Siisay an Pinakamahalagang Persona sa Buhay Mo?
Siisay an Pinakamahalagang Persona sa Buhay Mo?
“Ika sana an Kaharohalangkawe sa bilog na daga.”—SAL. 83:18.
1, 2. Mapadapit sa personal niatong kaligtasan, taano ta bakong igo na basta maaraman sana an ngaran ni Jehova?
TIBAAD enot mong naheling an ngaran ni Jehova kan ipaheling iyan sa saimo sa Salmo 83:18. Tibaad nangalas ka kan mabasa mo an mga tataramon na idto: “Tanganing an mga tawo makaaram na ika, na an ngaran Jehova, ika sana an Kaharohalangkawe sa bilog na daga.” Poon kaidto, daing duda na ginagamit mo na man an tekstong ini tanganing tabangan an iba na mamidbid an satong mamomoton na Dios, si Jehova.—Roma 10:12, 13.
2 Minsan ngani mahalagang maaraman nin mga tawo an ngaran ni Jehova, bakong igo an siring na kaaraman sana. Mangnoha kun paano idinoon kan salmista an saro pang katotoohan na mahalagang marhay sa satong kaligtasan kan sabihon nia: “Ika sana an Kaharohalangkawe sa bilog na daga.” Iyo, si Jehova an pinakamahalagang Persona sa bilog na uniberso. Bilang an Kaglalang kan gabos na bagay, igwa sia kan deretso na hagadon sa gabos niang linalang na lubos na magpasakop sa saiya. (Kap. 4:11) Kun siring, may marahay kitang dahelan kun taano ta kaipuhan niatong hapoton an satong sadiri, ‘Siisay an pinakamahalagang persona sa buhay ko?’ Mahalagang marhay na maingat niatong siyasaton an satong simbag dian!
An Isyu sa Hardin nin Eden
3, 4. Paano nadaya ni Satanas si Eva, asin ano an resulta?
3 An pagigin seryoso kan hapot na ini malinaw na maheheling sa mga nangyari kaidto sa hardin nin Eden. Duman, tinentaran kan rebeldeng anghel, na kan huri namidbid bilang si Satanas na Diablo, an enot na babaeng si Eva na enoton an sadiri kaining kamawotan kisa sa pagboot ni Jehova na dai pagkakanon an bunga nin sarong kahoy. (Gen. 2:17; 2 Cor. 11:3) Nagpadara si Eva sa panenentar na ini asin paagi kaiyan dai nia iginalang an soberaniya ni Jehova. Dai nia minidbid si Jehova bilang an pinakamahalagang Persona sa buhay nia. Alagad paano nadaya ni Satanas si Eva?
4 Naggamit si Satanas nin nagkapirang tusong taktika sa pakikipag-olay nia ki Eva. (Basahon an Genesis 3:1-5.) Enot, dai ginamit ni Satanas an personal na ngaran ni Jehova. Basta nia sana sinabing “Dios.” Sa kabaliktaran, ginamit kan kagsurat kan Genesis an personal na ngaran ni Jehova sa enot na bersikulo kan kapitulong iyan. Ikaduwa, imbes na sambiton ni Satanas an dapit sa “pagboot” nin Dios, naghapot sana sia manongod sa ‘sinabi’ nin Dios. (Gen. 2:16) Sa tusong paaging ini, posibleng pinagmaigotan ni Satanas na menoson an halaga kan pagboot na iyan. Ikatolo, minsan ngani si Eva sana an kaolay nia, ginamit nia an pronoun na “kamo.” Sa paggibo kaiyan, posibleng pinagmaigotan ni Satanas na pukawon an amor propio ni Eva tanganing mamatean nia na mahalaga sia—na garo baga sia an tagapagtaram para sa saiya asin sa saiyang agom. Ano an resulta? Minalataw na pangahas na nagdesisyon si Eva na sia na mismo an magtaram para sa saindang duwa paagi sa pagsabi sa halas: “Puede kaming kumakan sa bunga kan mga kahoy sa hardin.”
5. (a) Nadara ni Satanas si Eva na isentro an atension kaini sa ano? (b) Ano an ipinaheling ni Eva paagi sa pagkakan sa bawal na bunga?
5 Biniribid man ni Satanas an mga katotoohan. Ipinarisa nia na bakong makatanosan an Dios kan pagbotan Nia si Adan asin Eva na ‘dai magkakan sa gabos na kahoy kan hardin.’ Sunod, nadara ni Satanas si Eva na isipon an sadiri nia asin kun paano pa soboot mapaparahay an kamugtakan nia, na sia magin “arog nin Dios.” Sa kahurihurihi, nadara nia si Eva na isentro an atension sa kahoy asin sa bunga kaiyan imbes na sa relasyon nia sa Saro na nagtao sa saiya kan gabos na bagay. (Basahon an Genesis 3:6.) Makamomondo, paagi sa pagkakan kan bunga, ipinaheling ni Eva na bako si Jehova an pinakamahalagang Persona sa buhay nia.
An Isyu kan Panahon ni Job
6. Paano kinuestion ni Satanas an rekord nin integridad ni Job, asin nagtao iyan ki Job nin anong oportunidad?
6 Pakalihis nin mga siglo, an maimbod na tawong si Job nagkaoportunidad na ipaheling kun siisay an pinakamahalagang Persona sa buhay nia. Kan iinatubang ni Jehova ki Satanas an rekord nin integridad ni Job, si Satanas nagsimbag: “Mayo daw nin dahelan na natatakot si Job sa Dios?” (Basahon an Job 1:7-10.) Dai nagnegar si Satanas na si Job makinuyog sa Dios. Imbes, kinuestion nia an motibo ni Job. Inakusaran nia si Job na naglilingkod ini ki Jehova, bakong huli sa pagkamoot, kundi huli sa pansadiring interes. Si Job sana an makakasimbag sa akusasyon na iyan, asin tinawan sia nin oportunidad na gibohon iyan.
7, 8. Ano an nagin mga pagbalo ki Job, asin ano an ipinaheling nia paagi sa maimbod niang pakatagal?
7 Tinogotan ni Jehova si Satanas na magpaabot ki Job nin sunod-sunod na kalamidad. (Job 1:12-19) Ano an nagin reaksion ni Job sa pagkabaliktad na ini nin mga kamugtakan? Sinabi sa sato na sia “dai nagkasala o nagsahot nin ano man na sala sa Dios.” (Job 1:22) Alagad dai pa nagsilensio si Satanas. Nagreklamo pa sia: “Kublit para sa kublit, asin an gabos na sadiri nin tawo itatao nia para sa saiyang kalag.” * (Job 2:4) Sinabi ni Satanas na kun si Job mismo an magsakit, madesisyon daa ini na bako si Jehova an pinakamahalagang Persona sa buhay nia.
8 Kuminanos an itsura ni Job huli sa makangingiring helang dangan sinutsutan sia kan saiyang agom na sumpaon an Dios asin magadan. Pagkatapos, tolong falsong pararanga an nag-akusar sa saiya nin salang gawe-gawe. (Job 2:11-13; 8:2-6; 22:2, 3) Minsan siring, sa gabos na pagsakit na ini, pinagdanay ni Job an saiyang integridad. (Basahon an Job 2:9, 10.) Paagi sa saiyang maimbod na pakatagal, ipinaheling nia na si Jehova an pinakamahalagang Persona sa buhay nia. Pinatunayan man ni Job na posible para sa bakong perpektong tawo na simbagon, dawa sa limitadong paagi, an falsong mga akusasyon kan Diablo.—Ikomparar an Talinhaga 27:11.
An Perpektong Simbag ni Jesus
9. (a) Paano prinobaran ni Satanas na tentaran si Jesus mapadapit sa personal na kamawotan? (b) Ano an reaksion ni Jesus sa pagtentar na ini?
9 Dai nahaloy pakapabautismo ni Jesus, prinobaran ni Satanas na tentaran si Jesus na panigoan an makasadiring mga kamawotan imbes na pagdanayon si Jehova bilang an pinakamahalagang Persona sa buhay nia. Tolong beses na tinentaran ni Satanas si Jesus. Enot, hiningoa niang pukawon an pagmawot kan laman paagi sa pagtentar ki Jesus na gibohon na tinapay an mga gapo. (Mat. 4:2, 3) Si Jesus nag-ayuno pa sana nin 40 aldaw asin gutom-gutom sia. Kaya sinutsutan sia kan Diablo na gamiton sa salang paagi an saiyang milagrosong kapangyarihan tanganing panigoan an pagkagutom nia. Ano an reaksion ni Jesus? Bakong arog ni Eva, nagkonsentrar si Jesus sa Tataramon ni Jehova asin tolos na sinayumahan an pagtentar.—Basahon an Mateo 4:4.
10. Taano ta inangat ni Satanas si Jesus na tumagbang hale sa tore kan templo?
10 Prinobaran man ni Satanas na tentaran si Jesus na humiro na may pagkamakasadiri. Inangat nia si Jesus na tumagbang hale sa tore kan templo. (Mat. 4:5, 6) Ano an gustong mangyari ni Satanas? Sinabi ni Satanas na kun mayong maraot na mangyari ki Jesus sa pagtagbang, mapapatunayan daa kaiyan na si Jesus “aki nin Dios.” Siempre, gusto kan Diablo na tawan ni Jesus nin sobrang atension an saiyang reputasyon, sagkod pa ngani sa punto na magpasikat sia. Aram ni Satanas na posibleng akoon nin saro an peligrosong angat huli sa amor propio asin pagmawot na dai mapasupog sa iba. Ginamit ni Satanas sa salang paagi an sarong teksto, alagad ipinaheling ni Jesus na lubos niang nasasabotan an Tataramon ni Jehova. (Basahon an Mateo 4:7.) Paagi sa pagsayuma sa angat na iyan, pinatunayan giraray ni Jesus na si Jehova an pinakamahalagang Persona sa buhay nia.
11. Kan ialok kan Diablo an gabos na kahadean kan kinaban, taano ta sinayumahan iyan ni Jesus?
11 Sa ultimong desperadong pagprobar ni Satanas, iinalok nia ki Jesus an gabos na kahadean kan kinaban. (Mat. 4:8, 9) Tolos na sinayumahan ni Jesus an alok na iyan. Aram nia na an pag-ako kaiyan nangangahulogan na isinisikwal nia an soberaniya ni Jehova—an mismong deretso kan Dios na mamahala bilang an Kaharohalangkawe. (Basahon an Mateo 4:10.) Sa kada pagtentar, sinimbag ni Jesus si Satanas paagi sa pagkotar nin mga teksto na yaon an personal na ngaran ni Jehova.
12. Taano ta napurisaw na marhay si Jesus, asin ano an manonodan niato sa reaksion nia dian?
12 Mientras na nagrarani an katapusan kan buhay ni Jesus digdi sa daga, napaatubang sia sa depisilon na desisyon. Sa bilog niang ministeryo, ipinahayag nia an saiyang pagigin andam na itao an buhay nia bilang atang. (Mat. 20:17-19, 28; Luc. 12:50; Juan 16:28) Minsan siring, aram ni Jesus na sia putik man na aakusaran asin sesentensiahan sa irarom kan sistema legal kan mga Judio dangan gagadanon bilang sarong paralanghad. Napurisaw siang marhay sa aspektong ini kan saiyang kagadanan. Namibi sia: “Ama ko, kun mapupuede, togoti na an kopang ini lumihis sa sako.” Alagad sinabi pa nia: “Minsan siring, bakong an boot ko, kundi an boot mo.” (Mat. 26:39) Iyo, an kaimbodan ni Jesus sagkod sa mismong kagadanan nia lubos na nagpatunay kun siisay an pinakamahalagang Persona sa buhay nia!
An Satong Simbag sa Hapot
13. Anong mga leksion an nanodan niato sa halimbawa ni Eva, Job, asin Jesu-Cristo?
13 Ano na an nanodan niato? Sa kamugtakan ni Eva, nanodan niato na ipinapaheling kan mga nagpapadara sa makasadiring mga kamawotan o pakamate nin sobrang pagpahalaga sa sadiri na bako si Jehova an pinakamahalagang Persona sa buhay ninda. Sa kabaliktaran, nanodan niato sa pagpadanay ni Job kan saiyang integridad na ikakapaheling dawa kan bakong perpektong mga tawo na ineenot ninda si Jehova paagi sa maimbod na pagtagal nin mga kasakitan—dawa dai ninda lubos na nasasabotan an dahelan kan siring na mga kapurisawan. (Sant. 5:11) Nanodan man niato sa halimbawa ni Jesus na kita dapat na magin andam na magtios nin kasusupgan asin dai magtao nin sobrang pagpahalaga sa sato mismong reputasyon. (Heb. 12:2) Alagad paano niato ikakaaplikar an mga leksion na ini?
14, 15. Paano an reaksion ni Jesus sa sugot napapalaen sa reaksion ni Eva, asin paano niato maaarog si Jesus? (Komentohan an ilustrasyon sa pahina 18.)
14 Nungka nindong lingawan si Jehova huli sa mga sugot. Tinogotan ni Eva na madara an atension nia sa sugot na napapaatubang mismo sa saiya. Naheling nia na an bunga “marahayrahay na kakanon asin kawiliwili sa mga mata, iyo, an kahoy magayon paghelingon.” (Gen. 3:6) Kabaliktaran nanggad sa reaksion ni Jesus sa tolong pagtentar! Kada tentaran sia, dai sia nagpopokus sa mismong sugot kundi iniisip nia an magigin resulta kan saiyang paghiro. Nagsarig sia sa Tataramon nin Dios asin ginamit man nia an ngaran ni Jehova.
15 Kun natetentaran kitang gumibo nin ikakaanggot ni Jehova, sa ano kita nagpopokus? Mientras na mas nagpopokus kita sa sugot, mas nagkokosog an maraot na kamawotan na iyan. (Sant. 1:14, 15) Kaipuhan niatong humiro tolos tanganing haleon an kamawotan na iyan, dawa pa kun an paggibo niato kaiyan garo man sana paghale sa sarong parte kan satong hawak. (Mat. 5:29, 30) Arog ni Jesus, kaipuhan niatong magpokus sa resulta kan satong paghiro—kun ano an epekto kaiyan sa satong relasyon ki Jehova. Dapat niatong girumdomon an sinasabi kan saiyang Tataramon, an Biblia. Solamenteng sa paaging ini mapapatunayan niato na si Jehova an pinakamahalagang Persona sa satong buhay.
16-18. (a) Taano ta tibaad magabatan an satong puso? (b) Ano an makakatabang sa sato na makaya an nakakapurisaw na mga kamugtakan?
16 Nungka kamong maghinanakit ki Jehova huli sa inaagihan nindong mga trahedya. (Tal. 19:3) Mientras na nagrarani an katapusan kan maraot na kinaban, padakol nin padakol sa mga lingkod ni Jehova an naaapektaran nin mga kalamidad asin trahedya. Dai kita nag-aasa nin milagrosong proteksion sa panahon na ini. Dawa siring, tibaad magabatan an satong puso arog ni Job kun may magadan na namomotan niato o kun mapaatubang kita sa problema.
17 Dai nasabotan ni Job kun taano ta itinogot ni Jehova an nagkapirang pangyayari, asin kun beses tibaad dai man niato masabotan kun taano ta may maraot na mga nangyayari. Posibleng may nabaretaan kitang maimbod na mga tugang na nagadan huli sa linog, arog kan sa Haiti, o huli sa iba pang natural na kalamidad. O tibaad may bisto kitang nagdadanay na may integridad na nabiktima nin kadahasan o nagadan huli sa makaturotristeng aksidente. O tibaad nasasakitan kita dahel sa nagkapirang nakakapurisaw na kamugtakan o pinaghohonang inhustisya. Huli sa labi-labing kamondoan, tibaad mag-agrangay kita: ‘O Jehova, taano ta ako? Ano an ginibo kong sala?’ (Hab. 1:2, 3) Ano an makakatabang sa sato sa mga panahon na arog kaiyan?
18 Kaipuhan niatong mag-ingat na dai pag-isipon na an siring na mga pangyayari nagpaparisa na dai kita inooyonan ni Jehova. Idinoon ni Jesus an katotoohan na ini kan sambiton nia an duwang trahedya kan panahon nia. (Basahon an Lucas 13:1-5.) Dakol na kalamidad an resulta nin “panahon asin dai inaasahan na pangyayari.” (Ecl. 9:11) Alagad ano man an dahelan kan kapurisawan niato, makakaya niato iyan kun mapokus kita sa “Dios nin gabos na karangahan.” Itatao nia an kinakaipuhan na kosog tanganing makapagpadagos kitang maimbod.—2 Cor. 1:3-6.
19, 20. Ano an nakatabang ki Jesus na tagalan an makasusupog na mga situwasyon, asin ano an makakatabang sa sato na gibohon man iyan?
19 Nungkang togotan na magin pangenot sa saindo an amor propio o takot na mapasupog. Huli sa kapakumbabaan ni Jesus, sia “nagpakadai sa sadiri asin nagpakang-oripon.” (Fil. 2:5-8) Natagalan nia an dakol na makasusupog na situwasyon huli sa pagsarig nia ki Jehova. (1 Ped. 2:23, 24) Sa paggibo nia kaiyan, inenot ni Jesus an kabotan ni Jehova, kaya ilinangkaw sia sa sarong superyor na posisyon. (Fil. 2:9) Irinekomendar ni Jesus sa mga disipulo nia an siring na pamumuhay.—Mat. 23:11, 12; Luc. 9:26.
20 Kun beses, tibaad makasusupog an nagkapirang pagbalo sa satong pagtubod. Pero, maninigo kitang magkaigwa kan kompiansa na arog kan ki apostol Pablo, na nagsabi: “Sa mismong dahelan na ini tinitios ko man an mga bagay na ini, alagad dai ako nasusupog. Huling midbid ko an sakong tinutubod, asin kompiado ako na maiingatan nia an ipinaniwala ko sa saiya sagkod sa aldaw na iyan.”—2 Tim. 1:12.
21. Sa ibong kan pagkamakasadiri kan kinaban, ano an determinasyon mo?
21 Ihinula kan Biblia na sa panahon niato an mga tawo magigin “mamomoton sa sainda man sana.” (2 Tim. 3:2) Kun siring, bakong makangangalas na napapalibotan kita nin mga tawo na sadiri sana an iniintindi. Nungka logod kitang maolakitan kan siring na pagkamakasadiri! Imbes, baga man kita napapaatubang sa sugot, mga trahedya, o panunupog, logod na an lambang saro sa sato magin determinadong patunayan na si Jehova nanggad an pinakamahalagang Persona sa satong buhay!
[Nota sa Ibaba]
^ par. 7 Para sa nagkapirang iskolar sa Biblia, an pananaram na “kublit para sa kublit” posibleng nagpaparisa na si Job may pagkamakasadiring matogot nanggad na mawaran nin kublit, o buhay, an saiyang mga aki asin ataman na mga hayop, basta sia dai. Para sa iba, idinodoon kan pananaram na iyan na an sarong tawo andam na mawaran nin kublit kun ikakaligtas iyan kan saiyang buhay. Halimbawa, tibaad ipansagang nin saro an saiyang takyag tanganing protehiran an payo nia, na huli kaiyan nawawaran nin kublit tanganing isalbar an kublit nia. Ano man an kahulogan kan pananaram na iyan, malinaw na ipinaparisa kaiyan na andam si Job na itao an gabos basta magdanay siang buhay.
Ano an Manonodan Niato sa . . .
• kun paano dinaya ni Satanas si Eva?
• reaksion ni Job sa mga trahedyang inagihan nia?
• kun ano an nagin pinakamahalaga ki Jesus?
[Mga Hapot Para sa Pag-adal]
[Ritrato sa pahina 17]
Dai inenot ni Eva an relasyon nia ki Jehova
[Ritrato sa pahina 18]
Si Jesus nagsayuma sa mga sugot ni Satanas asin nagpokus sa paggibo kan kabotan ni Jehova
[Ritrato sa pahina 20]
Pagpapatotoo sa mga tolda pagkatapos kan linog sa Haiti
Sa mga panahon nin kasakitan, puede kitang magpokus sa “Dios nin gabos na karangahan”
