Si Jehova—‘An Dios nin Katoninongan’

‘An Dios nin katoninongan mapa saindo gabos.’—ROMA 15:33.

1, 2. Anong nakakatension na situwasyon an isinaysay sa Genesis kapitulo 32 asin 33, saka ano an nagin resulta?

NANGYARI ini harani sa Penuel, sa may sulogan na kababan nin Jabok sa sirangan na parte kan salog nin Jordan. Nabaretaan ni Esau na papuli na an kakambal niang si Jacob. Dawa ngani 20 taon na an nakaagi poon kan ipabakal ni Esau sa tugang nia an saiyang pagkamatua, natatakot si Jacob na tibaad naghihinanakit pa man giraray an tugang nia asin gusto siang gadanon. Kaiba an 400 na lalaki, nagduman si Esau tanganing sabaton an tugang nia na naparayo an boot sa saiya. Huling inaantisipar ni Jacob na magigin agresibo si Esau, nagpadara sia ki Esau nin sunod-sunod na regalo na sa kabilogan labing 550 ataman na hayop. Sa kada grupo nin mga hayop na dara kan mga surugoon ni Jacob, sinasabi ninda ki Esau na iyan regalo kan saiyang tugang.

² Sa katapustapusi, magtatagboan na sinda! Mantang si Jacob makosog an boot na naglalakaw pasiring ki Esau, sia duminuko—bako sanang saro kundi pitong beses. Nagibo na ni Jacob an pinakamahalagang lakdang tanganing mapalumoy an puso kan tugang nia. Si Jacob namibi ki Jehova na logod iligtas sia ki Esau. Sinimbag daw ni Jehova an pamibing ini? Iyo. “Asin dominalagan si Esau na sominabat saiya,” an sabi sa sato kan Biblia, “asin kinogos nia siya, asin kinogos siya sa liog, asin hinadkan siya.”—Gen. 32:11-20; 33:1-4.

3. Ano an manonodan niato sa pagkasaysay dapit ki Jacob asin Esau?

³ Ipinapaheling kan pagkasaysay dapit ki Jacob asin Esau na maninigo kitang gumibo nin odok asin praktikal na paghihingoa tanganing resolberan an mga bagay-bagay kun lumataw an mga problema na puedeng magsapeligro kan  katoninongan niato sa laog kan kongregasyon. Si Jacob naghingoang makipagkatoninongan ki Esau, alagad bakong huli ta sia nagkasala sa saiyang tugang asin kaipuhan na maghagad nin dispensa. Dai, mayong pagpahalaga si Esau sa saiyang pagkamatua kaya ipinabakal nia iyan ki Jacob karibay nin sarong mangko nin ginaga. (Gen. 25:31-34; Heb. 12:16) Minsan siring, an paagi nin pagdolok ni Jacob ki Esau nagpapaheling kun guranong paghihingoa an maninigo na andam tang gibohon tanganing mapagdanay niato an matoninong na relasyon sa satong Kristianong mga tugang. Ipinapaheling man kaiyan na binebendisyonan kan tunay na Dios an satong mapagngayongayong paghihingoa na makipagkatoninongan. An Biblia igwa nin dakol na iba pang halimbawa na nagtotokdo sa sato na magin mga parapatoninong.

An Pinakanangongorog na Halimbawa na Dapat Tang Arogon

4. Ano an probisyon nin Dios tanganing iligtas an katawohan sa kasalan asin kagadanan?

⁴ An pinakamarahay na halimbawa nin parapatoninong iyo si Jehova—‘an Dios nin katoninongan.’ (Roma 15:33) Isip-isipa an ginibo ni Jehova tanganing tabangan kitang magkaigwa nin matoninong na relasyon sa saiya. Bilang makasalan na mga naggikan ki Adan asin Eva, maninigo kita sa “bayad nin kasalan.” (Roma 6:23) Sa ibong kaiyan, huli sa dakulang pagkamoot ni Jehova, iinareglo nia an satong kaligtasan paagi sa pagsugo sa saiyang namomotan na Aki hale sa langit tanganing mamundag bilang perpektong tawo. Dangan, an Aki gikan sa boot na nagsunod. Sia nagtogot na gadanon kan mga kaiwal nin Dios. (Juan 10:17, 18) Binuhay liwat kan tunay na Dios an saiyang namomotan na Aki, na pagkatapos kaiyan iprinesentar sa Ama an halaga kan saiyang pinabolos na dugo, na magigin pantubos tanganing iligtas sa daing sagkod na kagadanan an nagsosolsol na mga nagkasala.—Basahon an Hebreo 9:14, 24.

5, 6. Ano an epekto kan pinabolos na dugo ni Jesus sa naraot na relasyon sa pag-oltanan nin Dios asin kan makasalan na katawohan?

⁵ Ano an epekto kan probisyon na atang na pantubos kan Aki nin Dios sa naraot na relasyon sa pag-oltanan nin Dios asin kan makasalan na katawohan? “An padusa [“na nanonongod sa,” NW] satuyang katoninogñan nasa saiya,” an sabi kan Isaias 53:5, “asin nin huli kan saiyang magña labod nagkaoromayan kita.” Imbes na ibilang na mga kaiwal nin Dios, puede nang magkaigwa nin matoninong na relasyon sa saiya an makinuyog na mga tawo. “Na dian [ki Jesus] igua kita kan satong katubosan huli kan saiyang dugo, kan kapatawadan kan satong magña kalapasan.”—Efe. 1:7.

⁶ An Biblia nagsasabi: “Binoot nin Ama na dian [ki Cristo] mamugtak an bilog na kapanoan.” Ini huli ta si Cristo an pangenot na personahe sa pag-otob kan katuyohan nin Dios. Asin ano an katuyohan ni Jehova? Iyo na “mapaguli an gabos na bagay manogñod sa saiya man sana, pakaguiboha nia kan katoninogñan huli kan dugo” ni Jesu-Cristo. Sa siring, “an gabos na bagay” na dinadara nin Dios sa matoninong na relasyon sa saiya iyo “an magña bagay na nasa kalagñitan” asin “an magña bagay na nasa ibabao nin daga.” Ano an mga iyan?—Basahon an Colosas 1:19, 20.

7. Ano “an magña bagay na nasa kalagñitan” asin “an magña bagay na nasa ibabao nin daga” na dinadara sa matoninong na relasyon sa Dios?

⁷ An probisyon na pantubos nagpapagin posible na magkaigwa nin ‘matoninong [na relasyon] sa Dios’ an linahidan na mga Kristiano, na “pinakangmatanos” bilang mga aki nin Dios. (Basahon an Roma 5:1.) Sinda an “magña bagay na nasa kalagñitan” huling igwa sinda nin langitnon na paglaom asin ‘maghahade sa daga’ saka maglilingkod bilang mga saserdote para sa Dios. (Kap. 5:10) Sa ibong na lado, “an magña bagay na nasa ibabao nin daga” iyo an nagsosolsol na mga tawo, na pag-abot nin panahon magkakamit nin buhay na daing katapusan digdi sa daga.—Sal. 37:29.

8. Ano an epekto sa saindo kan paghorophorop sa kun gurano kadakula an ginibo ni Jehova tanganing an katawohan magkaigwa nin matoninong na relasyon sa saiya?

⁸ Sa pagpahayag ni Pablo kan saiyang odok sa pusong pagpasalamat sa probisyon ni Jehova, sia nagsurat sa linahidan na mga Kristiano sa Efeso: “An Dios, na mayaman sa pagkaherak, . . . minsan  kan kita garadan pa huli kan satong magña kalapasan, bominuhay sato sa kaibahan ni Cristo (huli sa biyaya kamo nakaligtas).” (Efe. 2:4, 5) Baga man langitnon o daganon an paglaom niato, nagpapasalamat kitang marhay sa Dios huli sa saiyang pagkaherak asin biyaya o dai na kutana maninigong kabootan. Dakulaon an satong pagpasalamat mantang iniisip-isip niato kun gurano kadakula an ginibo ni Jehova tanganing magin posible para sa katawohan na magkaigwa nin matoninong na relasyon sa saiya. Kun kita napapaatubang sa mga situwasyon na nagsasapeligro kan matoninong na pagkasararo sa kongregasyon, bako daw na an mapagpahalagang paghorophorop niato sa halimbawa nin Dios maninigong magpahiro sa sato na magin mga parapatoninong?

Makanood sa Halimbawa ni Abraham Asin Isaac

9, 10. Paano ipinaheling ni Abraham sa pagtratar nia ki Lot na sia parapatoninong kan lumataw an tension sa pag-oltanan kan saindang mga paraataman nin hayop?

⁹ Mapadapit sa patriarkang si Abraham, an Biblia nagsasabi: “Si Abraham nagtubod sa Dios, asin iyan ibinilang sa saiya na katanosan; asin sia inapod na katood nin Dios.” (Sant. 2:23) Nagin risang-risa an pagtubod ni Abraham huli sa saiyang pagigin mamomoton sa katoninongan. Halimbawa, mantang nagdadakol an ataman na hayop ni Abraham, nagkaigwa nin tension sa pag-oltanan kan saiyang mga paraataman nin hayop asin kan sa sobrino niang si Lot. (Gen. 12:5; 13:7) An malinaw na solusyon iyo na magsuwayan si Abraham asin Lot. Paano inatubang ni Abraham an sensitibong situwasyon na ini? Imbes na gamiton an saiyang edad asin espesyal na relasyon sa Dios bilang basehan tanganing diktahan an saiyang sobrino, ipinaheling ni Abraham na sia tunay na parapatoninong.

¹⁰ “Dai man logod magkaigua gñonian nin pagpasinuhayan ako asin ika, an magña paraataman [ko nin] hayop asin an magña saimo,” an sabi ni Abraham sa saiyang sobrino, “huli ta magtugang kita.” An patriarka nagsabi pa: “Bakong an bilog na kinaban nasa atubagñan mo? Ipinakikimaherak ko saimo na somiblag ka sako. Kun pumauala ka, ako ma patoo; kun ika pomatoo, ako mapauala.” Pinili ni Lot an pinakamatabang parte kan daga, alagad si Abraham dai naghinanakit sa saiya. (Gen. 13:8-11) Paghaloyhaloy, kan si Lot bihagon kan nananakyadang mga hukbo, si Abraham dai nag-alangan na isalbar an sobrino nia.—Gen. 14:14-16.

11. Paano si Abraham padagos na nakipagkatoninongan sa saiyang kataraed na Filisteo?

¹¹ Isip-isipa man kun paano si Abraham padagos na nakipagkatoninongan sa saiyang kataraed na Filisteo sa daga nin Canaan. Madahas na “kinua” kan mga Filisteo an bubon na kinalot kan mga surugoon ni Abraham sa Beer-seba. Ano an nagin reaksion kan tawong iyan mantang ikinasalbar nia an saiyang sobrino paagi sa pagdaog sa apat na hade na buminihag sa saiya? Imbes na makiiwal tanganing bawion an saiyang bubon, si Abraham nagdanay na silensio dapit sa bagay na ini. Pag-abot nin panahon, nagduman ki Abraham an hadeng Filisteo tanganing makipagtipan para sa katoninongan. Pagkatapos na si Abraham pasumpaon kan hadeng Filisteo na magin maboot sa mga aki kaini, saka sana sinabi ni Abraham an manongod sa bubon na kinua sa saiya. Nabigla an hade pakadangog kaini kaya ibinalik nia ki Abraham an bubon. Kun dapit ki Abraham, sia padagos na nabuhay nin matoninong bilang dayong residente sa dagang idto.—Gen. 21:22-31, 34.

12, 13. (a) Paano inarog ni Isaac an halimbawa kan saiyang ama? (b) Paano binendisyonan ni Jehova an pagigin mamomoton sa katoninongan ni Isaac?

¹² An aki ni Abraham na si Isaac mamomoton man sa katoninongan arog kan saiyang ama. Risang-risa ini sa pagtratar ni Isaac sa mga Filisteo. Huling may tiggutom sa daga, buminalyo si Isaac asin an saiyang pamilya paamihanan, gikan sa Beer-lahai-roi, na nasa marang rehion kan Negeb, pasiring sa Gerar na mas mabungang teritoryo kan mga Filisteo. Duman binendisyonan ni Jehova si Isaac nin abundang pananom asin pinadakol an saiyang ataman na hayop. Nagpoon na mauri sa saiya an mga Filisteo. Huling habo kan mga Filisteo na umasenso si Isaac arog kan saiyang ama, tinambonan ninda nin daga an mga bubon na kinalot kan mga surugoon ni Abraham sa rehion na idto. Sa katapustapusi, sinabihan kan hadeng Filisteo si Isaac na ‘sumiblag sa sainda.’ Nagsunod  an matoninong na si Isaac.—Gen. 24:62; 26:1, 12-17.

¹³ Pakabalyo ni Isaac asin kan saiyang pamilya saka kairiba, nagkalot an saiyang mga pastor nin saro pang bubon. Alagad nagsabi an mga pastor na Filisteo na sadiri daa ninda an tubig. Arog kan saiyang ama na si Abraham, dai nakiiwal si Isaac huli sa bubon. Imbes, pinakalot giraray ni Isaac nin bubon an saiyang mga surugoon. Nagsabi giraray an mga Filisteo na sainda daa ini. Para sa katoninongan, buminalyo si Isaac asin an dakol niang kairiba pasiring sa saro pang lugar. Duman nagkalot an mga surugoon ni Isaac nin bubon na nginaranan niang Rehobot. Pag-abot nin panahon, sia buminalyo sa mas mabungang rehion nin Beer-seba, na duman sia binendisyonan asin sinabihan ni Jehova: “Dai ka matakot, huli ta iyaon ako sa saimo, asin bebendicionan taka, asin papakadakolon ko an maguikan saimo huli sa pagkamoot ko ki Abraham na sakuyang oripon.”—Gen. 26:17-25.

14. Paano ipinaheling ni Isaac na sia parapatoninong kan makipagtipan sa saiya para sa katoninongan an hadeng Filisteo?

¹⁴ Siertong may kakayahan si Isaac na ipaglaban an saiyang deretso na gamiton an gabos na bubon na kinalot kan saiyang mga surugoon. An prueba kaini iyo na nagduman sa saiya sa Beer-seba an hadeng Filisteo asin an mga opisyal kaini tanganing makipagtipan sa saiya para sa katoninongan, na nagsasabi: “Nahiling niyamo na si Jehova iyaon sa saimo.” Pero, para sa katoninongan, nagdesisyon si Isaac na bumalyo nin labi sa sarong beses imbes na makiiwal. Sa pagkakataon na ini ipinaheling man ni Isaac na sia parapatoninong. An rekord sa kasaysayan nagsasabi: “Binogtakan niya [an saiyang mga bisita] nin kakanon, asin nagkarakan sinda asin nagirinom. Asin sinda nagbaragñon na amay, asin ta nagñagsinumpaan sinda; asin isinobol sinda ni Isaac . . . sa katoninogñan.”—Gen. 26:26-31.

Makanood sa Pinakapadangat na Aki ni Jacob

15. Taano ta dai mahimo kan mga tugang ni Jose na makipag-olay sa saiya nin matoninong?

¹⁵ An aki ni Isaac na si Jacob nagdakula na “tauong toninong.” (Gen. 25:27) Arog kan sinambit sa enotan, nakipagkatoninongan si Jacob sa saiyang tugang na si Esau. Daing duda na nakinabang si Jacob sa halimbawa nin pagigin mapagpatoninong kan saiyang ama na si Isaac. Kumusta man an mga aki ni Jacob? Sa 12 niang aking lalaki, si Jose an pinakapadangat ni Jacob. Si Jose makinuyog asin magalang na aki na odok na nagmamakolog sa intereses kan saiyang ama. (Gen. 37:2, 14) Minsan siring, nauring gayo ki Jose an mas matuang mga tugang nia kaya dai ninda mahimong makipag-olay sa saiya nin matoninong. Daing herak nindang ipinabakal si Jose tanganing magin oripon asin pinapaniwala an saindang ama na ginadan si Jose nin mabangis na hayop.—Gen. 37:4, 28, 31-33.

16, 17. Paano ipinaheling ni Jose sa saiyang mga tugang na sia mamomoton sa katoninongan?

¹⁶ Si Jehova nagdanay na kaibanan ni Jose. Pag-abot nin panahon, sia nagin primer ministro kan Egipto—ikaduwa sana ki Faraon kun dapit sa kapangyarihan. Kan magduman sa Egipto an mga tugang ni Jose huli sa grabeng tiggutom, sia dai ngani ninda namidbid huli sa saiyang opisyal na gubing na pang-Egipcio. (Gen. 42:5-7) Pasilon na kutana para ki Jose na magbalos sa mga tugang nia huli sa pagkadaing herak ninda sa saiya asin sa saindang ama! Minsan siring, imbes na magbalos, pinagmaigotan ni Jose na makipagkatoninongan sa sainda. Kan magin malinaw na nagsolsol na an mga tugang nia, sia nagpamidbid sa sainda na nagsasabi: “Dai kamo magmondo, dai man kamo manolsol kan pagpabakalan nindo sako digdi; huli ta sa pagsorog sa buhay ipinadara ako nin Dios digdi na magñenotan sa saindo.” Dangan hinadokan nia an gabos niang tugang asin nagtangis huli sa sainda.—Gen. 45:1, 5, 15.

¹⁷ Pagkagadan kan saindang ama na si Jacob, inisip kan mga tugang ni Jose na sia tibaad magbalos sa sainda. Mantang sinasabi ninda an saindang ikinakatakot sa saiya, si Jose ‘nagtangis’ asin suminimbag: “Dai kamo matakot: aatamanon ko kamo asin an saindong magña aki.” ‘Rinanga sinda’ kan mamomoton sa katoninongan na si Jose “asin pinakipagolayan sinda sa puso.”—Gen. 50:15-21.

 “Isinurat sa Pagtokdo Sato”

18, 19. (a) Paano kamo nakinabang sa pag-estudyar sa halimbawa kan mga parapatoninong na pinag-olayan sa artikulong ini? (b) Ano an pag-oolayan niato sa masunod na artikulo?

¹⁸ “An gabos na isinurat kaidto, isinurat sa pagtokdo sato,” an sabi ni Pablo, “tagñaning huli sa pakatagal asin sa karagñahan kan magña kasuratan, magkaigua kita nin paglaom.” (Roma 15:4) Paano kita nakinabang sa pag-estudyar bako sana sa pinakanangongorog na halimbawa ni Jehova kundi pati sa mga pagkasaysay sa Kasuratan dapit ki Abraham, Isaac, Jacob, asin Jose?

¹⁹ Bako daw na an mapagpahalagang paghorophorop sa ginibo ni Jehova, tanganing mapakarhay an naraot na relasyon nia sa makasalan na katawohan, nagpapahiro sa sato na gibohon an pinakamakakaya niato tanganing padagos na makipagkatoninongan sa iba? An mga halimbawa ni Abraham, Isaac, Jacob, asin Jose nagpapaheling na an mga magurang puedeng magkaigwa nin marahay na impluwensia sa saindang mga aki. Dugang pa, ipinapaheling man kan mga pagkasaysay na ini na binebendisyonan ni Jehova an paghihingoa kan mga nagmamaigot na makipagkatoninongan. Bakong makangangalas na inapod ni Pablo si Jehova na ‘an Dios nin katoninongan’! (Basahon an Roma 15:33; 16:20.) Pag-oolayan sa masunod na artikulo kun taano ta idinoon ni Pablo an pangangaipo na kita padagos na makipagkatoninongan asin kun paano kita magigin mga parapatoninong.

Ano an Nanodan Nindo?

• Paano nakipagkatoninongan si Jacob kan sia makikipagtagboan na ki Esau?

• Ano an epekto sa saindo kan ginibo ni Jehova tanganing an katawohan magkaigwa nin matoninong na relasyon sa saiya?

• Ano an nanodan nindo sa halimbawa kan mga parapatoninong na si Abraham, Isaac, Jacob, asin Jose?

[Mga Hapot Para sa Pag-adal]

[Ritrato sa pahina 23]

Ano an pinakamahalagang lakdang na ginibo ni Jacob tanganing makipagkatoninongan ki Esau?