Padagos na Makipagkatoninongan

“Sumonod kita sa magña bagay na nakakapatoninong.”—ROMA 14:19.

1, 2. Taano ta igwa nin katoninongan an Mga Saksi ni Jehova?

MASAKIT manompongan an tunay na katoninongan sa kinaban ngonyan. Dawa an mga tawong pareho an nasyonalidad asin lenguahe parateng nagkakabaranga huli sa relihion, politika, asin kamugtakan sa sosyedad. Sa kabaliktaran, nagkakasararo an banwaan ni Jehova dawa ngani sinda hale “sa gabos na nacion, asin sa gabos na tribu asin magña banuaan patin magña tataramon.”—Kap. 7:9.

² An matoninong na kamugtakan niato sa pangkagabsan dai nagkanorongod sana. An pangenot na dahelan na kita igwa kaiyan iyo na kita “may katoninogñan sa Dios” paagi sa satong pagtubod sa saiyang Aki, na an pinabolos na dugo nakakatahob sa satong mga kasalan. (Roma 5:1; Efe. 1:7) Dugang pa, an tunay na Dios nagtatao nin banal na espiritu sa saiyang maimbod na mga lingkod, asin kaiba sa bunga kaiyan an katoninongan. (Gal. 5:22) An saro pang dahelan kan satong matoninong na pagkasararo iyo na kita “bakong sa kinaban” o bakong kabtang kaiyan. (Juan 15:19) Imbes na kumampi sa politikal na mga isyu, kita nagdadanay na neutral. Huling pinulpog na ‘niato an satong mga minasbad na magin mga tarom nin arado,’ dai kita  nakikilabot sa mga giera sibil o ralaban nin mga nasyon.—Isa. 2:4.

3. Ano an pinapagin posible kan katoninongan niato, asin ano an pag-oolayan sa artikulong ini?

³ An pagkaigwa niato nin katoninongan sa lambang saro orog pa an kalabot kisa sa paglikay sana na makolgan an satong mga tugang. Dawa ngani kita kabilang sa kongregasyon kan Mga Saksi ni Jehova na tibaad kompuesto nin mga indibiduwal gikan sa laen-laen na etnikong grupo asin kultura, ‘kita nagkakaminorootmootan.’ (Juan 15:17) An katoninongan niato nakakatabang sa sato na ‘gumibo nin karahayan sa gabos na tawo, asin orog na sa mga nasa pagtubod.’ (Gal. 6:10) Dapat tang pakamahalon asin protehiran an satong matoninong na espirituwal na paraiso. Kun siring, siyasaton niato kun paano kita padagos na makikipagkatoninongan sa laog kan kongregasyon.

Kun Masingkog Kita

4. Ano an puede tang gibohon tanganing padagos na makipagkatoninongan kun nakolgan niato an boot nin saro?

⁴ “Sa dakol na bagay kita nasisingkog,” an isinurat ni disipulo Santiago. “Kun igua nin dai nasisingkog sa pagtaram, an siring na tauo sangkap” o perpekto. (Sant. 3:2) Huli kaini, siertong malataw an dai pagkakaoyon asin dai pagkasinabotan nin mga magkapagtubod. (Fil. 4:2, 3) Minsan siring, puedeng maresolberan an problema sa pag-oltanan nin mga indibiduwal na dai nararaot an katoninongan kan kongregasyon. Halimbawa, isip-isipa an sadol na dapat tang iaplikar kun marealisar niato na tibaad nakolgan niato an boot nin saro.—Basahon an Mateo 5:23, 24.

5. Paano kita puedeng padagos na makipagkatoninongan kun may nagkasala sa sato?

⁵ Kumusta man kun may nagkasala sa sato sa sadit na paagi? Dapat daw asahan niato na an nagkasala an rumani sa sato asin maghagad nin dispensa? An pagkamoot “dai nagguiguiromdom kan maraot,” an sabi kan 1 Corinto 13:5. Kun nakolgan an boot niato, padagos kitang nakikipagkatoninongan paagi sa pagpatawad asin paglingaw, an boot sabihon, ‘dai paggirumdom kan maraot.’ (Basahon an Colosas 3:13.) Ini an pinakamarahay na gibohon sa saradit na pagkakasala sa aroaldaw, huling nakakatabang ini sa matoninong na relasyon niato sa mga kapwa parasamba asin nagtatao sa sato nin katoninongan nin isip. An madonong na talinhaga nagsasabi: “Kamurawayan . . . an magpasensya sa mga karatan na ginibo.”—Tal. 19:11, BPV. *

6. Ano an maninigo tang gibohon kun nadedepisilan kitang gayo na palampason an sarong pagkakasala sa sato?

⁶ Paano kun nadedepisilan kitang gayo na palampason an sarong pagkakasala? Bako nanggad madonong na ipagparapangestorya an bagay na iyan. An siring na tsismis makakaraot sana sa katoninongan kan kongregasyon. Ano an maninigong gibohon tanganing maresolberan iyan nin matoninong? An Mateo 18:15 nagsasabi: “Kun an tugang mo magkasala tumang saimo, paduman ka, ipahayag mo saiya an saiyang sala na kamong dua sana: kun ika dagñogon nia, nabawe mo an saimong tugang.” Minsan ngani an Mateo 18:15-17 aplikado sa magabat na kasalan, maninigo na maboot na dolokon an nagkasala na kamo sanang duwa asin pagmaigotan na ibalik an matoninong na relasyon sa saiya, sono sa prinsipyo na sinasabi sa bersikulo 15. *

7. Taano ta maninigo tang resolberan tolos an pagpasuruhay?

⁷ Si Pablo nagsurat: “[Maanggot] kamo, asin dai magkasala; dai nindo pasolnopon an aldao sa saindong [kaanggotan]: ni tawan nin lugar an diablo.” (Efe. 4:26, 27) “Makipaguli ka nin madale sa saimong kaiwal,” an sabi ni Jesus. (Mat. 5:25) Kun siring, an padagos na pakikipagkatoninongan nangangaipo nin pagresolber tolos sa problema. Taano? Huling sa paggibo kaiyan, malilikayan na grumabe an dai pagkakaoyon siring sa sarong lugad na dai binobolong asin naimpeksion. Dai niato pagtogotan an pagigin orgolyoso, pagkauri, o an sobra nanggad na pagpahalaga sa materyal na mga bagay na makaolang sa sato na resolberan tolos an pagpasuruhay oras na mangyari iyan.—Sant. 4:1-6.

Kun Dakol an Kalabot sa Pagpasuruhay

8, 9. (a) Anong dai pagkaoroyon sa pagmansay an luminataw sa enot na siglong kongregasyon sa Roma? (b) Anong hatol an itinao ni Pablo sa mga Kristiano sa Roma mapadapit sa pagpasuruhay ninda?

⁸ Kun beses, bako sanang duwa kundi dakol na  indibiduwal an kalabot sa dai pagkaoroyon sa laog kan kongregasyon. Iyan an nangyari sa mga Kristiano sa Roma na pinadarahan ni Pablo nin ipinasabong na surat nia. May pagpasuruhay sa pag-oltanan nin Judio asin Gentil na mga Kristiano. An nagkapira sa kongregasyon na iyan malinaw na minemenos an mga maluya, o sobra kaestrikto, an konsensia. An mga indibiduwal na iyan hinuhusgaran an iba dapit sa personal na mga bagay. Anong sadol an itinao ni Pablo sa kongregasyon?—Roma 14:1-6.

⁹ Tinawan ni Pablo nin hatol an mga indibiduwal sa duwang lado na nagpapasuruhay. An mga nakakasabot na sinda bakong sakop kan Ley ni Moises sinabihan nia na dai pagmenoson an saindang mga tugang. (Roma 14:2, 10) An siring na atitud puedeng makapasingkog sa mga may pagtubod na nababaldi pa man giraray na kumakan nin mga bagay na ipinagbabawal kan Ley. “Dai mo paglaglagon an guibo nin Dios dahel sa kakanon,” an sadol ni Pablo sa sainda. “Marahay na dai magkakan nin laman, ni maginom nin arak, ni magguibo nin anoman na masisingkogan nin saimong tugang.” (Roma 14:14, 15, 20, 21) Sa ibong na lado, tinawan ni Pablo nin hatol an mga Kristiano na mas estrikto an konsensia na dai paghusgaran na bakong maimbod an mga may mas mahiwas na pagmansay. (Roma 14:13) Sinabihan nia an ‘lambang saro sa sainda, na dai mag-isip sa saiya man sana nin halangkaw pa kisa sa maninigo.’ (Roma 12:3) Pagkatapos na tawan nin hatol an duwang lado na nagpapasuruhay, si Pablo nagsurat: “Kaya sumonod kita sa magña bagay na nakakapatoninong, asin sa magña bagay na ikakapakosog kan saro sa saro.”—Roma 14:19.

10. Siring kan enot na siglong kongregasyon sa Roma, ano an kaipuhan tanganing maresolberan an dai pagkaoroyon ngonyan?

¹⁰ Makakasierto kita na naghimate nanggad sa hatol ni Pablo an kongregasyon sa Roma asin guminibo nin kinakaipuhan na pagliliwat. Kun may mangyari ngonyan na dai pagkaoroyon sa pag-oltanan nin mga kapwa Kristiano, bako daw na maninigo man niatong maboot na resolberan an pagpasuruhay paagi sa mapakumbabang paghagad asin pag-aplikar nin sono sa Kasuratan na hatol? Siring kan mga taga Roma kaidto, tibaad kaipuhan man ngonyan na gumibo nin pagliliwat an mga kabilang sa duwang lado na  nagpapasuruhay tanganing ‘mag-iriba nin matoninong.’—Mar. 9:50.

Kun Hinahagadan nin Tabang

11. Anong pag-iingat an maninigong gibohon nin magurang sa kongregasyon kun gusto siang kaolayon nin sarong Kristiano na may problema sa sarong kapagtubod?

¹¹ Paano kun an sarong magurang sa kongregasyon gustong kaolayon nin sarong Kristiano na may problema sa saiyang paryente o kapagtubod? An Talinhaga 21:13 nagsasabi: “An nagtatahob kan saiyang taligña sa inagragñay kan dukha sia man magaagragñay, asin ta dai sia hihinanyogon.” An sarong magurang sa kongregasyon siertong dai ‘matahob kan saiyang talinga.’ Minsan siring, nagpapatanid an saro pang talinhaga: “An enot na magtaram sa atubang kan korte hinohona na tama sagkod na dai pa siya hinahapot kan saiyang kalaban.” (Tal. 18:17, BPV) An sarong magurang sa kongregasyon maninigong maboot na maghinanyog, alagad kaipuhan niang mag-ingat na dai kampihan an nagsusumbong kan pagkakasala. Pagkatapos na maghinanyog, posibleng marhay na hapoton nia an nakolgan an boot kun baga nakipag-olay na sia sa nakakolog sa saiya. Tibaad repasohon man sa saiya kan magurang sa kongregasyon an sono sa Kasuratan na mga lakdang na puede niang gibohon tanganing padagos na makipagkatoninongan.

12. Magtao nin mga halimbawa na nagpapaheling kan peligro nin pabiglabiglang pag-aksion pagkatapos na madangog an sarong sumbong.

¹² Idinodoon kan tolong halimbawa sa Biblia an peligro nin pabiglabiglang pag-aksion pagkatapos na madangog an lado sana nin nagsusumbong. Naniwala si Potifar sa sumbong kan saiyang agom na prinobaran siang lupigan ni Jose. Huli sa daing katanosan na pagkaanggot, si Jose ipinabilanggo ni Potifar. (Gen. 39:19, 20) Si Hadeng David naniwala ki Siba, na nagsabi na kuminampi an saiyang kagurangnan na si Mefiboset sa mga kaiwal ni David. “Uya, maguin logod saimo an gabos na nasasadirihan ni [Mefiboset],” an pabiglabiglang simbag ni David. (2 Sam. 16:4; 19:25-27) Sinabi ki Hadeng Artajerjes na itinotogdok liwat kan mga Judio an mga lanob kan Jerusalem asin marebelde sinda sa Imperyo nin Persia. Naniwala an hade sa bakong totoong sumbong na iyan asin nagboot na pondohon an pagtogdok liwat sa Jerusalem. Bilang resulta, nagpondo an mga Judio sa paggibo sa templo nin Dios. (Esd. 4:11-13, 23, 24) Madonong na sinusunod nin Kristianong kamagurangan an hatol ni Pablo ki Timoteo na likayan an paghusgar kun dai pa aram an gabos na detalye.—Basahon an 1 Timoteo 5:21.

13, 14. (a) Ano an limitasyon niato mapadapit sa pagpasuruhay nin iba? (b) Ano an makakatabang sa kamagurangan tanganing makapaghusgar nin tama mapadapit sa pagpasuruhay nin mga kapagtubod?

¹³ Dawa kun garo baga malinaw nang ikinapahayag kan nagpapasuruhay an lado ninda, mahalagang marealisar na “an tawong naghohona na may naaaraman siya, dai nanggad nakakaaram kan dapat niyang maaraman.” (1 Cor. 8:2, BPV) Talaga daw na aram niato an gabos na detalye kun taano ta nagkaigwa nin pagpasuruhay? Lubos daw niatong nasasabotan an kamugtakan kan mga indibiduwal na kalabot dian? Kun naghuhusgar an kamagurangan, mahalagang marhay na dai sinda magpadaya sa kaputikan, tusong mga pakana, o huringhuding! May katanosan na naghohokom si Jesu-Cristo, an Hokom na nombrado nin Dios. Dai sia ‘naghohokom nin siring sa [naheheling] nin saiyang mga mata, ni nagsasagwe nin huli sa nadadangog kan saiyang mga talinga.’ (Isa. 11:3, 4) Imbes, ginigiyahan si Jesus kan espiritu ni Jehova. Nakikinabang man an Kristianong kamagurangan sa paggiya kan banal na espiritu nin Dios.

¹⁴ Bago sinda makapaghusgar mapadapit sa pagpasuruhay nin mga kapagtubod, kaipuhan na an kamagurangan mamibi para sa tabang kan espiritu ni Jehova saka magsarig sa paggiya kaiyan paagi sa pagkonsulta sa Tataramon nin Dios patin mga publikasyon kan grupong maimbod asin mapagmansay na oripon.—Mat. 24:45.

Makipagkatoninongan Ano Man an Mangyari?

15. Noarin niato maninigong isumbong an magabat na kasalan na naaraman niato?

¹⁵ Bilang mga Kristiano, sinasadol kita na padagos na makipagkatoninongan. Minsan siring, an Biblia nagsasabi man: “Alagad an gikan sa itaas na kadunongan, enot mabini; dangan matuninong.” (Sant. 3:17, An Banal na Biblia [Edisyon na 2007]) An pagigin mapagpatoninong ikaduwa sa kabinian, an boot sabihon, pagsuportar sa malinig na mga pamantayan nin Dios sa moral asin pag-otob  sa saiyang matanos na mga kahagadan. Kun maaraman nin sarong Kristiano na may magabat na kasalan an sarong kapagtubod, maninigo nia ining dagkahon na ituga sa kamagurangan an kasalan. (1 Cor. 6:9, 10; Sant. 5:14-16) Kun dai iyan gibohon kan nagkasala, an kasalan maninigong isumbong kan Kristianong nakaaram kaiyan. Kun dai nia ini gigibohon tangani sanang mapagdanay an matoninong na relasyon sa nagkasala, sia maninimbag man sa pagkakasalang iyan.—Lev. 5:1; basahon an Talinhaga 29:24.

16. Ano an manonodan niato sa ginibong aksion ni Jehu tumang ki Hadeng Joram?

¹⁶ An sarong pagkasaysay may koneksion ki Jehu nagpapaheling na mas mahalaga an katanosan nin Dios kisa sa pagigin mapagpatoninong. Isinugo nin Dios si Jehu tanganing isagibo an Saiyang paghokom sa pamilya ni Hadeng Ahab. An maraot na si Hadeng Joram, na aki ni Ahab asin Jezebel, suminakay sa saiyang karuwahe tanganing tagboon si Jehu asin nagsabi: “Igua nin katoninogñan, Jehu?” Ano an simbag ni Jehu? Sia nagsimbag: “Anong katoninogñan, kan magña pagparapasangbay ni [Jezebel] na saimong ina, asin an saiyang dakol na magña tagahupa [‘mangkukulam,’ BPV]?” (2 Ha. 9:22) Dangan, kinua ni Jehu an saiyang busog asin pinana si Joram sa puso. Siring kan ginibong aksion ni Jehu, dai dapat makikompromiso an kamagurangan sa tuyong naggigibo nin kasalan asin dai nagsosolsol tangani sanang mapagdanay an katoninongan. Itinitiwalag ninda an dai nagsosolsol na mga nagkasala tanganing an kongregasyon padagos na magkaigwa nin matoninong na relasyon sa Dios.—1 Cor. 5:1, 2, 11-13.

17. Ano an kabtang kan gabos na Kristiano sa padagos na pakikipagkatoninongan?

¹⁷ An kadaklan na pagpasuruhay sa pag-oltanan nin mga tugang mayo man nin kalabot na magabat na pagkakasala na nangangaipo nin hudisyal na aksion. Kun siring, marahay nanggad na mamomoton na tahoban an sala nin iba. “An nagtatahob nin kasumbikalan naghahanap nin pagkamuot,” an sabi kan Biblia, “an nagbubuyagyag kaiyan nagpapasuway nin magkatuod.” (Pr. [Tal.] 17:9, An Banal na Biblia [Edisyon na 2007]) An pagsunod sa mga tataramon na iyan makakatabang sa sato gabos na maingatan an katoninongan sa kongregasyon asin mapagdanay an marahay na relasyon ki Jehova.—Mat. 6:14, 15.

Mga Bendisyon nin Padagos na Pakikipagkatoninongan

18, 19. Anong mga pakinabang an itinatao nin padagos na pakikipagkatoninongan?

¹⁸ An padagos na pagsunod “sa magña bagay na nakakapatoninong” nagtatao sa sato nin nagsosopay na mga bendisyon. Igwa kita nin dayupot asin personal na relasyon ki Jehova mantang inaarog niato an saiyang halimbawa, saka nakakatabang kita sa matoninong na pagkasararo kan satong espirituwal na paraiso. An padagos na pakikipagkatoninongan sa laog kan kongregasyon nakakatabang sa sato na maheling an mga paagi kun paano man niato magigibo iyan sa mga hinuhulitan niato kan “evangelio nin katoninogñan.” (Efe. 6:15) Kita mas andam na “maguin maboot sa gabos, . . . matioson.”—2 Tim. 2:24.

¹⁹ Girumdomon man na magkakaigwa “nin pagkabuhay liwat an magña matanos asin bakong matanos.” (Gui. 24:15) Kun an paglaom na iyan mangyari na digdi sa daga, minilyon na tawo na laen-laen an pinaghalean, ugale, asin personalidad an bubuhayon liwat—poon pa kaidtong mga panahon “paglalagña [“pagkaestablisar,” NW] kan kinaban”! (Luc. 11:50, 51) Dakulang pribilehio nanggad na itokdo sa mga bubuhayon liwat an mga paagi nin pakikipagkatoninongan. An pagsasanay na inaako niato ngonyan bilang mga parapatoninong magigin nanggad dakulaon na tabang para sa sato sa panahon na iyan!

[Mga Nota sa Ibaba]

Ano an Nanodan Nindo?

• Paano kita padagos na makikipagkatoninongan kun nakolgan niato an boot nin saro?

• Ano an gigibohon niato tanganing padagos na makipagkatoninongan kun may nagkasala sa sato?

• Taano ta bakong madonong na may kampihan sa pagpasuruhay nin iba?

• Ipaliwanag kun taano ta may mga situwasyon na dai dapat padagos na makipagkatoninongan.

[Mga Hapot Para sa Pag-adal]

[Ritrato sa pahina 29]

Namomotan ni Jehova an mga lubos na nagpapatawad sa iba