Kapahingaloan nin Dios—Ano an Kahulogan Kaiyan?
Kapahingaloan nin Dios—Ano an Kahulogan Kaiyan?
“Igua pang natatada na sabbath nin kapahigñaloan manogñod sa banuaan nin Dios.”—HEB. 4:9.
1, 2. Ano an ikakakongklusyon niato basado sa tamang pagkatradusir sa Genesis 2:3, asin anong mga hapot an minalataw?
MANONODAN niato sa enot na kapitulo kan Genesis na iinandam nin Dios an daga, sa laog nin anom na piguratibong aldaw, tanganing magin istaran nin tawo. Sa katapusan kan kada aldaw na iyan, pirmeng sinasambit na nagkaigwa nin ‘hapon asin aga.’ (Gen. 1:5, 8, 13, 19, 23, 31) Minsan siring, kun dapit sa ikapitong aldaw, an Biblia nagsasabi: “Benendicionan nin Dios an ikapitong aldao, asin pinakangbanal niya, huli ta iyo iyan an pinahigñaloan niya sa saiya[ng] gabos na guibo na linalang asin guinibo nin Dios.”—Gen. 2:3.
2 Sa orihinal na Hebreo, “nagpapahingalo” an ginamit na berbo para sa terminong “pinahigñaloan.” Isinusuherir kaiyan na an ikapitong aldaw—an ‘aldaw’ nin kapahingaloan nin Dios—nagpapadagos pa kan 1513 B.C.E kan isurat ni Moises an libro nin Genesis. Nagpapadagos pa daw sagkod ngonyan an aldaw nin kapahingaloan nin Dios? Kun iyo, kita daw makakalaog dian ngonyan? An simbag sa mga hapot na ini mahalagang marhay para sa sato.
‘Nagpapahingalo’ daw si Jehova Sagkod Ngonyan?
3. Paano ipinaparisa kan mga tataramon ni Jesus sa Juan 5:16, 17 na an ikapitong aldaw nagpapadagos pa kaidtong enot na siglo?
3 May duwang ebidensia kun taano ta makakapagkongklusyon kita na an ikapitong aldaw nagpapadagos pa kaidtong enot na siglo C.E. Enot, estudyare an sinabi ni Jesus sa mga nagkokontra na nagkritika sa saiya huling nagpaomay sia sa Sabbath, na ibinibilang ninda na sarong klase nin gibohon. Sinabi sa sainda kan Kagurangnan: “An sakong Ama sagkod gñunian nagguiguibo, asin ako nagguiguibo.” (Juan 5:16, 17) Ano an punto kaiyan? Si Jesus inakusaran na naggigibo sa aldaw nin Sabbath. Paagi sa pagsabing: “An sakong Ama sagkod gñunian nagguiguibo,” nasimbag nia an akusasyon na iyan. Garo man sana sinabi ni Jesus sa mga nagkikritika sa saiya: ‘Pareho an gibohon ko asin kan sakong Ama. Huling an sakong Ama padagos na naggigibo durante kan saiyang rinibong taon na Sabbath, ako puede nanggad na padagos na maggibo, dawa kun Sabbath.’ Sa siring, ipinarisa ni Jesus na kun dapit sa daga, an dakulang aldaw nin Sabbath na kapahingaloan nin Dios, an ikapitong aldaw, dai natapos kan panahon nia. *
4. Anong dugang pang ebidensia an itinao ni Pablo na nagpapadagos pa an ikapitong aldaw kan panahon nia?
4 An ikaduwang ebidensia itinao ni Pablo. Kan kinokotar ni Pablo an Genesis 2:2 mapadapit sa kapahingaloan nin Dios, pinasabngan siang isurat: “Kita na nagtubod naglalaog sa kapahigñaloan.” (Heb. 4:3, 4, 6, 9) Kaya an ikapitong aldaw nagpapadagos pa kan panahon ni Pablo. Gurano pa daw kahaloy magpapadagos an aldaw na iyan nin kapahingaloan?
5. Ano an katuyohan kan ikapitong aldaw, asin noarin iyan lubos na maootob?
5 Tanganing masimbag an hapot na iyan, dapat tang girumdomon an katuyohan kan ikapitong aldaw. Ipinapaliwanag kan Genesis 2:3 kun ano iyan: “Benendicionan nin Dios an ikapitong aldao, asin pinakangbanal niya.” An aldaw na iyan “pinakangbanal”—ginibong sagrado, o itinagama ni Jehova—tanganing maotob an saiyang katuyohan. An katuyohan na iyan iyo na an daga magin istaran nin makinuyog na mga tawo na mangangataman kaiyan asin kan gabos na nabubuhay dian. (Gen. 1:28) Tanganing maotob an katuyohan na iyan, si Jehova Dios asin si Jesu-Cristo, an “kagurangnan kan sabbath,” “sagkod gñunian nagguiguibo.” (Mat. 12:8) An aldaw nin kapahingaloan nin Dios magpapadagos sagkod na an katuyohan nia may koneksion dian lubos nang maotob sa katapusan kan Sangribong Taon na Paghade ni Cristo.
Dai “Maholog sa Siring na Padara nin Kasumbikalan” o Pagsuway
6. Anong mga halimbawa an nagseserbing patanid sa sato, asin anong leksion an manonodan niato dian?
6 Malinaw na ipinaliwanag ki Adan asin Eva an katuyohan nin Dios, alagad dai sinda nakikooperar dian. Iyo, si Adan asin Eva an enot na mga tawo na nagsuway sa Dios. Minilyon pang iba an nagsurunod sa sainda poon kaidto. Paorootrong nagsuway dawa an piniling banwaan nin Dios, an nasyon nin Israel. Asin mahalagang mangnohon na si Pablo nagpatanid sa mga Kristiano kaidtong enot na siglo na dawa an nagkapira sa sainda puede man mabiktima kan silong iyan, arog kan suanoy na mga Israelita. Sia nagsurat: “Kaya magmaigot kita na makalaog sa kapahigñaloan na iyan, tagñaning dai nin siisay man na maholog sa siring na padara nin kasumbikalan.” (Heb. 4:11) Mangnohon na an pagigin masinuway ikinonektar ni Pablo sa dai pakalaog sa kapahingaloan nin Dios. Ano an boot sabihon kaiyan para sa sato? Kun sa ano man na paagi kita marebelde sa katuyohan nin Dios, bako daw na tibaad dai kita makalaog sa kapahingaloan nin Dios? Malinaw nanggad na an simbag sa hapot na iyan mahalagang marhay para sa sato, asin orog pa niatong pag-oolayan iyan. Minsan siring, aramon nguna niato kun ano pa an manonodan niato manongod sa paglaog sa kapahingaloan nin Dios paagi sa pag-estudyar sa maraot na halimbawa kan mga Israelita.
“Dai Sinda Makakalaog sa Sakong Kapahigñaloan”
7. Ano an nasa isip ni Jehova kan kaldahon nia an mga Israelita sa pagkaoripon sa Egipto, asin ano an inaasahan na gigibohon ninda?
7 Kan 1513 B.C.E., ihinayag ni Jehova sa saiyang lingkod na si Moises an katuyohan nia para sa mga Israelita. An Dios nagsabi: “Hominilig ako ta gñaning ikaligtas ko sinda sa kamot kan magña taga Egipto, asin makua ko sinda duman sa dagang idto [sa Egipto] na madara ko sa marhay asin mahiuas na daga, sa daga na nagbobolos nin gatas saka tangguli.” (Ex. 3:8) Siring kan panuga ni Jehova sa apoon nindang si Abraham, an katuyohan nin Dios sa pagkalda sa mga Israelita “sa kamot kan magña taga Egipto” iyo na gibohon sindang banwaan nia. (Gen. 22:17) Tinawan nin Dios an mga Israelita nin kodigo nin mga ley na makakatabang sa sainda na magkaigwa nin matoninong na relasyon sa saiya. (Isa. 48:17, 18) Sinabi nia sa mga Israelita: “Kun magdagñog kamo kan sakuyang tigñog, asin magsonod kamo kan sakuyang tipan [na sinasabi sa kodigo nin Ley], kamo maguiguin an piniling kayamanan ko sa gabos na magña banuaan; huli ta sadiri ko an bilog na daga.” (Ex. 19:5, 6) Kun siring, an pagkaigwa kan mga Israelita nin espesyal na relasyon sa Dios nakadepende sa pagdangog ninda sa tingog nia.
8. Ano kutana an nagin buhay kan mga Israelita kun sinda nagin masinunod sa Dios?
8 Isip-isipa nanggad kun ano kutana an nagin buhay kan mga Israelita kun nagdangog sana sinda sa tingog nin Dios! Binendisyonan kutana ni Jehova an saindang mga oma, ubasan, asin ataman na mga hayop. Dai kutana sinda nasakop kan mga kaiwal ninda. (Basahon an 1 Hade 10:23-27.) Pag-abot kan Mesiyas, posibleng marhay na naheling kutana nia an Israel bilang progresibo asin independienteng nasyon, na dai nasasakitan sa mapang-aping pamamahala kan Roma. An Israel nagin kutanang arogan na kahadean para sa kataraed na nasyon kaiyan, na nagtatao nin makosog na prueba na an pagsunod sa tunay na Dios minaresulta sa espirituwal asin materyal na mga bendisyon.
9, 10. (a) Taano ta seryosong bagay an pagmawot kan Israel na bumalik sa Egipto? (b) Paano kutana naapektaran an pagsamba kan Israel kun sinda nagbalik sa Egipto?
9 Dakula nanggad an nagin pribilehio kan Israel—an makipagtabangan para sa katuyohan ni Jehova, na maresulta sa mga bendisyon bako sanang para sa sainda kundi, pag-abot nin panahon, para sa gabos na pamilya sa daga! (Gen. 22:18) Minsan siring, sa pangkagabsan, ipinaheling kan rebelyosong kapag-arakian na iyan na dai sinda interesado sa pag-establisar nin sarong arogan na kahadean na sakop nin teokratikong pamamahala. Iyo, nagpumirit pa ngani sindang bumalik sa Egipto! (Basahon an Bilang 14:2-4.) Ngonyan, makakatabang daw an pagbalik ninda sa Egipto sa katuyohan nin Dios na gibohon an Israel na magin arogan na kahadean? Dai. Sa katunayan, kun nagpaoripon giraray an mga Israelita sa paganong nasyon na nambihag sa sainda, sinda nungkang makakasunod sa Ley ni Moises asin dai noarin man makikinabang sa areglo ni Jehova para sa kapatawadan kan saindang mga kasalan. Sinda makalaman asin halipoton nanggad an pananaw! Bakong makangangalas na sinabi ni Jehova dapit sa mga rebeldeng idto: “Dai ko naoyonan an kapagarakian na ini, asin ako nagsabi, Sinda danay na nasasala sa saindang puso: Alagad dai sinda tatao kaidto kan sakong magña paagui; siring sa isinumpa ko sa sakong kaangotan, Dai sinda makakalaog sa sakong kapahigñaloan.”—Heb. 3:10, 11; Sal. 95:10, 11.
10 Sa pagmamaigot na bumalik sa Egipto, ipinaheling kan masumbikal na nasyon na iyan na dai ninda pinahalagahan an espirituwal na mga bendisyon na inako ninda; imbes mas gusto ninda an mga puero (leek), sibulyas, asin bawang na yaon sa Egipto. (Bil. 11:5) Siring sa ingratong si Esau, andam an mga rebeldeng idto na iribay sa sarong masiram na kakanon an saindang mahalagang marhay na espirituwal na mana.—Gen. 25:30-32; Heb. 12:16.
11. Ano an nagin epekto sa katuyohan nin Dios kan pagigin bakong maimbod kan mga Israelita kan panahon ni Moises?
11 Sa ibong kan kawaran nin pagtubod kan kapag-arakian nin mga Israelitang naghale sa Egipto, si Jehova padagos asin mapasensiang ‘naggigibo’ tanganing maotob an katuyohan nia, na ngonyan itinatao an saiyang atension sa bagong kapag-arakian. An mga miembro kan bagong kapag-arakian na iyan mas masinunod kisa sa mga magurang ninda. Kaoyon kan pagboot ni Jehova, sinda naglaog sa Dagang Panuga asin nagpoon na sakopon iyan. Sa Josue 24:31, mababasa niato: “Naglingkod [an] Israel ki Jehova sa bilog na panahon ni Josue, asin sa bilog na panahon kan magña kamaguragñan na nagkaburuhay pakatapus ni Josue, asin an magña nakakaisi kan gabos na magña guibo ni Jehova, na guinibo nia huli [sa] Israel.”
12. Paano niato naaraman na posible ngonyan na makalaog sa kapahingaloan nin Dios?
12 Minsan siring, an makinuyog na kapag-arakian na iyan naggururang asin nagkagaradan saka nasalidahan nin kapag-arakian na “[dai] nakakamidbid ki Jehova, minsan an guibo na guinibo nia huli [sa] Israel.” Bilang resulta, “an magña aki ni Israel naguiribo kan maraot sa magña mata ni Jehova, asin nagrilingkod sinda sa magña Baal.” (Hok. 2:10, 11) An Dagang Panuga dai nagin tunay na lugar nin ‘kapahingaloan’ para sa sainda. Huli sa pagigin masinuway ninda, dai sinda nagkaigwa nin nagdadanay na pakipagkatoninongan sa Dios. Mapadapit sa mas huring panahon, si Pablo nagsurat: “Kun [an mga Israelita] tinawan ni Josue nin kapahigñaloan, dai na kutana [an Dios] nagtaram pakatapus kaidto dapit sa ibang aldao. Kaya igua pang natatada na sabbath nin kapahigñaloan manogñod sa banuaan nin Dios.” (Heb. 4:8, 9) An ‘banwaan nin Dios’ na pinanonongdan ni Pablo iyo an mga Kristiano. Iyan daw nangangahulogan na an mga Kristiano puedeng makalaog sa kapahingaloan nin Dios? Iyo nanggad—an Judio asin bakong Judiong mga Kristiano!
An Nagkapira Dai Nakalaog sa Kapahingaloan nin Dios
13, 14. Ano an koneksion kan pagsunod sa Ley ni Moises asin kan paglaog sa kapahingaloan nin Dios (a) kan panahon ni Moises (b) kan enot na siglo?
13 Kan si Pablo magsurat sa mga Kristianong Hebreo, nahahadit sia huling an nagkapira sa sainda dai nakikipagtabangan sa nagpapadagos na katuyohan nin Dios. (Basahon an Hebreo 4:1.) Sa anong paagi? May koneksion iyan sa pagsunod sa Ley ni Moises. Sa laog nin mga 1,500 na taon, an siisay man na Israelitang gustong mamuhay kaoyon kan katuyohan nin Dios dapat magsunod sa Ley. Minsan siring, paagi sa kagadanan ni Jesus, hinale na an Ley. Dai iyan nasabotan nin nagkapirang Kristiano, kaya iininsistir ninda na kaipuhan an padagos na pagsunod sa nagkapirang aspekto kan Ley. *
14 Sa mga Kristiano kaidto na determinadong magsunod sa Ley, ipinaliwanag ni Pablo na an pagigin halangkaw na saserdote ni Jesus, an bagong tipan, asin an espirituwal na templo nangongorog kisa sa katumbas kaiyan kaidtong mga panahon bago kan mga Kristiano. (Heb. 7:26-28; 8:7-10; 9:11, 12) Sa siring, posibleng marhay na kan isurat ni Pablo an dapit sa pribilehio na paglaog sa aldaw nin kapahingaloan ni Jehova, an nasa isip nia iyo an pagsunod sa semanal na Sabbath na nasa Ley: “Kaya igua pang natatada na sabbath nin kapahigñaloan manogñod sa banuaan nin Dios. Huli ta idtong lominaog na sa saiyang kapahigñaloan, nagpahigñalo na man sa saiyang magña guibo, siring kan guinibo nin Dios.” (Heb. 4:8-10) Dai na dapat isipon kan mga Kristianong Hebreong idto na makakamtan ninda an pag-oyon ni Jehova paagi sa paggibo kan mga bagay na basado sa Ley ni Moises. Poon kan Pentecostes 33 C.E., may kabootan na itinatao nin Dios an pag-oyon nia sa mga nagtutubod ki Jesu-Cristo.
15. Taano ta kaipuhan an pagkuyog kun gusto tang makalaog sa kapahingaloan nin Dios?
15 Ano an nakaolang sa mga Israelita kan panahon ni Moises sa paglaog sa Dagang Panuga? Pagsuway. Ano an nakaolang sa nagkapirang Kristiano kan panahon ni Pablo sa paglaog sa kapahingaloan nin Dios? Pagsuway man. Dai ninda nasabotan na natapos na kan Ley an katuyohan kaiyan asin ginigiyahan na ni Jehova an saiyang banwaan pasiring sa laen na direksion.
Paglaog Ngonyan sa Kapahingaloan nin Dios
16, 17. (a) Ano an boot sabihon kan paglaog ngonyan sa kapahingaloan nin Dios? (b) Ano an pag-oolayan sa sunod na artikulo?
16 Pira sanang Kristiano ngonyan an mainsistir na dapat magsunod sa partikular na aspekto kan Ley ni Moises tanganing makaligtas. An ipinasabong na mga tataramon ni Pablo para sa mga taga Efeso malinawon nanggad: “Huli sa biyaya kamo nakaligtas huli sa pagtubod; asin iyan bakong hale sa saindo, kundi balaog nin Dios; bakong huli sa magña guibo, tagñaning dai nin siisay man na managsag.” (Efe. 2:8, 9) Kun siring, ano an boot sabihon para sa mga Kristiano kan paglaog sa kapahingaloan nin Dios? Itinagama ni Jehova an ikapitong aldaw—an aldaw nin saiyang kapahingaloan—tanganing lubos na maotob an katuyohan nia kun dapit sa daga. Kita makakalaog sa kapahingaloan ni Jehova—o makakaibanan nia sa saiyang kapahingaloan—paagi sa masinunod na paggibo kaoyon kan nagpapadagos na katuyohan nia na ihinahayag sa sato paagi sa saiyang organisasyon.
17 Sa ibong na lado, kun mas gusto niatong magin independiente paagi sa pagbaliwala sa hatol na basado sa Biblia na itinatao sa sato paagi sa grupong maimbod asin mapagmansay na oripon, kita minakontra sa ihinahayag na katuyohan nin Dios. Puede kaining isapeligro an matoninong na relasyon niato ki Jehova. Sa sunod na artikulo, pag-oolayan niato an pirang komun na situwasyon na puedeng makaapektar sa banwaan nin Dios asin kun paano maheheling sa satong mga desisyon—magsunod man o magin independiente—kun kita talagang nakalaog na sa kapahingaloan nin Dios.
[Mga Nota sa Ibaba]
^ par. 3 An mga saserdote asin Levita may mga ginigibo sa templo kun aldaw nin Sabbath, pero “dai nagkakasala.” Bilang an halangkaw na saserdote sa dakulang espirituwal na templo nin Dios, puede man na gibohon ni Jesus an espirituwal na asignasyon nia na dai nababalga an Sabbath.—Mat. 12:5, 6.
^ par. 13 Dai niato aram kun baga igwa nanggad nin Judiong Kristiano na nagsuportar pati sa mga areglo para sa Aldaw nin Pagbayad sa Kasalan pagkatapos kan Pentecostes 33 C.E. An paggibo kaiyan kawaran nanggad nin paggalang sa atang ni Jesus. Minsan siring, an nagkapirang Judiong Kristiano nagsusunod pa man giraray sa ibang mga tradisyon na konektado sa Ley.—Gal. 4:9-11.
Mga Hapot Para sa Paghorophorop
• Ano an katuyohan kan kapahingaloan nin Dios sa ikapitong aldaw?
• Paano niato naaraman na nagpapadagos pa ngonyan an ikapitong aldaw?
• Ano an nakaolang sa mga Israelita kan panahon ni Moises saka sa nagkapirang Kristiano kan enot na siglo sa paglaog sa kapahingaloan nin Dios?
• Ano an boot sabihon kan paglaog ngonyan sa kapahingaloan nin Dios?
[Mga Hapot Para sa Pag-adal]
[Blurb sa pahina 27]
Kita makakalaog ngonyan sa kapahingaloan ni Jehova paagi sa masinunod na paggibo kaoyon kan nagpapadagos na katuyohan nia na ihinahayag sa sato paagi sa saiyang organisasyon
[Mga Ritrato sa pahina 26, 27]
Ano an kaipuhan na gibohon kan banwaan nin Dios ngonyan tanganing makalaog sa saiyang kapahingaloan?
