Maaarog Mo daw si Finehas Kun Napapaatubang Ka sa mga Kadepisilan?

MAHALAGANG marhay na pribilehio an maglingkod bilang magurang sa kongregasyon. Minsan siring, rinerekonoser kan Tataramon nin Dios na an kamagurangan napapaatubang sa mga kadepisilan. May beses na kaipuhan sindang magkapot nin mga kaso nin pagkakasala na sinda an ‘mahatol kasalihid ni Jehova.’ (2 Cron. 19:6) O an sarong paraataman tibaad tawan nin asignasyon na sa pagmate nia bako siang andam para dian, arog ki Moises, na may kahoyoan na naghapot mapadapit sa sarong asignasyon: “Siisay ako ta gñaning dumuman ki Faraon?”—Ex. 3:11.

An Kasuratan, na isinurat sa paggiya kan iyo man sanang aktibong puersa na nagnonombra sa kamagurangan, nagtatao nin buhay na halimbawa nin mga paraataman na mapangganang inatubang an mga kadepisilan. Si Finehas aki ni Eleazar asin makoapo ni Aaron kaya sia magigin halangkaw na saserdote pag-abot nin panahon. Idinodoon kan tolong pangyayari sa saiyang buhay na kaipuhan kan kamagurangan ngonyan na atubangon an mga kadepisilan na may kosog nin boot, pakarorop, asin pagsarig ki Jehova.

‘Sia Tuminindog’ Tolos

Si Finehas hoben pa kan magkampo an mga Israelita sa Kapatagan nin Moab. An Biblia nagsasabi: “An banuaan nagpoon nin pagguibo nin marigsok sa magña aking babae sa Moab. . . . Asin an banuaan nagkakan, asin naghorohod sa saindang magña dios.” (Bil. 25:1, 2) Pinadusahan ni Jehova nin nakakagadan na damat an mga nagkasala. Naiimahinar mo daw kun ano an siertong nagin epekto ki Finehas kan baretang ini nin pagkakasala asin kan ibinungang damat huli kaini?

“Uya,” an pagpapadagos kan pagkasaysay, “an sarong lalaki sa magña aki ni Israel ominabot asin nagdara nin sarong babaeng [Midianita] sa saiyang magña tugang, sa magña mata ni Moises asin sa bilog na kasararoan kan magña aki ni Israel, na naghihiribi sinda sa tata kan tabernaculo kan pagpatotoo.” (Bil. 25:6) Ano an gigibohon kan saserdoteng si Finehas? Sia medyo hoben pa, asin an nagkasalang Israelita sarong prinsipe na nangengenot sa pagsamba kan banwaan.—Bil. 25:14.

Alagad si Finehas may pagkatakot ki Jehova, bako sa mga tawo. Kan maheling nia an duwa, tolos siang nagkua nin budyak asin sinundan an lalaki sa laog kan tolda saka binudyak sindang duwa. Paano minansay ni Jehova an kosog nin boot asin determinasyon ni Finehas? Tolos-tolos na pinapondo ni Jehova an damat asin tinawan si Finehas nin balos na sarong tipan na an pagkasaserdote magdadanay sa saiyang linahe “sagkod sa panahon na daing talaan [NW].”—Bil. 25:7-13.

Siempre, an Kristianong kamagurangan ngonyan dai man nagigin madahas. Alagad arog ni Finehas, sinda dapat andam na magin determinado asin makosog an boot. Halimbawa, si Guilherme pirang bulan pa sanang magurang sa kongregasyon kan sia papaglingkodon bilang miembro nin hudisyal na komite. An nagkasala sarong magurang sa kongregasyon na nagtabang ki Guilherme kan sia hoben pa. “Nag-aalangan ako sa katongdan na iyan,” an sabi nia. “Nadepisilan akong magtorog sa banggi. Paorootro kong iniisip an mga paagi kun paano kakapotan an kasong ini na dai naaapektaran kan sakong emosyon an espirituwal na paghusgar ko. Namibi ako nin nagkapirang  aldaw asin nagsiyasat sa mga publikasyon na basado sa Biblia.” Nakatabang ini sa saiya na magkaigwa nin kosog nin boot na kaipuhan tanganing atubangon an pambihirang situwasyon na ini asin magtao nin espirituwal na tabang sa kapwa tugang na nagkasala.—1 Tim. 4:11, 12.

An kamagurangan nagigin halimbawa nin pagtubod asin kaimbodan paagi sa paghiro na may kosog nin boot asin determinasyon kun may mga situwasyon sa kongregasyon na nagkakaipo kaiyan. Siempre, an ibang Kristiano kaipuhan man na humiro na may kosog nin boot, na isinusumbong an magabat na pagkakasala na tibaad naaraman ninda. Kaagid kaiyan, kaipuhan an kaimbodan tanganing pondohon an pakikiasosyar sa sarong katood o paryente na natiwalag.—1 Cor. 5:11-13.

Nalilikayan an Komplikadong Problema Paagi sa Pakarorop

An kosog nin boot ni Finehas bako man kapusokan nin pagkahoben. Isip-isipa kun paano sia nagpaheling nin pakarorop—paghiro na may marahay na paghusgar asin pakamansay—kan madangog nia an saro pang sumbong. An mga tribo ni Ruben asin Gad patin an kabangang tribo ni Manases naggibo nin altar harani sa Salog nin Jordan. Nagkongklusyon an ibang Israelita na idto para sa falsong pagsamba kaya sinda nag-andam na maglansar nin aksion militar.—Jos. 22:11, 12.

Ano an nagin reaksion ni Finehas? Kaiba an mga prinsipeng Israelita, naggamit si Finehas nin marahay na paghusgar kan ipakipag-olay an bagay na ini sa mga naggibo kan altar. Lininaw kan inaakusaran na mga tribo an situwasyon, na ipinapaliwanag na sa katunayan idto sarong altar para sa “paglingkod ki Jehova.” Sa siring, nalikayan an komplikadong problema.—Jos. 22:13-34.

Kun an sarong Kristiano makadangog nin akusasyon o negatibong bagay dapit sa sarong kapwa lingkod ni Jehova, madonong nanggad na arogon si Finehas! Pinupugolan kita nin pakarorop na maanggot o ihayag an daing kabootan na mga obserbasyon dapit sa satong mga tugang.—Tal. 19:11.

Paano an pakarorop makakatabang sa kamagurangan na humiro arog ni Finehas? “Kun an sarong parahayag magpoon na magsabi dapit sa personal na dai pagkakaoyon nia asin nin saro pang indibiduwal,” an sabi ni Jaime, na labi nang sampulong taon na magurang sa kongregasyon, “inaarang ko tolos ki Jehova na logod tabangan akong dai magkampi kundi magtao nin sono sa Kasuratan na paggiya. Sarong beses, dinolok ako nin sarong sister manongod sa personal na problema nia mapadapit sa nagin pagtratar sa saiya nin sarong may paninimbagan na brother sa ibang kongregasyon. Huling dayupot na amigo ko an brother na iyan, pasil sana kuta sa sako na makipag-olay sa saiya. Imbes, pinag-olayan mi kan sister an nagkapirang prinsipyo sa Biblia. Enot sa gabos, sia uminoyon na sia mismo an makipag-olay sa brother. (Mat. 5:23, 24) Dai tolos-tolos na naibalik an matoninong na relasyon ninda. Kaya sinadol ko siang estudyaran an iba pang sono sa Kasuratan na mga prinsipyo. Sia nagdesisyon na ipamibi giraray an situwasyon asin nagmaigot na magpatawad.”

Ano an nagin resulta? “Pakalihis nin nagkapirang bulan,” an nagigirumdoman ni Jaime, “dinolok ako kan sister. Ipinaliwanag nia na dai  naghaloy pinagbasolan kan brother an sinabi nia. Iinareglar nia na makaibanan sa ministeryo an sister asin ipinahayag nia an apresasyon sa saiya. Naresolberan an problema. Magkakaigwa daw nin mas marahay na resulta kun ako, na tibaad ibilang na may kinakampihan, biyong nakilabot sa dai pagkakaoyon?” An Biblia naghahatol: “Dai ka maghidali na mag-asunto.” (Tal. 25:8, NW) Madonong na dinadagka kan may pakarorop na kamagurangan an mga Kristiano, na igwa nin personal na dai pagkakaoyon, na iaplikar an sono sa Kasuratan na mga prinsipyo tanganing padagos na magkaigwa nin katoninongan.

Sia Naghapot ki Jehova

Nagkapribilehio si Finehas na maglingkod bilang saserdote para sa piniling banwaan nin Dios. Arog kan nasambitan na, sia may pambihirang kosog nin boot asin pakarorop, dawa kan sia medyo hoben pa. Minsan siring, an saiyang kapangganahan sa pag-atubang sa mga kadepisilan nakadepende sa pagtitiwala ki Jehova.

Pagkatapos na makaturotristeng lupigan asin gadanon kan mga lalaking taga Gibea, kan tribo ni Benjamin, an sekondaryong agom nin sarong Levita, nag-andam an ibang tribo tanganing makigiera sa mga Benjamita. (Hok. 20:1-11) Namibi sinda para sa tabang ni Jehova bago makilaban, alagad duwang beses sindang nadaog, na dakol an nagadan sa sainda. (Hok. 20:14-25) Makongklusyon daw sinda na bakong epektibo an mga pamibi ninda? Interesado daw talaga si Jehova na maheling an pag-aksion ninda sa ginibong kasalan?

Nangenot giraray si Finehas, na dai nagluluya an kompiansa asin ngonyan halangkaw na saserdote na kan Israel. “Mabalik akong lumuas sa pakipaglaban na tumang sa magña aki ni Benjamin na sakuyang tugang na lalaki, o dai ako maghihiro?” an pamibi nia. Bilang simbag, tinabangan sinda ni Jehova na daogon an mga Benjamita, dangan biyo nindang sinolo an Gibea.—Hok. 20:27-48.

Anong leksion an puede tang manodan digdi? An nagkapirang problema sa laog kan kongregasyon nagdadanay pa man giraray sa ibong kan maigot na paghihingoa asin pamimibi kan kamagurangan para sa tabang nin Dios. Kun mangyari ini, marahay na girumdomon kan kamagurangan an sinabi ni Jesus: “Hagad [“padagos kamong maghagad” (NW) o mamibi], asin itatao saindo; hanap, asin makakakua kamo; toktok, asin bubukason saindo.” (Luc. 11:9) Dawa kun an simbag sa pamibi garo baga naaatraso, makakasierto an mga paraataman na sisimbagon iyan ni Jehova sa itinalaan niang panahon.

Halimbawa, sarong kongregasyon sa Ireland an nangangaipong marhay nin Kingdom Hall, alagad dai sinda tinotogotan kan lokal na opisyal sa pagplano (planning officer). Dai nia inaprobaran an gabos na plano para sa lugar na totogdokan kan mga tugang. Garo baga mayo nang ibang autoridad na puedeng mag-aprobar kan mga plano kundi an pangenot (chief) na opisyal sa pagplano para sa bilog na distrito. Makakatabang daw an pamibi, arog kan panahon ni Finehas?

Isinaysay nin sarong lokal na magurang sa kongregasyon: “Pagkatapos nin kadakol na pamimibi asin pagngayongayo, nagbiahe kami pasiring sa prinsipal na opisina sa pagplano. Sinabihan ako na tibaad dakol pang semana bago mi makaolay an pangenot na opisyal. Minsan siring, nahimo ming makaolay sia nin singko minutos. Kan maheling nia an bagong kopya kan mga plano, tinawan nia tolos kami nin permiso na magtogdok, asin poon kaidto nagmaigot na an lokal na opisyal sa pagplano na tabangan kami. Idinoon sa samo kan eksperyensiang iyan an puersa nin pamibi.” Iyo, sisimbagon ni Jehova an sinserong mga pamibi nin kamagurangan na nagsasarig sa saiya.

May magabat na paninimbagan si Finehas sa suanoy na Israel; pero, paagi sa kosog nin boot, pakarorop, asin pagsarig sa Dios, napangganahan nia an mga kadepisilan. Asin inoyonan ni Jehova an maigot na pag-asikaso ni Finehas sa kongregasyon nin Dios. Pakalihis nin mga 1,000 taon, pinasabngan si Esdras na magsurat: “Si [Finehas] na aking lalaki ni Eleazar naguin kaidto capitan sa sainda, kan idtoon saiya si Jehova.” (1 Cron. 9:20) Logod na magin totoo man iyan ngonyan sa gabos na nangengenot sa banwaan nin Dios, patin sa gabos na Kristiano na maimbod na naglilingkod sa saiya.