Pagsunod ki Cristo, an Perpektong Lider

AN MGA nagsusunod sa namamahalang mga tawo sa parate nadedesganar. Minsan siring, laen nanggad an epekto kan pangengenot ni Cristo sa mga nagpapasakop dian. Si Jesus nagsabi: “Madia kamo sa sako, kamo gabos na nagpapagal asin nagagabatan, asin papaginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin magkakaigwa kamo nin kaginhawahan para sa saindong kalag.” (Mat. 11:28, 29) An pangengenot ni Jesus nakakapaginhawa asin nakakapaogma. Interesado nanggad sia sa mga hamak asin inaapi, na inaagda sinda na magpasan kan saiyang may kabootan na sakal. Pero, ano an kalabot sa pagsunod sa pangengenot ni Jesus?

“Si Cristo nagsakit para sa saindo,” an isinurat ni Pedro, “na winalatan kamo nin modelo tanganing sunodon nindo nin estrikto an mga lakad nia.” (1 Ped. 2:21) Gurano kahalaga para sa sato na sunodon an mga lakad ni Jesus? Imahinara na kaiba ka sa sarong grupo na kaipuhan umagi sa sarong lugar na tinalbongan nin mga bomba asin saro sana sa saindo an nakakaaram kun paano makakaagi dian nin ligtas. Bako daw na estrikto mong susunodon an mga lakad nia, na tibaad nagtotongtong pa ngani sa mga tinotongtongan nia? Kaagid kaiyan, an satong seguridad sa maabot na panahon nakadepende sa pamumuhay na estriktong inaarog an halimbawa ni Jesus. Kaiba dian an paghinanyog asin pagkuyog sa saiya saka pakikipagtabangan sa mga representante nia.

Magdangog Asin Magkuyog

Sa pagtatapos kan saiyang Sermon sa Bukid, si Jesus nagsabi: “An gabos na nagdadangog sa mga tataramon kong ini asin naggigibo kaini ibabaing sa sarong tawong mapagmansay, na nagtogdok kan saiyang harong sa ibabaw kan dakulang gapo. Asin uminoran nin makosog asin nagbaha asin nagdoros patin hinampas an harong na idto, alagad dai iyan nagaba, huli ta itinogdok iyan sa ibabaw kan dakulang gapo.”—Mat. 7:24, 25.

Sa siring, inapod ni Jesus na “mapagmansay” an saro na naghihinanyog asin nagkukuyog sa mga tataramon nia. Ipinapaheling daw niato paagi sa odok sa pusong pagkuyog na iginagalang asin pinapahalagahan niato an halimbawa ni Cristo, o kita daw may tendensia na pilion sana an mga pagboot ni Jesus na pasil asin kombenyenteng kuyogon? Si Jesus nagsabi: “Danay kong ginigibo an mga bagay na nakakapaogma sa [Dios].” (Juan 8:29) Magmaigot kita na arogon an halimbawang iyan.

Kan enot na siglo, nagtao an mga apostol nin marahay na halimbawa nin pagpasakop sa pangengenot ni Cristo. Sa sarong pagkakataon, si Pedro nagsabi ki Jesus: “Uya! Binayaan mi an gabos na bagay asin suminunod na sa saimo.” (Mar. 10:28) Tunay nanggad na para sa mga apostol mahalagang marhay an pangengenot ni Jesus, kaya nagin andam sindang bayaan an ibang bagay tanganing sumunod sa saiya.—Mat. 4:18-22.

Makipagtabangan sa mga Representante ni Cristo

Kan si Jesus madali nang magadan, sinambit nia an saro pang paagi na puede tang sunodon an pangengenot nia. Sia nagsabi: “Sia na nag-aako sa siisay man na isinugo ko nag-aako man sa sako.” (Juan 13:20) Sa katunayan, inapod ni Jesus na “mga tugang” nia an saiyang linahidan na mga representante. (Mat. 25:40) Pagkabuhay liwat ki Jesus pasiring sa kalangitan, ninombrahan an “mga tugang” nia na magin mga representante nia, “kasalida ni Cristo” bilang mga embahador na nag-aagda sa iba na makipag-ulian ki Jehova Dios. (2 Cor. 5:18-20) Kalabot sa pagmidbid niato sa pangengenot ni Cristo an pagpasakop sa “mga tugang” nia.

 Marahay na siyasaton niato kun paano kita naghihimate sa napapanahon na hatol sono sa Kasuratan na yaon sa satong mga publikasyon na basado sa Biblia. Paagi sa pag-adal sa Kasuratan asin pag-atender sa mga pagtiripon, ikinakapagirumdom sa sato an mga sinabi ni Cristo. (2 Ped. 3:1, 2) Ipinapaheling niato an odok sa pusong pagpahalaga sa probisyon na ini nin espirituwal na kakanon paagi sa regular na pag-ako kaiyan. Pero, ano an maninigong magin reaksion niato kun inootro paminsanminsan an sarong partikular na hatol? Halimbawa, an Tataramon nin Dios naghahatol sa mga Kristiano na mag-agom “basta sa Kagurangnan.” (1 Cor. 7:39) Sa laog nin labing sarong siglo, an temang ini tinotokar sa panapanahon sa An Torrengbantayan. Ipinapaheling nanggad kan mga tugang ni Cristo an mamomoton na pagmakolog ninda sa espirituwal na ikakarahay niato paagi sa pagpublikar nin mga artikulo dapit digdi asin sa iba pang ipinasabong na hatol. An pagtaong atension sa mga pagirumdom na ini sarong paagi na ipinapaheling niato an pagsunod sa satong perpektong Lider, si Jesu-Cristo.

“An dana kan mga matanos kabaing kan sirang nin liwanag na paorog nang paorog na nagliliwanag sagkod na magin lubos an aldaw,” an sabi kan Talinhaga 4:18. Iyo, an pangengenot ni Jesus progresibo, bakong inaktibo. An saro pang paagi na makipagtabangan sa “mga tugang” ni Cristo iyo an pagigin positibo sa ano man na pagliliwat, na ipinupublikar kan “maimbod asin mapagmansay na oripon,” dapit sa pakasabot niato sa mga katotoohan na sono sa Kasuratan.—Mat. 24:45.

Ipinapaheling man niato an satong pagpasakop sa “mga tugang” ni Cristo paagi sa pakikipagtabangan sa nombradong mga paraataman sa kongregasyon. Si Pablo nagsabi: “Magin makinuyog kamo sa mga nangengenot sa saindo asin magin mapagpasakop, huli ta sinda nagbabantay sa saindong kalag.” (Heb. 13:17) Halimbawa, an sarong magurang sa kongregasyon tibaad parigonon an satong boot may koneksion sa kahalagahan kan pagkaigwa nin regular na Pampamilyang Pagsamba o magtao nin mga suhestion mapadapit sa sarong aspekto kan satong ministeryo sa langtad. An sarong nagbibiaheng paraataman tibaad magtao sa sato nin nakakatabang na hatol sono sa Kasuratan dapit sa sarong partikular na aspekto nin pamumuhay bilang Kristiano. An satong gikan sa boot na pag-aplikar sa siring na hatol nagpapaheling na sinusunod niato si Jesus bilang Lider niato.

Makamomondo na an kinaban mayo nin epektibong lider. Alagad, nakakaginhawa nanggad na sunodon an mamomoton na pangengenot ni Cristo! Kun siring, kuyogon niato an satong Lider asin makipagtabangan sa mga ginagamit nia ngonyan.

[Ritrato sa pahina 27]

Inaako mo daw an hatol na sono sa Kasuratan na dai makipagsakal sa bakong kapagtubod?