Jehova sa paagi nin pag-otob nia kan saiyang katuyohan?
• Sa Roma kapitulo 11, sa ano nagrerepresentar an . . .
poon nin olibo?
gamot kaiyan?
hawak kaiyan?
mga sanga kaiyan?
• Taano an proseso nin pagsugpon ta “bakong kaoyon nin naturalesa”?
[Mga Hapot Para sa Pag-adal]
[Kahon/Ritrato sa pahina 24]
Pagsugpon nin mga Sanga nin Layas na Olibo—Taano?
▪ Si Lucius Junius Moderatus Columella sarong Romanong soldados asin paraoma na nabuhay kan enot na siglo C.E. Nabantog sia huli sa isinurat niang 12 libro dapit sa buhay sa probinsia asin pag-oma.
Sa saiyang ikalimang libro, kinotar nia an suanoy na kasabihan na ini: “Sia na nag-aarado kan tanoman nin olibo, hinahagadan iyan nin bunga; sia na naglalaag dian nin abono, nakikimaherak para sa bunga; sia na nagtatakras kaiyan, pinipirit iyan na mamunga.”
Pagkaladawan sa mga poon nin kahoy na marambong alagad dai namumunga, irinekomendar nia an minasunod na paagi: “Marahay na labotan an mga iyan gamit an barena asin isuksok sa labot an berdeng sanga nin layas na poon nin olibo; an resulta, magigin mabunga an kahoy huling garo man sana nalahian iyan nin mabungang klase nin kahoy.”
[Ritrato sa pahina 23]
Nasasabotan daw nindo an ilustrasyon dapit sa simbolikong poon nin olibo?
