Sarong Makasaysayan na Miting

“PAGKATAPOS kan miting na ini, sasabihon nindo, ‘Ini makasaysayan nanggad na teokratikong taonan na miting!’” Paagi sa mga tataramon na iyan, orog pang pinakosog ni Stephen Lett—miembro kan Namamahalang Grupo kan Mga Saksi ni Jehova—an pag-antisipar kan dakol na nag-atender. Nagtiripon sinda para sa ika-126 na taonan na miting kan Watch Tower Bible and Tract Society of Pennsylvania, na ginibo kan Oktubre 2, 2010, sa Assembly Hall of Jehovah’s Witnesses sa Jersey City, New Jersey, E.U.A. Ano an nagkapira sa tampok na mga kabtang kan makasaysayan na okasyon na ini?

An pambukas na pahayag ni Tugang na Lett sarong entusiastikong pagtokar dapit sa langitnon na karuwahe ni Jehova na ilinadawan sa libro kan Biblia na Ezequiel. An dakulaon asin mamuraway na karuwaheng ini naglaladawan sa organisasyon nin Dios, na lubos na kontrolado ni Jehova. Sinabi ni Tugang na Lett na an langitnon na kabtang kaiyan, na kompuesto nin espiritung mga linalang, naghihiro na siring karikas nin kikilat—arog kan rikas kan kaisipan ni Jehova. Padagos man na naghihiro an daganon na kabtang kan organisasyon ni Jehova Dios. Sinambit ni Tugang na Lett an dakol na nakakaogmang pangyayari, kan nakaagi pa sanang mga taon, sa naheheling na kabtang kan organisasyon nin Dios.

Halimbawa, huling dakol na sangang opisina an pinagsasararo na, dakol na dating naglilingkod sa mga erokan na Bethel sa mga nasyon na iyan an makakakonsentrar sa paghuhulit. Dinagka ni Tugang na Lett an mga nagdadangog na danay na ipamibi na logod an Namamahalang Grupo, bilang representante kan grupong oripon, bako sanang padagos na magin maimbod kundi magin madonong, o mapagmansay man.—Mat. 24:45-47.

Nakakaparigon na mga Report Asin Nakakaogmang mga Interbio

Itinao ni Tab Honsberger, na miembro kan Komite kan Sangay sa Haiti, an nakakapahiro sa boot na report dapit sa resulta kan linog, kan Enero 12, 2010, na guminadan nin mga 300,000 katawo sa lugar na iyan. Sinambit nia na an klerigo nagsasabi sa mga tawo na pinadusahan nin Dios an mga nagadan huling mayo sindang pagtubod pero prinotehiran nia an mga marahay. Alagad, rinibong kriminal na sentensiado an nakadulag kan marumpag kan linog an mga lanob nin sarong presohan. Huli kaini, dakol sa Haiti na sadiosan an puso an nararanga kan maaraman ninda an katotoohan sa kun taano ta grabe an problema sa panahon niato. Kinotar ni Tugang na Honsberger an sinabi nin maimbod na tugang na lalaki sa Haiti na nagadanan nin agom huli sa kalamidad na iyan: “Sagkod ngonyan nagluluha pa ako. Dai ko aram kun sagkod noarin ako magmomondo, alagad naoogma akong mamatean an pagkamoot kan organisasyon ni Jehova. Igwa ako nin paglaom, asin determinado akong sabihon iyan sa iba.”

 Nagtao si Mark Sanderson, na ngonyan miembro kan pamilyang Bethel sa Brooklyn, nin report dapit sa Pilipinas. Bilang dating miembro kan Komite kan Sangay sa Pilipinas, ikinaogma niang sabihon an dapit sa 32 na sunod-sunod na pinakahalangkaw na bilang nin mga parahayag kan Kahadean asin na mas dakol na an bilang nin mga inaadalan sa Biblia kisa sa bilang nin mga parahayag. Iinestorya nia an dapit sa sarong tugang na si Miguel, na ginadan an makoapong lalaki. Nagmaigot na marhay si Miguel na magsangat nin kaso tanganing mapreso an naggadan. Dangan, kan si Miguel naghuhulit sa presohan, naheling nia an naggadan. Minsan ngani ninenerbios si Miguel, mahoyo asin maboot niang kinaolay ini. Pag-abot nin panahon, kinonduktahan nia nin pag-adal sa Biblia an lalaking ini, na naghimateng marhay asin nakanood na mamotan si Jehova. Bautisado na sia ngonyan. Sia nagin dayupot na amigo ni Miguel na nagmamaigot na mapaluwas nin amay sa presohan an saiyang bagong tugang. *

An sunod na kabtang iyo an pag-interbio ni Mark Noumair, instruktor sa Departamento sa Teokratikong mga Paadalan, sa tolong mag-agom—si Alex asin Sarah Reinmueller, David asin Krista Schafer, saka Robert asin Ketra Ciranko. Sinabi ni Alex Reinmueller, sarong paratabang sa Komite sa Pagpublikar, kun paano nia isinapuso an katotoohan mantang sia nagpapayunir sa Canada kan sia 15 anyos pa sana, na sa parate naghuhulit nin solo. Kan hapoton si Tugang na Reinmueller kun siisay an pinakanakaimpluwensia sa saiya sa Bethel, nasambitan nia an tolong maimbod na lalaki, saka sinabi nia kun paano an lambang saro sa sainda nakatabang sa saiya na tumalubo sa espirituwal. Sinambit kan saiyang agom na si Sarah an sarong tugang na babae na amiga nia, na dakol na dekadang nagtagal sa mga presohan sa Tsina huli sa pagtubod kaini. Sinabi ni Sarah na nakanood siang magsarig ki Jehova paagi sa personal na pamimibi.

Inomaw ni David Schafer, paratabang sa Komite sa Pagtotokdo, an saiyang ina huli sa makosog na pagtubod kaini asin sinambit man nia an dapit sa mga tugang na paratroso na nagtabang sa saiya na mag-auxiliary payunir kan sia hoben pa. An agom niang si Krista maogmang nag-estorya dapit sa impluwensia sa saiya nin may edad nang mga miembro kan pamilyang Bethel na “maimbod sa kadikiton,” arog kan sadol ni Jesus.—Luc. 16:10.

Ginirumdom ni Robert Ciranko, paratabang sa Komite sa Pagsurat, an duwa niang lolo asin duwang lola, na mga imigrante hale sa Hungary saka linahidan na mga Kristiano. Kan sia aki pa, naghanga sia pag-atender nia sa darakulang kombension kan dekada nin 1950 huling naaraman nia na mas dakula nanggad an organisasyon ni Jehova kisa sa kongregasyon ninda. Sinabi kan agom niang si Ketra kun paano nia nanodan na magin maimbod kan nagpapayunir sia sa sarong kongregasyon na may grabeng apostasiya asin iba pang  problema. Sia nagtagal asin pag-abot nin panahon idinestino bilang espesyal payunir sa sarong kongregasyon na an pagkasararo nakapahiro sa saiyang boot.

Pagkatapos, nagtao si Manfred Tonak nin report dapit sa Etiopia. An lugar na iyan kaidto pang mga panahon kan Biblia, asin ngonyan igwa nin labing 9,000 na parahayag kan maogmang bareta. An kadaklan sa sainda nag-iistar sa kabisera kaiyan, an Addis Ababa, o harani dian. Huli kaini, kaipuhan na tawan nin orog na atension an hararayong lugar. Tanganing magibo ini, inimbitaran an mga Saksing Etiope na nasa ibang mga nasyon na magbisita tanganing maghulit sa nagkapirang harayong lugar kan nasyon. Dakol an nag-abot, na nagpakosog sa mga Saksi duman, asin nakanompong sinda nin mga andam na maghinanyog.

An sarong tampok na programa iyo an simposium manongod sa Mga Saksi ni Jehova sa Rusia asin sa legal na pakikipaglaban ninda. Iprinesentar ni Aulis Bergdahl, na miembro kan Komite kan Sangay sa Rusia, an kasaysayan kan pagpersegir sa mga Saksi sa Rusia, lalo na sa Moscow. Iinestorya ni Philip Brumley, na naglilingkod sa Departamento Legal kan sangang opisina sa Estados Unidos, an nakakapukaw sa boot na mga nangyari kan nakaagi pa sanang mga bulan kan dangogon kan European Court of Human Rights (ECHR) an siyam na akusasyon tumang sa mga Saksi. An Korte sararong nagdesisyon na mayo sa siyam na akusasyon na iyan an igwa nin ano man na basehan asin dakol na beses na maingat pa nganing nangatanosan tanganing pahimutikan an mga argumentong iprinesentar. Minsan ngani hinahalat pa an magigin epekto kaiyan, may paglaom na nagtaram si Tugang na Brumley dapit sa puedeng magin epekto kan desisyon na ini kan Korte sa mga kaso sa ibang mga nasyon.

Pagkatapos kan nakakaogmang baretang ini, iinanunsiar ni Tugang na Lett na nagtogot na an ECHR na dangogon an haloyon nang kaso dapit sa buhis na kalabot an gobyerno kan Pransia asin Mga Saksi ni Jehova. Dikiton sana sa mga kasong ipinepresentar an inaako kan respetadong marhay na Korteng ini. Sa ngonyan, 39 nang kaso an dinangog kan ECHR na kalabot an Mga Saksi ni Jehova, asin an 37 kaiyan apabor sa sato an desisyon. Dinagka ni Tugang na Lett an bilog na banwaan nin Dios na padagos na ipamibi ki Jehova Dios an bagay na iyan.

An ultimong report itinao ni Richard Morlan, field instructor sa Paadalan Para sa mga Magurang sa Kongregasyon. Entusiastiko niang iinestorya an manongod sa paadalan asin an pagigin mapag-apresyar kan mga magurang sa kongregasyon na nag-adal dian.

Iba Pang Pahayag kan mga Miembro kan Namamahalang Grupo

Si Guy Pierce kan Namamahalang Grupo nagtao nin odok sa pusong pahayag na nagkonsentrar  sa teksto kan taon para sa 2011, ‘Magpaili sa ngaran ni Jehova.’ (Sof. 3:12, NW) Sinabi nia na minsan ngani maogmang panahon ini sa dakol na paagi para sa banwaan ni Jehova, seryoso asin maninigo man na pag-isipan an panahon na ini. Harani na an dakulang aldaw ni Jehova; pero, an mga tawo padagos na nagpapaili sa falsong relihion, politikal na mga institusyon, materyal na kayamanan, pagbutabutahan sa realidad (escapism), asin mga kaagid kaiyan. Tanganing makanompong nin tunay na pailihan, kaipuhan tang mag-apod sa ngaran ni Jehova, na kalabot an pagmidbid, lubos na paggalang, asin pagtiwala sa Persona na irinerepresentar kan ngaran na iyan, na namomotan sia paagi sa gabos na bagay na igwa kita.

Sunod, itinao ni David Splane kan Namamahalang Grupo an sinsero asin nakakapukaw sa isip na pahayag dapit sa temang “Nakalaog Na daw Kamo sa Kapahingaloan nin Dios?” Sinabi nia na an kapahingaloan nin Dios dai nangangahulogan na sia mayong ginigibo, huling si Jehova asin an saiyang Aki padagos na ‘naggigibo’ sa bilog na piguratibong aldaw na iyan nin kapahingaloan, tanganing mapangganang otobon an katuyohan nin Dios para sa mga linalang sa daga. (Juan 5:17) Kun siring, paano kita makakalaog sa kapahingaloan nin Dios? Kabtang sana kan simbag dian an pagpondo sa paggibo nin kasalan asin pagpakangmatanos. Kaipuhan tang magtubod asin mamuhay na isinasaisip an katuyohan nin Dios, na ginigibo an ano man na makakaya niato tanganing makatabang para sa katuyohan na iyan. Kun minsan, iyan nangorognang masakit gibohon, alagad kaipuhan tang sunodon an hatol na iyan asin makikooperar sa paggiya na gikan sa organisasyon ni Jehova. Odok na dinagka ni Tugang na Splane an mga nagdadangog na gibohon an gabos na makakaya ninda tanganing makalaog sa kapahingaloan nin Dios.

An ultimong pahayag, na itinao ni Anthony Morris kan Namamahalang Grupo, may temang “Ano Pa an Hinahalat Niato?” May pagkaapurado asin pagkamoot siring sa ama na ipinagirumdom ni Tugang na Morris sa mga nagdadangog an dapit sa propetikong mga pangyayari sa maabot na panahon, na inaantisipar na marhay kan gabos na maimbod. Kaiba digdi an pagkurahaw nin “Katoninongan asin katiwasayan!” saka an paglaglag sa falsong relihion. (1 Tes. 5:2, 3, NW; Kap. 17:15-17) Nagpatanid si Tugang na Morris dapit sa pagsabing, “Armagedon na,” huli sa mga pangyayari sa bareta na bako man kaotoban kan siring na mga hula. Irinekomendar nia an pagigin magayagaya, mapasensia, asin mapaghalat na kaisipan na ilinadawan sa Miqueas 7:7. Pero, kadungan kaiyan, dinagka nia an gabos na dayupot na magkasararo kaiba kan Namamahalang Grupo, siring sa mga soldados mantang pasiring sa kasagsagan kan ralaban. “Pasariga an saindong boot,” an sabi nia, “kamo gabos na naglalaom [ki Jehova].”—Sal. 31:24, An Marahay na Bareta Biblia.

Bilang kongklusyon, may itinaong nakakapukaw sa boot asin makasaysayan na mga paisi. Ipinaisi ni Geoffrey Jackson kan Namamahalang Grupo an plano na magpublikar, bilang pagprobar, nin pinasimpleng pag-aadalan na edisyon kan The Watchtower para sa mga limitado an kakayahan sa Ingles. Dangan, ipinaisi ni Stephen Lett na maareglo an Namamahalang Grupo nin mga pagsongko sa pagpastor sa mga paraataman nin distrito sa Estados Unidos asin sa agom ninda. Dangan, ipinaisi nia na an Ministerial Training School magigin nang Bible School for Single Brothers. Sinabi man nia na dai mahahaloy magkakaigwa nin bagong paadalan na Bible School for Christian Couples. Tatawan kaiyan nin orog na pagsasanay an mga mag-agom tanganing mas magamit sinda sa organisasyon ni Jehova. Ipinaisi man ni Tugang na Lett na an School for Traveling Overseers and Their Wives asin an School for Branch Committee Members and Their Wives gigibohon sa Patterson nin duwang beses kada taon, na may probisyon na mag-adal sa ikaduwang pagkakataon an mga nakapag-adal na dian kaidto.

Nakakapukaw sa boot an kongklusyon kan programa huli sa mapakumbaba asin sinserong pamibi kan 97 anyos na si John E. Barr, na haloy nang miembro kan Namamahalang Grupo. * Pagkatapos kan miting, namatean kan gabos na talagang makasaysayan an aldaw na idto.

[Mga Nota sa Ibaba]

[Blurb sa pahina 19]

Ikinaogma kan gabos na nag-atender an mga interbio

[Blurb sa pahina 20]

Binendisyonan ni Jehova an paghuhulit sa Etiopia