Hihimateon daw Nindo an Malinaw na mga Patanid ni Jehova?
Hihimateon daw Nindo an Malinaw na mga Patanid ni Jehova?
“Iyo ini an dalan, lakao kamo dian.”—ISA. 30:21.
1, 2. Ano an determinadong gibohon ni Satanas, asin paano kita tinatabangan kan Tataramon nin Dios?
AN SARONG karatula sa tinampo na nagtotokdo sa salang direksion bako sanang nakakaribong kundi posible man na peligroso. Imahinara na pinatanidan ka nin sarong katood na may maraot na tawo na tuyong binago an karatula tanganing mapahamak an bako listong mga nagbibiahe. Dai ka daw mahimate sa patanid nia?
2 Iyo nanggad, si Satanas sarong maraot na kaiwal na determinadong ilagalag kita. (Kap. 12:9) Hale sa saiya an gabos na maraot na impluwensiang pinag-olayan niato sa enot na artikulo asin ginagamit nia iyan tanganing pasukion kita parayo sa dalan na minagiya pasiring sa buhay na daing sagkod. (Mat. 7:13, 14) Marahay sana ta pinapatanidan kita kan satong mapagmalasakit na Dios na dai pagsundan an nakakaribong na ‘mga karatula sa tinampo’ ni Satanas. Pag-olayan na niato an tolo pa sa negatibong mga impluwensia ni Satanas. Mantang pinag-oolayan niato kun paano kita tinatabangan kan Tataramon nin Dios na dai malagalag, puede tang imahinaron na si Jehova naglalakaw sa likodan niato asin itinotokdo sa sato an tamang direksion, na nagsasabi: “Iyo ini an dalan, lakao kamo dian.” (Isa. 30:21) Paagi sa paghorophorop sa malinaw na mga patanid ni Jehova, magigin mas makosog an satong determinasyon na himateon iyan.
Dai Magsunod sa “Magña Bakong Tunay na Paratokdo”
3, 4. (a) Paanong an bakong tunay na mga paratokdo siring sa mga bubon na mayong tubig? (b) Sa parate, saen hale an bakong tunay na mga paratokdo, asin ano an gusto ninda?
3 Imahinara na nagbibiahe ka sa sarong desierto. May naheling kang bubon sa harayo asin dinumanan mo iyan, na naglalaom na makakakua ka nin tubig na makakahale sa paha mo. Minsan siring, pag-abot mo sa bubon, mayo palan iyan nin tubig. Nadesganar ka nanggad! An bakong tunay na mga paratokdo siring sa mga bubon na mayong tubig. An siisay man na nagdodolok sa sainda tanganing makakua kutana kan tubig nin katotoohan madedesganar nanggad. Paagi ki Pablo asin Pedro, pinapatanidan kita ni Jehova manongod sa bakong tunay na mga paratokdong iyan. (Basahon an Guibo 20:29, 30; 2 Pedro 2:1-3.) Sairisay an mga paratokdong iyan? An pinasabngan na mga tataramon kan duwang apostol na ini makakatabang sa sato na maaraman kun saen hale an bakong tunay na mga paratokdong iyan asin kun paano sinda nandadaya.
4 Sa kamagurangan kan kongregasyon sa Efeso, si Pablo nagsabi: “May maruluas sa pagiriba nindo na magtatararam nin magña bagay na maraot [“biribid,” NW].” Ini an isinurat ni Pedro sa mga kapwa Kristiano: “Dian man sa saindo magkakaigua nin magña bakong tunay na paratokdo.” Kaya, saen hale an bakong tunay na mga paratokdo? Puedeng sa laog mismo kan kongregasyon. Sinda mga apostata. * Ano an gusto ninda? Bako sana sindang kontento na bayaan an organisasyon na tibaad namotan ninda kan enot. Ipinaliwanag ni Pablo na an obheto ninda iyo na “magoyod ninda [pasiring] sa sainda an magña discipulo.” Mangnoha an paggamit kan depinidong artikulo (definite article) na “an” sa pananaram na “an magña discipulo.” Imbes na magluwas sa kongregasyon tanganing gumibo nin sadiri nindang mga disipulo, hinihingoa man kan mga apostata na iluwas kaiba ninda an mga disipulo ni Cristo. Siring sa “mga mabangis na lobo,” determinadong sibaon kan bakong tunay na mga paratokdo an mapagtiwalang mga miembro kan kongregasyon, na rinaraot an saindang pagtubod asin irinarayo sinda sa katotoohan.—Mat. 7:15, BPV *; 2 Tim. 2:18.
5. Anong mga pamamaagi an ginagamit kan bakong tunay na mga paratokdo?
5 Paano nandadaya an bakong tunay na mga paratokdo? Ihinahayag kan saindang mga pamamaagi an pagigin tuso ninda. An mga apostata ‘nagdadara sa hilom’ nin nakakaraot na mga ideya. Siring sa mga ismagler, sinda minahiro na may katusohan, na daing gayo risang nagpapalakop nin apostatang mga punto de vista. Asin kun paanong hinihingoa nin tusong palsipikador na gumamit nin palsipikadong mga dokumento, ginagamit man kan mga apostata an “magña tataramon nin pagsaguinsaguin,” o bakong totoong mga argumento. Naghihingoa sindang palakopon an inimbento nindang mga punto de vista na garo baga totoo iyan. Nagpapalakop sinda nin ‘mapandayang’ katokdoan, na “tinatawan nin salang kahulogan . . . an . . . mga Kasuratan” tanganing ioyon sa sadiri nindang mga ideya. (2 Ped. 2:1, 3, 13; 3:16, BPV) Malinaw nanggad na bakong para sa pinakaikakarahay niato an iniisip kan mga apostata. An pagsunod sa sainda irarayo sana kita sa dalan na minagiya pasiring sa buhay na daing sagkod.
6. Ano an malinaw na hatol sa sato kan Biblia mapadapit sa bakong tunay na mga paratokdo?
6 Paano niato mapoprotehiran an satong sadiri tumang sa bakong tunay na mga paratokdo? Malinaw an hatol kan Biblia kun paano niato sinda tatrataron. (Basahon an Roma 16:17; 2 Juan 9-11.) “Bumulag kamo sa sainda,” an sabi kan Tataramon nin Dios. An pagkasabi sa ibang traduksion, “maglikay kamo sainda.” Klaro an ipinasabong na hatol na iyan. Halimbawa, sinabihan ka nin doktor na lumikay sa saro na may nakakaolakit asin nakakagadan na helang. Aram mo kun ano an boot sabihon kan doktor, asin estrikto mong hihimateon an patanid nia. Bueno, an mga apostata “may kahelangan” sa isip, asin hinihingoa nindang maolakitan an iba paagi sa saindang mapandayang katokdoan. (1 Tim. 6:3, 4, An Banal na Biblia) Sinasabi sa sato ni Jehova, an Nangongorog na Doktor, na likayan sinda. Aram niato kun ano an boot niang sabihon, alagad determinado daw kitang himateon an patanid nia sa gabos na aspekto kan satong buhay?
7, 8. (a) Ano an kalabot sa paglikay sa bakong tunay na mga paratokdo? (b) Taano ta determinado kang marigon na manindogan tumang sa bakong tunay na mga paratokdo?
7 Ano an kalabot sa paglikay sa bakong tunay na mga paratokdo? Dai niato sinda pinapadagos sa satong harong ni tinitino man sinda. Dai man kita nagbabasa nin mga publikasyon ninda, nagdadalan o nagheheling sa sainda sa TV, nagbubukas nin mga Web site ninda, o naglalaag nin komento sa mga isinusurat (blog) ninda sa Internet. Taano ta siring kaiyan karigon an satong paninindogan? Huli sa pagkamoot. Namomotan niato an “Dios na totoo,” kaya dai kita interesado sa biribid na katokdoan na kontra sa saiyang Tataramon nin katotoohan. (Sal. 31:5; Juan 17:17) Namomotan man niato an organisasyon ni Jehova, na nagtokdo sa sato kan nakakaogmang mga katotoohan—kaiba na an ngaran ni Jehova asin an kahulogan kaiyan, katuyohan nin Dios para sa daga, kamugtakan nin mga gadan, asin an paglaom na pagkabuhay liwat. Nagigirumdoman mo daw kun ano an namatean mo kan enot mong manodan ini asin an iba pang mahahalagang katotoohan? Kun siring, taano ta totogotan mong italikod ka nin siisay man na nagmemenos sa organisasyon na nagtokdo sa saimo kan mga katotoohan na ini?—Juan 6:66-69.
8 Ano man an sabihon kan bakong tunay na mga paratokdo, dai kita masunod sa sainda! Taano ta maduman kita sa siring sa mga bubon na mayong tubig na makakadaya asin makakadesganar sana sa sato? Imbes, magin determinado kitang magdanay na maimbod ki Jehova asin sa organisasyon na haloy nang nakakahale kan satong paha paagi sa dalisay asin nakakarepreskong tubig nin katotoohan hale sa ipinasabong na Tataramon nin Dios.—Isa. 55:1-3; Mat. 24:45-47.
Dai Magtao nin Atension sa “Magña Osipon”
9, 10. Ano an ipinatanid ni Pablo ki Timoteo mapadapit sa “magña osipon,” asin ano an tibaad nasa isip ni Pablo? (Helingon man an nota sa ibaba.)
9 Kun beses, tibaad madali sanang marisa na may nakiaram sa sarong karatula sa tinampo kaya salang direksion an itinotokdo kaiyan. Sa ibang pagkakataon, tibaad bako madaling marisa an panglolokong iyan. Kaagid kaiyan an negatibong mga impluwensia ni Satanas; an nagkapira mas risang-risa kisa sa iba. Pinapatanidan kita ni Pablo manongod sa saro sa mapandayang mga estratehiya ni Satanas—an “magña osipon.” (Basahon an 1 Timoteo 1:3, 4.) Tanganing dai kita magsuki parayo sa dalan na minagiya pasiring sa buhay, kaipuhan tang maaraman ini, Ano an mga osipon, asin paano kita makakalikay na magtao nin atension dian?
10 An patanid ni Pablo manongod sa mga osipon kabtang kan enot na surat nia ki Timoteo, sarong paraataman na pinagbotan na papagdanayon an kadalisayan kan kongregasyon asin tabangan an mga kapagtubod na magdanay na maimbod. (1 Tim. 1:18, 19) Naggamit si Pablo nin termino sa Griego na puedeng nanonongod sa inimbentong estorya, eroestorya sana, o kaputikan. Segun sa The International Standard Bible Encyclopaedia, an terminong ini nanonongod sa “estorya (sa relihion) na mayong koneksion sa kun ano talaga an totoo.” Tibaad an nasa isip ni Pablo iyo an mga kaputikan sa relihion na pinapalakop paagi sa nakakapukaw na mga estoryang imahinasyon sana o alamat. * An siring na mga estorya minaresulta sana sa “magña pagduadua,” na puedeng magpalataw nin mayong kamanungdanan na mga hapot asin daing saysay na pagsiyasat. An mga osipon sarong taktika kan pangenot na paradaya, si Satanas, na naggagamit nin mga kaputikan sa relihion asin mga eroestorya sana na bakong sa Dios tanganing ilagalag an mga dai nagmamaan. Malinaw an hatol ni Pablo: Dai magtao nin atension sa mga osipon!
11. Paano tusong ginagamit ni Satanas an falsong relihion sa pagdaya sa mga tawo, asin anong patanid an dapat tang himateon tanganing matabangan kita na dai madaya?
11 Ano an nagkapirang osipon na makakapalagalag sa mga dai nagmamaan? Sa pangkagabsan, an terminong “magña osipon” puedeng ipanongod sa ano man na kaputikan sa relihion o eroestorya sana na puede kitang “[‘irayo,’ NW] sa katotoohan.” (2 Tim. 4:3, 4) Tusong ginagamit ni Satanas, na nagsasagin ‘anghel nin liwanag,’ an falsong relihion tanganing dayaon an mga tawo. (2 Cor. 11:14) Minsan ngani an Kakristianohan naghihingakong parasunod ni Cristo, sinda nagtotokdo nin mga doktrina—kaiba na an Trinidad, kalayo sa impierno, asin imortalidad kan kalag—na pano nin mga eroestorya sana asin kaputikan. Ipinapalakop man ninda an mga kapiestahan, arog nin Pasko asin Pasko nin Pagkabuhay (Easter), na an garo baga bako man maraot na mga kaugalean kaiyan sa katunayan hale sa mitolohiya asin paganismo. Paagi sa paghimate sa patanid nin Dios na sumiblag asin ‘dai dumoot sa [“maati,” BPV] na bagay,’ dai kita madadaya nin mga osipon.—2 Cor. 6:14-17.
12, 13. (a) Anong mga kaputikan an pinapalakop ni Satanas, asin ano an totoo mapadapit sa kada saro kaiyan? (b) Paano kita makakalikay na madaya kan mga osipon ni Satanas?
12 May iba pang mga kaputikan na ipinapalakop si Satanas na makakadaya sa sato kun kita bakong maingat. Estudyare an nagkapirang halimbawa. Maski ano puede—tama man o sala. Depende na iyan sa pagmate mo. An ideyang ini ipinapalakop sa media asin mga aling-alingan. An siring na biribid na pagmansay sa mga pamantayan nin Dios nag-iimpluwensia sa sato na baliwalaon an gabos na pamantayan sa moral. An totoo, kaipuhan tang marhay an paggiya dapit sa moral, na Dios sana an makakatao. (Jer. 10:23) Dai makikiaram an Dios sa mga nangyayari sa daga. Kun kita nagpapaimpluwensia sa kaisipan na siring sa “mabuhay para sana ngonyan,” kita magigin ‘hugakon o daing bunga.’ (2 Ped. 1:8) An totoo, an aldaw ni Jehova marikas na nagdadangadang, asin dapat na padagos tang halaton iyan. (Mat. 24:44) An Dios dai nagmamakolog sa saimo bilang indibiduwal. Kun papaniwalaan niato an kaputikan na ini hale ki Satanas, kita masuko huling iisipon niato na nungka kitang magigin maninigo sa pagkamoot nin Dios. An totoo, namomotan asin pinapahalagahan ni Jehova bilang indibiduwal an mga nagsasamba sa saiya.—Mat. 10:29-31.
13 Dapat kitang padagos na magbantay huling an kaisipan asin saboot kan kinaban ni Satanas garo baga tama sa enot na pagheling. Pero, girumdomon na si Satanas eksperto sa pandadaya. Solamenteng paagi sa paghimate sa hatol asin mga pagirumdom kan Tataramon nin Dios na kita makakalikay na madaya kan “magña osipon na tinogdas sa katosohan [“mga osipon na inimbento sana,” BPV]” ni Satanas.—2 Ped. 1:16.
Dai Magsunod “ki Satanas”
14. Anong patanid an itinao ni Pablo sa nagkapirang babaeng balo na aki pa, asin taano ta kaipuhan na isapuso niato gabos an mga sinabi nia?
14 Imahinara an sarong karatula sa tinampo na nagsasabing “Ini an Dalan Tanganing Makasunod ki Satanas.” Siisay sa sato an masunod sa siring na karatula? Pero, si Pablo nagpapatanid sa sato manongod sa nagkapirang paagi na an nagdusay na mga Kristiano tibaad ‘mapasuki pasiring ki Satanas.’ (Basahon an 1 Timoteo 5:11-15.) An mga tataramon ni Pablo ipinapanongod nia sa nagkapirang “babaeng balo na aki pa,” alagad an mga prinsipyong nasambit nia aplikado sa sato gabos. Tibaad dai man inisip kan Kristianong mga babaeng idto kan enot na siglo na sinda nagsusunod ki Satanas, alagad iyan nanggad an ginigibo ninda. Paano kita makakapag-ingat dawa sa dai tinutuyong pagsunod ki Satanas? Siyasaton niato an patanid ni Pablo mapadapit sa nakakaraot na tsismis.
15. Ano an obheto ni Satanas, asin paano sinambit ni Pablo an mga taktika ni Satanas?
15 An obheto ni Satanas iyo na pasilensiohon an tingog kan pagtubod niato—papondohon kita sa paghuhulit kan maogmang bareta. (Kap. 12:17) Tanganing magibo iyan, hinihingoa niang mawili kita sa mga aktibidad na nakakasayang sana nin panahon o nakakapabaranga sa sato. Mangnoha kun paano sinambit ni Pablo an mga taktika ni Satanas. ‘Naghihinugak, na nanghaharongharong.’ Sa panahon na ini nin teknolohiya, madali sanang masayang an panahon niato asin kan iba, halimbawa, paagi sa pag-e-mail nin mga bagay na mayong kamanungdanan o bako nganing totoo. “Magña tabilan.” An tsismis puedeng sumagkod sa pagpakaraot, na sa parate nagreresulta sa iriwal. (Tal. 26:20) Baga man narerealisar ninda o dai, inaarog kan mga parapakaraot si Satanas na Diablo. * “Magña atomatoman.” Mayo kita nin deretso na makiaram sa personal na buhay nin iba. An gabos na mayong pakinabang asin nakakaraot na gawe-gaweng iyan puedeng makaistorbo sa ipinapagibo sa sato nin Dios na paghuhulit kan Kahadean. Kun kita bako nang aktibo sa pagsuportar sa gibohon ni Jehova, nagpopoon na kitang magsunod ki Satanas. Saro sana sa sainda an dapat tang kampihan.—Mat. 12:30.
16. Anong sadol an dapat tang himateon na makakatabang sa sato na malikayan na ‘mapasuki pasiring ki Satanas’?
16 An paghimate sa sadol kan Biblia makakatabang sa sato na malikayan na ‘mapasuki pasiring ki Satanas.’ Estudyare an nagkapira sa madonong na mga hatol ni Pablo. “Magsopay sa guibo nin Kagurangnan.” (1 Cor. 15:58) An pagdadanay na sibot sa mga gibohon na pang-Kahadean poprotehiran kita sa mga peligro nin pagigin mayong maginibo asin nin mga aktibidad na nakakasayang sana nin panahon. (Mat. 6:33) Magtaram nin “marahay sa pagparigon.” (Efe. 4:29) Magin determinadong dai maghinanyog sa nakakaraot na tsismis asin dai pagpalakopon iyan. * Pataluboon an pagtitiwala asin paggalang sa mga kapagtubod. Huli kaini, parate kitang magtataram nin nakakapakosog imbes na nakakaraot. “Hingowahon nindo na . . . atoman sana nindo an sadiri nindong buhay.” (1 Tes. 4:11, BPV) Magpaheling nin personal na interes sa iba, alagad gibohon iyan na may paggalang sa pribadong buhay ninda asin dai nakakahale kan dignidad ninda. Girumdomon man na dai niato maninigong ipirit sa iba an sadiri tang pagmansay kun dapit sa mga bagay na sinda mismo an kaipuhan magdesisyon.—Gal. 6:5.
17. (a) Taano ta pinapatanidan kita ni Jehova manongod sa kun ano an dai niato dapat sunodon? (b) Ano an saindong determinasyon mapadapit sa dalan na gusto ni Jehova na agihan niato?
17 Nagpapasalamat nanggad kita huling malinaw na sinasabi sa sato ni Jehova kun ano an dai niato dapat sunodon! Pero, nungkang lingawan na dakula an pagkamoot sa sato ni Jehova kaya itinao nia an mga patanid na pinag-olayan niato sa magkasunod na duwang artikulong ini. Habo nia kitang magsakit o makolgan huli sa pagsunod sa nakakaribong na ‘mga karatula sa tinampo’ ni Satanas. Puedeng piot an dalan na gusto ni Jehova na agihan niato, alagad iyan sana an pasiring sa pinakamarahay na destinasyon—an buhay na daing katapusan. (Mat. 7:14) Nungka logod na magluya an satong determinasyon na himateon an konseho ni Jehova: “Iyo ini an dalan, lakao kamo dian.”—Isa. 30:21.
[Mga Nota sa Ibaba]
^ par. 4 An “apostasiya” nangangahulogan nin pagrayo, pagsuhay, pagtalikod, pagrebelde, asin pagbaya sa tunay na pagsamba.
^ par. 4 An Marahay na Bareta Biblia (Bikol Popular Version)
^ par. 10 Halimbawa, an apokripal na libro nin Tobit (Tobias), na isinurat kan mga ikatolong siglo B.C.E. asin kun siring mababasa kan panahon ni Pablo, pano nin superstisyon asin daing kamanungdanan na mga estoryang imahinasyon sana dapit sa mahika asin pangkukulam na ipinepresentar na totoo.—Helingon an Insight on the Scriptures, Volume 1, pahina 122.
^ par. 15 An termino sa Griego para sa “diablo” di·aʹbo·los, na nangangahulogan nin “parapakaraot.” An terminong ini ginagamit bilang saro pang titulo ni Satanas, an pangenot na parapakaraot.—Juan 8:44; Kap. 12:9, 10.
^ par. 16 Helingon an kahon na “Pagwarak nin mga Balukag sa Doros.”
Ano an Simbag Nindo?
Paano nindo personal na ikakaaplikar an mga patanid na yaon sa minasunod na mga teksto?
[Mga Hapot Para sa Pag-adal]
[Kahon/Mga Ritrato sa pahina 19]
Pagwarak nin mga Balukag sa Doros
Iiniilustrar nin sarong suanoy na eroestorya nin mga Judio an epekto kan pagpalakop nin nakakaraot na tsismis. Minsan ngani laen-laen an bersion kaiyan, uni an pinakasumaryo kan estorya.
May sarong lalaki na naglibot sa banwaan tanganing pakaraoton an tawong madonong sa banwaan na iyan. Kan huri, an tsismosong iyan na maraot an intension narealisar an sala nia, kaya dinumanan nia an tawong madonong tanganing humagad nin tawad, na nagsasabi na gigibohon nia an ano man na kaipuhan tanganing mabayadan an danyos. Saro sana an ipinapagibo kan tawong madonong: Sinabihan nia an tsismoso na magkua nin ulunan na balukag an laog, sision iyan, asin iwarak an mga balukag sa doros. Minsan ngani nagngalas an tsismoso sa ipinapagibo sa saiya, sinunod nia an instruksion dangan nagbalik sa tawong madonong.
“Napatawad mo na ako?” an hapot nia.
“Paduman ka nguna, dangan tipona an gabos na balukag,” an simbag kan tawong madonong.
“Alagad paano ko magigibo iyan? Iwinarak na iyan kan doros.”
“Kun paanong masakit nang tiponon an mga balukag, masakit na man remedyohan an danyos kan itsinismis mo.”
Malinaw an leksion. Oras na itinaram na, dai na iyan mababawi, asin tibaad imposible nang mahale an makolog na epekto kaiyan. Bago magpalakop nin dawa kadikit na tsismis, madonong na girumdomon na kita garo man sana magwawarak nin mga balukag sa doros.
[Ritrato sa pahina 16]
Sa anong paagi garo man sana iniimbitaran nin nagkapira na dumagos sa saindang harong an mga apostata?
