Maninigo daw na Magpabautismo an mga Hoben?

“OGMAHON ako na an aki kong babae saro na ngonyan na lingkod ni Jehova, asin aram ko na maogma man sia,” an sabi ni Carlos, * sarong Kristianong ama sa Pilipinas. An sarong ama na taga Grecia nagsurat: “Kaming mag-agom naoogmang marhay na an tolo ming aki nabautismohan bilang mga Saksi ni Jehova kan sinda hoben pa. Sinda nag-ooswag sa espirituwal asin naoogma sa paglilingkod ki Jehova.”

An Kristianong mga magurang may dahelan na maggayagaya nin labi-labi kun magpabautismo an saindang mga aki, alagad kun beses an kagayagayahan may kaibang dai pagkapamugtak. “Ogmahon ako asin haditon,” an sabi nin sarong ina. Taano ta magkasalak an emosyon? “Nasabotan ko na an sakong aki lubos nang maninimbag ngonyan ki Jehova.”

Maninigong magin pasohan kan gabos na hoben an paglilingkod ki Jehova bilang saro sa saiyang bautisadong mga Saksi. Pero, an diosnon na mga magurang tibaad mag-isip-isip, ‘Aram ko na marahay an pag-oswag kan aki ko, alagad igo daw an saiyang kosog tanganing labanan an imoral na mga panggigipit asin magdanay na malinig sa atubangan ni Jehova?’ An iba tibaad maghapot sa saindang sadiri, ‘Kun napapaatubang sa impluwensia nin materyalismo, magpapadagos daw an sakong aki sa paglilingkod sa Dios na may kagayagayahan asin kaigotan?’ Huli kaiyan, anong paggiya kan Biblia an makakatabang sa mga magurang na madeterminaran kun baga andam na an saindang mga aki na magpabautismo?

Pagigin Disipulo—An Pangenot na Kahagadan

Imbes na sabihon an eksaktong edad kun noarin mapabautismo, ilinaladawan kan Tataramon nin Dios an espirituwal na kamugtakan kan mga kualipikado nang magpabautismo. Pinagbotan ni Jesus an saiyang mga parasunod: “Gumibo kamo nin mga disipulo sa mga tawo kan gabos na nasyon, na bautismohan nindo sinda.” (Mat. 28:19) Huli kaini, an binabautismohan mga disipulo na ni Cristo.

Ano an disipulo? An Insight on the Scriptures nagpapaliwanag: “An terminong ini pangenot na minaaplikar sa gabos na bako sanang naniniwala sa mga katokdoan ni Cristo kundi maingat man na nagsusunod dian.” May kakayahan daw na magin tunay na disipulo ni Cristo an mga medyo hoben pa? Sarong tugang na labing 40 taon nang  misyonera sa Latin Amerika an nagsurat manongod sa saiyang sadiri asin sa saiyang duwang tugang na babae: “Kami nasa tama nang edad kaidto tanganing maaraman na gusto ming maglingkod ki Jehova asin mabuhay sa Paraiso. An samong pagdusay nakatabang sa samo na magin makosog kan kami napapaatubang sa mga sugot na inaagihan nin mga hoben. Dai mi pinagbabasolan an samong pagdusay sa Dios kan aki pa kami.”

Paano nindo maaaraman kun disipulo na ni Cristo an saindong aki? An Biblia nagsasabi: “Paagi sa saiyang mga gawe an sarong aki nagpapamidbid kan saiyang sadiri kun baga an saiyang mga gibo dalisay asin tanos.” (Tal. 20:11) Estudyare an nagkapirang gawe na naghahayag na an sarong hoben ‘nagpapaheling nin pag-oswag’ bilang disipulo.—1 Tim. 4:15.

Prueba nin Pagigin Disipulo

Kinukuyog daw kamo kan saindong aki? (Col. 3:20) Ginigibo nia daw an iinasignar sa saiya na mga trabaho sa harong? An Biblia nagsasabi manongod sa 12 anyos na si Jesus: “Sia padagos na nagpasakop sa [saiyang mga magurang].” (Luc. 2:51) Siempre, mayong aki ngonyan an perpektong makakakuyog sa saiyang mga magurang. Alagad an tunay na mga Kristiano dapat na “sunodon na marhay an mga lakad [ni Jesus].” Kaya an mga hoben na interesadong magpabautismo maninigong midbid na makinuyog sa saindang mga magurang.—1 Ped. 2:21.

Estudyare an minasunod na mga hapot: An aki daw nindo ‘padagos na hinahanap nguna an Kahadean’ paagi sa ministeryo? (Mat. 6:33) Sia daw andam na magsabi sa iba kan maogmang bareta, o kaipuhan pa nindo siang kombensiron na maglingkod sa langtad asin makipag-olay sa mga kagharong? Isinasaisip daw nia an saiyang paninimbagan bilang dai pa bautisadong parahayag? Igwa daw sia nin pagmawot na dumalaw liwat sa mga interesadong nanonompongan nia sa teritoryo? Sia daw nagpapamidbid sa saiyang mga kaeskuela asin maestra na sia sarong Saksi ni Jehova?

Mahalaga daw sa saiya an pag-atender sa mga pagtiripon kan kongregasyon? (Sal. 122:1) Ikinakaogma daw nia an pagkomento sa Pag-adal sa Torrengbantayan asin sa Pag-adal sa Biblia kan Kongregasyon? Sia daw entusiastikong nakikikabtang sa Teokratikong Paadalan sa Pagmiministro?—Heb. 10:24, 25.

Nagmamaigot daw an saindong aki na magdanay na malinig sa moral paagi sa paglikay sa nakakaraot na mga kaibaiba sa eskuelahan asin sa iba pang lugar? (Tal. 13:20) Ano an nagugustohan niang musika, mga pelikula, programa sa telebisyon, video game, asin mga binubuksan sa Internet? An saiya daw na mga tataramon asin gawe-gawe nagpapatunay na gusto niang sunodon an mga pamantayan sa Biblia?

Gurano kadakol an aram kan saindong aki sa Biblia? Kaya daw niang sabihon sa sadiri niang pananaram an saiyang nanonodan sa saindong banggi nin Pampamilyang Pagsamba? Kaya daw niang ipaliwanag an pundamental na mga katotoohan sa Biblia? (Tal. 2:6-9) Interesado daw sia sa pagbasa kan Biblia asin pag-adal kan mga publikasyon kan grupong maimbod asin mapagmansay na oripon? (Mat. 24:45) Sia daw naghahapot manongod sa mga katokdoan asin teksto sa Biblia?

 An mga hapot na iyan puedeng makatabang sa saindo na madeterminaran an espirituwal na pag-oswag kan saindong aki. Pagkatapos estudyaran an mga iyan, tibaad magkongklusyon kamo na may kaipuhan pa siang paoswagon bago magpabautismo. Minsan siring, kun an saiyang pamumuhay nagpapaheling nin prueba nin pagigin disipulo asin tunay nanggad na idinusay na nia sa Dios an saiyang buhay, tibaad puede na nindo siang togotan na magpabautismo.

An mga Hoben Puedeng Mag-omaw ki Jehova

Dakol na lingkod nin Dios an nagpaheling nin kaimbodan kan sinda tin-edyer o aki pa. Isip-isipa si Jose, Samuel, Josias, asin Jesus. (Gen. 37:2; 39:1-3; 1 Sam. 1:24-28; 2:18-20; 2 Cron. 34:1-3; Luc. 2:42-49) Asin an apat na aking babae ni Felipe, na naghuhurula, siertong sinanay na marhay poon kan aki pa sinda.—Gibo 21:8, 9.

Sarong Saksi sa Grecia an nagsabi: “Ako nabautismohan kan ako 12 anyos. Nungka kong pinagbasolan an sakong desisyon. Poon kaidto, 24 taon na an uminagi, na an 23 kaiyan ginamit ko sa bilog na panahon na paglilingkod. An sakong pagkamoot ki Jehova pirmeng nakatabang sa sako na atubangon an mga kadepisilan sa panahon nin pagkahoben. Sa edad na 12, mayo ako kan kaaraman sa Kasuratan na yaon sa sako ngonyan. Alagad aram ko kaidto na namomotan ko si Jehova asin gusto ko siang paglingkodan sagkod lamang. Naoogma ako na tinabangan nia akong makapadagos sa paglilingkod sa saiya.”

Hoben man o gurang, an saro na nagpapaheling nin prueba nin pagigin tunay na disipulo maninigong magpabautismo. Si apostol Pablo nagsurat: “Paagi sa puso an saro nagtutubod para sa katanosan, alagad paagi sa ngoso an saro nagpapahayag sa publiko para sa kaligtasan.” (Roma 10:10) Kun an sarong hoben na disipulo ni Cristo gumibo kan mahalagang lakdang nin pagpabautismo, magigin makahulogan na pangyayari iyan para sa saiya sagkod sa mga magurang nia. Mayo man logod nin makaolang sa kagayagayahan na naghahalat sa saindo o sa mga aki nindo.

[Nota sa Ibaba]

[Kahon sa pahina 5]

An Tamang Pagmansay sa Bautismo

Para sa nagkapirang magurang, an bautismo kan saindang mga aki sarong kapakipakinabang na lakdang na may kalabot na peligro—arog nanggad nin pagkua nin lisensia sa pagmaneho. Alagad isasapeligro daw kan bautismo asin sagradong paglilingkod nin saro an saiyang kapangganahan sa maabot na panahon? An Biblia minasimbag na dai. An Talinhaga 10:22 nagsasabi: “An bendisyon ni Jehova—iyan an nakakapayaman, asin dai nia iyan dinadagdagan nin kolog.” Asin si Pablo nagsurat sa hoben na si Timoteo: “Sa katotoohan, iyan may dakulang pakinabang, ining diosnon na debosyon kaiba an pagigin naninigoan sa sadiri.”—1 Tim. 6:6.

Totoo, an paglilingkod ki Jehova bakong pasil. Napaatubang si Jeremias sa dakol na kasakitan sa saiyang gibohon bilang propeta nin Dios. Pero, sia nagsurat manongod sa saiyang pagsamba sa tunay na Dios: “An saimong tataramon nagin para sa sako labi-labing kaogmahan asin kagayagayahan kan sakong puso; huli ta ako inapod sa saimong ngaran, O Jehova Dios nin mga hukbo.” (Jer. 15:16) Aram ni Jeremias na an paglilingkod sa Dios an ginigikanan kan saiyang kagayagayahan. An kinaban ni Satanas sarong gikanan nin mga kasakitan. Kaipuhan na tabangan kan mga magurang an saindang mga aki na masabotan an pagkakalaen na iyan.—Jer. 1:19.

 [Kahon/Ritrato sa pahina 6]

Maninigo daw na Dai Nguna Magpabautismo an Sakong Aki?

Kun beses, dawa kualipikado nang magpabautismo an mga aki, tibaad magdesisyon an mga magurang ninda na dai na nguna. Ano daw an mga dahelan ninda?

Natatakot ako na kun mabautismohan na an sakong aki, tibaad makagibo sia nin magabat na kasalan dangan matiwalag. Rasonable daw na maniwala na an sarong hoben na dai nguna nagpapabautismo dai maninimbag sa Dios huli sa paggawe nia? Ipinanongod ni Salomon sa mga hoben an minasunod na mga tataramon: “Aramon mo na sa [mga ginigibo mo] hohokoman ka kan tunay na Dios.” (Ecl. 11:9) Asin mayong sinambit si Pablo na espesipikong edad kan sia magpagirumdom: “An lambang saro sa sato maninimbag sa Dios para sa saiyang sadiri.”—Roma 14:12.

An bautisado asin dai pa bautisadong mga parasamba parehong maninimbag sa Dios. Dai paglingawan na pinoprotehiran ni Jehova an mga lingkod nia paagi sa ‘dai pagtogot na sinda matentaran nin labi sa saindang makakaya.’ (1 Cor. 10:13) Sagkod na ‘pinapagdadanay ninda an toltol na pag-iisip’ asin linalabanan an sugot, makakaasa sinda sa suporta nin Dios. (1 Ped. 5:6-9) Sarong Kristianang ina an nagsurat: “An bautisado nang mga aki may mas dakol na dahelan na rayoan an maraot na mga bagay kan kinaban. Para sa aki kong lalaki, na nabautismohan kan 15 anyos, sarong proteksion an bautismo. ‘Dai mo iisipon na gumibo nin kontra sa ley ni Jehova,’ an sabi nia. An bautismo sarong mapuersang motibasyon para sa katanosan.”

Kun an saindong mga aki sinanay nindo paagi sa tataramon asin halimbawa na kuyogon si Jehova, makakapagtiwala kamo na padagos nindang gigibohon iyan pakapabautismo ninda. An Talinhaga 20:7 nagsasabi: “An matanos naglalakaw sa saiyang integridad. Maogma an saiyang mga aki na masurunod sa saiya.”

Gusto ko ngunang maheling na naabot kan aki ko an nagkapirang pasohan. An mga hoben maninigong makanood na magtrabaho tanganing, pag-abot nin panahon, makaya nindang buhayon an saindang sadiri. Alagad may peligro kun dadagkahon sinda na mamuhay na nakapokus sa edukasyon asin pinansial na seguridad imbes na sa tunay na pagsamba. Mapadapit sa “banhi,” o tataramon kan Kahadean, na dai nagtatalubo, si Jesus nagsabi: “Kun manongod man sa nakasabwag sa matunok, ini an nagdadangog kan tataramon, alagad an kahaditan kan sistemang ini nin mga bagay asin an mapandayang kapangyarihan nin kayamanan minapuot kan tataramon, asin sia nagigin bakong mabunga.” (Mat. 13:22) An mga plano sa buhay na ineenot an kinabanon na mga pasohan kisa sa espirituwalidad puedeng makahale kan pagmawot nin sarong hoben na paglingkodan an Dios.

Mapadapit sa mga hoben na kualipikado na sa bautismo alagad dai oyon an mga magurang ninda, an sarong eksperyensiadong magurang sa kongregasyon nagkomento: “Kun oolangon an sarong hoben na magpabautismo, puede siang lumuya sa saiyang pag-oswag sa espirituwal dangan madesganar.” Asin an sarong nagbibiaheng paraataman nagsurat: “An sarong hoben puedeng makamate na bako siang marigon sa espirituwal asin na maluya sia kun ikokomparar sa iba. Tibaad isipon niang sa kinaban nia mamamatean na mapanggana sia.”

[Ritrato]

Maninigo daw na enoton an halangkaw na edukasyon?

[Ritrato sa pahina 3]

An sarong aki puedeng magpaheling nin ebidensia nin pagigin disipulo

[Mga Ritrato sa pahina 3]

Pag-andam asin pakikikabtang sa mga pagtiripon

[Ritrato sa pahina 4]

Pagkuyog sa mga magurang

Ritrato sa pahina 4]

Pakikikabtang sa ministeryo

[Ritrato sa pahina 4]

Personal na pamibi